10 ni Epereli

Me‘u na Vakaqaqacotaka Vakacava e Veisiga na Noqu Vakabauti Jisu Karisito?

Na Lako Yani 14–17

Veivakasalataki Vata

Me liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Oti, me ikuri ni veivosaki me baleta na gagadre bibi ni kuoramu se kalasi, o na rairai via veitalanoataka na vosa kei na iulutaga eso mai na koniferedi raraba. E na rawa ni veivuke na taro eso oqo.

• Na vosa kei na itukutuku cava soti e vakaibalebale vei keda? Na cava e vakaqaqacotaka na noda vakabauti Jisu Karisito?

• Na cava e vakaqaqacotaka na noda ivakadinadina me baleti ira na parofita bula? Na cava eda sa vakauqeti kina me da cakava ena vuku ni ka eda sa vulica se vakila?

• Na cava e gadrevi me da na cakava vaka kuoramu se kalasi me da na nanuma kina ka vakayacora na ivakasala eda sa rogoca ena koniferedi raraba?

Ena itini ni lesoni, ke veiganiti, vakayacora na vei ka oqo:

• Vakadinadinataka na ivakavuvuli eso e sa vakatavulici.

• Vakananuma vei ira na lewe ni kalasi se kuoramu na ituvatuva kei na veisureti e a caka ena gauna ni soqoni.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

Me rawa ni ra bula tiko ena lekutu, e a gadrevi vei ira na luvei Isireli me ra vulica na ivakarau ni vakararavi ki vua na Turaga. Era a vakararavi Vua me baleta na cakamana ni veivakabulai, me vaka na wasei rua ni Wasa Damudamu, ka vakakina na cakamana ni bula, me vaka na mana mai lomalagi. Sa vakakina kivei ira o vakavulica tiko. Kevaka me ra bula mai na nodra ilakolako vakayalo ena lekutu ni bula oqo, sa dodonu me ra cakacakataka nodra vakabauti Jisu Karisito. Ka me ra dau cakacakataka na vakabauta oya e veisiga yadua, ka sega ena so ga na gauna. Eso vei ira o vakavulica era na rairai nanuma ni sega soti ni kaukauwa na nodra vakabauta. E rawa ni o vukei ira me ra raica ni vakabauta e na tubu tiko vakamalua, ena veisiga yadua. E na vakabulabulataki mai na veika lalai ka rawarawa eda dau cakava vakawasoma. Vakasamataka vakatitobu na veika oqo ni o vulica Na Lako Yani 14–17 ena macawa oqo. Sa rawa talega mo vulica na itukutuku nei Peresitedi Dallin H. Oaks “Veika Lalai ka Rawarawa” (Liaona, Me 2018, 89–92).

E rawa ni da vakaqaqacotaka na noda vakabauta ena veisiga ena veisala lalai ka rawarawa.

Vulica Vata

Me tekivu taki e dua na veitalanoa, sa rawa mo kerei ira na itabagone me ra wasea eso na nodra itovo matau e veisiga ka vukei ira me ra caka vinaka. Na veika oqo e okati kina na kena maroroi na tiko bulabula se na vakaqaqacotaki ni nodra ivakadinadina. Na cava e rawa ni yaco ke sega ni maroroi tiko na vei tovo vakaoqo? E rawa vakacava ni vakatauvatani na noda sasaga ni caka vinaka ena veisiga kei na ivakaro a solia na Turaga vei ira na Isireli me ra kumuna vata na mana? (raica Na Lako Yani 16:16–21). E rawa ni o vukei ira ena kalasi se kuoramu me ra vakatauvatana na veika era sotava na Isireli kei na noda sasaga me da vakaqaqacotaki na noda vakabauti Jisu Karisito e veisiga. Me kena ivakaraitaki, na cava e solia vei keda na Turaga e tautauvata kei na mana ni veisiga a solia o Koya vei ira na Isireli? Na cava e rawa ni da cakava ka na tautauvata kei na kumuni mana? Me itoma ni nomuni veitalanoa, vakayagataka e dua se sivia na itaviqaravi ka toka e ra se dua ga na nomu vakataki iko.

