13–19 Tesema

O Le Aiga: O Se Folafolaga i le Lalolagi

“O Le Aiga e Totonugalemu i le Fuafuaga a le Foafoa”

Na saunoa Peresitene Dallin H, Oaks: “Ou te talitonu o o tatou uiga e faatatau i le folafolaga i le aiga ma lona faaaogaina o [se tofotofoga] lea mo lenei tupulaga. Ou te tatalo mo tagata uma o le Au Paia o Aso e Gata Ai ia tutu mausali i lena tofotofoga” (“O Le Fuafuaga ma le Folafolaga,” Ensign po o le Liahona, Nov. 2017, 31). Mafaufau loloto i nei upu a o e suesue i le folafolaga i le vaiaso lenei.

Tusifaamaumau Ou Lagona Uunai

Ae tatou te lei fananau mai, sa avea i tatou ma vaega o se aiga—o le aiga a o tatou Matua Faalelagi. Ina ua oo i le taimi e tuua ai lo Laua afioaga, atonu sa faamafanafanaina le iloa e faapea, i luga o le fogaeleele, o le a avea ai foi aiga ma se vaega o le fuafuaga a le Atua. O le mamanu i luga o le fogaeleele ua faamoemoe e mulimuli i le mamanu atoatoa i le lagi.

E leai ni faamautinoaga o le a avea aiga faalelalolagi ma ni aiga atoatoa pe faagaoioia foi. Ae e pei ona aoao mai Peresitene Henry B. Eyring, o aiga e “avatu i fanau a le Atua le avanoa silisili e talileleia ai i latou i le lalolagi i le alofa e tasi i le lalolagi lea e latalata atu i le mea na tatou lagonaina i le lagi—le alofa faamatua” (“Faapotopotoina o le Aiga o le Atua,” Ensign po o le Liahona, Me 2017, 20). O le iloaina o aiga e le atoatoa ma o le a oo i ai osofaiga mai le fili, na auina mai ai e le Atua Lona Alo Pele e togiola i tatou ma faamalolo o tatou aiga. Ma na Ia auina mai perofeta o aso e gata ai faatasi ma se folafolaga e puipuia ma faamalolosia ai aiga. Afai tatou te mulimuli i perofeta ma tuu atu le faatuatua i le Faaola, e ui ina le atoatoa aiga i le olaga nei i le avea ma ni aiga atoatoa faalelagi, ae o loo i ai le faamoemoe mo aiga—i luga o le fogaeleele ma i le lagi.

Manatu mo Suesuega Faaletagata Lava Ia o Tusitusiga Paia

“O le aiga e totonugalemu i le fuafuaga a le Foafoa.”

“O Le Aiga: O Se Folafolaga i le Lalolagi” ua manino lava e faatatau i aiga. Ae ua faapena foi ona faatatau i le fuafuaga a le Atua o le faaolataga. O se tasi o auala e suesue ai le folafolaga, o le vaai lea mo mea o loo aoao mai ai e uiga i le muai olaga, olaga faitino, ma le olaga pe a mavae le olaga nei. O a ni mea e te aoaoina pe a e suesue i le folafolaga i le ala lenei? E fesoasoani faapefea lenei mea ia te oe ia e malamalama i le pogai e taua ai le faaipoipoga ma le aiga i le fuafuaga a le Atua’?

Tagai foi Dallin H. Oaks, “O Le Fuafuaga ma le Folafolaga,” Ensign po o le Liahona, Nov. 2017, 28–31.

“E maua le fiafia i le olaga faaleaiga pe a faavae i aoaoga a le Alii o Iesu Keriso.”

Mafaufau i parakalafa ono ma le fitu o le folafolaga i le aiga o se mamanu mo le “fiafia i le olaga faaleaiga.” A o e faitau i nei parakalafa, faailoa mai mataupu faavae o le “o faaipoipoga ma aiga manuia.” Ona mafaufau lea i se sootaga faaleaiga e te manao e faamalosi. O le a se mea ua musuia oe e fai? O le a faapefea ona e faaaofia ai le Faaola i au taumafaiga?

Tagai foi Richard J. Maynes, “Faatulagaina o se Aiga e Faatutotonu ai Keriso,” Ensign po o le Liahona, Me 2011, 37–39; vitio “What Matters Most,” ChurchofJesusChrist.org.

O le a ou “tali atu i le Atua” mo le ala ou te faia ai lo’u aiga.

I O le folafolaga i le aiga o loo i ai faamanuiaga ofoofogia ua folafola mai e le Tama Faalelagi mo i latou o e mulimuli i Lana fautuaga. O loo i ai foi lapataiga malolosi mo i latou e le mulimuli ai. Mafaufau e fai se lisi o faamanuiaga ma lapataiga e te maua.

