13 ni Feperueri

Me da Dina Tikoga Vakacava ki Vua na iVakabula ena Dua na Vuravura ka Sinai e na Vei Ka Ca?

Nai Vakatekivu 12–17; Eparaama 1–2

Veivakasalataki Vata

Me liutaka e dua na mataveiliutaki ni kuoramu se kalasi; 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Qai liutaka e dua na veitalanoa me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro ka toka e ra se mai na nomu taro ga vakataki iko (raica na iVoladusidusi Raraba, 10.2, 11.2, ChurchofJesusChrist.org). Tuva na sala mo na vakayacora mai na veika e sa veitalanoataki.

• Bulataka na kosipeli. Eda sa toso voleka mai vakacava ki vua na iVakabula? Eda sa saga tiko vakacava me da vakataki Koya vakalevu cake?

• Nodra vukei o ira era gadreva tu na veivuke. O cei beka e sa tiko voli ena noda vakananu e na dua na gauna lekaleka oqo? Eda na vukei ira vakacava na tamata oqo?

• Sureti ira na tamata kecega me ra ciqoma na kosipeli. Eda na sauma vakacava na nodra vakatataro na noda itokani me baleta na Lotu ena sala e vakaqaqacotaka na nodra vakabauta na iVakabula?

• Vakaduavatataki ni matavuvale ki na veigauna tawamudu. Na cava na sala eso e rawa ni da sema vakavinaka cake kina ki vei ira na wekada, me vakataki ira na tubuda kei na tacida?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso e sa vakatavulici.

• Vakananuma vei ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se itabagone; 25-35 na miniti

Vakarautaki Iko Vakayalo

Na bula dodonu ena dua na vuravura caka ca e sega ni ka rawarawa. Vei Eparaama, na ibili me gole tani mai vua na Kalou e sega ni lako wale ga mai na vuravura e taudaku—na tamai Eparaama sara mada ga e a gole tani mai vua na Turaga (raica na Eparaama 1:5–12; 2:5). Erau sotava na dredre o Eparaama kei Sera, ia e rau a vakabauta na yalayala ni Turaga “ka sa vakauqeti rau, ka mokoti rau, ka vakatusa ni ratou sa vulagi ga ka veilakoyaki voli e vuravura” ( Iperiu11:13).

O na vukei ira vakacava na lewe ni kalasi se kuoramu me ra yalodina tikoga ni ra vakila ni ra “vulagi ga ka veilakoyaki voli” e vuravura baleta ni ra bulataka na ivakatagedegede ni Turaga? O na vakauqeti ira vakacava me ra yaloqaqa ni ra dinata tiko na Turaga? Ni o vakavakarau mo veivakavulici, navuca mo railesuva na Joni Joni 15:18–20 kei na itukutuku nei Elder Neil L. Andersen “Overcoming the World” (Liaona, Me 2017, 58–62).

Sa rawa vei ira na tisaipeli i Jisu Karisito me ra kune vakacegu ni ra bula voli ena yalodina se cava ga na veisaqasaqa.

Vulica Vata

Era a rairai vakauqeti na lewe ni nomu kalasi se kuoramu ena macawa oqo ni ra vulica tiko na ivakaraitaki nei Eparaama ena Nai Vakatekivu 12–17 kei na Eparaama 1–2. Sureti ira me ra railesuva na Eparaama 1:1–19 ka wasea na veika e vakauqeti ira me baleta na ivakaraitaki nei Eparaama. Na tautauvata cava eda raica ena veibolei a sotava ko Eparaama kei na bolebole eda sotava tiko edai? Digitaka e dua se sivia na itaviqaravi ka toka e ra me vakauqeta na veitalanoa me baleta na sala e rawa ni da yalodina tikoga kina vei Jisu Karisito ena veituvaki kecega.

