Veiyalayalati Makawa 2022
25 ni Sepiteba. Na Cava na Noda iTavi ena Cakacaka ni Veivakabulai kei na Bula Vakacerecerei? Aisea 40–49

“25 ni Sepiteba. Na Cava na Noda iTavi ena Cakacaka ni Veivakabulai kei na Bula Vakacerecerei? Aisea 40–49,” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau 2022 (2021)

“25 ni Sepiteba. Na Cava na Noda iTavi ena Cakacaka ni Veivakabulai kei na Bula Vakacerecerei?” Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa: Ulutaga Vakaivunau ni 2022

tucake na tabagone e tautuba ni valetabu

25 ni Sepiteba

Na Cava na Noda iTavi ena Cakacaka ni Veivakabulai kei na Bula Vakacerecerei?

Aisea 40–49

ivakatakilakila ni veivakasalataki vata

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala me cakacakataki kina na veika sa veivosakitaki.

  • Bulataka na kosipeli. Na cava eda a veivosakitaka ena soqoni sa oti, kei na veisureti se ilesilesi cava a vakayacori? Na cava eda sa cakava meda cakacakataka kina na veisureti oya?

  • Vukei ira era gadreva na veivuke. Na cava eda rawa ni cakava se tukuna me da dodoliga kina vei ira era galili se vakayawaki ira mai vua na Tamada Vakalomalagi?

  • Sureta na tamata kecega mera ciqoma na kosipeli. Na cava eso na sala eda rawa ni vukei ira kina eso mera vakila na loloma i Jisu Karisito?

  • Vakaduavatataka na matavuvale me tawamudu. Na ivakasala cava eda rawa ni veiwasei kina vakai keda me vukea me vaqaqacotaki noda matavuvale?

Ena itinitini ni lesoni, ke veiganiti, cakava na ka oqo:

  • Vakadinadinataka na ivakavuvuli eso sa vakatavulici.

  • Vakananumi ira na lewe ni kalasi se kuoramu me baleta na ituvatuva kei na veisureti era cakava ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

E matata mai na ivolanikalou ni noda veivuke ena cakacaka ni Turaga e sega ni baleti ira walega na uabula. A se gonetagane voli o Samuela ena imatai ni gauna e vosa kina vua na Turaga. A rairai se goneyalewa beka o Meri ni a sikovi koya e dua na agilosi, ka tukuna ni o koya ena tinana na iVakabula. Ka sa yabaki 14 o Josefa Simici ena gauna a kacivi koya kina na Turaga me vakalesuya mai na kosipeli. Ena dua na gauna lekaleka sa oti, a sureti ira kina na itabagone kece o Peresitedi Russell M. Nelson mera “lewena na mataivalu ni itabagone ni Turaga me vukea na vakasoqoni Isireli (“iNuinui nei Isireli” [lotu ni itabagone e vuravura raraba, 3 ni Jiune, 2018], ChurchofJesusChrist.org). E dina sara, ni a kaya na Turaga, “Ko iko, Isireli, na noqu tamata” (Aisea 41:8), oqo e oka kina o ira kece na Nona tamata ni veiyalayalati, oka kina o ira ena nomu kalasi se kuoramu.

E dina ga ni da veiyalayalati kece me da qarava na Kalou ena gauna eda papitaiso kina, e sega ni o ira kece na itabagone era raici ira tu me ra italai ni Turaga. Era na sega beka ni kila na sala matalia eso e rawa ni ra veivuke kina ena Nona cakacaka. Vakaraica na veimalanivosa ena Aisea 41–44 kei na wase 1.2 ni iVoladusidusi Raraba: Veiqaravi e Na Lotu i Jisu Karisito ni Yalododonu Edaidai ena rawa ni vukei ira na itabagone mera kila na kena ibalebale mera italai ni Turaga.

goneyalewa e taudaku ni valetabu

Sa rawa vakatabakidua vua na tamata gone yadua me cau ki na cakacaka ni veivakabulai kei na bula vakacerecerei.

