28 ni Okosita

Ena Vukei Au Vakacava na iVakabula ena Noqu Gauna ni Veivakatovolei?

Same 102–103; 110; 116–119; 127–128; 135–139; 146–150

Veivakasalataki Vata

Me liutaka e dua na mataveiliutaki ni kuoramu se kalasi; e rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava na veika sa veivosakitaki.

• Bulataka na kosipeli. Na veika cava soti sa yaco oti sa kauti keda vakavoleka sara vua na Tamada Vakalomalagi kei Jisu Karisito?

• Nodra vukei o ira era gadreva tu na veivuke. E dua beka e se qai toki vou mai ki na neitou tabanalevu se lewena na Lotu? E rawa vakacava meda vukei ira me ra vakavakarau?

• Sureti ni tamata kecega me ra ciqoma na kosipeli. Na itaviqaravi cava soti sa yaco tiko ka rawa ni da sureti ira na noda itokani me ra tiko kina?

• Vakaduavatataki ni matavuvale ki na tawamudu. Na sasaga cava soti e rawa ni da cakava me da vola kina na keda itukutuku makawa?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni bose.

Vakatavulica na iVunau

Liutaki mai vua e dua na iliuliu itabaqase se na itabagone; e rauta ni 25-35 na miniti

Vakarautaki Iko Vakayalo

Na ibolebole eda sotava e rawa ni vakavuna meda oca, lomaocaoca, vakadrukai, ka galili. Era kila na dauvolaivola ni Same na yalo oqori ka vakaraitaka vei ira ena qaqa: “Sa vakacataki na lomaqu, ka sa malai me vaka na co; … Au sa vakatawa, ka sa vaka na separo ni sa tiko duaduaga mai na dela ni vale” (Same 102:4, 7). Ia ena kena kaukauwa ga, era vakadinadinataka ni vuki vua na iVakabula ena kauta mai na vakacegu: “Mo vakavinavinaka vei Jiova, na yaloqu, Ia mo kakua ni guilecava na nona ka ni loloma kecega: O koya sa bokoca na nomui valavala ca kecega; O koya sa vakabulai iko mai na kemu mate kecega; O koya sa vakabulai iko mai na rusa; O koya sa vakaisalataki iko e na ka ni loloma kei nai valavala vakayalololoma sara” (Same 103:2–4).

Vakasamataka na veivakalougatataki ena yaco mai vei ira na lewe ni nomu kalasi se kuoramu ni ra kila vakavinaka cake na sala e rawa ni vukei ira kina na iVakabula ena nodra veivakatovolei. E sa vukei iko beka vakacava na iVakabula? Ni o vakavakarau mo veivakavulici, e rawa ni o railesuva na itukutuku nei Peresitedi Henry B. Eyring “Vakatovolei, Vakadinadinataki, ka Vakavinakataki” (Liaona, Nove. 2020, 96–99) kei na “Dredre” ena Ulutaga Vakosipeli (topics.ChurchofJesusChrist.org).

Ena vukei keda ka vakacegui keda na iVakabula ena noda vakatovolei.

Vulica Vata

Sa rawa mo tekivu ena nomu kerei ira na lewe ni kalasi se kuoramu mera railesuva na Same 102, 103, kei na116, ka vakaraica na sala e vukei keda kina na iVakabula ena noda sasaga meda ulabaleta na veivakatovolei. E rawa ni ra cakacaka yadudua se vakailawalawa me ra vola e vica na iyatuvosa me baleta na veika era sa kunea ka wasea na veika era sa vola. Digitaka e dua se sivia na itaviqaravi oqo me vukei ira me ra kila vakatitobu cake na ulutaga oqo.

