22 ni Me

Au na Vakaraitaka Vakacava na Noqu Vakavinavinaka vua na Kalou?

Nai Vakarua 6–8; 15; 18; 29–30; 34

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Na cava eda a veivosakitaka ena gauna sa oti, kei na veisureti se ilesilesi cava a vakayacori? Na cava eda sa cakava meda cakacakataka kina na veisureti oqo se itavi?

• Nodra vukei o ira era gadreva tu na veivuke. Na cava eda rawa ni cakava se tukuna me da dodoliga yani vei ira era na rairai galili se yawa mai vua na Tamada Vakalomalagi?

• Sureti ni tamata kecega me ra ciqoma na kosipeli. Na cava eso na sala eda rawa ni vukei ira kina eso mera vakila na loloma i Jisu Karisito?

• Vakaduavatataki ni matavuvale ki na bula tawamudu. Na vakasama cava eda rawa ni veiwasei kina vakai keda me vukea noda matavuvale?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

Sa dau wanonovi keda ka vakalougatataki keda tiko na Kalou. Ia ena veivagolei tani kei na veitemaki kece eda sotava, e rawarawa me da guilecavi Koya. A yaco oqo vakavuqa vei ira na Isireli, oka kina ena veigauna dredre era a lako sese tu kina ena lekutu. Ia a kauti ira na Turaga ki na vanua yalataki—na vanua ni veivakacegui levu cake kei na vuqa na veitemaki, me ra na temaki kina me ra guilecavi Koya tale. Na ivakaro ni Turaga ena Nai Vakarua 6 a nakiti me vukei ira na Isireli me ra dau nanumi Koya tikoga kei na Nona vosa (raica na tikina 6–9).

O dau maroroya vakacava na Turaga kei na Nona vosa e yalomu—“de ko ni guilecavi Jiova”? (Na iVakarua 6:12). E vukei keda vakacava na noda nanuma na Turaga meda dau yalo ni vakavinavinaka ena ituvaki kece sara ni noda bula? Ni o vakavakarau mo veivakavulici, vakasamataka mo railesuva na Nai Vakarua 12:6–9, 12 kei na Luke 17:11–19. Sa rawa talega mo railesuva na itukutuku nei Peresitedi Dieter F. Uchtdorf “Vakavinavinaka ena iTuvaki Cava Ga” (Liaona, Me 2014, 70–77).

Ni da nanuma tiko na Turaga ena rawa ni vukei keda meda vakila na vakavinavinaka ena ituvaki kece sara ni bula.

Vulica Vata

Me tekivutaki e dua na veivosaki me baleta na kena nanumi na Turaga, sa rawa mo sureti ira na itabagone me ra wasea na veika era sotava ni ra guilecava e dua na ka bibi. Na cava a yaco kina? Na cava ena yaco ni da guilecava na veika cecere sa cakava vei keda na Turaga? Sureta na nomu kalasi se kuoramu me railesuva na Nai Vakarua 6:4–9, 20–25. Na cava e vakatavulica vei keda na veitikina oqo me baleta noda nanuma na vinaka ni Kalou ena noda bula? Digitaka e dua se sivia na itaviqaravi e ra mo vukei ira kina o vakavulica me ra vulica na ivakarau me ra vakavinavinaka vakalevu cake kina ena nona vinaka na Kalou ka vakaraitaka na nodra vakavinavinaka Vua.

• Na wiliki vata ni Luke 17:11–19 e rawa ni vukei ira na itabagone me ra vakasamataka na vuna e bibi kina vei keda me da vakaraitaka na noda vakavinavinaka vua na Kalou. Vakasamataka mo taroga na taro ka na vukea na nodra semata na italanoa oqo ki na nodra bula. Me kena ivakaraitaki, na cava eso na vuna e sega ni dau vakavinavinaka kina vua na iVakabula e ciwa vei iratou na tini na vukavuka? Na cava na vuna eda sega kina ni dau vakaraitaka na noda vakavinavinaka vua na Kalou? Kerei ira o vakavulica mera vakasamataka na gauna eso era a vakavinavinaka kina, ena gauna mada ga ni dredre. Na cava na revurevu ni vakaraitaki ni vakavinavinaka e na yaco vei keda? Na cava e ka bibi kina meda dau vakaraitaka na noda vakavinavinaka vua na Kalou? (Raica na idusidusi vakaivolanikalou ena “iVurevure Veitokoni” me baleta eso na isaunitaro.) Na cava eda rawa ni cakava meda vakaraitaka kina na noda vakavinavinaka vua na Kalou?

• E vuqa tu na serenilotu ni vakacaucau kei na vakavinavinaka, me vaka na “Noqu Kalou Au Kurabui ka Galu” kei na “Wilika Na Nomu Kalougata”(Serenilotu, naba 44,144). Sa rawa mo kerei ira na itabagone mera vakasaqara ena qaqa ni sere oqo na veika era vakila ni ra vakavinavinakataka. Sureti ira me ra wasea na veika era sa kunea ka vakamacalataka na vuna era vakavinavinakataki ira kina. Sa rawa mo ni lagata vata e vica na sere oqo.

• Na itukutuku nei Peresitedi Dieter F. Uchtdorf “Vakavinavinaka ena iTuvaki Cava ga” e vukei keda meda kila vakavinaka na sala meda vakavinavinaka vakalevu cake kina. E dua na sala mera vukei kina na itabagone mera vulica mai na itukutuku oqo o ya mera wasei ira vakailawalawa lalai ka solia ki na ilawalawa yadua e dua na iwase ni itukutuku. Kerei ira mera wasea e dua na malanivosa se yatuvosa era nanuma ni umani vata na veika a vakavulica o Peresitedi Uchtdorf. Sureti ira me ra wasea e dua na ka era sa vulica me baleta na vakavinavinaka. E rawa talega ni ra sarava na vidio “Peresitedi Russell M. Nelson ena Kaukauwa Veivakabulai ni Vakavinavinaka” (ChurchofJesusChrist.org). Na cava e rawa ni da cakava me da “vakavinavinaka ena ituvaki cava ga,” se cava ga na ka era tu kina? Na ivakaraitaki cava soti eda sa raica vei ira na tamata era dau vakavinavinakataka se cava ga na dredre ni nodra bula?

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma ni kua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Mosaia 2:19–24 (E dodonu meda vakacaucautaka ka vakavinavinaka vua na Kalou)

• Alama 34:38; 37:37; Vunau kei na Veiyalayalati 46:32; 59:7, 15–21 (Meda vakavinavinakataka na ka kecega)

• Same 107:8–9; Filipai 4:6–7; Vunau kei na Veiyalayalati 78:19 (Veivakalougatataki ni vakavinavinaka)

• Dale G. Renlund, “Vakasamataka na Vinaka kei na Cecere ni Kalou,” Liaona, Me 2020, 41–44

• “Vakavinavinaka,” Me iSakisaki ni iTabagone (ivolalobi, 2011), 18

Veivakavulici ena iVakarau ni iVakabula

Na iVakabula e kilai ira era dau muri Koya, ka kila o cei ira rawa ni vaka. Na kila ka oqori e vakauqeta na ivakarau e vakavulici ira kina o Koya. O na vulica vakacava na veika era taleitaka, gagadre, kei na nodra bolebole o ira o vakavulica me rawa ni o vakavulici ira vakavinaka cake?