Vulica Vata

Na Aisea 41–44 e rawa ni vukei ira na itabagone me ra kila na kena ibalebale mera italai ni Turaga. Me tekivutaki e dua na veivosaki, e rawa ni o vola na veitikina vakaoqo ena papa: Aisea 41:8–10; 42:6–7; 43:9–12; 44:21. Na tamata yadua e rawa ni tomika e dua na malanivosa, wilika, ka wasea na veika sa vulica me baleta na kena ibalebale mera italai ni Turaga. Ena sala cava eso eda nona italai kina na Turaga? Na veivakalougatataki cava e yaco mai ni da sa veiqaravi tiko ena Vukuna? Oqo eso tale na sala mera vukei kina o ira o vakavulica mera kauti ira mai na tamata vei Karisito mera vakaitavi vagumatua ena Nona cakacaka.

  • Era kila beka o ira o vakavulica na cava na “cakacaka ni veivakabulai kei na bula vakacerecerei”? Me vukei ira, sa rawa mo lesi ira mera vulica (yadudua se vakailawalawa lalai) e dua vei ira na va na iwasewase ni wase 1.2 ni iVoladusidusi Raraba. Na veiwasewase lalai yadua e vakamacalataka e dua na tiki ni cakacaka. Kerei ira na itabagone me ra vakasamataka vakatitobu na taro vakaoqo: Na cava eso na ka bibi e rawa ni cakava e dua na tamata ena noqu yabaki ni bula me vakaitavi kina ena tiki ni cakacaka ni veivakabulai oqo? Na cava e rawa ni cakava na noda kalasi se kuoramu? Sa rawa ki na tamata yadua se ilawalawa me wasea na veika era sa vulica, vata kei na isau ni taro.

  • Ena yaga vei ira o vakavulica me ra vulica eso tale na ka me baleta na va na tiki ni cakacaka ni veivakabulai kei na bula vakacerecerei—bulataki ni kosipeli i Jisu Karisito, vukei ira era vakaleqai tu, sureta na tamata kecega mera ciqoma na kosipeli, ka vakaduavatataka na matavuvale me tawamudu. E rawa ni ra digitaka e dua na tikina era taleitaka ka vakadikeva eso na ka e semati kina ena ruku ni “iVurevure Veitokoni.” Mera wasea na itabagone na veika era raica e vakauqeti ira mera saumaki vakalevu cake vua na Turaga ka vukei ira na tani mera cakava vakakina. Sa rawa ni ra qai cakava e dua na ituvatuva mera cakava kina e dua na ka ena vukea na kena vakayacori na cakacaka oqo. E rawa ni liutaka na veivosaki oqo na peresitedi ni kalasi se kuoramu.

  • Me vukei ira na itabagone mera vakasamataka vakatitobu na sala e rawa ni ra vakayagataka kina na nodra taledi me kauti ira mai na yalo vei Karisito, sa rawa mo kerei ira yadua mera vulica e dua na iwase ni itukutuku nei Elder John C. Pingree Jr. “Au na Solia Vei Iko e Dua na Cakacaka” (Liaona, Nove. 2017, 32–35). E rawa ni ra wasea na sala e rawa ni vukea kina e dua e sega ni vakadeitaka tiko ni rawa ni veivuke o koya ena cakacaka ni Turaga. E rawa talega ni o railesuva vata na wase “Kunea ka Taracake na iSolisoli Vakayalo” ena itukutuku nei Elder Pingree. E vukei keda vakacava na Turaga meda kunea ka taracake noda taledi?

Cakacaka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na veika era vakauqeti kina.

iVurevure Veitokoni

Veivakavulici ena iVakarau ni iVakabula

“Kevaka era vakila na itabagone ni o vakabauti ira, ena tubu na nodra yalodei ena kedra ituvaki vakalou” (Veivakavulici ena iVakarau ni iVakabula, 28).