Na Veivakalougatataki ni Valetabu
Mai Vei Peresitedi Thomas S. Monson
Ni da gole ki valetabu, ena rawa ni yaco mai kina vei keda e dua na ivakarau ni ivakatagedegede vakayalo kei na vakilai ni vakacegu.
Kemuni na taciqu kei na ganequ, sa ka ni marau dina vei au meu tiko kei kemuni ena mataka vinaka ni Siganimate oqo ni vakanamata tiko vua na iVakabula kei vuravura na noda vakanananu. Au via vakaraitaka yani na noqu lomani kemuni ka kidavaki kemuni kau masulaka vua na Tamada Vakalomalagi me vakauqeta na noqu vosa vei kemuni.
Na koniferedi oqo sai ka vitu tiko ni yabaki ni noqu mai kacivi kina meu Peresitedi ni Lotu. Era sa bau so dina na yabaki osooso sara, vakasinaiti sega ena vica walega na bolebole ia ena veivakalougatataki talega ka sega ni wili rawa. Ena kedra maliwa na veivakalougatataki taleitaki ka tabu oqo sai koya na madigi meu vakatabui ira vakakina ka vakatabui ira tale na valetabu.
Wale tikoga oqo, ena Noveba se qai sivi, a noqu kina na madigi meu vakatabuya na Valetabu totoka vou na Phoenix Arizona. Era a tomani au kina o Peresitedi Dieter F. Uchtdorf, Elder Dallin H. Oaks, Elder Richard J. Maynes, Elder Lynn G. Robbins kei Elder Kent F.Richards. Ena bogi ni bera na veivakatabui, a vakayacori kina e dua na soqoni vakavanua ni kena marautaki ka ra vakaitavi totoka sara kina e 4,000 na itabagone ena tikina ni valetabu. Na kena siga tarava a vakatabui kina ena tolu na soqoni vakalou ka veivakauqeti ni valetabu.
Na tara ni valetabu sa dua dina na ivakaraitaki matata ni tubu ni Lotu. Sa mai 144 tiko yani kina oqo na noda valetabu ka vakayagataki tiko e vuravura raraba, ka 5 e vakavoutaki tiko kei na 13 tale era se qai tara tiko. Kuria oya, e 13 na valetabu ka ra sa kaburaki oti yani era sa yacova tiko eso na kedra ikalawa ni vakavakarau ni kedra tekivu tarai. Ena yabaki oqo eda vakanamata tiko yani kina kedrau vakatabui tale e 2 na valetabu kei na kedra vakatabui e 5 na valetabu vovou ka sa tuvai tiko mera na vakacavari.
Ena rua na yabaki sa oti, na gauna eda vakanamata tiko kina ena noda sasagataka tiko na kena vakacavari na vei valetabu ka kacivaki yani e liu, eda sa mai biuta tu mada vakawawa na ituvatuva me baleta e dua vei ira na ikuri ni vei valetabu oqori. Ia, e kani marau vei au ena mataka nikua meu kacivaka e tolu na valetabu vou ka na qai tara tiko ena veivanua oqo: Abidjan, Ivory Coast; Port-au-Prince, Haiti; kei Bangkok, Thailand. E dua na veivakalougatataki veivakurabutaki sa mai tu oqo me baleti ira na noda lewenilotu yalodina ena veivanua oqo, ka vakakina na veivanua tale eso e vuravura era tu kina na valetabu.
Na ikalawa ni vakatulewataki ni kedra gadrevi vakakina na kunei ni kedra vanua e so tale sa tosoi tikoga, ka ni sa neitou gagadre me nodra talega na madigi ni gole yani ki valetabu ka kua soti ni levu na nodra solibulataki gauna se ivurevure eso, e vuqa vakavuqa sara na lewenilotu. Me vaka keitou sa dau cakava tiko eliu, keitou sa na dau bulagoci kemuni tiko yani ena veivakatulewa me baleta na veika oqori.
Niu vakasamataki ira tiko na valetabu, e vuki yani noqu vakanananu kina levu na veivakalougatataki eda dau ciqoma kina. Nida curuma yani na katuba ni valetabu, eda dau biuta vakatikitiki na veivakauti kei na veilecayaki kei vuravura. Ena loma ni itikotiko tabu oqo eda kunea kina na totoka kei na bula vakaivakarau. Na kune vakacegu ni yaloda kei na cegu mai na veika ni osooso ni noda bula.
