24 ni Jiulai

Na Veivakalougatataki Cava e Lako Mai ni Ciqomi na Cakacaka Vakalotu ni Valetabu?

Esera 1; 3–7; Niemaia 2; 4–6; 8

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Eda sa raica vakacava na liga ni Turaga ni cakacaka tiko ena noda bula?

• Nodra vukei o ira era gagadre tu. E rawa vakacava ni da veitokoni vakai keda ena veika eda sotava tiko?

• Sureti ni tamata kecega me ra ciqoma na kosipeli. E rawa vakacava ni da vakayagataka vakavinaka cake na tekinolaji me iyaya ni cakacaka me wasei kina na kosipeli?

• Vakaduavatataki ni matavuvale ki na bula tawamudu. Na cava eda sa cakava tiko me vukea na noda matavuvale me lako mai ki Vua?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

Ni ra sa lesu mai na Jiu ki Papiloni, era kunei Jerusalemi kei na kena valetabu e vakacacani (raica na 2 Tui 25:1–10; 2 Veigauna 36:17–19). Era gadreva na tamata me ra tara tale na valetabu. Ena loma ga ni dua na gauna lekaleka, era sa tekivu tara tale ka reki ni sa vakacavari na valetabu (raica na Esera 3:8–13; 6:16–22). Nikua, ni da sa tamata ni veiyalayalati ni Kalou, eda sa tara valetabu ka reki ni tara e dua na valetabu vou. Cava na vuna? Baleta ni cakacaka vakalotu ni valetabu ena veimuataki ki na veivakalougatataki cecere duadua nei Tamada Vakalomalagi. Era kauta mai na kaukauwa vakayalo. Era dusimaki keda. Ka ra na vukei keda meda vakataka na Kalou ka ciqoma na veika kece sa Nona. (Raica na Vunau kei na Veiyalayalati 84:19–22; 109:22–26.)

O na vukei ira vakacava na itabagone me ra gu-ta na valetabu me vakataki ira na Isireli? O na vukei ira vakacava mera gadreva mai vu ni yalodra taucoko mera veiyalayalati kei na Kalou ena Nona vale savasava? Ni ko vakavakarau mo veivakavulici, sa rawa mo railesuva na itukutuku nei Peresitedi Thomas S. Monson “Na Veivakalougatataki ni Valetabu” (Liaona, Me 2015, 91–93) kei na itukutuku “Na Vuna e Bibi kina na Cakacaka Vakalotu kei na Veiyalayalati” ena temples.ChurchofJesusChrist.org.

Na cakacaka vakalotu ni valetabu ena vukei keda meda vakataka na Kalou ka ciqoma na veika kece e tu Vua.

Vulica Vata

Ni gadrevi mera vukei na lewe ni kalasi se kuoramu mera namaka tiko na veivakalougatataki era rawa ni ciqoma mai na cakacaka vakalotu ni valetabu, sa rawa mo sureti ira mera railesuva na Esera 3:10–13; 6:16, 21–22. Kerei ira me ra wasea na vosa se malanivosa e vakaraitaka na veika era vakila na Jiu e liu me baleta na kena tara vou tale na nodra valetabu. Na cava e dau vakavuna kina na marau na tara ni dua na valetabu? Ena vukei keda vakacava na noda valetabu nikua kei na cakacaka meda cakava meda toro voleka vua na iVakabula? Oqo eso tale na vakasama me vukei ira na itabagone me ra kila na veivakalougatataki e rawa ni ra ciqoma ena valetabu.

• Ena gauna a vakatabuya kina o Josefa Simici na Valetabu e Kirtland, a cabora na masu ni veivakatabui e kune ena Vunau kei na Veiyalayalati 109. Na masu oqo e vakamacalataka e vuqa na veivakalougatataki eda rawa ni ciqoma mai na cakacaka vakalotu ni valetabu. Sa rawa ki na lewe ni kalasi se kuoramu mera vakasaqara na tiki eso ni masu oqo, vakabibi na tikina e 12–26, ka vakasaqara na veivakalougatataki a masulaka o Josefa Simici. Sa rawa mera vola ena vava ni volavola na veika era sa kunea. Sa rawa mo kerei ira na itabagone mera veivosakitaka na sala e rawa ni vaqaqacotaki ira kina ena gauna oqo kei na veisiga ni mataka na veivakalougatataki yadua oqo. Wasea na nomu ivakadinadina me baleta na veivakalougatataki o sa ciqoma mai na cakacaka vakalotu ni valetabu.

• Me vukei ira na lewe ni kalasi se kuoramu me ra wasea na nodra nanuma me baleta na valetabu, kerei ira me ra vakacavara na iyatuvosa oqo: “Niu vakasamataka na valetabu, au vakila …” Sa rawa mo sureti ira mera wilika na imatai ni lima na parakaravu ni itukutuku nei Elder Kent F. Richards “Na Kaukauwa Vakalou” (Liaona, Me 2016, 118–20). E a kaya vei iratou “Na ka levu duadua eda na gadreva o ya na valetabu.” Na cava eda vulica me baleta na kaukauwa e solia vei keda na Kalou mai na cakacaka vakalotu ni valetabu? Mera qai vakasaqaqara na itabagone ena vo ni itukutuku nei Elder Richards, ka vakasaqara na veivakalougatataki e lako mai vei keda ni da vakaitavi ena cakacaka vakalotu ni valetabu. Se sa rawa mera vakasaqara na veivakalougatataki oqo ena itukutuku nei Peresitedi Thomas S. Monson “Na Veivakalougatataki ni Valetabu.”

• Me vukei ira na lewe ni kalasi se kuoramu mera vakasamataka vakatitobu na solibula eso era sa tu vakarau me ra ciqoma na veivakalougatataki ni valetabu, sa rawa mo vakaraitaka na vidio “Na Valetabu e Bikeni” (ChurchofJesusChrist.org). Na cava na vuna a lomasoli kina na matavuvale na Mou Tham me ratou solibula vakalevu kina me ratou lako ki na valetabu? (Raica talega na Thomas S. Monson, “Na Valetabu Savasava—e Dua na Bikeni ki Vuravura,” Liaona, Me 2011, 90–94.) Na solibula cava soti eda cakava meda na ciqoma kina na veivakalougatataki ni valetabu nikua? E rairai e dua beka sa qai lako mai ki na valetabu e rawa ni lewena na soqoni ka wasea na veika e sotava. Sa rawa mo sureti ira na itabagone mera vakasaqara ena itukutuku nei Elder Ronald A. Rasband “Vakaturivua na Turaga” (Liaona, Nove. 2020, 22–25) ka wasea na veivakalougatataki ni tiko e dua na ivolatara ni valetabu. E rawa talega ni o railesuva vata na taro ni ivolatara ni valetabu (raica na Russell M. Nelson, “iOtioti ni Vosa,” Liaona, Nove. 2019, 120–22).

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma ni kua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veimaliwai kei Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Quentin L. Cook, “Raici Iko ena Valetabu,” Liaona, Me 2016, 97–100

Veivakavulici ena iVakarau ni iVakabula

“Ni o veivakatavulici, mo kakua ni tukuna walega na itukutuku, vukei na itabagone mera kunea na vei dina ni kosipeli vakai ira ena ivolanikalou kei na nodra vosa na parofita” (Veivakavulici ena iVakarau ni iVakabula, 28)