I Alii Agavaa Uma o le Ekalesia, saunia e Emma Allebes

6–12 Tesema

O Mataupu Faavae o le Faatuatua ma Folafolaga Aloaia 1 ma le 2

“Matou te Talitonu”

A o outou suesue i Mataupu Faavae o le Faatuatua ma Folafolaga Aloaia 1 ma le 2, mafaufau i o latou aafiaga sa i ai i le Ekalesia. O le a se mea ua faagaeetia ai oe e uiga i upumoni ua latou aoao mai?

Tusifaamaumau Ou Lagona Uunai

I le 200 tausaga talu mai le Uluai Faaaliga a Iosefa Samita, o loo faaauau pea ona tuuina mai e le Atua “faaaliga e faaopoopo i luga o lea faaaliga, lea malamalama e faaopoopo i luga o lea malamalama” i taitai o Lana Ekalesia (Mataupu Faavae ma Feagaiga 42:61). I nisi o tulaga, o lena faaaliga na faatonuina ai taitai o le Ekalesia e faia ni suiga i aiaiga ma faiga faavae a le Ekalesia, “e tusa ai ma le finagalo o le Alii, i le faatatau o ona alofa mutimutivale e tusa ma tulaga o le fanauga a tagata” (Mataupu Faavae ma Feagaiga 46:15). O Folafolaga Aloaia 1 ma le 2 ua faaalia ai lenei ituaiga o faaaliga—o le tasi na taitai atu ai i le faamutaina o le faiga o faaipoipoga autaunonofo, ma le isi na maua ai e tagata o ituaiga uma faamanuiaga o le perisitua, e aofia ai ma faamanuiaga o le malumalu. O suiga faapenei o vaega ia o le uiga o le i ai o se “ekalesia moni ma ola” (Mataupu Faavae ma Feagaiga 1:30), faatasi ai ma se perofeta moni ma soifua.

Ae o loo i ai foi mea e le suia—o upumoni faavavau, faaleaoaoga faavae. Ma o nisi taimi o le faamoemoega o faaaliga o le tuuina mai lea o le malamalama faaopoopo i luga o nei upumoni, e fesoasoani ia manino atili ai la tatou vaai i ai. O Mataupu Faavae o le Faatuatua—o faamatalaga pupuu e 13 a Iosefa Samita o mea e talitonu i ai le Au Paia o Aso e Gata Ai—e foliga mai ua faataunuu ai lenei faamoemoega o le faamaninoga. O ituaiga faaaliga uma ia ua taiala ma manuia ai le Ekalesia, o se Ekalesia ua mausali ona faavaeina i luga o upumoni e faavavau ae e mafai ona tuputupu ae ma suia a o faateleina e le Alii lo tatou malamalamaaga e fesoasoani tatou te fetaiai ai ma luitau o aso nei. I se isi faaupuga, “Matou te talitonu i mea uma na faaali mai e le Atua, mea uma ua Ia faaali mai nei, ma matou te talitonu foi o le a Ia faaali mai le tele o mea silisili ma le tāua tau i le Malo o le Atua i le lumanai” (Mataupu Faavae o le Faatuatua 1:9).

Manatu mo Suesuega Faaletagata Lava Ia o Tusitusiga Paia

O Mataupu Faavae o le Faatuatua

O Mataupu Faavae o le Faatuatua o loo i ai upumoni faaleaoaoga faavae o le talalelei toefuataiina.

O se tasi o auala e mafai ona outou suesuea ai Mataupu Faavae o le Faatuatua o le lisi lea o upumoni o loo maua i mataupu faavae taitasi o le faatuatua, ona sue lea o mau e faatatau i nei upumoni. E faapefea ona faatamaoaiga e nei mau lou malamalama i upumoni o loo i le Mataupu Faavae o le Faatuatua?

Tagai foi Taiala i Tusitusiga Paia, “Mataupu Faavae o le Faatuatua,” scriptures.ChurchofJesusChrist.org; L. Tom Perry, “O Aoaoga Faavae ma Mataupu Faavae o Loo i Ai i Mataupu Faavae o le Faatuatua,” Ensign po o le Liahona, Nov. 2013, 46–48; “Mataupu 38: O Le Tusi a Wentworth,” i le Aoaoga a Peresitene o le Ekalesia: Iosefa Samita, 435–47.

Mataupu Faavae o le Faatuatua 1:9; Folafolaga Aloaia 1 ma le 2

O le Ekalesia a Iesu Keriso ua taialaina i faaaliga.

“Matou te talitonu foi o le a faaali mai [e le Atua] le tele o mea silisili ma le tāua tau i le Malo o le Atua ” (Mataupu Faavae o le Faatuatua 1:9), e tusa lava pe o na mea e sui ai aiaiga ma faiga faavae o le Ekalesia. Faatasi ai ma lenei mataupu faavae i le mafaufau, iloilo le Folafolaga Aloaia 1 ma le 2, ma vaavaai mo upu ma fuaitau e faamalosia ai lou faatuatua i faaaliga faifaipea. O a isi faataitaiga o faaaliga faifaipea i le perofeta a le Alii e mafai ona e mafaufau i ai? O faapefea ona aafia ai lou olaga i nei faaaliga? O faapefea ona faaalualuina ai i luma le galuega o le malo o le Tama Faalelagi?

