24 ni Epereli

Na Cava na Vuna e Solia Kina vei Keda na Kalou na iVakaro?

Na Lako Yani 18–20

Veivakasalataki Vata

Me liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se na nomu taro ga (raica na iVoladusidusi Raraba, 10.2, 11.2, ChurchofJesusChrist.org). Tuva na sala mo cakava na veika sa veivosakitaki.

• Bulataka na kosipeli. Na veika cava soti sa yaco oti sa kauti keda vakavoleka sara vua na Tamada Vakalomalagi kei Jisu Karisito?

• Nodra vukei o ira era gadreva tu na veivuke. E dua beka e se qai toki vou ki na noda tabanalevu se lewena na Lotu? E rawa vakacava meda vukei ira me ra vakila ni raa taleitaki?

• Sureti ira na tamata kecega me ra ciqoma na kosipeli. E tiko beka eso na itaviqaravi e vakarau vakayacori tiko ka rawa ni da sureti ira na noda itokani me ra tiko kina?

• Vakaduavatataki ni matavuvale ki na veigauna tawamudu. Na sasaga cava soti e rawa ni da cakava meda vola kina na keda itukutuku makawa?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti a lokuci ena gauna ni soqoni.

Vakatavulica na iVunau

Liutaka e dua na iliuliu itabaqase se itabagone; me 25-35 na miniti

Vakarautaki Iko Vakayalo

Na wiliki ni Lako Yani 20 ena rawa ni uqeti iko mo vakasamataka na vuna e tiko kina vei keda na ivakaro. Eso na tamata era raica na ivunau me yalani keda se dua na sasaga me ra lewai keda. Ia baleta ga ni da kila ni Tamada dauloloma na Kalou, sa rawa ni da vakabauta ni Nona lawa e baleta na noda vinaka, kevaka sara mada ga eda sega ni kila na vuna era soli kina. Sa yalataka oti vei keda o Koya nida na rawa ni kila na dina ni Nona ivunau nida sa bulataka (raica na Joni 7:17).

E vakatavulica o Peresitedi Russell M. Nelson: “Baleta ni rau lomani keda na Tamada kei na Luvena ena loloma tawayalani, uasivi sara ka baleta ni Rau kila ni da na sega ni raica rawa na veika kece Erau raica, Erau sa solia vei keda na lawa ena tuberi keda ka taqomaki keda. E tiko e dua na isema kaukauwa ni loloma ni Kalou kei na Nona lawa” (“The Love and Laws of God” [Lotu ena Brigham Young University, 17 ni Sepi., 2019], 2, speeches.byu.edu).

Na cava o vakavinavinakataka kina na ivunau? Na cava o na vinakata mera kila na lewe ni nomu kalasi se kuoramu me baleta na vuna e solia kina vei keda na Kalou na ivakaro? E rawa ni o vakavakarau mo veivakavulici ena railesuvi ni Lako Yani 20 kei na itukutuku nei Peresitedi Dallin H. Oaks “Veilomani ka Bulavata ena Maliwa ni Duidui” (Liaona, Nove. 2014, 25–28).

Eda rawa ni kila ni dina na ivunau ni Kalou nida sa bulataka.

Vulica Vata

Me vukei ira na lewe ni kalasi se kuoramu mera railesuva na iVakaro e Tini, sa rawa mo kerei ira mera vola na levu ga ni ivakaro oqo era sa nanuma rawa. Kevaka era gadreva na veivuke, e rawa ni ra raica na Lako Yani 20:3–17. Cava na vuna e solia kina vei keda na Kalou na ivakaro? Me vukea na isau ni taro oqo, sa rawa mera veivosakitaka vakailawalawa lalai e vica na Vunau e Tini. Ena vukei keda vakacava na bulataki ni ivakaro oqo meda kune marau ka toro volekata yani na Kalou? Na veivakasama oqo e rawa ni vukei ira o vakavulica mera kila vakalevu cake na vuna e solia kina vei keda na Kalou na ivakaro.

