23 ni Janueri

Ena Vukei Au Vakacava na Turaga Me‘u Veiqaravi Vakalevu Cake Ena Yalodina?

Nai Vakatekivu 5Mosese 6

Veivakasalataki Vata

Me liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Mo qai liutaka e dua na veitalanoa me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro ka toka e ra se na nomu taro ga vakataki iko (raica na iVoladusidusi Raraba, 10.2, 11.2, ChurchofJesusChrist.org). Tu vakarau mo vakayacora na veika e sa veitalanoataki.

• Bulataka na kosipeli. Na cava so e sotavi wale tikoga oqo e sa vakaqaqacotaka na noda ivakadinadina?

• Nodra vukei o ira era gadreva tu na veivuke. O cei e gadreva na noda veivuke kei na masu? Na cava eda sa vakauqeti kina me da na vakayacora me ra vukei kina?

• Sureti na tamata kecega me ra ciqoma na kosipeli. E rawa vakacava me da na vu ni rarama kivei ira na lewe ni matavuvale se itokani ka ra sega ni duavata kei na noda vakabauta?

• Vakaduavatataki ni matavuvale ki na veigauna tawamudu. Eda na vakaraitaka vakacava na loloma kei na veitokoni levu cake ki na noda matavuvale ka vakayaco veisau vinaka ena noda itikotiko?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso era sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti a lokuci ena gauna ni bose.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

Ni sa ciqoma o Inoki na nona veikacivi me qarava na Turaga, a vakila ni sega ni ganiti koya (raica na Mosese 6:31). Ia e sega ni talai Inoki ga na Turaga me vakayacora na Nona cakacaka; A yalataka vei Inoki ni na taqomaki koya ka vukei koya (raica na Mosese 6:32–34).

E na rawa beka ni o sematavata na yalolailai nei Inoki ki na nomu sasaga vakataki iko mo veiqaravi. Eso na noda veiqaravi e yaco ena veikacivi ena Lotu. Ena so tale na gauna, eda na raica beka e dua na ka e gadrevi kina na veivukei ka da na vakauqeti vaka Yalo me da na vakaraitaka na noda loloma kei na veitokoni. Se cava na madigi e yaco mai, e rawa ni da yaloqaqa, me vakataki Inoki, ena noda kila ni na vukei keda na Turaga ni da ciqoma na Nona veisureti me da “lako vata kei au” (Mosese 6:34).

Ni o vakavakarau mo vakavulica na veivuke e rawa ni da ciqoma mai vua na Turaga ni da qaravi ira na tani, railesuva na Mosese 6 ka vakasamataka na veika o sa sotava ena nomu qaravi ira na tani. A vukei iko vakacava na Turaga ena nomu sasaga? Na cava o nuitaka ni ra na vulica na nomu kalasi se lewe ni kuoramu mai na ivakaraitaki nei Inoki kei ira tale eso? E rawa talega ni o wilika e dua vei ira na itukutuku oqo mai vei Peresitedi Henry B. Eyring: “Lako Vata kei Au” (Liahona, Me 2017, 82–85) se “Marama ni Veiyalayalati Veitokani kei na Kalou” (Liaona, Nove. 2019, 70–73).

E rawa ni da vakamuria na ivakaraitaki ni iVakabula ena veiqaravi me sa tiki ni noda bula ena veisiga.

Vulica Vata

Veiqaravi kivei ira na tani sa madigi vei keda me da “lako vata kei [na Kalou],” ka da na ciqoma na Nona veivuke ni da sa veiqaravi (Mosese 6:34). Me vukea na nodra na tekivu veitalanoa e na tikina oqo na lewe ni kalasi se kuoramu, sa rawa mo kerei ira me ra vakasaqara ena Mosese 6:32–39 na sala a tiko kina kei Inoki na Turaga ena nona veiqaravi. Ena vukei keda vakacava na Turaga ni da qaravi Koya? Na veivakasama eso oqo e rawa ni vukei iko mo liutaka e dua na veitalanoa me baleta na veivuke vakalou eda rawa ni ciqoma ni da qaravi ira na tani.

