14 ni Okosita

Au na Kunea Vakacava na Reki ena Noqu Muria na iVakabula?

Same 1–2; 8; 19–33; 40; 46

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Eda sa kunea tiko vakacava na reki ena noda muri Jisu Karisito?

• Nodra vukei o ira era gadreva tu na veivuke. O cei ena noda tabanalevu se itikotiko e gadreva na noda veivuke? E rawa vakacava ni da vukei ira?

• Sureti ni tamata kecega me ra ciqoma na kosipeli. Eda na veivukei vakacava vakai keda meda vakavakarau ki na veiqaravi vakadaukaulotu?

• Vakaduavatataki ni matavuvale ki na tawamudu. Eda na cau vakacava ki na sasaga ni noda tabanalevu meda cakava na tuva kawa kei na cakacaka ni valetabu?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

Na cava e kauta mai vei iko na reki? Era na kaya na tamata ni ra na kunea na reki ena gauna vata kei ira na itokani kei na matavuvale, e dua na ka taleitaki, se dua mada ga na siga ka sega kina na veivakatovolei. E vakatavulica o Peresitedi Russell M.Nelson: “Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula. Ni vakanamata na noda bula ki na ituvatuva ni veivakabulai ni Kalou … vei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. E yaco mai na reki baleti Koya” (Reki kei na Bulabula Vakayalo,” Liaona, Nove. 2016,82). E vuqa na Same era tukuna na itukutuku vata oqo: “Kemuni na vakatakila mai vei au na sala ni bula: Sa ka uasivi vakaidina na marau sa tu e matamuni” (Same 16:11).

Vakasamataka mada eso na ibolebole era sotava tiko na lewe ni nomu kalasi se kuoramu. O na vukei ira vakacava me ra kila ni reki dina e yaco mai ena kena cakacakataki na vakabauta na iVakabula—ena gauna sara mada ga ni dredre? Tugana vakatitobu na veitaro oqo ena nomu vakavakarau mo veivakavulici. Vakaraica na veitikina veisemati e rawa ni o wasea ki na nomu kalasi se kuoramu ena Same se ena itukutuku nei Peresitedi Nelson “Reki kei na Bulabula Vakayalo.”

Na reki dina e yaco mai ena cakacakataki ni vakabauta na iVakabula, ena gauna sara mada ga ni dredre.

Vulica Vata

Sa rawa mo sureti ira na lewe ni nomu kalasi se kuoramu mera railesuva e vica vei ira oqo: Same 1; 8; 19; 23; 27. Na cava eda vulica mai na Same oqo ena sala e vakavu reki kina vei keda na kosipeli? Mo qai vakayagataka e dua se sivia na itaviqaravi oqo me vukei ira o vakavulica mera kila vakavinaka cake ni reki dina e yaco mai ena noda muri Jisu Karisito.

• Eda vinakata taucoko me da kunea na reki, ia e dodonu me da kila na veika e kauta mai na reki dina kei na veika e veimuataki ki na rarawa. Kerei ira na itabagone me ra wasea eso na ka e kauta mai vei ira na reki kei na vuna era cakava kina na veika oqo. Vola ena vava ni volavola “Sa sucu na tamata, me ra rawata na marau” (2 Nifai 2:25). Mo qai sureti ira na itabagone, vaka tamata yadua se ilawalawa lalai, me ra railesuva e dua se sivia na ivolanikalou ena “iVurevure Veitokoni” ka vola na ka era raica e veimuataki ki na reki. E rawa talega ni o vakaraitaka na vidio “E Rawa ni da Kunea na Marau” (ChurchofJesusChrist.org). Na cava eso na sala era tovolea kina na tamata me ra kunea na reki e veimuataki sara ga ki na rarawa? Sa kauta mai vakacava vei keda na reki na iVakabula?

• Eda kila kece na tamata era sotava tu na bolebole e dina ga ni ra saga tiko nodra vinaka taucoko mera bulataka na kosipeli. E rawa vakacava ni o vukei ira o vakavulica me ra kila ni rawa ni da kunea na reki ena gauna mada ga e bolei tiko kina na noda bula? Sa rawa mo kerei ira mera railesuva na itukutuku nei Peresitedi Russell M. Nelson “Reki kei na Bulabula Vakayalo” se na itukutuku nei Peresitedi Steven J. Lund “Kune Marau vei Karisito” (Liaona, Nove. 2020, 35–37). Na ivakaraitaki cava eda kunea me baleta na tamata era kune reki vei Karisito se cava ga na nodra ibolebole? Na cava eda vulica mai na ivakaraitaki eso oqo? Na cava eso na ka sotavi eda rawa ni wasea?

• O keda kece eda rawa ni vakila na nuiqawaqawa kei na lomaocaoca ni da sotava na veibolebole ni bula oqo. Vei ira eso, na vakanananu oqo sa ivalu ni bula taucoko. Ena yaga ki na nomu kalasi se kuoramu e dua na veivosaki me baleta na veibolebole oqo ka na rawa ni vukei ira vakacava na iVakabula era vakaleqai tu ena nuiqawaqawa kei na lomaocaoca. Me tekivu na veivosaki oqo, sa rawa mo kerei ira na itabagone me ra railesuva na itukutuku nei Elder Jeffrey R. Holland “Vaka na Bilo Kavoro,” vakabibi na iotioti ni va na parakaravu (Liaona, Nove. 2013, 40–42), se itukutuku nei Sister Reyna I. Aburto “Veidraki Kece, Jisu Tu Vei Au!” (Liaona, Nove. 2019, 57–59). Sureti ira na lewe ni kalasi se kuoramu me ra vaqara na dina e vakaibalebale vei ira ka wasea na veika era sa kunea. Vakayaloqaqataki ira na itabagone me ra veitalanoa vata kei na dua na itubutubu se iliuliu nuitaki se sikova na mentalhealth.ChurchofJesusChrist.org kevaka era nanuma ni ra gadreva na veivuke.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Maciu 5:1–12; 1 Pita 4:12–13; 2 Nifai 2:25–27; Mosaia 2:41; 3:3–7; 4:2–3; Alama 36:16–22; 4 Nifai 1:15–16 (Na sala me kunei kina na reki)

• D. Todd Christofferson, “Na Nodra Reki na Yalododonu,” Liaona, Nove. 2019, 15–18

• “iTatarovi ni Kukuna kei na Veiqaravi,” ChurchofJesusChrist.org

Veivakavulici ena iVakarau ni iVakabula

Na iVakabula e kilai ira vinaka o ira e vakavulica—kei na vanua e rawa ni ra na yacova. Ni ra sotava na dredre, a tomana tikoga o Koya me lomani ira. Ko na vakaraitaka vakacava ni ko lomani ira ka tokoni ira o vakatavulica?