26 ni June

Na Cava e Bibi kina na Tiko Savasava ena iTuvatuva ni Kalou?

2 Samuela 5–7; 11–12; 1 Tui 3; 8; 11

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na iToko ni Goneyalewa se na Itoko ni Kuoramu ni Matabete i Eroni Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Meda na tiko voleka vakacava vua na iVakabula? Eda sa saga tiko vakacava meda vakataki Koya vakalevu cake?

• Nodra vukei o ira era gadreva tu na veivuke. O cei e sa tiko e na noda vakasama na gauna oqo? Eda na vukei ira vakacava na tamata yadua oqo?

• Sureta na tamata kecega me ra ciqoma na kosipeli. Eda na sauma vakacava na nodra taro na noda itokani me baleta na Lotu ena sala e vaqaqacotaka na nodra vakabauta na iVakabula?

• Vakaduavatataki ni matavuvale ki na tawamudu. Na cava eso na sala e rawa ni da sema vakavinaka cake kina vei ira na isema ni lewe ni matavuvale, me vakataki ira na tubudra kei na tavaledra?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki e dua na iliuliu ni itabaqase se na itabagone; e rauta ni 25-35 na miniti

Vakarautaki Iko Vakayalo

Na Tamada Vakalomalagi, e vinakata me da marau, e solia vei keda na lawa ni tiko savasava. Kei Setani, e vinakata o koya me da rarawa, e vakavuvulitaka ni lawa oqo e sega ni bibi. E cakava na ka kece e rawata me temaki keda me da vakayacora na ivalavala ca ni veiyacovi. Sa rawa mera vakayarayarataki na itabagone ena iyaloyalo kei na itukutuku e veisaqasaqa kei na veika e vakavulica na Kalou me baleta na veiyacovi. E gadrevi vei keda yadua me da qarauna na veitemaki vakaoqori ka segata me da maroroya na noda vakanananu, vosa, kei na ivalavala me savasava ena noda bula taucoko. Eda vulica na lesoni oqo mai na veika rarawa a sotava o Tevita na Tui. O koya e dua na ivakaraitaki ni yalodina cecere. Ia a sa muria ga na veitemaki ka voroka na lawa ni tiko savasava (raica na 2 Samuela 11:1–5).

E rawa ni o vakavakarau mo veivakavulici ena wiliki ni 2 Samuela 11, na itukutuku nei Elder David A. Bednar “Eda Vakabauta na Tiko Savasava” (Liaona, Me 2013, 41–44), kei na ivurevure tale eso me baleta na tikosavasava. Na cava e rawa ni vakauqeti ira na lewe ni kalasi se kuoramu me ra raica na tiko savasava me vaka e raica na Kalou? Na cava e rawa ni vukei ira me ra cata na sala e raica tiko kina o Setani?

Me da yalodina tikoga ki na lawa ni tiko savasava ni Kalou, e dodonu me da segata e veisiga me da maroroya na noda vakanananu, vosa, kei na ivalavala me savasava.

Vulica Vata

Oqo e dua na sala me vakamacalataki kina na ulutaga ni tiko savasava ka vukei ira o vakavulica me ra railesuva na veika era sa wilika ena ivolanikalou. Vola na vosa Tevita kei Josefa ena vava ni volavola. Qai railesuva vata na 2 Samuela 11:1–5 kei na Nai Vakatekivu 39:7–12. Erau a sauma vakacava o Tevita kei Josefa na veitemaki me rau vakayacora na ivalavala ca ni veiyacovi? Na cava eda sa vulica mai na nodra ivakaraitaki? Vakayagataka na itaviqaravi eso oqo se so na nomu mo vakauqeta na veivosaki me baleta na vuna e bibi kina na tiko savasava ena ituvatuva ni Kalou.

