8 ni Me

Au Na Kila Vakacava Ni Sa Vosoti Au Na Kalou?

Lako Yani 35–40; Vunau ni Soro 1; 16; 19

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Ena vukei keda vakacava na gole vua na Turaga meda sotava na noda bolebole kei na veivakatovolei?

• Nodra vukei o ira era gadreva tu na veivuke. O cei eda kila e gadreva tu na noda masu kei na noda veitokani?

• Sureti ni tamata kecega me ra ciqoma na kosipeli. Na ituvatuva cava me wasei kina na kosipeli sa veivosakitaki ena soqoni ni matabose ni itabagone ni tabanalevu? Ena rawa ni vakaitavi vakacava na noda kalasi se kuoramu?

• Vakaduavatataki ni matavuvale ki na bula tawamudu. E rawa vakacava ni vaqaqacotaka na keda isema vua na Tamada Vakalomalagi kei Jisu Karisito na noda cakava na tuva kawa?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

Eso na gauna era dau vakataroga na tamata kevaka sa “rauta na ka era cakava” me vosoti kina na nodra ivalavala ca. E dina ga ni taura na igu me da veivutuni, ia eda na sega ni vosoti baleta ni da sa vakacavara e dua na jekelisi se cakava eso na cakacaka. Eda sa vosoti ni da ciqoma na loloma veivueti nei Jisu Karisito. Ena sala oqo sa rawa ni veisau kina na keda ituvaki.

Ena gauna makawa, na ivakarau kei na solibula ni lawa i Mosese a dusimaki ira na Isireli ki na Veisorovaki ni iVakabula. Me vaka sa vakamacalataka na Turaga ena Vunau ni Soro 16:30, “Ni dou na sorovaki e na siga ko ya mo dou vakasavasavataki, dou na savasava kina mai na nomudou ivalavala ca kecega ena mata i Jiova.” E dina, ni dua na itovo ni bula duadua ga e sega ni solia vei keda na veivosoti ni ivalavala ca. Na veivosoti e lako mai vei Jisu Karisito. Ena noda gauna, na cakacaka vakalotu me vaka na papitaiso kei na sakaramede e dusimaka na noda vakasama kei na yaloda vua na iVakabula. Era vukei keda me da kila ni na dau vosoti keda o Koya ni da veivutuni.

E sa vukei iko vakacava na Tamada Vakalomalagi mo kila ni ko sa vosoti? Sa rawa mo vulica na Mosaia 4:1–3 kei na itukutuku nei Peresitedi Tad R. Callister “Na Veisorovaki i Jisu Karisito” (Liaona, Me 2019, 85–87). Na itukutuku oqo e rawa ni vukei ira o vakavulica me ra kila ni Tamada Vakalomalagi e vosoti keda ni da veivutuni.

Eda sa vosoti ni da ciqoma na loloma veivueti nei Jisu Karisito.

Vulica Vata

Sa rawa mo tekivu ena nomu vakaraitaka na iyaloyalo ni iVakabula e Kecisemani kei na kauveilatai (raica na iVola ni iYaloyalo Vakosipeli, naba 56–57). Sureti ira na itabagone me ra vaqara na Vunau ni Soro 1:1–9; 16:15–16, 30. Kerei ira me ra wasea na veimalanivosa e vakananuma vei ira na Veisorovaki ni iVakabula. A vukei ira vakacava na Isireli me ra vakanamata ki na Veisorovaki ni iVakabula na solibula e vakamacalataki tiko ena veitikina oqo? Na cava e vukei keda meda nanuma tiko na Veisorovaki ni iVakabula? Na cava e vukei keda me da vakila na loloma kei na veivosoti ni iVakabula? Na veitaviqaravi e ra e rawa ni vukei ira na itabagone me ra kila vakavinaka cake ni na vosoti keda na Kalou.

• E vica na tamata ena ivolanikalou era vakamacalataka na veika era vakila ena gauna e vosoti ira kina na Tamada Vakalomalagi. E rawa ni ra wilika na lewe ni nomu kalasi se kuoramu eso na ivakaraitaki (raica na“iVurevure Veitokoni”). Sureti ira me ra vola e dua na lisi ni malanivosa mai na veitikina oqo e vakamacalataka na veika e vakila ni da vosoti. E rawa ni o kerei ira me ra vakaraitaka ena nodra vosa na veivosoti cava e vakila vei ira na veivosoti. Na cava eda vulica baleta na Kalou mai na veika vakilai oqo? Ena rawa beka ni o wasea na nomu nanuma me baleta na veivosoti.

• Ena so na gauna era sega ni vakadeitaka na tamata ni ra sa vosoti baleta ni ra sega ni kila ni ra sa veivutuni dina. Na itukutuku nei Elder Dale G. Renlund “Veivutuni: E dua na Digidigi Rekitaki” e vakamacalataka na ivakarau ni veivutuni dina ka ciqoma na veivosoti ni Kalou (Liaona, Nove. 2016, 121–24). Sa rawa mo vola ena vava ni volavola na ulutaga Na Veivutuni Dina kei na Veika e Yaco ena Sala ni Veivutuni. Kerei ira o vakavulica me ra vaqara na ivakavuvuli ena itukutuku ka lewena na ulutaga. Na cava eda vulica me baleta na iVakabula kei na Nona veivosoti ena tolu ni otioti ni parakaravu ni itukutuku oqo?

• Eso na tamata era sa veivutuni beka ia era sega ni vakila na veivosoti. Oqo e rairai baleta ni ra a sega ni rawa ni vosoti ira vakataki ira. Na ivakasala ena itukutuku nei Peresitedi Tad R. Callister ena “Veisorovaki i Jisu Karisito” e rawa ni vukei ira. E rawa ni wilika na nomu kalasi se kuoramu na iwase ka tekivu ena “2. Valavala Ca.” Kerei ira me ra vaqara na ivakasala e rawa ni ra wasea vua e dua na itokani se lewe ni matavuvale ka se cala tikoga ni sa veivutuni oti. Solia na gauna vei ira na itabagone me ra wasea na nodra nanuma me baleta na iVakabula, ka rawa kina vei keda me da veivutuni ka vosoti.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma ni kua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veimaliwai kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Inosi 1:1–8; Mosaia 4:1–3; Alama 24:7–10; 36:17–21 (Na veika era vakila na tamata ni ra sa vosoti)

• Aisea 1:18; Mosaia 26:30; Moronai 6:8; Vunau kei na Veiyalayalati 58:42–43; 64:10 (Sa yalataka tu na Turaga me vosoti keda)

• Russell M. Nelson, “E Rawa Ni Da Caka Vinaka Cake ka Vinaka Cake,” Liaona, Me 2019, 67–69

• Craig A. Cardon, “E Via Veivosoti na iVakabula,” Liaona, Me 2013, 15–18

Veivakavulici ena iVakarau ni iVakabula

A vakavulica na iVakabula mera vakayagataka na ivolanikalou me ra kunea kina na isau ni nodra vakatataro vakai ira. O na vukei ira vakacava o ira o vakatavulica mera gadreva na gole ki na ivolanikalou kei na nodra vosa na parofita ni ra vakasaqara na isaunitaro?