13 ni Maji

Me‘u Na Sotava Vakacava na Dredre ena Vakabauta?

Na iVakatekivu 37–41

Veivakasalataki Vata

Me liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Mo qai tekivutaka na veitalanoa me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro ka toka e ra se na nomu taro ga vakataki iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo vakayacora kina na veika e sa veitalanoataki.

• Bulataka na kosipeli. Eda sa raica vakacava na liga ni Turaga ni cakacaka tiko ena noda bula?

• Nodra vukei o ira era gadreva tu na veivuke. E rawa ni da veitokoni vakacava ena veika eda sotava tiko?

• Sureti ira na tamata kecega me ra ciqoma na kosipeli. E rawa vakacava me da vakayagataka vakavinaka cake na tekinolaji me iyaya ni cakacaka me wasei kina na kosipeli?

• Vakaduavatataki ni matavuvale ki na veigauna tawamudu. Na cava eda sa cakava tiko me da vukea kina na noda matavuvale me ratou lako mai ki Vua?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso e sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a lokuci ena gauna ni soqoni.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

E na nona gauna vaka cauravou, o Josefa mai Ijipita e a sotava e vuqa na vei mataqali dredre. A sotava na veiravuti ena nona matavuvale ka vakalolomataki mai vei iratou na tuakana. A sotava na veitemaki me voroka na lawa ni tiko savasava. Ia e a sega ni rokovi me baleta na nona yalodina, e a biu yani ki vale ni veivesu. E rawa ni ra sotava na lewe ni nomu kalasi se kuoramu na veivakatovolei vata oqo kei na vuqa tale. Ni o vulica na veika a sotava o Josefa ena Nai Vakatekivu 37–41, vakasamataki ira o vakavulica. Vakasamataka vakatitobu na lesoni yaga cava soti ena rawa ni vakatavulica vei ira na bula nei Josefa (raica talega na Ica 12:27; Henry B. Eyring, “Tovolea, Tovolea, Tovolea,” Liaona, Nove. 2018, 90–93). Na italanoa kei Josefa e rawa ni vakauqeta na lewe ni kalasi se kuoramu me ra taroga, “Au na rawa ni sotava vakacava na veika dredre ena vakabauta, ka na vukei au vakacava na Kalou?”

Ni da vakanamatataka na noda vakabauta ki vei Jisu Karisito, eda na rawa ni kunea na kaukauwa ena dela ni dredre.

Vulica Vata

Sa rawa mo kerei ira na lewe ni kalasi se kuoramu me ra vola ena papa ni volavola eso na ka e a yaco ena bula nei Josefa mai Ijipita, me vaka e vakamacalataki ena Nai Vakatekivu 37 kei na 39–41. Vakaraitaka eso na iyaloyalo, me vaka na kena ena Lako Mai, Mo Muri Au—Me Baleta na Tamata Yadua kei na Matavuvale, e rawa ni vukei ira me ra nanuma tiko na veika e a yaco oqo. E tautauvata vakacava na veivakatovolei i Josefa kei na veibolei era sotava tiko na itabagone e daidai? Kevaka me bula tiko e daidai o Josefa, na ivakasala cava beka ena solia vei keda o koya me baleta na kena sotavi na veika dredre? Na cava beka ena tukuna me baleta na kena vukei koya tiko na nona veiwekani kei na Turaga? Vakayagataka na itaviqaravi vaka oqo me vukei ira na itabagone me ra vakasamataka na sala era rawa ni vorata kina na nodra vei bolebole ni ra sa vakabauti Jisu Karisito.

• Ni vulici na nona ivakarau na iVakabula e na sotavi na veika dredre ena rawa ni vukei keda me da sotava na noda dredre ena vakabauta. E rawa ni ra vakatura na itabagone eso na ivakaraitaki ni veika dredre a sotava na iVakabula ka railesuva vata (raica na “iVurevure Veitokoni” me baleta eso na vakasama). Na cava e vakauqeti keda me baleta na nona sotava na iVakabula na Nona vei gauna ni dredre? Ena rawa vakacava me da muria na Nona ivakaraitaki ni da veimaliwai kei ira na tani?

