2010–2019
Ke Me sa Nomu iLesilesi
Epereli 2015
10:37

Ke Me sa Nomu iLesilesi

Mai vei Elder Jorge F. Zeballos

Ena Vitusagavulu

Official portrait of Elder Jorge F. Zeballos of the First Quorum of the Seventy, 2015 April.

Meda sa qai gu ga ki liu ena noda vulica na noda itavi, vakatulewa vakadodonu, cakava vakakina na lewa oqori, ka ciqoma na lewa nei Tamada.

Au se qai yabaki 12 tiko rau a gole mai na daukaulotu ena imatai ni gauna me rau veivakalotutaki ena siti au a sucu kina ena vualiku kei Chile. Dua na Sigatabu, ni sa vula ono tiko na noqu mai lotu ena tabana lailai oqo, a vota sara mai na madrai e dua na daukaulotu ni veisoliyaka tiko na sakaramede. Au raici koya ka kaya vakamalua, “Au sega ni rawa.”

“Cava e sega kina?” a sauma.

Au a kaya vua, “Baleta niu sega ni lewe ni Lotu.”

A sega sara ga ni vakabauta o daukaulotu. A ramase mai na matana. Au vakabauta ni vakasamataka, “Ia o cauravou oqo e dau tiko ena soqoni kece! Mena sega ni lewe ni Lotu vakacava?”

Na siga tarava, rau sa tu sara e vale o rau na daukaulotu, ka rau saga nodrau igu taucoko me vakavulici taucoko na noqu matavuvale. Ia me vaka ni sega ni malele kina na noqu matavuvale, rau sa nuidei ka tomana tikoga na daukaulotu ena vuku ni noqu laki Lotu tiko ena ono na vula vakacaca. Kena itinitini, sa qai yaco mai na gauna cecere au sa waraka tu mai ni rau sa sureti au meu lewena na Lotu i Jisu Karisito. Rau a vakamacalataka na daukaulotu me baleta ga niu se gone, ena gadrevi na nodrau veivakadonui na noqu itubutubu. Au a gole vata kei rau na daukaulotu me keitou laki raici tamaqu, kau raitayalotaka ni na tukuna mai “Luvequ, ni ko sa na tamata yalomatua, ko sa na rawa ni vakatulewa ga vakataki iko.”

Ni rau sa veivosaki na daukaulotu kei koya, au sa masulaka sara ga vakaukauwa me tarai na yalona me vakadonuya na ka au a gadreva tiko. Oqo na ka a qai kaya vei rau na daukaulotu: “Kemudrau na cauravou, sa ono mai na vula na noqu raici Jorge tiko na luvequ ni dau yadra vakamataka ena vei Sigatabu, vakaisulu vinaka sara, ka taubale yani ki lotu. Au sa raica ga na veivakauqeti vinaka mai na Lotu ki na nona bula.” Oti, a qai vosa mai vei au, kau kurabui ni a kaya, “Luvequ, kevaka ga me sa nomu ilesilesi ga mo vakatulewa kina, au sa na vakadonuya mo papitaisotaki.” Au a mokoti tamaqu, reguci koya, ka vakavinavinakataki koya ena ka sa cakava oqo. Ena siga e tarava au a papitaiso kina. Ena macawa sa oti sai ka 47 ni yabaki ni ivakananumi ni gauna bibi o ya ni noqu bula.

Na cava beka sa noda ilesilesi bibi na lewe ni Lotu i Jisu Karisito? A vakamacalataka kina vaqo o Peresitedi Joseph Fielding Smith: “Oqo e rua na noda itavi bibi. … Ai matai, meda vakasaqara na veivakabulai; kena ikarua, na noda itavi vei ira na tamata.”

Sa qai kena oqo, na ilesilesi bibi duadua sa lesia vei keda na Tamada: noda vakasaqara meda dui vakabulai keda mada, vakakina vei ira na tamata, ni da kila vinaka tiko ni malanivosa oqo, e tukuna tiko ni ibalebale ni veivakabulai o ya na kena rawati na matanitu lagilagi cecere duadua sa vakarautaka tu vei keda na Tamada vei ira na luvena talairawarawa. Na ilesilesi oqo sa nuitaki vei keda—ka da sa ciqoma ena galala—me na vakamatatataki kina na veika meda vakaliuca, noda gagadre, noda vakatulewa, kei na noda itovo ena veisiga.

Kivua e dua sa mai kila vinaka oqo, ena vuku ni Veisorovaki i Jisu Karisito, sa tu sara ga e matada na veivakabulai, kevaka meda sega ni rawata sa noda ga na rusa. Koya gona, na veibasai ni veivakabulai na rusa, me vaka ga na veibasai ni rawa-ka na druka. E vakavulica vei keda o Peresitedi Thomas S. Monson ni “sega ni dodonu vua na tamata me tiko vakacegu sara ena nona rawa-ka ena gauna era raica kina ni sa tu e matadra na veika dodonu cecere.” Meda sa qai tiko vakacegu beka vakacava, ni takiveiyaga noda igu meda vakalagilagi kevaka eda kila ni sa rawa meda vakalagilagi?

Au kerea meu wasea mada e va na ivakavuvuli bibi ena vukea meda gadreva me sa noda ilesilesi vua na Tamada mai Lomalagi, ka vakakina noda vakaio ki na veika sa namaka tiko o Koya o ya meda na yaco me vakataki Koya.