• Era vakasinaiti tu na ivolanikalou ena ivakavuvuli ni veiqaravi (raica na kena ivakaraitaki, Maciu 25:31–40; Luke 10:25–37; Mosaia 2:17). Nanuma mo sureti ira o vakavulica me ra wasea na veitiki ni ivolanikalou e vakauqeti ira me ra qaravi ira na tani. E rawa ni o kerei ira taumada me ra vakavakarau mai me ra wasea na veitiki ni ivolanikalou me baleta na veiqaravi se ivakaraitaki ni veiqaravi. Kevaka era gadreva na veivuke, vakayaloqaqataki ira me ra rai ki na “Veiqaravi” ena iDusidusi ki na iVolanikalou (scriptures.ChurchofJesusChrist.org). Na cava eda sa vakauqeti mai kina me da vakayacora ena vuku ni ka eda sa vulica?

• A qaravi ira na tani na iVakabula ena Nona gauna taucoko ni veiqaravi vakalotu. Na cava eda rawa ni vulica mai na Nona ivakaraitaki ka na rawa ni vukei keda ni da caka cala? Me saumi na taro oqo, sa rawa ki na lewe ni kalasi se kuoramu yadua me wilika e dua vei ira na ivolanikalou oqo, ka vakaraica e dua na ka e vakavulica na ivakaraitaki ni veiqaravi ni iVakabula: Maciu 14:13–21; Joni 9:1–11, 35–38; 13:4–5, 12–17; 3 Nifai 17:5–9. Sureti ira yadua me ra wasea na veika era raica. Solia na gauna vei ira me ra vakasamataka e dua e rawa ni ra qarava kei na sala era na muria kina na ivakaraitaki ni iVakabula ena nodra veiqaravi.

• Ena so na gauna eda nanuma ni veiqaravi e sa dua na ka levu ka kana gauna. Oqori beka e dua na vuna eda sega kina ni dau veiqaravi ena kena levu eda rawa ni rawata. E rawa ni o vakaraitaka ni iVakabula e dau veiqaravi kivei ira na tamata e raica o Koya ena nona bula e veisiga (raica, me kena ivakaraitaki, Maciu 12:9–13; Marika 5:21–34; Luke 19:1–10; Joni 4:3–26). Me vukei ira na lewe ni kalasi se kuoramu me ra vakasamataka na sala rawarawa eso e rawa ni ra qaravi ira kina na tani ena nodra bula e veisiga, e rawa ni o vakaraitaka e dua vei rau na vidio oqo: “When Ye Are in the Service—YM” se “When Ye Are in the Service—YW” (ChurchofJesusChrist.org). Sureti ira na itabagone me ra wasea na nodra vakasama. Na cakacaka lalai cava ni veiqaravi eda sa raica ni ra vakayacora tiko eso? Na cava eda sa vakauqeti kina me da cakava? Sureti ira yadua me ra vola na sala eso me vakacavari kina na veimalanivosa oqo: “Au rawa ni qaravi ira na tani ena ‑‑‑” kei na “au na vakasaqara na veivuke ni Turaga ena noqu sasaga me‘u veiqaravi ena noqu ‑‑‑” Qai kerea e vica me ra wasea na veika era sa vola.

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma ni kua. Kevaka era vinakata, me ra wasea na nodra vakasama. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• “Opportunities to Do Good,” “Teachings of Thomas S. Monson: Rescuing Those in Need” (vidio), ChurchofJesusChrist.org

• Bonnie L. Oscarson, “Na Gagadre sa Tu e Matada” (Liaona, Nove. 2017, 25–27)

Veivakavulici ena iVakarau ni iVakabula

“Me ikuri ni nodra vukei na lewe ni vuli mera vakila ka kila na Yalo, vukei ira mera na cakacakataka na veivakauqeti era ciqoma” (Veivakavulici ena Sala ni iVakabula [2016], 10).