Ni da gole ki valetabu, ena rawa ni yaco mai kina vei keda e dua na ivakarau ni ivakatagedegede vakayalo kei na vakilai ni vakacegu ka na tababokoca na veika tale eso eda vakila ka rawa ni dau yaco mai kina loma ni tamata. Eda taura rawa kina na ibalebale dina ni vosa ni iVakabula ena Nona a kaya: “Au sa laiva vei kemudou na vakacegu, au sa solia vei kemudou na noqu vakacegu. … Me kakua ni rarawa na yalomudou se rere.”
Na vakacegu vakaoqo sa rawa ni botea na veiyalo kece—na yalo e vakaleqai, na yalo e bikai ena rarawa, na yalo e vakila na veilecayaki, na yalo e vakamamasu me vukei.
Au qai mai kila wale tikoga oqo me baleta e dua na cauravou ka gole yani kina valetabu ena yalo ka vakamamasu tiko me vukei. Ena vuqa na vula yani eliu a sa ciqoma kina na nona veikacivi me veiqaravi ena tabana ni kaulotu e na Ceva kei Amerika. Ia, a mai bera tu yani na nona ivola ni curuvanua ena dua na gauna balavu sara ka mai lesi tale me laki veiqaravi ena dua na tabana ni kaulotu e Amerika. Dina ga ni a yalolailai ni a sega ni rawa me laki kaulotu ena vanua a kacivi taumada kina, a sega ni vakataratutu na nona guta sara na nona ilesilesi vou, ka saga sara me veiqaravi ena kena vinaka duadua. A yaco me vakayalolailaitaki ena vuku ni nodra ivakaraitaki ca e so na daukaulotu ka vaka vei koya era vinakata mera gade tu ga, mai na nodra wasea yani na kosipeli.
Ena vica wale toka ga na vula yani ki liu a mai yacovi gonetagane oqo e dua na tauvimate levu ka mai paralasi vakalailai toka yani kina, ka mai vakau yani kina ki vale ena dua na vakacegu vakatauvimate.
Ni oti e vica na vula sa mai bula vinaka sara yani o cauravou, ka mai yali yani na nona paralase. A vakaraitaki vua ni na rawa me laki veiqaravi tale vakadaukaulotu, e dua na veivakalougatataki ka masulaka tu e veisiga. Na ka ga e leqa me baleta na itukutuku oqo sai koya ni na lesu tale kina tabana ni kaulotu vata ga ka se qai biuta ga mai, na vanua ka vakila kina ni sega soti ni vaka na ka e namaki vei ira, na nodra ivakarau kei na ivakaraitaki eso vei ira na daukaulotu era tiko kina.
A gole mai ki na valetabu me mai qara na vakacegu kei na veivakadeitaki me rawa ni nona e dua na gauna ni kaulotu vinaka. Rau a masulaka talega na nona itubutubu ni na vakarautaka vei luvedrau na veisiko kina valetabu na ka e gadreva.
Ni curu yani kina rumu vakasilesitieli na cauravou ni oti na soqoni, a dabe ena dua na idabedabe ka tekivu masulaka yani na veidusimaki mai vua na Tamana Vakalomalagi.
E dua tale ka curu vakalailai yani ni oti o ya e dua na gonetagane ka yacana o Landon. Ni curu yani ki loma ni rumu, a rai totolo vakadodonu sara yani vua na cauravou ka dabe toka ena idabedabe, bobo na matana ka masu dina toka. A sega ni vakataratututaka o Landon na veivakauqeti ka yacovi koya me sa laki veivosaki kei na cauravou o ya. Nona sega ni via veivakataotaki, sa mani nanuma me wawa. Ni mai oti e vica na miniti se masu tikoga o cauravou oqo. Sa kila o Landon ni sa sega tale ni rawa vua me tosoya na veivakauqeti. A torova yani na cauravou ka tara na tabana. A rai na cauravou, ka kidacala ni sa vakasosataki. A kaya lo yani o Landon, “Au vakila vakaukauwa ni sa dodonu me daru veivosaki, dina ga niu sega ni kila baleta.”
