13 ni Noveba

Meu na Ciqoma Vakacava na Veisovaraki ni Yalo ni Turaga?

Osea 1–6; 10–14; Joeli

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana mo cakava na veika sa veivosakitaki.

• Bulataka na kosipeli. Na cava so e sotavi wale ga oqo e vakaqaqacotaka na noda ivakadinadina?

• Vukei ira era gadreva tu na veivuke. O cei e gadreva na noda veivuke kei na masu? Na cava eda sa vakauqeti kina me da cakava me vukei ira?

• Sureta na tamata kecega mera ciqoma na kosipeli. E rawa vakacava me da dua na rarama vei ira na lewe ni matavuvale se itokani era sega ni duavata kei na noda vakabauta?

• Vakaduavatataka na matavuvale me tawamudu. Eda na vakaraitaka vakacava na loloma kei na veitokoni e levu cake ki na noda matavuvale ka vakayaco veisau vinaka ena noda itikotiko?

Ena itinitini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

E sega ni vakatarotutu ni da bula tiko ena gauna ni veilecayaki kei na rere. Na parofita ni Veiyalayalati Makawa o Joeli a vakamacalataka na noda gauna—na “siga i Jiova”—me “siga butobuto ka loaloa” ka “sa ka levu ka rerevaki sara” (Joeli 2:1–2, 11). Ia oya e sega ni kena ibalebale ni sa inuinui ca wale na noda veisiga. Vakasamataka mada na yalayala oqo nei Elder Dieter F. Uchtdorf: “Dina ga ena so na gauna eda vakila ni vaka me da sa buluti tu ena veivakatovolei ni bula se vakavolivoliti tu ena butobuto ni lomada, na loloma ni Kalou kei na veivakalougatataki ni kosipeli vakalesui mai nei Jisu Karisito ena vakavuna me kadre mai a dua na ka sega ni vakasamataki rawa” (“Ena Cakava na Kalou e Dua na Ka e Sega ni Vakasamataki Rawa,” Liaona, Nove. 2020, 52).

Okoya gona ni o sa raica na butobuto kei na loaloa ni noda gauna, nanuma tiko ni sa yalataka talega na Turaga—na veivakalougatataki—ka sega ni vakasamataki rawa: “Ka’u na sovaraka na Yaloqu kivei ira na tamata kecega; ka ra na parofisai kina ko ira na nomudou gonetagane kei ira na nomudou goneyalewa” (Joeli 2:28; raica talega na Josefa Simici—Ai Tukutuku 1:41). Raica matua na yalayala matata ni na sovaraki mai na Yalo ni Kalou vei ira na cauravou kei na goneyalewa. Na cava na vuna o nanuma kina ni sa ka bibi vei ira o vakavulica mera kila vinaka o ya? Vakasamataka vakatitobu na taro oqo ni o wilika na Joeli 2 kei na itukutuku nei Elder Uchtdorf ena nomu vakavakarau mo veivakavulici.

Sa yalataka tu na Turaga ni na yaco ena iotioti ni gauna, ena sovaraka mai na Yalona, ka “ra na parofisai kina ko ira na nomudou gonetagane kei ira na nomudou goneyalewa” (Joeli 2:28).

Vulica Vata

Me vukei ira o vakavulica mera kila vinaka na Joeli 2:28–29, sa rawa mo biuta e dua na iyaya ena dua na bilo ka qai dua me sovaraka kina na wai. E vukei keda vakacava oqo meda kila vinaka na kena ibalebale me “sovaraka [mai na Yalona] kivei ira na tamata kecega” na Turaga? Era sa vakayacori tiko vakacava na parofisai ena Joeli 2:28–29? Oqo eso na vakasama e rawa ni vukei ira na itabagone mera kila vakavinaka cake na sala e sovaraka tiko mai kina na Turaga na Yalona edaidai.