• Na sere ivakatagi tabu e dau sureta na Yalo ka vakavulica na ivunau ena dua na ivakarau kaukauwa sara. Vakasamataka mo railesuva e dua na serenilotu me baleta na sala e vukei keda kina na iVakabula ena noda vakatovolei, me vaka “Na Yavu Tudei” (Serenilotu, naba 43). Na cava e vakavulica na serenilotu me baleta na veivuke e rawa ni solia vei keda na iVakabula? Mera qai railesuva na itabagone na malanivosa ni ivolanikalou ena ““iVurevure Veitokoni.” E rawa ni yaga vei ira me ra vola e dua na malanivosa mai na serenilotu se dua na ivolanikalou e vakananuma vei ira me ra vakasaqara na iVakabula ena nodra dredre.

• Na itukutuku nei Peresitedi Henry B.Eyring “Sa Vakatovolei, Vakadinadinataki, ka Vakavinakataki” ena rawa ni vukei ira o vakavulica mera kila vakavinaka cake na taro vakaoqo: Na cava eso na inaki ni noda vakatovolei vakayago? Ena vukei keda vakacava na iVakabula ena noda ibolebole? Na cava eda rawa ni cakava meda rawata kina na veivuke kei na kaukauwa ni iVakabula? Sa rawa mo vola na veitaro oqo ena vava ni volavola. Sa rawa vei ira na lewe ni kalasi se kuoramu mera vakasaqara na isaunitaro ena itukutuku nei Peresitedi Eyring. Me ivakaraitaki, na cava eda vulica mai na italanoa baleti tinai Peresitedi Eyring ena itekivu kei na icavacava ni itukutuku? Sa rawa mo kerea na tamata yadua mera vakasamataka vakatitobu na sala mera vakayagataka kina na veika era sa vulica ki na nodra vakatovolei. Eso na itabagone era na tu vakarau beka me ra wasea na nodra nanuma.

• E tukuna o Sisita Lisa L. Harkness na itukutuku ni iVakabula ni vakamaravutaka tiko na ca-va me vakavulica ni rawa vei Koya me vakamaravutaka na ca-va ena noda bula (raica na Marika 4:35–41; “Mo Cegu, Mo Maravu Mai,” Liaona, Nove. 2020, 80–82). Sa rawa mo sureta e dua na lewe ni kalasi se kuoramu me vakavakarau mai me mai wasea na veika sa vulica me baleta na iVakabula mai na itukutuku vakaivolanikalou. Na tamata oqo e rawa talega ni vakaraitaka e dua na iyaloyalo (raica na iYaloyalo Vakakosipeli, naba 40). Mera qai railesuva na itabagone na veika a vakavulica o Sisita Harkness me baleta na sala e “tiko kina ena noda waqa” na iVakabula ni da sotava na bolebole. Sa rawa mo sureti ira na tamata yadua me ra wasea na sala sa vukei ira kina na iVakabula ena nodra vakatovolei, oka kina na sala sa vukei ira kina o Koya mai vei ira na tamata tale eso. Vakayaloqaqataki ira na itabagone me ra wasea na veika era sotava vua e dua era kila e gadreva tu na vakacegu ni iVakabula.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veimaliwai kei Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Aisea 53:3–5; Iperiu 2:17–18; Alama 7:11–13; 36:3; Ica 12:27 (Ena vukei keda na iVakabula ena noda veivakatovolei)

• Dieter F. Uchtdorf, “Ena Cakava na Kalou e Dua na Ka e Sega ni Vakasamataki Rawa,” Liaona, Nove. 2020, 51–54

• Cristina B. Franco, “Na Kaukauwa ni Veivakabulai i Jisu Karisito,” Liaona, Nove. 2020, 60–62

• “Ulunivanua me Cabeti” (vidio), ChurchofJesusChrist.org

Veivakavulici ena iVakarau ni iVakabula

“Ni tarogi na taro ka na uqeti ira na vuli mera wasea nodra ivakadinadina ni ivakavuvuli e vakavulici ena rawa ni sala kaukauwa ni kena sureti na Yalotabu. … Na nodra ivakadinadina—kei na nodra ivakadinadina na vo ni lewe ni kalasi—ena tubu cake ni sa cakacaka na Yalotabu me tukuna na ka dina” (Veivakavulici ena iVakarau ni iVakabula, 32).