10 ni Jiulai

Na Cava E Bibi Kina me Vakamuri na Parofita Bula ni Kalou?

2 Tui 2–7

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Na cava sa veivosakitaka na matabisopi ena noda bose ni matabose ni itabagone ni tabanalevu? Na ivalavala cava e rawa ni da cakava me yavutaki ena veivosaki oya?

• Nodra vukei o ira era gadreva tu na veivuke. Eda na dodoliga yani vakacava vei ira na tamata ena sala va-Karisito ni da raica e dua na gagadre ka sega ni kila na ka me tukuni?

• Sureti ni tamata kecega me ra ciqoma na kosipeli. Na cava e dua na ka eda sa kunea ena kosipeli i Jisu Karisito e kauta mai vei keda na reki? E rawa vakacava ni da wasea na reki oya vei ira tale eso?

• Vakaduavatataki ni matavuvale ki na tawamudu. Na cava eso na sala eda rawa ni sema vakavinaka cake kina kei ira na isema ni lewe ni matavuvale, me vakataki tubudra kei na tavaleda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

E rairai tiko beka e so na Neamani na tauvi vukavuka vei keda kece (raica na 2 Tui 5:1–15). Me vakataki Neamani, ka sa cudru vakalevu ni tukuna vua na parofita o Ilaisa mo laki sili ga ena uciwai mo vakabulai, eda na sega beka ni kila na vu ni nodra ivakasala na noda parofita. Eda na nanuma beka ni so na nodra ivakasala e sega ni vakaibalebale vei keda ka sega ni baleti keda. Ia sa yalataka na Kalou na veivakalougatataki cecere kevaka eda yalomalumalumu meda muria na parofita (raica na Vunau kei na Veiyalayalati 21:4–7). Sa vukei iko vakacava na nomu muria na parofita mo toro voleka vua na Turaga? Na ivakaraitaki cava tale mai na 2 Tui 4–6 e vakaraitaka na noda vakalougatataki ni da muri ira na parofita bula?

Ni o vakavakarau mo vakavulica na veivakalougatataki e yaco mai ena noda muria na parofita bula, vakasamataka na bolebole era sotava na itabagone. Ena vukei ira vakacava na parofita ena veibolebole oqo ni ra muria na parofita? Sa rawa talega mo wilika na itukutuku nei Elder Neil L. Andersen “Na Parofita ni Kalou” (Liaona, Me 2018, 24–27) se na itukutuku nei Elder L. Whitney Clayton “Na Veika Kecega Sa Kaya Vei Iko Ko Koya, Kitaka” (Liaona, Me 2017, 97–99).

Na vakamuri ni parofita e rawa ni vukei ira na itabagone ena bolebole era sotava.

Vulica Vata

Me tekivutaki e dua na veivosaki, sa rawa mo kerea na lewe ni kalasi se kuoramu yadua (se ilawalawa lalai) me railesuva e dua vei ira na itukutuku oqo: 2 Tui 4:1–7; 5:6–14; 6:8, 13–17. Kerei ira me ra vaqara e dua na ka e vakauqeti ira me ra wilika ka muria na nodra ivakavuvuli na parofita kei na iapositolo nikua. Ni ra sa wasea oti na ilawalawa yadua eso na ka era sa kunea, sa rawa mo kerea e vica na itabagone mera vakacavara na iyatuvosa oqo: “Niu muri ira na parofita kei na iapositolo bula, au …” Me tomani na veivosakitaki ni nodra vakamuri na parofita, digitaka e dua se sivia na vakasama oqo.

• Baleta ga ni ra kune duadua ga na parofita bula ena Nona Lotu vakalesui mai na Turaga, sa rawa vei ira na lewe ni nomu kalasi se kuoramu mera sauma na nodra vakatataro na tani me baleti ira na parofita bula. Sa rawa mo vola ena vava ni volavola na taro eso oqo e rawa ni tiko vei ira na tamata me baleti ira na parofita bula: Na cava na vuna e tiko kina e dua na nomu parofita? E digitaki vakacava e dua na parofita? O kila vakacava ni sa vosa dina tiko na parofita vua na Kalou? E rawa ni ra vaqara na itabagone na isaunitaro ki na veitaro oqo ena ivurevure ena ruku ni “iVurevure Veitokoni Eso.” Sa rawa mera vakatovotovotaka mera sauma na taro oqo kei na so tale era vakayagataka na dina era sa kunea kei na nodra vakanananu kei na veika era sa sotava.

• Ena vukei keda vakacava na vosa ni noda parofita bula ni da sotava na bolebole yadua? Me vukei ira na itabagone mera sauma na taro oqo, sa rawa mo sureti ira mera vola ena vava ni volavola eso na ivakasala kei na veisureti a solia na parofita ena koniferedi raraba sa oti. Na cava eda sa cakava meda cakacakataka kina na veisureti oqo? Na veisau cava eda sa raica ena noda bula ena vuku ni sasaga oqo? Sa rawa mo sureta e dua me wasea na veika a sotava vakaikoya ka a vukei koya kina na ivakasala ni parofita ena dua na bolebole.

• O na vukei ira vakacava o vakavulica me ra kila ni muria na parofita ena vukei ira me ra toro voleka vua na iVakabula? E dua na sala o ya me soli vei ira yadua e dua na kadi lailai ka sureti ira mera wilika na veitiki ni itukutuku nei Elder Neil L. Andersen “Na Parofita ni Kalou.” E rawa ni ra vola ena dua na yasa ni kadi e dua na ka era sa vulica me baleta na sala e rawa ni vukei ira kina na parofita me ra toro voleka yani vei Karisito. Ena yasa kadua ni kadi, e rawa ni ra vola e dua na ka era sa vakauqeti me ra cakava me ra muria kina na parofita. Sureti ira me ra wasea na veika era sa vola.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Emosi 3:7; Vunau kei na Veiyalayalati 1:4, 37–38; Mosese 6:26–27, 32–36; Ulutaga ni Kosipeli,“Parofita,” topics.ChurchofJesusChrist.org; “Na Cava na Vuna Era Tiko Kina na Parofita?” (vidio), ChurchofJesusChrist.org (Na cava na vuna era tu kina na parofita)

• Gary E. Stevenson, “Na Yalona e Dua na Parofita,” Liaona, Me 2018, 17–20 (Sa digitaki vakacava e dua na parofita)

Veivakavulici ena iVakarau ni iVakabula

“Na saumaki dina e sega walega ni kena kilai vakalevu cake na Yalotabu ni vakadeitaka na dina ki lomada; ia meda cakacakataka talega na dina oqori. Me ikuri ni nodra vukei o ira na vuli mera vakila ka kila na Yalotabu, mo vukei ira mera na cakacakataka na veivakauqeti era ciqoma” (Veivakavulici ena iVakarau ni iVakabula, 10).