O faapefea ona e faatinoa le fautuaga a le Atua o loo i le folafolaga? Afai e te tu i luma o le Atua i le asō, o le a se mea o le a e lototele e talanoaina ma Ia e uiga i au sootaga faaleaiga? O le a se mea e manaomia ona e faaleleia?

Tagai foi Alema 5:15–22; Mataupu Faavae ma Feagaiga 42:22–25; 93:39–44.

E tatau i matua ona tausia a latou fanau i le alofa ma le amiotonu.

E mafai ona ou maua faamanuiaga folafolaina pe afai e le atoatoa tulaga o lo’u aiga?

Ua aoao mai Elder D. Todd Christofferson: “Ina ia tautino atu ia upumoni faavae e faatatau i le faaipoipoga ma le aiga, e le o faaseloa ai le vaai pe tuuitiitia ai osigataulaga ma manuia o i latou e le i afea le tulaga lea i le taimi nei. … E tofu tagata uma ma meaalofa; e tofu tagata uma ma taleni; e mafai e tagata uma ona saofaga i le tatalaina mai o le fuafuaga paia i tupulaga taitasi. E tele mea e lelei, e tele mea e manaomia—o nisi lava taimi o mea uma e tatau ai mo le taimi nei—e mafai ona ausia i tulaga faatauvaa. … Faatasi ai ma le mautinoa tatou te molimau atu o le Togiola a Iesu Keriso ua faamoemoeina, ma, i le iuga, o le a tauia ai mea uma na le’i mauaina, ma le toilalo o i latou na liliu atu ia te Ia. E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau” (“Aisea e Faaipoipo Ai, Aisea e Fai ai se Aiga,” Ensign po o le Liahona, Me 2015, 52).

Manatu mo Suesuega Faaleaiga o Tusitusiga Paia ma Afiafi Faaleaiga

“O le tulaga tane po o le fafine o le tagata o se vaega taua lea o le muai olaga, olaga faitino, ma le faasinomaga e faavavau ma le faamoemoega.”Afai o le a fesoasoani mo lou aiga le talanoa i aoaoga faavae e faatatau i itupa ma le tosina atu i le itupa tutusa, atonu o le a fesoasoani atu punaoa nei: Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25–28; Autu o le Talalelei, “Tosina Atu i le Itupa Tutusa,” topics.ChurchofJesusChrist.org.

“O le fuafuaga paia o le fiafia.”Ina ia fesoasoani i lou aiga ia iloa le taua o aiga i le fuafuaga a le Tama Faalelagi, atonu e te tusia le olaga i le muai olaga, olaga faitino, ma le olaga pe a mavae le oti i luga o ni vaega se tolu o se pepa. Ia suesue faatasi i le folafolaga, ma tusi i le pepa mea tou te aoaoina e uiga i nei vaega taitasi o le fuafuaga a le Atua. Aisea e taua tele ai aiga i le Atua?

“E [mafai] ona toe faatasia aiga e faavavau.”E mafai foi ona outou matamata i le vitio “Plan of Salvation—We’re Still a Family” (ChurchofJesusChrist.org). Saili i le o le folafolaga i le aiga mo upumoni na malamalama i ai le alii talavou o loo i le vitio, ma sa fesoasoani e maua ai lona faatuatua.

“Fiafia i le olaga faaleaiga.”Ina ia talanoa pe faapefea ona maua le tele o le “fiafia i [lou] olaga faaleaiga,” e mafai ona outou usuina faatasi se pese e uiga i aiga, e pei o le “O Se Lagi se Aiga” (Viiga, nu. 179 ). O le a se mea tatou te aoao mai i le pese ma mai le o le aiga o se folafolaga o le a aumaia ai le fiafia atili i lo tatou aiga? E mafai faapefea ona tatou mautinoa o lo tatou aiga o loo “faavae i aoaoga a le Alii o Iesu Keriso”? Mafaufau e filifili se aoaoga se tasi e te manao e galue i ai i lenei vaiaso.

“Faamalosia le aiga o se iunite faavae o malo.”O faapefea ona taumafai Satani e faavaivaia aiga i le lalolagi? E faapefea ona tatou faia la tatou vaega ia faamalolosia aiga? Mo manatu, tagai i le savali a Sister Bonnie L. Oscarson “O Tagata e Puipuia le Folafolaga o le Aiga” (Ensign po o le Liahona, Me 2015, 14–17).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Se Lagi se Aiga,” Viiga, nu. 179.

Faaleleia o Suesuega Faaletagata Lava ia

Mauaina o le alofa o le Atua. Ua aoao mai Peresitene M.Russell Ballard, “[O le] talalelei o se talalelei o le alofa—alofa i le Atua ma le alofa i le tasi ma le isi” (“God’s Love for His Children,” Ensign, Me 1988, 59). A o e faitau i le o le folafolaga i le aiga, mafaufau e maitau pe faailoga faamaoniga o le alofa o le Atua e faapitoa ona anoa ia te oe.