atavali o Iosefa F. Samita

Uso Iosefa, saunia e David Lindsley

28 Novema

Na Faapefea Ona Fesoasoani Iosefa Samita e Faataunuu le Fuafuaga a le Tama Faalelagi?

Mataupu Faavae ma Feagaiga 135–136

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea e te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni mea e mafai ona tatou faia e fausia ai le lotogatasi i totonu o le korama po o tagata o le vasega? O a sini tatou te mananao e galulue faatasi i ai?

• O o tatou tiute po o matafaioi. O a mea o loo tatou faia e faasoa atu ai le talalelei? O a aafiaga ua tatou oo i ai i le faia o galuega o le malumalu ma talafaasolopito o aiga?

• O o tatou olaga. O faapefea ona tatou vaaia le aao o le Alii i o tatou olaga? O a mea ua musuiaina i tatou i ā tatou suesuega o tusitusiga paia i lenei vaiaso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

“O Iosefa Samita, le Perofeta ma le Tagatavāai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai” (Mataupu Faavae ma Feagaiga 135:3). O se faamatalaga malosi lea e uiga i le matafaioi a Iosefa Samita. Ua e mafaufau po o le a le uiga o lenei faʻamatalaga i lou olaga? E faapefea ona ese lou olaga pe ana faapea e le toefuataiina mai le talalelei a Iesu Keriso? O le a se mea e mafai ona e faia e fesoasoani ai i tagata o lau korama po o le vasega ia faamalosia a latou molimau i le misiona a Iosefa Samita?

Ao e sauni e aoao atu, e faaopoopo i le suesueina o le Mataupu Faavae ma Feagaiga 135, mafaufau e iloilo le “Iosefa Samita” i le Faamaoni i le Faatuatua ([2004], 89–90) ma le savali a Elder Neil L. Andersen “Iosefa Samita” (Liahona, Nov. 2014, 28–31).

se tamaitai talavou ma se alii talavou o loo faitauina le Tusi a Mamona

Ua faamanuiaina o tatou olaga e upumoni na toefuatai mai e ala i le Perofeta o Iosefa Samita.

Aoao Faatasi

Ina ia amataina se talanoaga e uiga i auala na fesoasoani ai Iosefa Samita e faataunuu le fuafuaga a le Tama Faalelagi, atonu e te amata i le toe iloiloina o mea na aoaoina e le korama po o le vasega e uiga i le Perofeta mai le faitauina o le Mataupu Faavae ma Feagaiga 135 i lenei vaiaso. Mo se faataitaiga, e mafai ona latou faia se lisi o upumoni ua latou iloa e uiga i le Faaola ma Lana talalelei ona o Iosefa Samita. Aisea e taua ai nei upumoni taitasi i le fuafuaga a le Tama Faalelagi? O gaoioiga nei e mafai ona fesoasoani i lau korama po o le vasega ia sili atu ona malamalama i le matafaioi a Iosefa Samita i le ata o le faaolataga.

• Ina ia fesoasoani i tagata o le korama po o le vasega ia saunia e fesoasoani i isi ia malamalama i le taua o le Perofeta o Iosefa, e mafai ona latou faitauina le “O le Toefuataiina o le Talalelei a Iesu Keriso e ala ia Iosefa Samita” i le mataupu e 3 o le Tala’i La’u Talalalei ([2019], 36–38). O le galulue i ni paga poʻo ni vaega toʻalaiti, e mafai ona latou iloa ai manatu e foliga taua e fefaasoaaʻi ma isi. Ona mafai lea ona latou faataitai le faasoaina atu o le aafiaga o Iosefa Samita i le tasi ma le isi i a latou lava upu. Fai atu ia i latou e mafaufau i mea latou te ono faia e faasoa atu ai le savali o le Toefuataiga. Masalo e mafai ona latou mafaufau i se tagata patino e mafai ona latou faʻasoaina atu i ai lenei savali. Atonu foi latou te naunau e faasoa atu ni aafiaga pe a latou fesoasoani i se tasi e aoao e uiga ia Iosefa Samita.

• Fai atu i tagata o le korama po o le vasega e mafaufau faapea, o se tasi o a latou uo i le lotu ua faapea mai, “Ou te le mautinoa e i ai saʻu molimau ia Iosefa Samita. E faapefea ona e iloa o ia o se perofeta?” E faapefea ona tatou tali atu? O le a se mea ua tatou aoaoina mai i le aafiaga a Iosefa Samita Iosefaa Samita--Talafaasolopito 1:8–19 e uiga i auala e mafai ai ona tatou maua pe faamalosia a tatou molimau? Fai atu i sui o le korama po o le vasega e fai se lisi o auala e faamalosia ai a latou molimau e uiga i le Perofeta o Iosefa Samita ma ia taitoatasi ona filifili se mea latou te mananao e fai i lenei vaiaso.

• Ina ia fesoasoani i tagata o le korama po o le vasega ia malamalama lelei i le galuega na faataunuuina e le Atua e ala mai ia Iosefa Samita, e mafai ona e valaaulia i latou e faitau itulau 48–53 o le Aoaoga a Peresitene o le Ekalesia: Gordon B. Hinckley (2016) pe matamata se tasi pe sili atu o vitio i “Punaoa Lagolago.” E mafai ona latou filifilia se tasi pe lua o aoaoga faavae ma faiga o loʻo tuʻuina atu i nei punaoa e sili ona taua ia i latou. E mafai ona latou faamatala pe aisea latou te faafetai ai na toefuatai e le Alii nei mea e ala mai ia Iosefa Samita. Atonu latou te fiafia foi e tusi se tusi e faailoa ai lo latou agaga faafetai mo le auala na fesoasoani ai le galuega a Iosefa Samita e faalatalata atu ai i latou i le Faaola. E mafai foi ona latou mafaufau loloto i mea e mafai ona latou faia e faaaoga atoatoa ai faamanuiaga na tuuina mai e le Alii e ala mai ia Iosefa Samita.

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Mataupu Faavae ma Feagaiga 35:17–18 (Na toefuatai mai e le Alii le atoatoaga o le talalelei, e ala mai i le Perofeta o Iosefa Samita)

• Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” Liahona, Nov. 2017, 60–63

• “Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples,” vitio, ChurchofJesusChrist.org

Aoao Atu i le Ala a le Faaola

Sa taulai atu le Faaola i le fesoasoani i e mulimuli ia te Ia ia ola i le talalelei ma o latou loto atoa. E faapefea ona e fesoasoani ia i latou o loo e aoaoina ia iloa pe faapefea ona aafia o latou olaga i aso taitasi i a latou molimau ia Iosefa Samita?