Tagai foi Amosa 3:7; 2 Nifae 28:30.

Folafolaga Aloaia 1

E ao lava ona agai i luma le galuega a le Atua.

I le “Excerpts from Three Addresses na saunia e Peresitene Uilitofi Uitilafi e faatatau i Manifeso” (i le faaiuga o le Folafolaga Aloaia 1), o a mafuaaga na tuuina mai e le perofeta mo le faamutaina e le Alii o faaipoipoga autaunonofo? O le a se mea ua aoao ai oe e lenei mea e uiga i le galuega a le Atua?

Mo nisi faamatalaga e uiga i tulaga faaletalafaasolopito o le Folafolaga Aloaia 1, tagai “The Messenger and the Manifesto” (Revelations in Context, 323–31) ma le “Faaipoipoga Autaunonofo ma Aiga i Iuta Anamua” (Autu o le Talalelei, topics.ChurchofJesusChrist.org).

Uilifoti Uitilafi, saunia e H. E. Peterson

Folafolaga Aloaia 2

E mafai ona tatou faalagolago i le Alii, e tusa lava pe le o i ai so tatou malamalamaaga atoatoa.

Ua aoao i tatou e tusitusiga paia ia faalagolago i le Alii (tagai Faataoto 3:5), ma o le mea lena na faia e le toatele o tagata o le Ekalesia e tupuga mai Aferika ina ua taofia e le Ekalesia faauuga o le perisitua ma sauniga o le malumalu mai ia i latou. E ui ina sa latou le’i malamalama i le pogai na i ai lenei aiaiga faavae—ma masani ona lagona le tiga i faamalamalamaga na aoaoina atu i lena taimi, ia ua faapea ona teena e le Ekalesia i aso nei—e toatele tagata tuuto o le Ekalesia e i ai tupuaga Aferika na faalagolago i le Alii ma tumau faamaoni i o latou soifuaga atoa. A o e faitau i le Folafolaga Aloaia 2, mafaufau loloto pe na faapefea ona e aoao e faalagolago i le Alii e tusa lava pe e te le malamalama atoatoa i ai.

O le aoao ai e uiga i le faatuatua o tagata uli o le Ekalesia e mafai ona musuia ai oe. O nisi nei o a latou tala, o loo maua i le history.ChurchofJesusChrist.org:

• “Jane Elizabeth Manning James” (Autu o le Talafaasolopito o le Ekalesia)

• “In My Father’s House Are Many Mansions” (tala ia Green Flake)

• “You Have Come at Last” (tala ia Anthony Obinna)

• “Break the Soil of Bitterness” (tala ia Julia Mavimbela)

• “I Will Take It in Faith” (tala ia George Rickford)

Tagai foi “Witnessing the Faithfulness,” Revelations in Context, 332–41; Autu o le Talalelei, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” vaega 1–4, history.ChurchofJesusChrist.org; BeOne.ChurchofJesusChrist.org.

Manatu mo Suesuega Faaleaiga o Tusitusiga Paia ma Afiafi Faaleaiga

O Mataupu Faavae o le Faatuatua.Mafaufau pe faapefea ona fatufatu e lou aiga ni “tama’i lesona” mo Mataupu Faavae o le Faatuatua. Mo se faataitaiga, i le vaiaso atoa, e mafai e tagata taitoatasi o le aiga ona filifili se mataupu faavae [o le faatuatua] se tasi ma su’e mau, ata, viiga, po o pese a tamaiti e faatatau i ai, pe faasoa se aafiaga patino.

Pe e mafai ona auaua’i tagata o le aiga e fesili atu i le tasi ma le isi i ni fesili e uiga i le Ekalesia ma o tatou talitonuga ona tali lea o na fesili i se mataupu faavae o le faatuatua.

Folafolaga Aloaia 1 ma le 2.O Folafolaga Aloaia 1 ma le 2 e fesoasoani tatou te malamalama ai i matafaioi o faaaliga i ona po nei i le Ekalesia. A o faitau faatasi e lou aiga, mafaufau e talanoa i auala e taitai ai e perofeta i tatou “e ala i musumusuga a le Atua Malosi Aoao” (Folafolaga Aloaia 1). E faapefea ona faamalosia e nei folafolaga e lua o tatou faatuatua i se Atua soifua o le e taialaina patino Lana Ekalesia? O faapefea ona tatou vaaia Lona aao i le galuega o le Ekalesia i ona po nei? Atonu e te filifili e sailiili faatasi nisi o punaoa o loo i luga a’e i “Manatu mo le Suesuega Faaletagata Lava Ia o Tusitusiga Paia.”

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Tausi Poloaiga,” Tusipese a Tamaiti, 68–69.

Faaleleia o Lo Tatou Aoao Atu

Tulitatao ia valaaulia e faatino. “A e tulitatao atu i se valaaulia e faatino, e te faaali atu i tagata aoao e te popole mo i latou ma pe faapefea e le talalelei ona faamanuia o latou olaga. E te tuu atu foi ia i latou ni avanoa e faasoa ai o latou aafiaga” (Aoao Atu i le Ala a le Alii, 35).