Ni rau tekivu veitalanoa, sa tekivu cauraka na yalona vei Landon, na cauravou ena nona vakamacalataka na kena ituvaki kei na nona tinia ena nona gadreva me ciqoma eso na vakacegu kei na veivakayaloqaqataki ena nona kaulotu tiko. O Landon, ka se qai lesu ga mai ena dua na kaulotu rawati vinaka ena dua ga na yabaki yani ki liu, a talanoataka na ka a yaco ena nona kaulotu vakaiikoya, na bolebole kei na veika a sotava, na sala ka vuki kina vua na Turaga me vukei, kei na veivakalougatataki a ciqoma. A veivakacegui ka veivakadeitaki na nona vosa, vakakina na nona mana vakalevu sara ni nona dau guta na nona kaulotu. Emuri, ni sa mai seyavu yani na rere ni cauravou, sa yaco mai vua e dua na vakacegu. A vakila na vakavinavinaka cecekia ni kila ni sa rogoci na nona masu.
Rau a masu vata na cauravou e rua, ka sa vakavakarau o Landon me biubiu, marau ena nona a vakarorogo kina veivakauqeti ka yaco mai vua. Ni sa tu me lako, a taroga vei Landon na cauravou, “E vei o a kaulotu kina?” Me yacova mai oqo, e sega ni dua veirau a se vakaraitaka na yaca ni tabana ni kaulotu a veiqaravi mai kina. Na gauna e sauma yani kina o Landon ena yaca ni nona tabana ni kaulotu, sa tonawanawa na matai cauravou ena wainimatana. A veiqaravi tu mai o Landon ena tabana ni kaulotu vata saraga ena suka lesu tiko kina o cauravou oqo!
Ena dua na ivola e se qai vola oti ga mai vei au, a wasea mai kina o Landon na iotioti ni nona vosa na cauravou oqo vua: “Au a vakabauta ni na vakalougatataki au o Tamada Vakalomalagi, ia au a sega ni vakasamataka rawa ni na tala mai o Koya e dua ka veiqaravi mai na noqu tabana ni kaulotu saraga me mai vukei au. Au sa kila oqo ni na vinaka na ka kece.” Na masu malumalumu ni dua na yalo sa yalodina sara sa rogoci ka saumi mai.
Kemuni na taciqu kei na ganequ, eda na vakatovolei ena noda bula; eda na temaki ka bolei. Ni da gole ki valetabu, ni da nanuma na veiyalayalati eda vakayacora ekea, ena yaco meda na vorata vinaka cake na noda vakatovolei ka lako curuma na veitemaki. Eda na rawa ni kunea na vakacegu ena valetabu.
Era sega ni voli rawa na veivakalougatataki ni valetabu. E dua kau vakavinavinakataka sara vakalevu e veisiga kece ni noqu bula sai koya ka keirau sa ciqoma kei na watiqu daulomani, o Frances, kau ciqoma ena noqu tekiduri ena dua na icabocabo ni soro ka vakayacora na veiyalayalati ka vauci keirau vata me baleta na tawamudu kece sara. E sega ni dua na ka me talei cake vei au mai na vakacegu kei na veivakadeitaki au ciqoma ena kila, ka sa mai noqu ni o koya kei au keirau na duavata tale.
Me vakalougatataki keda na Tamada Vakalomalagi me noda tikoga na yalo ni sokalou e valetabu, me da talairawarawa kina ki na Nona ivunau, vakakina meda vakamuria vinaka sara na weniyava ni noda Turaga ka iVakabula, o Jisu Karisito. Au vakadinadinataka ni sai Koya na noda Dauveivueti. Sai koya na Luve ni Kalou. Sai koya ka lako tani mai na ibulubulu ena mataka ni imatai ni Siganimate oya, ka kauta vata mai kei Koya na isolisoli ni bula tawamudu me baleti ira kece sara na luve ni Kalou. Ena mataka ni siga totoka oqo, nida marautaka tiko na soqo bibi oqo, meda cabora na masu ni vakavinavinaka me baleta na Nona isolisoli cecere ka totoka vei keda. Me vakadina kina oqo, sa noqu masu ena yalovakarokoroko ena Yacana tabu, emeni.