• Wilika vata na Alama 37:6–7. Vola vakalasi se kuoramu ena papa ni volavola e so na “veika lalai ka rawarawa” e sa sureti keda tu kina na Turaga me da cakava e veisiga me da lako mai kina ki Vua. O ira o vakavulica e rawa ni ra railesuva na itukutuku nei Peresitedi Dallin H. Oaks “Veika Lalai ka Rawarawa” me ra kunea tale kina e so na ka lalai e rawa ni veivakayarayarataki vakalevu ena noda bula. Na cava na revurevu ni veika oqo? Na cava eda sa vakauqeti kina me da cakava me rawa ni tiki dei kina ni noda bula e veisiga na veika oqo?

• Na cava na vuna e gadrevi kina me vakabulabulataki e veisiga na vakabauti Jisu Karisito? Me vukei ira na lewenilotu me ra kila vakavinaka cake oqo, e rawa ni o vakaraitaka e dua se sivia na vidio e tuvai koto ena ruku ni “iVurevure Veitokoni.” Ena vidio oqo, e vakavulica kina o Elder D. Todd Christofferson ni gadrevi me da sasaga e veisiga me tokoni na noda vakabauta. Sureti ira o vakavulica me ra wasea na veika era sa vulica ka vakauqeti ira me ra vakalevutaka na nodra vakabauti Jisu Karisito e veisiga.

• Na sasaga tudei e veisiga sa sala vinaka duadua me vakaqaqacotaki kina na noda vakabauti Karisito. Me veitalanoataki na vakasama oqo, wilika vata na ikatolu ni vakatutu nei Elder David A. Bednar “Gumatua Cake ka Dau Kauwai mai Vale” (Liaona, Nove. 2009, 17–20). Na lesoni cava eso e rawa ni vulici mai na nona ivakamacala me baleta e dua na droini ena nona valenivolavola? E yaga vakacava na vei lesoni oqo ena noda sasaga me vakatorocaketaki na noda vakabauti Jisu Karisito? Ni wiliki vata na Alama 32:21, 26–43 ena rawa ni vakuria na veika me veitalanoataki. Na veivakararamataki cava eso e kunei me baleta na sala me vakaqaqacotaki kina na noda vakabauti Jisu Karisito?

• E rawa ni da vakalevutaka na noda vakabauta ena noda digitaka me da vuli mai na veika eda sotava ka vakatovolei kina. Sa rawa mo vakaraitaka na vidio “Spiritual Whirlwinds” (ChurchofJesusChrist.org). Veitalanoataka na veika e na rawa ni vakaqaqacotaka na noda vakabauta ni da sotava na vei bolei e so. (Raica talega na Neil L. Andersen, “Spiritual Whirlwinds, ” Liaona, Me 2014, 18–21.) Sa rawa mo kerei ira na lewe ni kalasi se kuoramu me ra wasea na gauna era a vakila kina ni vakatovolei na nodra vakabauti Karisito kei na veika era a cakava me vakaqaqacotaki kina na nodra vakabauta ena gauna o ya. Mo vakaraitaka ni Na Lako Yani 14–17 e vakamacalataka na nodra vosa kudrukudru e veigauna, se vakacauoca, na Isireli ni ra sotava na veivakatovolei. E rawa vakacava me vakamalumutaka na noda vakabauta na vosa kudrukudru ena gauna ni veivakatovolei? Na cava na kedrau duidui na vosakudrukudru kei na vakaraitaki ni noda lomaleqa vua na Tamada Vakalomalagi ena gauna dredre?

Cakacaka ena Vakabauta

Vakauqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma ni kua. Kevaka era vinakata, me ra wasea na nodra nanuma. Sureti ira me ra vakasamataka na sala ena vakaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• “Daily Bread: Pattern,” “Daily Bread: Change,” “Daily Bread: Experience” (vidio), ChurchofJesusChrist.org

Veivakavulici ena iVakarau ni iVakabula

Vukei ira na lewe ni kalasi se kuoramu me ra kila na sala e rawa ni ra sureta kina na Yalo me tiko ena nodra veitalanoa. E rawa ni ra cakava oqo ena nodra “itovo ‑‑‑ , na sala era dau veiqaravi kina vakai ira, kei na nodra nanuma me baleta na kosipeli” (Veivakavulici ena iVakarau ni iVakabula, 15).