9 ni Okotova

Na Cava na Vuna Me iTakele Kina ni Noqu Bula o Jisu Karisito?

Aisea 58–66

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Me, ikuri ni veivakasalataki ena gagadre vakatabakidua ni kuoramu se kalasi, o na rairai via veivosakitaka na vosa kei na itoko eso mai na koniferedi raraba. Ena rawa ni veivuke na taro eso oqo.

• Na vosa kei na itukutuku cava soti e vakaibalebale vei keda? Na cava e vaqaqacotaka na noda vakabauti Jisu Karisito?

• Na cava e vaqaqacotaka na noda ivakadinadina baleti ira na parofita bula? Na cava eda sa vakauqeti me da cakava ena vuku ni veika eda sa vulica se vakila?

• Na cava e gadrevi meda cakava va kalasi se kuoramu me vakananumi kina na ivakasala eda sa rogoca ena koniferedi raraba?

Ena itinitini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

“Au na rekitaki Jiova vakaidina, na yaloqu ena rekitaki koya na noqu Kalou,” a kaya o Aisea, “ni sa vakasulumi au ena isulu ni bula, ka vakaitutuvitaki ena itutuvi ni yalododonu” (Aisea 61:10). Na cava na vuna o “rekitaki Jiova vakaidina” kina? Me vakataki Aisea, ni da kidava na veika sa cakava vei keda na Turaga, eda reki, ka da dau tukuna wasoma na nona “yalololoma levu i Jiova ka vakacaucautaki Jiova” (Aisea 63:7).

Na cava era vakila o ira o vakavulica me baleta na iVakabula? Na cava e rawa ni vukei ira mera lomana ka rokovi Koya vakalevu cake? Na cava e rawa ni vukei ira mera vakila na Nona loloma? Ni ko vakasamataka vakatitobu na veitaro oqo ka wilika na Aisea 58–66, sa rawa talega mo railesuva na itukutuku nei Elder Matthew S. Holland “Na iSolisoli Totoka Cecere ni Luvena” (Liaona, Nove. 2020, 45–47) kei na nei Sisita Cristina B. Franco “Na Kaukauwa ni Veivakabulai ni Veisorovaki” (Liaona, Nove. 2020, 60–62).

Ni da vulica vakalevu cake na veika me baleta na iVakabula, eda sa vakauqeti meda cakava me itakele ni noda bula o Koya.

Vulica Vata

Ni ra vulica na lewe ni kalasi se kuoramu na ilesilesi a talai mai kina o Jisu Karisito me rawata, era na vakauqeti vakalevu cake mera cakava me itakele ni nodra bula na iVakabula. E rawa ni ra vaqara ena Aisea 61:1–3 ka vola ena papa ni volavola na veika sa lumuti tu kina na iVakabula me cakava (raica talega na Luke 4:16–20). A vakayacora vakacava na iVakabula na veitikina oqo ni Nona ilesilesi? E dau vakayacora vakacava o Koya ki na noda bula ena gauna oqo? Na vakasama e ra e rawa ni vukea na nomu kalasi se kuoramu me tomana e dua na veivosaki me baleta na vuna e dodonu me iusutu tiko kina ni noda bula o Jisu Karisito.

• E dau tiko ena koniferedi raraba na itukutuku e vakadinadinataki Jisu Karisito. Sa rawa mo sureta e vica na lewe ni kalasi se kuoramu mera wasea e dua na ka era sa vulica me baleta na iVakabula ena koniferedi raraba. Vakayaloqaqataki ira me ra wasea na nodra nanuma me baleta na iVakabula ena vuku ni veika era sa vulica.

• Na ivolanikalou e rawa ni vukei ira na itabagone me ra kila vakavinaka cake na vuna e dodonu me itakele tiko kina ni nodra bula na iVakabula. Sa rawa mo vola ena papa Na cava na vuna me itakele tiko kina ni noqu bula o Jisu Karisito? Kerei ira na itabagone mera wasea na nodra nanuma. Mo kerei ira (yadudua se vakailawalawa) mera vaqara ena ivolanikalou ena ruku ni “iVurevure Veitokoni” me kunei kina na ikuri ni isaunitaro. Sureti ira na itabagone mera wasea na veika era sa vulica kei na vuna e vakaibalebale kina vei ira.

• Navuca mo kerei ira o vakavulica mera vakamacalataka na siga bibi duadua ena nodra bula. Na cava beka na siga bibi duadua ena itukutuku ni veigauna? Sureti ira mera raica na veika a kaya o Elder Dieter F. Uchtdorf ni sa siga bibi duadua ena railesuvi ni nona itukutuku “Raica na Tamata!” (Liaona, Me 2018, 107–10). Vakayaloqaqataki ira na itabagone mera vakasaqara na veivakalougatataki a yalataka o Elder Uchtdorf kivei ira era “raici” Jisu Karisito. E rawa talega ni ra wasea na veika era sa cakava tiko me itakele kina ni nodra bula e veisiga na iVakabula. E rawa ni o vakayaloqaqataki ira mera vakasamataka na veika e rawa ni ra cakava mera toro voleka kina vei Jisu Karisito ka tuva e dua na lalawa mera cakava kina.

• Kevaka e dua me na tarogi keda se cava na vuna eda vakabauti Jisu Karisito kina, na cava beka eda na kaya? Vakayaloqaqataki ira na itabagone mera wasea na nodra nanuma ka vola ena papa ni volavola. E rawa talega ni o sureti ira mera railesuva na “Se Bula na Karisito: Nodra iVakadinadina na iApositolo” (ChurchofJesusChrist.org) se “Na iLesilesi Vakalou i Jisu Karisito” ena wase 3 ni Vunautaka na Noqu Kosipeli ([2019], 60–61). Vakauqeti ira mera vakasaqara na dina rawarawa eso era na wasea me vakamacalataka na vuna e bibi kina vei ira na iVakabula. E rawa ni ra vakuria na dina era kunea ki na lisi ena papa ni volavola ka veivosakitaka na sala e rawa ni ra wasea kina na dina oqo vei ira na tamata era kila.

Cakacaka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Joni 8:12; 14:6; Roma 8:35–39; 2 Nifai 2:3–9; 9:5–10; Alama 36:3, 27; 3 Nifai 27:14–16, 27; Ica 12:27 (Na cava na vuna e dodonu me itakele kina ni noda bula o Jisu Karisito)

• Becky Craven, “Maroroya na Veisau” (Liaona, Nove. 2020, 58–60)

• “Au Kilai Jisu,” “Loloma i Jisu” (Serenilotu, naba 74, 110)

• “Why We Need a Savior—A Christmas Message about Our Savior Jesus Christ,” “Because of Him” (vidio), ChurchofJesusChrist.org

Veivakavulici ena iVakarau ni iVakabula

“O ira yadua ena nomu kalasi era ivurevure bulabula ni ivakadinadina, raititobu, kei na veika sotavi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula,5).