Nativity in Copper and Umber, saunia e J. Kirk Richards

20–26 Tesema

Kerisimasi

O Le Meaalofa Lē Mafaatusalia o le Alo Paia o le Atua

O se tasi o auala e taulai atu ai ou mafaufauga i le Faaola i lenei Kerisimasi o le suesue lea o le “O Le Keriso Soifua: O Le Molimau a le Au Aposetolo.” O le otootoga lenei ua fautuaina atu ai auala e mafai ona e faia ai lenei molimau faaperofeta o se vaega o au suesuega patino ma faaleaiga o le talalelei.

Tusifaamaumau Ou Lagona Uunai

I le 1838, na tautino mai ai e le Perofeta o Iosefa Samita, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Peresitene o le Ekalesia: Iosefa Samita, 49). O tausaga mulimuli ane, na saunoa mai ai Peresitene Russell M. Nelson e faapea, “o le saunoaga patino lava lenei a le Perofeta na maua ai se uunaiga mo perofeta, tagatavaai, ma talifaaaliga e toa 15 ia tuuina mai ma sainia la latou molimau e faamanatu ai le 2,000 tausaga o le soifua mai o le Alii. O lea molimau iloga ua faaulutalaina ‘O Le Keriso Soifua.’ E toatele tagata o le ekalesia ua taulotoina ona upumoni. O isi e tau le iloaina o loo i ai. A o e saili e aoao atili e uiga ia Iesu Keriso, ou te uunaia oe e suesue i le ‘O Le Keriso Soifua’” (“Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 40).

I le avea ai ma Au Paia o Aso e Gata Ai, ua tatou olioli i faamanuiaga o faaaliga faifaipea e ala mai i perofeta ma aposetolo i ona po nei. Tatou te faafetai mo a latou saunoaga musuia o fautuaga, lapataiga, ma faamalosiauga. Ae o le mea sili lava, ua faamanuiaina i tatou i a latou molimau mamana e uiga ia Iesu Keriso—i le vaitau o le Kerisimasi ma le tausaga atoa. O nei saunoaga e sili atu nai lo na’o ni saunoaga musuia a tusitala atamamai po o failauga i tagata lautele po o ni malamalamaaga loloto mai polofesa o tusitusiga paia. O saunoaga a [perofeta ma aposetolo] ua filifilia, valaauina, ma faatagaina e le Atua o “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23).

Manatu mo Suesuega Faaletagata Lava Ia o Tusitusiga Paia

“E leai lava se isi ua i ai se aafiaga matua loloto na’uā.”

O a ni manatu e oo atu ia te oe a o e faitau i le Luka 2:10–11 faatasi ai ma le parakalafa muamua o le “O Le Keriso Soifua”? O le a sau tala e fai e lagolago ai le faamatalaga “e leai lava se isi ua i ai se faatosinaga matua loloto na’uā [e pei o Iesu Keriso] o i latou uma na soifua ma o le a soifua ai i luga o le fogaeleele”? Vaavaai mo upumoni i le “O Le Keriso Soifua” ua faamatala ai le faatosinaga matua loloto na’uā a le Faaola. Na faapefea ona Ia faatosinaina oe ma aumaia ia te oe le “olioli tele”?? (Luka 2:10).

“Na toe tu mai o Ia mai le tuugamau.”

I le “O Le Keriso Soifua,” o loo molimau mai ai le Au Aposetolo e uiga i le Toetu o le Faaola, ma ta’ua ai ni faailoaga faatolu o le Alii toetu (tagai i le parakalafa lima). Mafaufau e faitau e uiga i nei asiasiga i le Ioane 20–21; 3 Nifae 11–26; ma le Iosefa Samita—Talafaasolopito 1:14–20. O le a se mea ua e aoaoina e uiga i le Faaola mai Ana fetalaiga ma faatinoga i le taimi o nei faailoaga mai?

“Ua toefuataiina mai i le fogaeleele Lana perisitua ma Lana Ekalesia.”

I lau suesuega o le Mataupu Faavae ma Feagaiga i le tausaga lenei, sa e maua ai le avanoa e aoao atili ai e uiga i le ala na “toefuataiina mai ai le perisitua [a le Faaola] ma Lana Ekalesia.” O fea o nei upumoni po o mataupu faavae e faapitoa le anoa ia te oe? Mafaufau e toe faamanatu nisi o mau nei o loo aoao mai e uiga i le Toefuataiga: Mataupu Faavae ma Feagaiga 1:17–23; 13; 20:1–12; 65; 110; 112:30–32; 124:39–42; 128:19–21. Mafaufau loloto pe faapefea ona fesoasoani upumoni o le talalelei toefuataiga e te iloa ma tapuai ai ia Iesu Keriso (tagai Mataupu Faavae ma Feagaiga 93:19).

“O le a i ai se aso e toe afio mai ai o Ia i le lalolagi.”