• E rawa ni yaga vei ira na itabagone o vakavulica na kena vakatakilai na ivakatagedegede ni Turaga ni bula savasava ni veiyacovi. Sureti ira me ra railesuva na “Bula Savasava ni Veiyacovi” ena Me iSakisaki ni iTabagone ([ivolalailai, 2011], 35–37) se na ikava ni parakaravu ni “Na Matavuvale: Ai Vakaro ki Vuravura Raraba” (ChurchofJesusChrist.org). E duidui vakacava na ivakavuvuli ni Turaga me baleta na veiyacovi mai na ka e vinakata o Setani meda vakabauta? E rawa ni ra railesuva na itabagone “Na Matavuvale: Ai Vakaro ki Vuravura Raraba,” ka vaqara na itukutuku e vakamacalataka na vuna e bibi kina na bula savasava ni veiyacovi ki na ituvatuva ni marau nei Tamada Vakalomalagi. Na cava eda vulica mai na veimalanivosa oqo e vukei keda meda bula dodonu tiko ena vuravura nikua?

• Eso na gauna era sega ni kila vinaka na noda ivakatagedegede ni bula savasava, vakabibi ni duidui na ivakatagedegede oqo mai na veika era vakabauta e vuqa na tamata. Eda na sauma vakacava na nodra taro? Na cava eda vulica mai vei Elder kei Sisita Renlund ena vidio “Na Cava e Bibi kina na Bulataki ni Lawa ni Tiko Savasava?” mai na “Veivosaki e Matanavotu kei Elder kei Sisita Renlund” (ChurchofJesusChrist.org). Sa rawa mera vakasaqara talega na itabagone na ivolanikalou ena “iVurevure Veitokoni” me baleta na itukutuku e vakamacalataka na veivakalougatataki ni tiko savasava. Sa rawa mo kerei ira me ra wasea na nodra nanuma me baleta na vuna era digitaka kina me ra talairawarawa ki na ivakatagedegede ni turaga ni bula savasava ni veiyacovi.

• Na itovo kilai levu e dau vakavulica ni sega ni gadrevi me savasava tu na veiyacovi. Ia na itovo vakavanua e vakawalena na dina me baleta na veivakalougatataki ni tiko savasava kei na rerevaki ni bula tawasavasava. Mo vulica eso tale na ka me baleta na dina oqo, sa rawa ni ra vulica na itabagone na itukutuku nei Elder David A. Bednar “Eda Vakabauta na TikoSavasava.” Eso e rawa ni ra vulica na iwase “Na iNaki ni Meca,” kei na so tale e rawa ni vulica “Na Veivakalougatataki ni TikoSavasava.” Mera qai veiwaseitaka na cava era sa dui vulica. Vakayaloqaqataki ira me ra vola e dua na malani vosa mai na itukutuku oqo era vinakata me ra nanuma ena gauna ka tarava era sotava kina na itukutuku lasu me baleta na veiyacovi. E rawa talega ni o dusimaki ira ki na iwase ka kenaulutaga “Na iVakavuvuli ni Veivutuni.” Veivosakitaka na sala e rawa ni vakabulai ira kece era via veivutunitaka na ivalavala ca ni veiyacovi na iVakabula. Vakananuma vei ira o vakavulica ni rawa ni ra veivosaki kei na nodra itubutubu se na bisopi kevaka e tu na nodra vakatataro se gadrevi me ra veivutuni.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma ni kua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• 1 Koronica 6:19–20 (Na yagoda sa vale ni Kalou)

• Alama 38:12 (Kevaka meda tarova na noda gagano, eda na rawa ni vakasinaiti ena loloma)

• Vunau kei na Veiyalayalati 25:2; 121:45–46 (Na veivakalougatataki ni ivalavala dodonu)

• “Tiko Savasava: Na Cava na Kena iYalayala?” “Nuidei Dina,” “Au Sa Digitaka Meu Savasava” (vidio), ChurchofJesusChrist.org

Veivakavulici ena iVakarau ni iVakabula

Ena veituvaki yadua, sa dau ivakaraitaki ka dauveituberi kina na iVakabula. A vakavulici ira na Nona tisaipeli ena masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina o Koya. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya.