27 ni Feperueri

Na Cava e Bibi kina na Vakamau Tawamudu?

Nai Vakatekivu 24–27

Veivakasalataki Vata

Me liutaka e dua na mataveiliutaki ni kuoramu se kalasi; me 10–20 na miniti

Ni tekivu na soqoni, cavuta vata na Itoko ni Goneyalewa se na Itoko ni Matabete i Eroni Qai tekivua taka na veitalanoa me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro ka toka e ra se mai na nomu taro ga vakataki iko (raica na iVoladusidusi Raraba, 10.2, 11.2, ChurchofJesusChrist.org). Tuva na sala mo vakayacora kina na veika e sa veitalanoataki.

• Bulataka na kosipeli. Na ulutaga cava soti eratou sa veitalanoataka na matabisopi ena noda bose ni matabose ni itabagone ni tabanalevu? Na cava soti eda na rawa ni cakava vakalasi se kuoramu ka me na yavutaki ena veitalanoa oqori?

• Nodra vukei o ira era gadreva tu na veivuke. Eda na dodoliga yani vakacava vei ira na tamata ena sala va-Karisito ni da raica e dua na gagadre ia ka sega ni da kila na ka me tukuni?

• Sureti ira na tamata kecega me ra ciqoma na kosipeli. Na cava eda sa kunea ena kosipeli i Jisu Karisito e kauta mai vei keda na reki? E rawa vakacava ni da wasea na loloma oqori vei ira tale eso?

• Vakaduavatataki ni matavuvale ki na veigauna tawamudu. Na cava eda sa cakava tiko me kunei kina na yacadra na tubuda era gadreva tu na cakacaka vakalotu ni valetabu? Na cava eda rawa ni cakava me da vukei ira kina na tamata me ra kunea na yacadra na tubudra?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso e sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a lokuci ena gauna ni soqoni.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

Ni sa yaco mai na gauna me sa vakamau kina o Aisake, a kerei nona tamata o Eparaama me raica mai e dua na wati Aisake. E rau a vinakata o Eparaama kei Aisake me rau kunea e dua na wati Aisake ka na rawa ni vakayacora ka maroroya na veiyalayalati kei na Turaga ka vakavulica talega vei iratou na luvena. O Repeka sa ikoya na marama yalodina ka a qai vakayacora na veiyalayalati ni vakamau vata kei Aisake. Me vaka ni sa vakamatatataka tu na ivolanikalou ni vakamau e ka bibi sara ki vua na Kalou, e sa bolei tiko ena noda gauna oqo na ivakavuvuli ni Kalou me baleta na vakamau. Ia era kaya na Nona parofita ni vakamau e “sa lesia na Kalou” (“Na Matavuvale: Ai Vakaro ki Vuravura Raraba,” ChurchofJesusChrist.org). Sa ka bibi vei ira o vakavulica me ra kila na dina tawamudu me baleta na vakamau. Ni ra vakayacora oqo ena vukei ira me ra vakavakarau ka vakadinadinataka na tikina bibi oqo ena ituvatuva ni Tamada Vakalomalagi.

Na cava mada na nodra nanuma na itabagone o vakavulica me baleta na vakamau tawamudu? O na vukei ira vakacava me ra kilamatata na vuna e suitu tiko kina ni ituvatuva nei Tamada Vakalomalagi na vakamau tawamudu? Ni o vakavakarau mo veivakavulici, e rawa ni o railesuva na itukutuku nei Elder D. Todd Christofferson “A Cava na Vu ni Vakawati, A Cava na Vu ni Matavuvale” (Liaona, Me 2015, 50–53). Sa rawa talega mo railesuva “Na Matavuvale: Ai Vakaro ki Vuravura Raraba” (ChurchofJesusChrist.org).

Na matavuvale sa itakele ni nona ituvatuva na Tamada Vakalomalagi.

Vulica Vata

Era sa na rairai vakasamataka vakatitobu na itabagone o vakavulica na bibi ni vakamau ni ra wilika na Nai Vakatekivu 24–27 ena macawa oqo. Sureti ira me ra railesuva na Nai Vakatekivu 24. Kerei ira me ra wasea na veitikina ka vakaraitaka na bibi ni vakamau vei ira na kawa tamata e vakamacalataki tiko ena wase oqo. Sureti ira me ra vakasamataka na vuna e itakele kina ni ituvatuva ni Kalou na vakamau tawamudu. Na veitaviqaravi ka toka e ra e rawa ni vukei ira me ra kila vakavinaka cake na bibi ni vakamau.