O le Kerisimasi o se taimi e toe tepa ai i tua i le aso na soifua mai ai Iesu Keriso ma ia tulimatai atu ai i le aso o le a Ia toe afio mai ai. O a ni mea ua e aoaoina e uiga i Lona toe afio mai mai le parakalafa lona lua i le faaiuga o le “O Le Keriso Soifua”? Atonu foi e manaia le faitau, pesepese, pe faalogologo i viiga o le Kerisimasi o loo aoao mai e uiga i le Afio Mai Faalua, e pei o le “Le Lalolagi ia Fiafia” po o le “O se Itupo Maninoa Lava” (Viiga, nu. 113, 118).

“O Ia o le malamalama, o le ola, ma le faamoemoega o le lalolagi.”

I le parakalafa mulimuli o le “O Le Keriso Soifua,” ia maitau uiga auaumama ma faalagiga na tuuina mai mo le Faaola. O mau nei e mafai ona fesoasoani e te mafaufau loloto ai i le ala ua avea ai Iesu Keriso ma “le malamalama, o le ola, ma le faamoemoega o le lalolagi”: Luka 2:25–32; 1 Korinito 15:19–23; Moronae 7:41; Mataupu Faavae ma Feagaiga 50:24; 84:44–46; 93:7–10. E faapefea ona avea o Ia ma ou malamalama, ola ma le faamoemoe? O a isi uiga auaumama po o faalagiga o le Faaola e sili ona taua ia te oe?

O faapefea ona aafia lou faatuatua i le, ma le alofa mo le Faaola ona o le suesueina o le “O Le Keriso Soifua”?

Malamalama o le Lalolagi, saunia e Howard Lyon

Manatu mo Suesuega Faaleaiga o Tusitusiga Paia ma Afiafi Faaleaiga

“O Le Keriso Soifua.”Ina ia fesoasoani i lou aiga ia malamalama i upumoni o loo aoaoina e uiga i le Faaola i le “O Le Keriso Soifua,” e mafai ona e filifilia nisi o fuaitau autu ma galulue faatasi e su’e pe tusi ni ata e faaalia ai na fuaitau. Ona outou tuufaatasia lea o na ata ma fuaitau e fai ai se tusi.

“Matou te tuuina atu la matou molimau.”O le a se mea tatou te aoao mai i le “O Le Keriso Soifua” e uiga i le uiga o le tuuina atu o le molimau? Atonu e te manao e tusifaamaumau au molimau e uiga ia Keriso e faamanatu ai le soifua mai o le Faaola.

“Sa femaliuai o Ia ma agalelei.”E mafai faapefea e lou aiga ona ono mulimuli i le faataitaiga a le Faaola o le auauna atu i lenei Kerisimasi? O le a faapefea ona e faasalalau atu le “filemu ma le agalelei” i lou aiga ma lou nuu? E mafai faapefea ona e fesoasoani e aumaia le “faamalologa i e mama’i”? E mafai ona e maua ni manatu i nisi o Christmas videos i luga o le polokalama o le Gospel Media po o le Gospel Media library (medialibrary.ChurchofJesusChrist.org).

“Ia faafetaia le Atua mo le meaalofa lē mafaatusalia o Lona Alo paia lea.”O a ni meaalofa ua tatou maua ona o Iesu Keriso? Atonu e mafai e tagata o le aiga ona maua tali i le “O Le Keriso Soifua” ona afifi faameaalofa lea o ni aitema ua faatusa i ai na meaalofa mai le Faaola. E mafai e lou aiga ona tatala meaalofa i le aso Kerisimasi pe i le aluga o le vaiaso ma faitau mau e faatatau i meaalofa taitasi. O nisi nei o mau, e ui atonu e maua e lou aiga nisi mau se tele: Luka 2:10–14; 1 Peteru 2:21; Mosaea 3:8; Alema 11:42–43; Mataupu Faavae ma Feagaiga 18:10–12. E mafai foi ona outou usuina se pese e uiga i le Faaola, e pei o le “Na Ia Auina Mai Lona Alo” (Tusipese a Tamaiti, 20–21), e su’e ai isi meaalofa e mai ia te Ia.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Sa Pepese! Mai Agelu,” Viiga, nu. 119.

Faaleleia o Suesuega Faaletagata Lava Ia

Taulai atu i le Faaola. “O le faitauina ma le agaga tatalo ‘O Le Keriso Soifua’ e pei lava o le faitauina o molimau a Mataio, Mareko, Luka, Ioane, ma perofeta o le Tusi a Mamona. O le a faateleina ai lou faatuatua i le Faaola ma fesoasoani ai ia te oe e faatumau lou taulaiga ia te Ia” (M. Russell Ballard, “Toe Foi Mai ma Maua,” Ensign po o le Liahona, Me 2017, 65).