23 ni Okotova

E Volai tu li e Yaloqu na Kosipeli?

Jeremaia 30–33; 36; Lele 1; 3

Veivakasalataki Vata

E liutaka e dua na mataveiliutaki ni kuoramu se kalasi; 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Mo liutaka na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana mo cakava na veika sa veivosakitaki.

• Bulataka na kosipeli. Na cava eda a veivosakitaka ena soqoni sa oti, kei na veisureti se ilesilesi cava a vakayacori? Na cava eda sa cakava meda cakacakataka kina na veisureti oya?

• Vukei ira era gadreva tu na veivuke. Na cava eda rawa ni cakava se tukuna meda dodoliga yani vei ira era na rairai galili se yawa mai vua na Tamada Vakalomalagi?

• Sureta na tamata kecega mera ciqoma na kosipeli. Na cava eso na sala eda rawa ni vukei ira kina eso mera vakila na loloma i Jisu Karisito?

• Vakaduavatataka na matavuvale me tawamudu. Na vakasama cava so eda rawa ni veiwasei kina vakai keda me vukea me vaqaqacotaka noda matavuvale?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti era cakava ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

A tukuna na Turaga vua na parofita o Jeremaia ni ena veisiga mai muri, ena vakasoqoni Isireli o Koya ka cakava e dua na “veiyalayalati vou” vata kei ira na Nona tamata. A vakaraitaka o Koya, “Ka’u na tugana na noqu vunau ki na lomadra, ka’u na vola talega ki na yalodra; ia ka’u na yaco me’u nodra Kalou, ka ra na yaco ko ira mera noqu tamata” (raica na Jeremaia 31:31–34). Na veisiga oqori sa ikoya edaidai, eda sa tamata ni Kalou. Na veivakavuvuli oqo ena rawa ni uqeti iko—kei ira o vakavulica—mera taroga, Na cava na kena ibalebale me volai e yaloqu na kosipeli? E sa volai tu beka e yaloqu na kosipeli? Kevaka e sega, na cava au na rawa ni cakava kina?

Navuca na sala o na vukei ira kina na lewe ni nomu kalasi se kuoramu mera vakasamataka vakatitobu vakai ira na veitaro oqo. Mo vakavakarau mo veivakavulici, e rawa ni o kunea na itukutuku mo wasea mai na Jeremaia 30–33; 36; mai na itukutuku nei Peresitedi Russell M. Nelson “Me Qaqa Duadua Ga na Kalou” (Liaona, Nove. 2020, 92–95); kei na itukutuku nei Elder D. Todd Christofferson “Ni Ko Sa Saumaki Mai” (Liaona, Me 2004, 11–13).

Ni da lomana na Turaga ka segata me da vuli mai Vua, ena volai e yaloda na kosipeli.

Vulica Vata

Vakauqeti ira na itabagone mera veivosakitaka na Jeremaia 31:31–34. Me caka oqo, sa rawa ni o solia vei ira na uto pepa eso ka volai tu kina e vica na taro me baleta na ibalebale ni kosipeli e yaloda, me vaka na kena e kunei ena “Vakarautaki Iko Vakayalo.” Ni ra cakacaka yadudua, vakayarurua, se vakailawalawa lalai, mera wilika na itabagone na veitikina oqo mai vei Jeremaia ka vakasamataka vakatitobu na sala mera na sauma kina na taro. Mera qai wasea na nodra taro kei na isau ni taro era vakasamataka. Sa koto e ra eso tale na vakasama ka rawa ni vukei iko mo vakavulici ira na itabagone ena sala e rawa ni volai kina e yalodra na kosipeli.

• Ni solia o Mosese eso na iotioti ni nona ivakavuvuli vei ira na Isireli, a vakauqeti ira me ra ciqoma na vosa ni Kalou e yalodra. A vakavulica talega vei ira eso na sala e rawa ni ra cakava kina oqo, me vaka e kunei ena Nai Vakarua 6:3–9. Ni wilika vata vakalasi se kuoramu na veitikina oqo ka veivosakitaka na sala eso eda rawa ni cakava kina na ivakasala nei Mosese. Me baleta eso na vakasama, sa rawa ki na nomu kalasi se kuoramu me sarava na vidio “Come, Follow Me: These Words” (ChurchofJesusChrist.org). Sa rawa talega mera vulica na Alama 5:14, 26–35 mera raica kina na veika a vakavulica o Alama me baleta na sala eda rawa ni maroroya kina na kosipeli sa volai tu e yaloda.

• Ena nona itukutuku “Ni Ko Sa Saumaki Mai,” a vakamacalataka o Elder D. Todd Christofferson na ka eda rawa ni cakava me volai kina e yaloda na kosipeli. Na cava eda vulica mai na imatai ni va na parakaravu me baleta na kena ibalebale me volai e yaloda na kosipeli? Sa rawa mo sureti ira yadua na itabagone mera wilika e dua se sivia na vo ni parakaravu ka vakasaqara na veika e gadrevi meda cakava me yaco kina oqori. Na cava na itavi ni iVakabula? Na cava na noda itavi? Vakauqeti ira na itabagone mera wasea na nodra isaunitaro, vata kei na veivakararamataki tale eso era sa kunea. Na veika cava soti sa vukei keda me volai tu kina e yaloda na kosipeli? Na itavi cava e vakayacora na noda maroroya na noda veiyalayalati ena iwalewale oqo?

• E vakamacalataka o Peresitedi Russell M. Nelson ni vosa na Isireli “e tukuna tiko e dua na tamata ka sa lomasoli me laiva me qaqa na Kalou ena nona bula” (“Me Qaqa Duadua Ga na Kalou,” 92). Sa rawa mo sureti ira na itabagone mera vakasaqaqara ena imatai ni ono na parakaravu ni itukutuku nei Peresitedi Nelson kei na iotioti ni tiki ni itukutuku ka tekivutaki tiko ena “Na taro vei keda yadua.” Kerei ira mera vakaraica e dua na ka e vukei ira mera kila na kena ibalebale mera “laiva me qaqa na Kalou” ena nodra bula. Na cava eda vakila ka cakava ni sa qaqa tiko na Kalou ena noda bula? Na cava e vakavulica o Peresitedi Nelson me baleta na kena volai e yaloda na kosipeli ena vukea vakacava na vakasoqoni vata o Isireli?

Cakacaka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala era na cakacakataka kina ka vaqaqacotaka na nodra veiwekani kei na Tamada Vakalomalagi kei Jisu Karisito.

iVurevure Veitokoni

• Henry B. Eyring, “Write upon My Heart” (Liahona, Nov. 2000, 85–87)

• Linda K. Burton, “E Volai Tu Beka e Yaloda na Vakabauta ni Veisorovaki i Jisu Karisito?” (Liaona, Nove. 2012, 111–15)

Veivakavulici ena iVakarau ni iVakabula

“Na ivunau e kune ena ivolanikalou kei na nodra vosa na parofita nikua e tiko kina na kaukauwa me vukica na yalo, ka vakalevutaka na vakabauta. Ni o ni ‘tovolea na savasava ni vosa ni Kalou,’ kei ira o vakavulica ko ni na qai raica ni ‘dau vakayarayarataki ira na tamata mera vakayacora na [ka] dodonu’ (Alama 31:5)” (Veivakavulici ena iVakarau ni iVakabula, 5).