• E tu ena ivolanikalou na isau ni taro oqo “Na cava e solia kina vei keda na Kalou na ivakaro?” Sa rawa mo sureti ira na lewe ni kalasi se kuoramu mera vakaraica na isaunitaro ena dua se sivia na ivolanikalou e tiko ena “iVurevure Veitokoni.” Qai kerei ira me ra wasea e dua na ka era sa vulica. E rawa talega nira sarava na vidio eso oqo ka vaqara na vakasama eso:“Instructions Included,” “Why Does God Give Us Commandments?” (ChurchofJesusChrist.org

• Me vukei ira na lewe ni kalasi se kuoramu me ra kila na vuna e solia kina vei keda na Kalou na ivakaro, e rawa ni o vakatauvatana na ivakaro mai vua na Kalou ki na veika era sotava e rawa ni ra veiwekanitaka. Me kena ivakaraitaki, e rawa ni o kerei ira me ra raitayaloyalotaka ni ra vodo tiko ena dua na gaunisala ni ulunivanua volekata e dua na barinisavu ka tiko e dua na bai ena yasa ni gaunisala. Kerei ira me ra veivosakitaka vata kei na dua tale na taro oqo: E tautauvata vakacava kei na bai na ivunau ni Kalou? Sa vakalougatataki iko vakacava na talairawarawa ki na ivakaro? Na veivakatauvatani cava tale e rawa ni vukei keda meda kila vinaka na vuna e solia kina vei keda na Kalou na ivakaro kei na vuna meda talairawarawa kina? Me baleta eso na ivakaraitaki, e rawa ni o sureti ira me ra railesuva e dua na itukutuku se vidio e kunei ena “iVurevure Veitokoni.” Kerei ira mera wasea na veivakatauvatani era sa kunea ka veivosakitaka na veika era sa vulica.

• Na nomu veivosaki e rawa ni liutaki ira na lewe ni kalasi se kuoramu mera veivosakitaka na sala eda maliwai ira era sega ni vakabauta se bulataka eso na ivakaro. Sa rawa mo sureti ira mera yadrava na ivakasala ena itukutuku nei Peresitedi Dallin H. Oaks “Veilomani ka Bulavata ena Maliwa ni Duidui.” O na taroga beka na taro vakaoqo: Me vakacava beka na ivakarau ni noda raici ira era digitaka me ra bulataka na bula e duatani mai vei keda? Eda na rawa ni raica vakacava na vinaka vei ira na tani ni duidui na nodra digidigi mai na kena eda cakava?

Cakacaka ena Vakabauta

Uqeti ira na lewe ni kalasi se kuoramu me ra vakasamataka vakatitobu ka vola na cava era na cakava me ra vakayacora kina na veivakauqeti era ciqoma nikua. Kevaka era vinakata, mera wasea na nodra nanuma. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Nai Vakarua 10:12–13; Alama 36:30; Vunau kei na Veiyalayalati 1:24–28; 82:8–10; 93:20, 28; 130:18–21 (Na vuna e solia kina vei keda na Kalou na ivakaro)

• Jeffrey R. Holland, “Me da Vala Tiko” (Liaona, Nove. 2011, 44–47; raica talega na vidio “Tiko ga ena loma ni Laini”); Richard G. Scott, “The Atonement Can Secure Your Peace and Happiness” (Liaona, Nove. 2006, 40–42; raica talega na vidio “A Secure Anchor”); Von G. Keetch, “Sa Kalougata ka Marau ko Ira sa Maroroya na iVakaro ni Kalou” (Liaona, Nove. 2015, 115–17; raica talega na vidio ena ulutaga vata ga)

Veivakavulici ena iVakarau ni iVakabula

“Ni ko sasagataka tiko mo bula ka veivakavulici vakataka na iVakabula, ena dau yaco mo guce ena so na gauna. Kakua ni yalolailai; ia, me muataki iko na nomu caka cala kei na malumalumu oqo ki vua na Tamada Vakalomalagi kei na iVakabula” (Veivakavulici ena iVakarau ni iVakabula,14).