• Ena so na gauna ena rawarawa cake ni da sotava na dredre ena noda tovolea me da raica na dredre oya mai na nona ivakarau ni rai na Turaga. Me vukei ira o vakavulica me ra kila vakavinaka oqo, kerei ira me ra vakasaqara na ivakaraitaki ni rai oya ena nodra railesuva na itukutuku nei Elder Rafael E. Pino “Na Rai Tawamudu ni Kosipeli” (Liaona, Me 2015, 117–19). Sureti ira me ra wasea na veika era sa kunea. Na cava e vakatura na ivakaraitaki eso oqo me baleta na sala eda rawa ni raica ka sotava kina na noda vei gauna dredre? Ke rawa ni vosa vei keda na iVakabula me baleta na noda bolebole, na cava eda nanuma ni na kaya o Koya? Me vukea na saumi ni taro oqo, e rawa ni ra railesuva na itabagone na ivolanikalou ena “iVurevure Veitokoni.”

• Nanuma mo kerei ira na itabagone me ra wasea e dua na ivakaraitaki ni dua (e dua beka na tubudra) ka a vakauqeti ira ena ivakarau e a sotava kina e dua na veivakatovolei dredre. Se o rawa ni wasea na ivakaraitaki veivakauqeti mai vei ira o kila. Na itukutuku ni koniferedi raraba e dau oka kina na italanoa ni tamata era dau sotava na dredre ena vakabauta (raica eso na ivakaraitaki ena “iVurevure Veitokoni”). Vakasamataka na veika o rawa ni wasea mai na itukutuku vakaoqo ka na rawa ni yaga vei ira o vakavulica. Ni o ni veitalanoataka na ivakaraitaki oqo, vakatura ki na lewe ni kalasi se kuoramu na nodra vukei na tamata ena nodra dei ena vakabauti Jisu Karisito ni ra sotava na vei tuvaki dredre. E rawa talega ni o wasea na lisi ni ivurevure eso nei Bisopi W. Christopher Waddell ka sa vakarautaka tu na Turaga me vukei keda ena noda bolebole, ka na kunei e na icavacava ni nona itukutuku “Gole Vua na Turaga” (Liaona, Nove. 2017, 94–96).

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na vakayacora me baleta na veivakauqeti era ciqoma edai. Kevaka era vinakata, me ra wasea na nodra nanuma. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Maciu 4:1–11 (A tiko vua na iVakabula na vakabauta ena Nona gauna ni dredre)

• Maciu 14:10–21; Luke 23:33–34; Joni 19:25–27 (Na iVakabula e qaravi ira tale ga na tani ena Nona gauna ni dredre)

• Maciu 27:45–46; Luke 23:44–46 (A vakila na iVakabula na galili ena Nona gauna ni sotavi dredre ia e a nuitaka tiko ga na Kalou)

• Maciu 5:38–45; Mosaia 24:8–15; Vunau kei na Veiyalayalati 121:1–8; 122:5–9 (Na ivakavuvuli ni iVakabula me baleta na sotavi ni veika dredre)

• Neil L. Andersen, “Wounded,” Liaona, Nove. 2018, 83–86

• L. Todd Budge, “Consistent and Resilient Trust,” Liaona, Nove. 2019, 47–49.

• Jean B. Bingham, “That Your Joy Might Be Full,” Liaona, Nove. 2017, 85–87

Veivakavulici ena iVakarau ni iVakabula

“Ni ko sa vakavakarau, mo vakayagataka na nomu kilai ira vinaka na tamata o vakavulica me dusimaka na nomu ituvatuva” (Veivakavulici ena iVakarau ni iVakabula,7). Me kena ivakaraitaki, tuva ena masumasu na itaviqaravi ena vakayagataki ni ivolanikalou kei na ivurevure tale eso e rawa ni veivuke ena bolebole era sotava na lewe ni kalasi se kuoramu.