11 ni Tiseba

Au sa Vakaliuca Tiko li na Veika ni Kalou ena Noqu Bula?

Akeai; Sakaraia 1–3; 7–14

Veivakasalataki Vata

E liutaka e dua na mataveiliutaki ni kuoramu se kalasi; me 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Me liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se taro vakai iko (raica na iVoladusidusi Raraba, 10.2, 11.2, ChurchofJesusChrist.org). Tuvana mo cakava na veika sa veivosakitaki.

• Bulataka na kosipeli. Na cava sa veivosakitaka na matabisopi ena noda bose ni matabose ni itabagone ni tabanalevu? Na cava e rawa ni da cakava me yavutaki ena veivosaki oya?

• Vukei ira era gadreva tu na veivuke. Eda na dodoliga yani vakacava vei ira na tamata ena sala vaKarisito ni da raica e dua na gagadre ka sega ni kila na ka meda kaya?

• Sureta na tamata kecega mera ciqoma na kosipeli. Na cava e dua na ka eda sa kunea ena kosipeli i Jisu Karisito e kauta mai vei keda na reki? E rawa vakacava ni da wasea na reki oya kei ira tale eso?

• Vakaduavatataka na matavuvale me tawamudu. Na cava eda cakava tiko me kunei kina na yacadra na tubuda era gadreva tu na cakacaka vakalotu ni valetabu? Na cava eda rawa ni cakava meda vukei ira tale eso mera kunea na yacadra na nodra qase e liu?

Ena itinitini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kalasi se kuoramu me baleta na ituvatuva kei na veisureti e a caka ena gauna ni soqoni.

Vakatavulica na iVunau

Liutaki mai vua e dua na iliuliu itabaqase se na itabagone; me 25-35 na miniti

Vakarautaki Iko Vakayalo

Sa sinai tu na bula ena veika bibi meda cakava. Kevaka eda sega ni qaqarauni, na osooso ni bula e rawa ni vakavuna meda guilecava na inaki ni bula. Eda kila ni iVakabula kei na Nona kosipeli e dodonu me ka bibi duadua vei keda, ia na veika tale eso ena rawa ni vagolei keda tani. Oqori beka na vuna e vakasalataki keda kina na ivolanikalou meda “lewa deivaka nai lakolako ni yavada” (Vosa Vakaibalebale 4:26), “dou vakananuma mada ki na nomudou ivalavala” (Akeai 1:5), ka “dou dikevi kemudou, se dou tu ena vakabauta” (2 Korinica 13:5).

O ira na Isireli era bula tiko ena gauna nei parofita Akeai a gadreva na mataqali veisureti vakaoqo. Ena nodra sasaga yaga mera tarai Jerusalemi cake tale, era a biuta tani kina na taravou tale ni vale ni Turaga. Vakasamataka mada na sala e rawa ni vakayagataki kina na ivakaro ni Turaga ena Akeai 1 vei keda nikua. O na vakauqeti ira vakacava o vakavulica mera dikeva na nodra yalayala mera vakaliuca na veika ni Kalou ena nodra bula? E rawa ni o railesuva na itukutuku nei Elder Dale G. Renlund “Yalayala Tawayavalati Rawa vei Jisu Karisito” (Liaona, Nove. 2019, 22–25) se na ivakavuvuli nei Peresitedi Ezra Taft Benson e “Na iVunau Cecere—Lomana na Turaga” (ena Nodra iVakavuvuli na Peresitedi ni Lotu: Ezra Taft Benson [2014], 37–45).

E rawa ni da vakaliuca na veika ni Kalou.

