27 ni Maji

O Cei O Au, O Cei e Vinakata na Kalou Me‘u Yaco Me‘u Vaka?

Na Lako Yani 1–6

Veivakasalataki Vata

Me liutaka e dua na mataveiliutaki ni kuoramu se kalasi; 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Qai liutaka e dua na veitalanoa ni veivakabulai kei na bula vakacerecerei ena nomu vakayagataka e dua se sivia na taro ka toka e ra se na nomu taro ga vakataki iko (raica na iVoladusidusi Raraba, 10.2, 11.2, ChurchofJesusChrist.org). Tuva na sala mo vakayacora kina na veika e sa veitalanoataki.

• Bulataka na kosipeli. Eda sa kunea tiko vakacava na reki ena noda muri Jisu Karisito?

• Nodra vukei o ira era gadreva tu na veivuke. O cei ena noda tabanalevu se itikotiko e gadreva na noda veivuke? E rawa vakacava ni keitou veivuke?”

• Sureti ira na tamata kecega me ra ciqoma na kosipeli. Eda na veivukei vakacava vakai keda me da vakavakarau ki na veiqaravi vakadaukaulotu?

• Vakaduavatataki ni matavuvale ki na veigauna tawamudu. Eda na cau vakacava ki na sasaga ni noda tabanalevu me da vakayacora na tuva kawa kei na cakacaka ni valetabu?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso e sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti e a caka ena gauna ni soqoni.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

Na vunikau kama ka sega ni yavu rawa ena rairai veivakurabuitaki, ka a toboka na rai nei Mosese. Ia a veivakurabuitaki vakalevu cake sara na ka a yaco tarava. A vosa vei Mosese na Kalou, ka vulica o Mosese me raici koya vakataki koya me vaka na nona raici koya na Kalou. Ena rai oqori, a rawata kina o Mosese e dua na ka mai na Nona veivuke na Turaga ka a nanuma tu o koya ni na sega ni rawata: a vorati Fero ka vueti ira na tamata ni Kalou.

E da gadreva taucoko me da sotava na vei tuvaki ni bula ka na vukei keda me da vakaisosomitaka na noda vakatitiqa ena Nona kila-ka na Kalou me baleta se o cei o keda kei na vanua au na rawa ni yacova. O ira na itabagone, vakabibi, era bolei tu ena itukutuku lasu me baleta na kedra yaga yadua. Me vakataki Mosese, na Kalou e sa “vakarautaka tu e dua na cakacaka [me ra] cakava” (iToko ni Kuoramu ni Matabete iEroni). Sa tu na nodra dui Fero me ra vorata kei ira na nodra tamata me ra vueta. O na vukei ira vakacava me ra nanuma tiko ni ra sa luvena yalewa kei na tagane lomani na itubutubu vakalomalagi “ena ituvaki vakalou kei na icavacava tawamudu”? (iToko ni Goneyalewa). Vakasamataka vakatitobu oqo ni o wilika Na Lako Yani 1–6. Navuca talega mo vulica na Vunau kei na Veiyalayalati 18:10–15 kei na itukutuku nei Peresitedi Dieter F. Uchtdorf “You Matter to Him” (Liaona, Nove. 2011, 19–22).

E rawa ni veisautaki na noda bula ni da sa kila na ka e gadrevi vei keda vaka luve ni Kalou.

Vulica Vata

Era sa na rairai wilika na lewe ni nomu kalasi se kuoramu na Na Lako Yani 1–6 ena macawa oqo. Me vakauqeti ira me ra wasea na veika era sa vulica, e rawa ni o taroga vei ira se na cava e a vakila o Mosese me baleta na nona veikacivi me sereki ira na luvei Isireli (raica Na Lako Yani 3:11). Na dina cava soti a vakavulici Mosese kina na Turaga me vukea na veisau ni nona rai? (raica Na Lako Yani 3:4–15; 4:10–17; raica talega na Mosese 1:3–11). Ena vukei Mosese vakacava na vei dina eso oqo? Era na vukei keda vakacava? Vakayagataka e dua na itaviqaravi me vaka e dua vei ira oqo me vukea na kalasi se lewe ni kuoramu me ra kila na veika e sa vakatakila na Kalou me baleta na ka e gadrevi vei ira, kedra yaga, kei na rawa-ka.

