27 ni Noveba

Meu Wasea Beka Vakacava na Kosipeli?

Jona; Maika

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana na sala mo cakava kina na veika sa veivosakitaki.

• Bulataka na kosipeli. Eda toro voleka vakacava vua na iVakabula? Eda saga vakacava meda vakataki Koya vakalevu cake?

• Vukei ira era gadreva tu na veivuke. O cei eda vakananuma tiko ga oqo? Eda na vukei ira vakacava na tamata yadua oqo?

• Sureta na tamata kecega mera ciqoma na kosipeli. Eda na sauma vakacava na nodra taro na noda itokani me baleta na Lotu?

• Vakaduavatataka na matavuvale me tawamudu. Na cava eso na sala e rawa ni da sema vakavinaka cake kina vei ira na isema ni lewe ni matavuvale, me vakataki ira na tubuda kei na tavaleda?

Ena itinitini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

Era na tiko beka na lewe ni nomu kalasi se kuoramu era dau raica e veigauna na sala eso mera wasea kina na kosipeli. E rairai mo na cakava talega qo! Ia, vei ira e vuqa na tamata, na kena wasei na kosipeli e dredre ka vakarerevaki sara mada ga. E kalougata, ni o keda kece e rawa ni da vinaka cake ena wasei ni noda vakabauti Jisu Karisito. O na sega beka ni rogoca vakayago na domo ni Turaga ni vakaroti iko mo cakava e dua na ka me vaka na “lako ki Ninive, na koro levu ko ya, ka vunauca,” me vaka a cakava o Jona (Jona 1:2). Ia na domo malua ni Yalo Tabu e rawa ni uqeti iko mo “lako ki” na lewe ni matavuvale kei na itokani vakatabakidua era sa vakarautaki tu mera rogoca na nomu ivakadinadina. Mo yalorawarawa ki na veika o rawa ni vulica mai na veika a sotava o Jona ena nomu vuli ena macawa oqo, ka vakarautaki iko mo wasea na veika o sa vulica vei ira o vakavulica. Sa rawa talega mo wilika na itukutuku nei Elder D. Todd Christofferson “Wasei ni iTukutuku ni Veivakalesui Mai kei na Tucake Tale” ni o vakavakarau mo veivakavulici (Liaona, Me 2020, 110–13).

Na Yalo Tabu e rawa ni uqeti keda me da wasea na kosipeli vei ira era sa vakarau tu mera rogoca na noda ivakadinadina.

Vulica Vata

Me vukei ira o vakavulica mera wasea na veivakauqeti mai na nodra vulica me baleti Jona ena macawa oqo, sa rawa mo vakaraitaka e dua na iyaloyalo kei Jona (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Sureti ira mera veivosakitaka na veika era sa vulica me baleta na wasei ni kosipeli mai na veika a sotava o Jona. Sa rawa mo sureti ira mera railesuva vakatabakidua na Jona 1 kei na 3 ka taroga: Na cava eda vulica me baleta na wasei ni kosipeli vei ira era sega tu beka ni vakarau mera veisau? Na cava eda vulica me baleta na nona lomasoli na Kalou me vosoti ira era veivutuni? Me rawa ni vakauqeti ira na lewe ni nomu kalasi se kuoramu mera wasea na kosipeli, vakayagataka e dua se sivia na itaviqaravi oqo se bulia e dua ga na nomu.

• Me rawati na vakasama eso me baleta na sala me wasei kina na kosipeli ni iVakabula vei ira tale eso, sa rawa ki na nomu kalasi se kuoramu mera railesuva na itukutuku eso oqo ena ivolanikalou: Joni 4:3–26; Cakacaka 16:25–33; Alama 19:14–18, 28–31. Sa rawa mo ni qai veivosakitaka vata na taro vakaoqo: Era a vakavakarau vakacava na tamata ena itukutuku oqo mera rogoca na itukutuku ni kosipeli? Na cava o raica me baleta na sala a wasei kina na itukutuku? Na cava o nanuma e vinakata kina na Tamada Vakalomalagi kei Jisu Karisito meda wasea na kosipeli? Sa rawa mo ni qai veivosakitaka vakalasi se kuoramu na veika e vakavulica vei keda na itukutuku oqo me baleta na sala eda rawa ni wasea kina na kosipeli edaidai.

• Na wiliki ni nodra ivakaraitaki veivakauqeti na so tale ena wasei ni kosipeli e rawa ni vakayaloqaqataki ira na itabagone o vakavulica mera vakayacora vakakina. A wasea o Elder D. Todd Christofferson eso na ivakaraitaki ena nona itukutuku “Wasei ni iTukutuku ni Veivakalesui Mai kei na Tucake Tale.” Ena itukutuku oqo, a vakatavulica kina o Elder Christofferson ni gadrevi e tolu na ka me veivakayarayarataki kina na noda veisureti me ciqomi na kosipeli: na noda loloma, noda ivakaraitaki, kei na noda vakayagataka na iVola i Momani. Veivosakitaka na ivakaraitaki eso ni wasei ni kosipeli ena itukutuku oqo, ka sureti ira o vakavulica mera wasea eso tale na ivakaraitaki, oka kina na veika era dui sotava. E vakaraitaka vakacava na veika sotavi oqo na tolu na ka a vakavulica o Elder Christofferson?

• E rawa vakacava ni o vukei ira o vakavulica mera kila ni wasei ni kosipeli e rawa ni ka matau sara ka sega ni dodonu me veivakarerei? E rawa ni o vakaraitaka na vidio ena “iVurevure Veitokoni” ka kerei ira na itabagone mera vakasamataka na sala e rawa ni ra wasea kina na kosipeli vua e dua era kila. Na cava eda rawa ni cakava me sureti ira mera lako mai ka raica? Na madigi cava soti e tu vei ira mera lako mai ka veivuke? E rawa vakacava ni da vukei ira mera vakila na gagadre mera lako mai ka tiko dei? E rawa vakacava ni da cakava me tiki ni noda bula e veisiga na wasei ni kosipeli?

Cakacaka ena Vakabauta

Vakauqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Carlos A. Godoy, “Au Vakabauti Ira na Agilosi,” Liaona, Nove. 2020, 86–88

• “Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (vidio), ChurchofJesusChrist.org; e rawa ni o kunea eso tale na ivurevure ena “Wasei ni Kosipeli,” Gospel Library

  Sureti ira na tani "Me ra Lako Mai ka Raica"

  Na tamata e taleitaka me galeleti.Era gadreva me ra sureti.Na vidio oqo e vakaraitaka ni veisureti me ra "lako mai ka raica" e rawa ni iwalewale rawarawa me tiki ni nodra bula na lewe ni Lotu i Jisu Karisito ni Yalododonu edaidai.

  Sureti ira na tani mera "Lako mai ka Veivuke"

  Na tamata era dau via veivuke; vakavuqa na ka ga era gadreva oya mera sureti.Na vidio oqo e vakaraitaka na rawarawa ni veisureti vei ira na tamata mera veivuke kina madigi ni veiqaravi ni Lotu i Jisu Karisito ni Yalododonu edaidai.

Veivakavulici ena iVakarau ni iVakabula

“Era na cakava na tamata na veisau e vakaibalebale ena nodra bula ni sa lako mai na veisau o ya mai na nodra galala ni digidigi. Ni ko solia na veisureti me cakacakataki, vakadeitaka ni ko na rokova na nodra galala ni digidigi o ira o vakavulica” (Teaching in the Savior’s Way, 35).