Vulica Vata

Sa rawa mo tekivuna e dua na veivosaki ena nomu vola na veimalanivosa mai na Akeai 1:6 ena papa. Na cava eda rawa ni vulica mai na veivakasama oqo—kaburaka tiko na sorenikau ia sega ni tamusuka, kana tiko ia ka sega ni yalo vakacegu, se rawa ilavo tiko ia qai biuta ena dua na taga cicila—me baleta na vakayagataki gauna ena veika tale eso ka sega ni veika e vinakata na Turaga meda cakava? Me vaka ni sega ni kerei keda tiko na Turaga meda vakanamata ki na tara ni dua na valetabu, na cava e kerea tiko o Koya meda vakanamata kina? E rawa vakacava ni da cakava na veika oqori me ka bibi duadua ena noda bula? Na veitaviqaravi oqo e rawa ni vukei ira na itabagone mera dikeva na nodra yalayala me ra vakaliuca na veika ni Kalou ena nodra bula.

• Na vakaivotavota ena sakaramede e sa dua na madigi vakasakiti ena veimacawa me dikevi kina na noda yalodina vei Jisu Karisito. Eda na vakayagataka vakacava na sakaramede meda vakasamataka kina se da sa vakataka vakalevu cake tiko na iVakabula? Sa rawa beka mera wasea na itabagone na sala era na cakava kina na ka oqo. Sa rawa talega mera vola na taro eso era na tarogi ira kina vakai ira ena gauna ni sakaramede. Sureti ira mera vakasamataka vakatitobu e dua se sivia na ivolanikalou, itukutuku, se ivurevure tale eso ena “iVurevure Veitokoni” ni ra cakava na nodra lisi.

• A wasea o Peresitedi Dieter F. Uchtdorf, ena nona itukutuku “Na Veika e Bibi Cake” (Liaona, Nove. 2010, 19–22), na ivakasala e rawa ni vukei ira na itabagone me ra “vakasamataka [na nodra] sala” (Akeai 1:5). E rawa ni o sureta na tamata yadua se ilawalawa lalai me wilika na iotioti ni tolu na iwase ni vosa (vakatekivu ena iwase “Na Kaukauwa ni Yavu”), ka vaqara na kena ibalebale me vakanamata na noda bula vua na iVakabula. E rawa ni ra wasea e dua na ka era vakauqeti kina mera cakava me vaqaqacotaka na nodra yalodina vei Jisu Karisito.

• E vuqa vei keda eda osooso ena caka vinaka. Ia era sega ni dau ka uasivi duadua. Navuca mo wasea e dua na tikina mai na imatai ni wase ni itukutuku nei Peresitedi Dallin H. Oaks “Vinaka, Vinaka Cake, Vinaka Sara” (Liaona, Nove. 2007, 104–8) ka na rawa ni vukei ira na itabagone mera kila na ivakavuvuli oqo. Sa rawa talega mo sureti ira mera vola yadua na nodra itaviqaravi ena veisiga. Kerei ira mera vakadikeva vakai ira se sa “vinaka,” “vinaka cake,” se “vinaka sara” na itaviqaravi yadua. Na cava e dau cakava e dua na itaviqaravi me “vinaka sara”? Sureti ira mera wasea vakai ira na veika era sa vulica mai na vakadikeva-vakai ira oqo.

Cakacaka ena Vakabauta

Uqeti ira na lewe ni kalasi se kuoramu mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra vakauqeti.

iVurevure Veitokoni

• Josua 24:14–15; Maciu 6:19–34; 22:36–40; Marika 10:17–22; 1 Korinica 11:23–28; 2 Korinica 13:5; Kolosa 3:1–2 (Sa dodonu me da vakaliuca na veika ni Kalou ena noda bula)

• Scott D. Whiting, “Yaco mo Vakataki Koya,” Liaona, Nove. 2020, 12–15

• “As Now We Take the Sacrament,” Hymns, no. 169

Veivakavulici ena iVakarau ni iVakabula

“E sega ni gadrevi me vakaotivi kece ena dua na gauna ni kalasi mena tarai kina na yalona e dua—ena so na gauna, dua se rua na usutu bibi sa na rauta vinaka” (Veivakavulici ena iVakarau ni iVakabula, 7).