• E volai tu ena ivolanikalou e vuqa na gauna a sovaraka mai kina na Turaga na Yalona vei ira na Nona tamata. Ni railesuvi eso na veika oqo ena rawa ni vukei ira na itabagone mera kila vakavinaka cake na ivakarau mera ciqoma kina na sovaraki mai ni Yalo ni Kalou ena nodra bula. Navuca mo droinitaka ena papa e dua na joke wai levu ni sovaraka tiko na wai ka kerei ira yadua se ilawalawa lalai mera wilika e dua se sivia na malanivosa ni ivolanikalou ena “iVurevure Veitokoni.” E rawa ni ra vola ena papa ni volavola wavokita na joke wai na veika era cakava na tamata ena nodra malanivosa ni ivolanikalou me rawa kina vua na Turaga me sovaraka mai na Yalona kei na veivakalougatataki cava a muria mai. Na gauna cava beka eda a vakila kina ni Vakacegui, Dusimaki, se Vakasavasavataki keda na Yalo?

• E rawa ni o vola ena papa ni volavola na vosa oqo mai vei Elder Dieter F. Uchtdorf: “E vakasamataka tiko na Kalou e dua na ka sega ni vakasamataki rawa me baleti kemuni yadudua kei na Lotu taucoko—e dua na cakacaka vakasakiti ka veivakurabuitaki” (“Ena Cakava na Kalou e Dua na Ka Sega ni Vakasamataki Rawa,” 53). Vakasamataka mo kerei ira na itabagone me ra vakaraica ena itukutuku nei Elder Uchtdorf me baleta na veivakalougatataki sega ni vakasamataki rawa a solia na Kalou vei ira na tamata ena ivolanikalou ni oti na veigauna dredre. Na cava e vakavulica vei keda o Elder Uchtdorf meda cakava me rawa ni da vakatulewa vinaka kina ni da sotava na dredre? Sureti ira na itabagone mera cakava e dua na lisi ni veika “sega ni vakasamataki rawa” ena rairai vakasamataka tiko na Kalou me baleti keda. Sureti ira o vakavulica mera vakasamataka vakatitobu na veika era lomasoli mera na cakava mera ciqoma kina na veivakalougatataki oqo.

• Navuca mo vakaraitaka na vidio “President Nelson: Hear Him—Personal Revelation” (ChurchofJesusChrist.org). Kerei ira na itabagone mera vakarogoca na raititobu eso me baleta na sala e vosa kina vei keda na Yalo kei na sala e vakalougatataka kina na noda bula o Koya. E rawa talega ni ra railesuva na itukutuku nei Peresitedi Russell M. Nelson, “Na iVakatakila ki na Lotu, Na iVakatakila ki na Noda Bula” (Liaona, Me 2018, 93–96). Kerei ira mera vaqara na isaunitaro vakaoqo: A vakasaqara ka ciqoma vakacava o Peresitedi Nelson na veivakauqeti ni Yalo? Na cava eda vulica mai vei Josefa Simici me baleta na lomasoli ni Kalou me vosa vei ira na Luvena? Na cava e sureti keda kina o Peresitedi Nelson me da cakava? Tukuna vei ira na itabagone me baleta e dua na gauna o a vakila kina ni sovaraka tiko mai na Turaga na Yalona. Sureti ira mera vakasamataka vakatitobu na veika era sa sotava, ka mera wasea, kevaka era lomavinaka kina.

Cakacaka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Cakacaka 2:1–6, 14–21; Jekope 7:1–8; Mosaia 4:1–3, 19–20; 18:7–11; Alama 19:14, 28–36; Ilamani 6:34–36; Vunau kei na Veiyalayalati 19:37–41

Veivakavulici ena iVakarau ni iVakabula

Me ikuri ni nodra vukei o ira na vuli mera vakila ka kila na Yalo, mo vukei ira mera na cakacakataka na veivakauqeti era ciqoma” (Veivakavulici ena iVakarau ni iVakabula, 10).