12 ni June

Au Na Rogoca Vakacava Na Domo ni Turaga?

Ruci; 1 Samuela 1–3

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Na cava so e sotavi wale tikoga oqo e sa vakaqaqacotaka na noda ivakadinadina?

• Nodra vukei o ira era gadreva tu na veivuke. O cei e gadreva na noda veivuke kei na masu? Na cava eda vakauqeti me da cakava me vukei ira?

• Sureti ni tamata kecega me ra ciqoma na kosipeli. E rawa vakacava ni da dua na rarama vei ira na lewe ni matavuvale se itokani era sega ni duavata ena noda vakabauta?

• Vakaduavatataki ni matavuvale ki na tawamudu. Eda na vakaraitaka vakacava na loloma kei na veitokoni ki na noda matavuvale ka vakayaco veisau vinaka ena noda itikotiko?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

E vuqa na lewe ni nomu kalasi se kuoramu e rawa ni ra semati vua na gonetagane o Samuela. Ni sa vosa vua na Turaga, a sega ni veirauti na veika e sotava o Samuela kei na ivakatakila me kila kina na domo ni Turaga. Na daunivakasala nei Samuela, o Ilai, a rawa ni vukei Samuela me vulica me kila na domo oqo. Me vakataki Ilai, sa nomu na madigi mo vakadinadinataka vei ira o vakavulica ni vinakata na Turaga me vosa vei ira. E rawa ni o vukei ira me ra vulica me ra kila na domo ni Turaga, ena gauna sara mada ga o vulica tiko kina mo rogoci Koya. Sa rawa mo ni vulica vata na veika era sa vakavulica na Nona parofita me baleta na ivakatakila ki na tamata yadua. E rawa ni o vulica mo kaya vua na Turaga, me vaka a cakava o Samuela, “Mo ni vosa mai; niu sa vakarorogo na nomuni tamata” (1 Samuela 3:10).

Me ikuri ni wiliki ni 1 Samuela 3 ena macawa oqo, sa rawa mo vakavakarau mo veivakavulici ena nomu wilika na itukutuku nei Peresitedi Russell M. Nelson “Rogoci Koya” (Liaona, Me 2020, 88–92).

E kerei keda o Peresitedi Nelson meda vakarabailevutaka na noda noke vakayalo me ciqoma na ivakatakila.”

Vulica Vata

Me vakarautaki ira o vakavulica me baleta na veivosaki nikua, navuca mo kerei ira me ra railesuva na 1 Samuela 3:1–14. Sureti ira me ra wasea na veika era sa vulica mai na itukutuku oqo me baleta na rogoci ni domo ni Turaga. Na cava eso tale na sala e dau veitaratara kina kei keda na Turaga? Na vei itaviqaravi oqo e rawa ni vukei ira na itabagone me vakatitobutaka na nodra kila vakavinaka na ivakatakila yadua.

• Oqo e dua na sala me ra vukei kina o ira o vakavulica me ra kila vakavinaka cake na ivakarau ni kena ciqomi na ivakatakila. Sa rawa mo vola ena vava ni volavola na tiki ni ivolanikalou e vakaturi tiko ena “iVurevure Veitokoni” (se so tale o kila). Sureti ira na itabagone me ra wilika na ivolanikalou yadua. Mera qai vola ena vava ni volavola e toka tikiva na tikina yadua e vakavulica tiko na ivolanikalou me baleta na ciqomi ni ivakatakila ki na tamata yadua. Sureti ira me ra wasea na veika era sa sotava ena nodra vakasaqara ka ciqoma na ivakatakila. Kevaka e ganita, wasea na veika o sa sotava.

• Eda ciqoma na veivakalougatataki cecere ni da vulica me da rogoca na domo ni Turaga. Sa rawa mo tekivuna e dua na veivosaki me baleta na ka oqo ena nomu kerei ira na itabagone me ra wasea na vuna era na gadreva kina na ivakatakila. Qai kerei ira mera vakasaqara ena itukutuku nei Peresitedi Russell M. Nelson “Rogoci Koya.” Sureti ira me ra vaqara na ivakasala ka na vukei ira me ra kila na ivakarau me ra rogoca kina na domo ni Turaga. E rawa talega ni o vakaraitaka e dua se sivia na vidio mai na iKomuni ni “Rogoci Koya” (ChurchofJesusChrist.org/media). Na cava na vuna e bibi kina vei keda meda vulica meda rogoca na domo ni Turaga? Vakayaloqaqataki ira na itabagone me ra vola ena nodra ivolaniveisiga se ena tiki ni pepa eso me vakaraitaki ena nodra itikotiko.

• O ira na itabagone o vakavulica era na rairai vakasamataka tu beka na sala me ra kila kina na gauna e vosa tiko kina vei ira na Yalo Tabu. Vakasamataka mo vakaraitaka na vidio “E Rawa Vakacava Meu Kila na Kedrau Duidui na Yalo Tabu kei na Veika Au Vakila?” kei na “E Rawa Vakacava Meu Vakila Vakawasoma Cake na Yalo Tabu?” mai na “Veivosaki e Matanavotu kei Peresitedi Eyring kei Elder Holland” (ChurchofJesusChrist.org). Na cava eda vulica mai na vidio oqo me baleta na kilai vakamatata ni veivakauqeti ni Yalotabu kei na noda vakanananu? Sa rawa ki na lewe ni kalasi se kuoramu mera wasea na sala era na sauma kina e dua na itokani ka tautauvata na taro kei na kena e veivosakitaki ena vidio oqo.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma ni kua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veimaliwai kei Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• 1 Tui 19:9–12; Ilamani 5:29–31; Vunau kei na Veiyalayalati 6:14–16, 21–23; 8:2–3; 11:12–14 (Na sala e dau vosa kina vei keda na Turaga)

• Vunau kei na Veiyalayalati 9:7–9 (Na ivakatakila e gadreva na noda vakasama kei na vuli vakai keda)

• Ronald A. Rasband, “Meda sa Liutaka Tu,” Liaona, Me 2017, 94–96

• A vakavulica o Peresitedi Russell M. Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, veivakacegui kei na veivakauqeti e veigauna ni Yalo Tabu. Kemuni na taciqu kei na ganequ lomani, au sa masuti kemuni mo ni vakalevutaka na nomuni rawa ka vakayalo me ciqomi kina na ivakatakila” (“iVakatakila ki na Lotu, iVakatakila ki na Noda Bula,” Liaona, Me 2018, 96).