11 ni Sepiteba

E Rawa Vakacava Meu na Savasava ka Marau Tale ni oti Noqu iValavala Ca?

Aisea 1–12

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvalaka na sala mo cakacakataka kina na veika sa veivosakitaki.

• Bulataka na kosipeli. Ena vukei keda vakacava noda gole vua na Turaga meda sotava kina na bolebole kei na veivakatovolei?

• Qaravi ira era gadreva tu na veivuke. O cei eda kila e gadreva tu na noda masu kei na noda veitokani?

• Sureta na tamata kecega me ra ciqoma na kosipeli. Na ituvatuva cava me wasei kina na kosipeli sa veivosakitaki ena soqoni ni matabose ni itabagone ni tabanalevu? Ena rawa vakacava ni vakaitavi kina na noda kalasi se kuoramu?

• Vakaduavatataka na matavuvale ki na bula tawamudu. Ena vaqaqacotaka vakacava na noda veiwekani kei na Tamada Vakalomalagi kei Jisu na cakacaka ni tuva kawa?

Ena itinitini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

Ni da vakila ni da cala ni oti na ivalavala ca, sa noda na digidigi. Na veika vakilai oqo, ni mosi, e rawa ni veivakalougatataki kevaka ena vukei keda meda veivutuni. Ia e tukuna vei keda o Setani ni kena ibalebale oya ni Kalou e sega ni lomani keda ka tovolea me cakava meda yalolailai ka nuinui ca. Era tiko beka eso o vakavulica era vakacolati tu ena veika vaka oqo. Era na vakataroga beka kevaka era na rawa ni savasava ka marau tale. O na vukei ira vakacava me ra kunea na inuinui ena Veisorovaki ni Vakabula?

A vunauci ira vakadoudou na tamata na parofita o Aisea me baleta na nodra ivalavala ca. Ia a vakadinadinataka talega o koya ena vukuna na iVakabula, “ke sa vaka na ka kulakula na nomudou ivalavala ca, sa na vulavula me vaka na uca vulavula” (Aisea 1:18). Vakasamataka vakatitobu ni o wilika na Aisea 1–12 ena macawa oqo. Na cava ena vakauqeti ira o vakavulica mera gole vei Jisu Karisito ena vakabauta ni icolacola ni nodra ivalavala ca e rawa ni kautani? Vulica tale ga na ivakadinadina i Sisita Sharon Eubank me baleti Karisito ena nona itukutuku “Karisito: Na Rarama sa Cilava na Butobuto” (Liaona, Me 2019, 73–76).

Ena vuku i Jisu Karisito, sa rawa ni kau tani na noda icolacola ni ivalavala ca.

Vulica Vata

Vakarautaka na veivosaki me yavutaki ena Aisea 1–12, e rawa ni o kerei ira yadua na itabagone mera kauta mai ki na soqoni e dua na ka damudamu kei na dua na ka vulavula. E rawa ni o vakaraitaka na veika oqo ni wiliki vata tiko na Aisea 1:16–18. Mera wasea na nodra vakasama na itabagone ena veika era sa vulica mai na veitikina qo. (Raica na veivosaki nei Sisita Sharon Eubank ena tikina e 18 ena “Karisito: Na Rarama sa Cilava na Butobuto.”) Oqo eso tale na itaviqaravi e rawa ni vakauqeta na vakabauta ena kaukauwa ni iVakabula me vakasavasavataki keda vakayalo.

• Ciqomi ni ivakaraitaki vakaivolanikalou ni veivutuni e rawa ni vukei ira o vakavulica mera tara cake nodra vakabauta ni o Jisu Karisito e rawa ni vakasavasavataki ira vakayalo. Sa rawa mo vola ena papa na yaca eso me vakataki Saula (veisau me Paula), Alama Lailai, Sisoromi, kei ira na Anitai-Nifai-Liai. E rawa talega mo vola e rua na iwasewase ni ivolanikalou: Cakacaka 8:3; Mosaia 27:8–10; Alama 11:21–23; Alama 17:12–15 (o ira na tamata oqo ena nodra ivalavala ca) kei na Cakacaka 9:13–20; Alama 36:17–24; Alama 15:5–12; Alama 23:6–12 (ni oti na nodra vuki na tamata oqo vua na iVakabula ka veivutuni). Sa rawa mera vakasotara vata na itabagone na yaca yadua kei na ivolanikalou e vakamacalataka tiko na tamata o ya. Na cava era cakava na tamata oqo me ra veivutuni? Na cava e vakavulica na italanoa oqo me baleta na nona lomasoli na iVakabula me veivosoti? Eda raica beka eso na ivakarau eda rawa ni muria?

• Me vukei ira o vakavulica mera kila vakavinaka cake na vosoti ni ivalavala ca, sa rawa ni o solia vei ira yadua e dua na vosa vakatautauvata se italanoa vakaibalebale mera vulica. Oqo e rawa ni oka kina na gone cidroi (raica na Luke 15:11–24); na iVakabula vaka noda iVakatawa (parakaravu 5–8 ena itukutuku nei Elder Dale G. Renlund “Na iVakatawa Vinaka” [Liaona, Me 2017, 29–32]); kei na dua na piano kavoro (na itekivu ni itukutuku nei Sisita Cristina B. Franco “Na Kaukauwa ni Veivakabulai ni Veisorovaki” [Liaona, Nove. 2020, 60–62]). E rawa ni ra vakalekalekataka na itabagone na vosa vakatautauvata se italanoa vakaibalebale yadua ka veivosakitaka na veika e vakatavulica me baleta na loloma kei na kaukauwa ni veisorovi ni iVakabula.

• Noda kila na bibi ni noda ivalavala ca ena vukei keda ka muataki keda ki na veivutuni. Noda vakila na yalolailai se noda tawayaga ena vuku ni noda ivalavala ca ena sega ni veivuke ka na rawa ni tarovi keda mai na veivutuni. E rawa ni ra wilika vata na nomu kalasi se kuoramu na iwase a kena iulutaga na “Na Rarawa Vakalou” ena itukutuku nei Peresitedi Dieter F. Uchtdorf “O Sa na Rawata Ena Gauna Oqo!” (Liaona, Nove. 2013, 55–57). Na cava na kedrau duidui mo rarawataka na ivalavala ca e veimuataki ki na veivutuni kei na rarawa e veimuataki ki na nuiqawaqawa? (raica talega na 2 Korinica 7:9–10; Momani 2:12–14). Kevaka e dua e vakila ni vakadrukai ena vakilai ni cala kei na yaluma ni ivalavala ca, na cava eda rawa ni kaya me vukei koya me gole vua na iVakabula? Sureti ira na itabagone mera wasea na nodra ivakadinadina ni iVakabula kei na Nona loloma veivueti.

Cakacakataka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veimaliwai kei tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

• Dallin H. Oaks, “Vakasavasavataki mai na Veivutuni,” Liaona, Me 2019, 91–94

• “Na Veivutuni ena Veisorovaki i Jisu Karisito,” ena wase 3 ni Vunautaka na Noqu Kosipeli (2019), 62–63.

• “Repentance: A Joyful Choice” (vidio), ChurchofJesusChrist.org

Veivakavulici ena iVakarau ni iVakabula

“Na nona ivakadinadina na iVakabula sa solia na lewa ki na Nona vosa. … Ni o wasea na ivakadinadina ni ivunau dina, ena vakadeitaka na Yalo na dina ni ivunau ki yalodra o ira o vakavulica” (Veivakavulici ena iVakarau ni iVakabula, 21).