• Sa rawa vei ira na lewe ni nomu kalasi se kuoramu me ra na vakamacalataka na vuna e bibi kina vei ira na vakamau. Sureti ira me ra raitayaloyalotaka ni tiko e dua na nodra itokani ka vakabauta ni vakamau e sa ivakarau makawa ka sa sega ni gadrevi. E rawa ni ra vola e dua na ivola kivua na itokani oqo me ra vakamacalataka ki vua na bibi ni vakamau ena ituvatuva ni Tamada Vakalomalagi. Vakayaloqaqataki ira me ra okata kina na dina era kunea ena “Na Matavuvale: Ai Vakaro ki Vuravura Raraba.” E rawa talega ni ra vakayagataka na ivolanikalou e kune ena “iVurevure Veitokoni” se ena “Vakamau, Vakamautaka” ena iDusidusi ki na iVolanikalou (scriptures.ChurchofJesusChrist.org). Vakayaloqaqataki ira me ra wasea ki na kalasi na veika era sa vola.

• Me tekivutaki na veitalanoa me baleta na bibi ni vakamau, vola ena papa ni volavola Na cava e bibi kina na vakamau tawamudu? Solia vei ira na itabagone e vica na miniti me ra vola na nodra isau ni taro. Sureti ira me ra wasea na nodra isau ni taro. Sa rawa me ra vakasaqara na ikuri ni isau ni taro ena itukutuku nei Elder D. Todd Christofferson “A Cava na Vu ni Vakawati, A Cava na Vu ni Matavuvale” (Liaona, Me 2015, 50–53). E rawa talega ni ra sarava na vidio “Why Is Marriage Sacred to Heavenly Father?” mai na “Face to Face with Elder and Sister Renlund” (ChurchofJesusChrist.org). Sureti ira me ra wasea na nodra ivakadinadina me baleta na bibi ni vakamau.

• Ni da ciqoma na ivakavuvuli ni Kalou me baleta na vakamau ka segata me da bulataka, eda na ciqoma e vuqa sara na veivakalougatataki. Ia kivei ira eso—oka kina o ira era saga tiko ena yalodra taucoko me ra bulataka na kosipeli—era sotava tiko na bolebole ena kena tauyavutaki na vakawati tawamudu marautaki. Kerei ira na itabagone me ra veitalanoataka eso na veibolebolei vakaoqo. Na cava e rawa ni caka me vakarautaki keda ki na veibolei vakaoqori? Sa rawa talega mo sureti ira me ra wilika na iotioti ni rua na iwasewase ena vosa nei Elder Neil L. Andersen “Na Mata ni Vakabauta” (Liaona, Me 2019, 34–38). Me ra veitalanoataka na lewe ni kalasi se kuoramu eso na ivakaraitaki era raica ena nodra bula se na nodra itukutuku vakakawa ni matavuvale me baleti ira era sotava ena yalodina na veibolei me vaka e cauraka o Elder Andersen. Ena veivuke vakacava na iVakabula kivei ira kece era sotava tiko na veibolei ena nodra sasagataka na veivakalougatataki ni vakawati tawamudu?

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma edai. Kevaka era vinakata, me ra wasea na nodra nanuma. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Vunau kei na Veiyalayalati 49:16–17 (Na vakamau e vukea na vakataudeitaki ni inaki ni Veibuli)

• Vunau kei na Veiyalayalati 131:1–4; 132:15–21 (E gadrevi ena bula vakacerecerei na vakamau tawamudu)

• “Renaissance of Marriage,” “How Did Elder and Sister Bednar Meet?” mai na vidio “Face to Face with Elder and Sister Bednar” ChurchofJesusChrist.org

Veivakavulici ena iVakarau ni iVakabula

Na iVakabula e a sureti ira na dau vakamuri Koya me ra cakacaka ena vakabauta ka bulataka na dina a vakavulica o Koya. O na sureti ira vakacava o vakavulica me ra bulataka na dina era sa vulica tiko?