• Sa dau vakamasuti ira wasoma na nona parofita na Turaga kei ira na Nona parofita me ra bula yalodina se cava ga na ca e wavoliti ira tu. Na cava eso na sala e temaki ira kina na itabagone o Setani me ra voroka kina na ivakaro ni Kalou ena noda gauna oqo? Sa rawa talega me ra wilika o ira o vakavulica eso na ivolanikalou ena “Supporting Resources.” Sureti ira me ra veitalanoataka na veika era sa vulica me baleta na dina tikoga vei Karisito ena gauna e temaki keda kina o vuravura me da vakayacora na kena veibasai se me vakalialiai keda. E rawa ni ra wasea na sala eso era sa kunea me ra yalodina tikoga kina ena gauna era sega ni vakakina o ira na tani. Na gauna cava eda a rawata kina o keda se so eda kila me da vakayacora kina na vei ka oqo? E rawa ni o vakaraitaka e dua se sivia na vidio e kune ena “iVurevure Veitokoni.”

• Me vukea na nomu kalasi se kuoramu me ra kila vinaka na sala me ra vorati vuravura kina ka ciqoma na veivakalougatataki e yaco mai ena kena vakayacori, vola e na papa na Vakadrukai vuravura e … kei na Vakadrukai vuravura e yaco kina na … Mo qai kerei ira na itabagone me ra railesuva na itukutuku nei Elder Neil L. Andersen “Vakadrukai Vuravura.” Sureti ira me ra vakasaqara na sala me vakacavari kina na veiyatuvosa oqo, vola na veika era sa vulica ena papa. Me veitalanoataki na veika era sa kunea. Sureta e dua me vakavakarau mai me mai wasea e dua na italanoa ka vakaraitaka na nona dina tikoga o Jisu Karisito vei Tamana dina ga ni tu na veisaqasaqa (raica, me kena ivakaraitaki, Maciu 4:1–11; Luke 22:39–44). Na cava e vukei keda kina na ivakaraitaki ni iVakabula me da kila vinaka kina na vakadrukai kei vuravura? (raica na Joni 16:33).

• O ira na tisaepeli i Jisu Karisito me ra “tiko i vuravura ia me ra kakua ni vakavuravura.” Mo “tiko e vuravura” e rawa ni kena ibalebale ni da sotava na veisaqasaqa ni da bulataka tiko na noda ivakatagedegede. Ia sa kena ibalebale talega me da vakauqeti ira na tamata me ra caka vinaka. Me vakavulici na ivakavuvuli oqo, sa rawa mo kerea e dua me vakarau mai me mai wasea ki na kalasi e dua se sivia na italanoa ena itukutuku nei Peresitedi Bonnie H. Cordon “That They May See” (Liaona, Me 2020, 78–80). Na cava eda vulica mai na vei italanoa oqo me baleta na vakayagataki ni noda rarama me vukei kina o ira na tani me ra toro voleka yani vei Jisu Karisito? Sureta na kalasi se kuoramu me ra vakasaqara na itukutuku nei Peresitedi Cordon me baleta na iyatuvosa e vakauqeti ira me ra rarama kivei ira tale eso ena dua na vuravura tawakilikili. Sureti ira me ra wilika i cake na nodra iyatuvosa ka wasea na veika era vakauqeti kina me ra na vakayacora.

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma nikua. Kevaka era vinakata, me ra wasea na nodra vakasama. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Maciu 5:14–16; 1 Nifai 15:23–25; Ilamani 5:12; Vunau kei na Veiyalayalati 10:5; 27:15–18; 87:8 (Na sala me da dina tikoga kina vei Jisu Karisito ena dua na vuravura tawakilikili)

• “Stand Ye in Holy Places—Bloom Where You‘re Planted,” “195 Dresses,” “Guided Safely Home” (vidio), ChurchofJesusChrist.org

Veivakavulici ena iVakarau ni iVakabula

A sureti Pita na iVakabula me vakadinadinataka ena nona tarogi koya ena dua na taro, “Ia dou sa kaya se ko cei koi au?” ( Maciu 16:15). Ni sauma o Pita, a vakaukauwataki na nona ivakadinadina. Na taro cava soti ena sureti ira o vakavulica me ra vakadinadinataka me rawa ni vakaqaqacotaka kina na Yalo na nodra ivakadinadina?