• E kaya o Peresitedi Dieter F. Uchtdorf, “Na Turaga e vakayagataka e dua na ivakarau ka duatani sara mai na kena e tu e vuravura me vakarautaka kina na yaga ni dua na yalo” (“You Matter to Him,” 22). Me veitalanoataki na vakasama oqo, sa rawa mo vola ena papa E vakaraitaka vakacava o vuravura vua e dua na tamata ni sa ka bibi sara o koya? Sureti ira o vakavulica me ra vakatura na isau ni taro. Kevaka eda na vakatulewataka na keda yaga ena sala oqo, ena vakayaco-ka vakacava na yalo vakaoqo ki na noda digidigi? Mo qai vola ena papa E vakaraitaka vakacava na Kalou vua e dua na tamata ni sa ka bibi sara o koya? Ni ra wasea na itabagone na isau ni taro, vakayaloqaqataki ira me ra wilika na Joni 3:16; Vunau kei na Veiyalayalati 18:10–15; Luke 15:3–6, 11–32. Sa rawa talega me ra wilika na iotioti ni kovu ni itukutuku nei Peresitedi Uchtdorf. Kevaka eda na vakatulewataka na keda yaga ena sala oqo, ena vakayaco-ka vakacava na yalo vakaoqo ki na noda digidigi?

• Na ivakatakilakila e tara na noda rai kei na noda qaravi keda vakataki keda kei ira na tani. Me vukea na lewe ni kalasi se kuoramu me ra vakasamataka na sala era sa vakatakilakilataki ira kina, sa rawa ni o solia vei ira yadua e vica na itokaniyaca lala. Na ivakatakilakila yadua e rawa ni toqai kina na “Bula, o au o ‑‑‑” ka me volai e cake. Sureti ira me ra vakasamataka e vica na vosa se malanivosa duidui e rawa ni ra vola ena nodra itokaniyaca. Kevaka a vakalewena na Tamada Vakalomalagi na itokaniyaca me baleti keda, na cava beka e na vola o Koya? Na cava e rawa ni vola o Koya kevaka e kaya na ivakatakilakila “Bula, au rawa ni yaco me‘u‑‑‑”? Me ra qai vakasamataka vakatitobu na lewe ni kalasi se kuoramu na vei taro oqo ni ra wilika tiko eso na ivolanikalou oqo: 1 Joni 3:1–3; Moronai 10:32–33; Vunau kei na Veiyalayalati 76:69–70; 84:37–38.

• Na itukutuku ni koniferedi raraba ena “iVurevure Veitokoni” e tiko kina eso na ivakaraitaki ni tamata ka sa veisau na nodra bula baleta ni ra sa vulica na vei ka e gadrevi vei ira vaka luve ni Kalou. Sa rawa mo solia ki na kalasi se kuoramu yadua e dua vei ira na ivakaraitaki oqo me ra vakasamataka vakatitobu ka wasea vei ira na ilawalawa. O sa rawa talega ni talaucaka na kena sa tara na nomu bula na noda kila ni da luvena taucoko na Kalou. Sureti ira na lewe ni kalasi me ra vakayacora vakakina.

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma ni kua. Kevaka era vinakata, me ra wasea na nodra nanuma. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Joy D. Jones,“Yavubula Tawayalani,” Liaona, Nove. 2017, 13–15

• Brian K. Taylor,“Au Luve Beka ni Kalou?” Liaona, Me 2018, 12–14.

• “Our True Identity,” “How Can I See Myself as God Does?” mai na “Face to Face with Elder Rasband, Sister Oscarson, and Brother Owen” (vidio), ChurchofJesusChrist.org

• “Na Veika Taucoko Me Baleti Au” ena veika FamilySearch.org/discovery

Veivakavulici ena iVakarau ni iVakabula

Kevaka era kidava na itabagone ni o vakabauti ira, ena tubu na nodra yalodei me baleta na kedra ituvaki vakalou, ka ra na vakidacalataki iko ena veika era na rawata” (Veivakavulici ena iVakarau ni iVakabula, 28).