1. Vulica Noda iLesilesi

Kevaka meda na cakava na lewa ni Kalou, kevaka sa noda ilesilesi Vua, meda sa qai tekivu ena vuli, kila vakavinaka, ciqoma, ka bula voli me vaka na Nona lewa kivei keda. Sa kaya kina na Turaga, “Raica sa kilikili ki na tamata yadua me vulica ka kila na nona itavi; io me vakayacora ena yalodina na itavi ni ilesilesi sa digitaki kina.” Na kena tiko vei keda na gagadre e se bera ni taucoko kevaka eda na sega ni vakadeitaka meda kila vinaka na veika sa namaka tu vei keda na Tamada ka vinakata meda cakava.

Ena italanoa Alice in Wonderland, a sega tu ni kila o Alice na sala mena gole kina, a qai tarogi Cheshire Cat, “Kerekere, e rawa beka mo vakaraitaka na sala meu na muria?”

A sauma mai o pusi, “Oqori ena vakatau sara ga na vanua o via gole kina.”

A kaya o Alice, “Au sega ni kauwai sara ki na vanua cava.”

“Sa qai sega ni dua na betena na sala mo na gole kina,” a kaya mai o pusi.

Ia, eda sa kila tu na sala e gole tiko ki na “vunikau, sa kamikamica na vuana me [na] marau kina na tamata”—“na sala, sa basika ki na bula”—sa rabalailai, ka taura na gugumatua meda lako ena sala oqo, ka “ra sa lewe lailai sa kunea.”

E vakavulica vei keda o Nifai ni “vosa i Karisito sa tukuna vei kemudou na veika kece mo dou kitaka.” A vakuria ni “Yalo Tabu … ena vakaraitaka vei kemudou ko Koya na veika kece mo dou kitaka.” Koya gona, na ivurevure eda rawa ni vulica kina na noda ilesilesi sai koya na vosa i Karisito eda ciqoma mai vei ira na parofita ena gauna makawa kei na gauna nikua kei na ivakatakila kivei keda yadua eda ciqoma mai vua na Yalo Tabu.

2. Mo Vakatulewa

Keda sa vulica beka na Vakalesui mai ni kosipeli, e dua na ivakaro, na ilesilesi e baleta na qaravi ni dua na veikacivi, se na veiyalayalati eda cakava e valetabu, sa noda ga na digidigi se da cakava se sega na veika sa virikotori toka ena kila vou o ya. Sa nona lewa vakai koya na tamata me na curuma e dua na veiyalayalati tabu me vakataka na papitaiso se na cakacaka vakalotu ni valetabu. Ena vuku ga ni vosa bubului sa ivakarau tudei ni nodra bula vakalotu na tamata ena gauna makawa, ni a kaya na lawa makawa “dou kakua talega ni bubului vakailasu ena yacaqu.” Ia, ena Nona gauna, a vakavulica kina na iVakabula e dua na sala cecere meda maroroya kina na noda veiyalayalati ena Nona kaya ni io e kena ibalebale na io kei na sega e kena ibalebale na sega. Sa qai rauta ga na vosa ni dua na tamata me vakayavutaka kina na nona dina kei na yalayala ki vua e dua na tamata—ka vakabibi cake ni tamata o ya sa Tamada mai Lomalagi. Ni da doka tiko na noda yalayala ena matanataki kina ni sa dina ka kilikili sara na noda vosa.

3. Cakava me Vakakina

Ni oti noda vulica na noda ilesilesi ka vakatulewa e sema tiko ki na vuli kei na kila o ya, meda sa cakava me vakakina.

E dua na ivakaraitaki kaukauwa ni veivakadeitaki tudei me sotava na Nona yalayala vei Tamana e tadu mai na ivakaraitaki ni iVakabula ena kena a kau mai vua e dua e paralase tu me vakabulai. “Ia ni sa raica ko Jisu na nodratou vakabauta, sa kaya vua sa tauvi paralasi, Na luvequ, sa bokoci na nomu ivalavala ca.” Eda kila ni sa yaga bibi sara na Veisorovaki i Jisu Karisito meda na vosoti ena vuku ni noda ivalavala ca, ia ena gauna a vakayacori kina na nona vakabulai na tamata paralase, e se bera ni yaco na siga cecere o ya; e se bera ni yaco na gauna ni nona vakararawataki na iVakabula e Kecisemani vakakina ena kauveilatai. Ia, a sega walega ni vakalougatataka o Jisu na tamata paralase o ya me tucake ka lako, ia a bokoca talega na nona ivalavala ca, sa mai vakaraitaka kina e dua na ivakaraitaki savasava sega ni cakitaki rawa ni na sega ni druka o Koya, ni na vakayacora na nona yalayala vei Tamana, ka vakayacora e Kecisemani kei na kauveilatai na veika sa yalataka tu mai o Koya.

Na salatu eda sa digitaka meda lako kina e raba lailai. Ena yaco na bolebole ena ilakolako oqo ka na gadrevi me vakabauti ga o Jisu Karisito kei na noda sasaga vinaka duadua sara meda tiko ga ena sala ka toso ki liu. Sa dodonu sara meda veivutuni ka talairawarawa ka vosota, ena gauna mada ga eda sega ni kila vinaka na veika kece e voliti keda tu. Meda dau vosoti ira na tamata ka bula voli ena veika eda sa vulica kei na veika eda sa digidigi kina.

4. Lomada Dina meda Ciqoma na Lewa nei Tamada

Na bula vaka-tisaipeli e sega walega ni gadrevi kina meda vulica na noda itavi, vakatulewa vakadodonu, ka cakava me vakakina, ia sa bibi talega na noda vakatorocaketaka na lomada ka gugumatua meda ciqoma na lewa ni Kalou, ena gauna mada ga e sega ni tautauvata kei na noda gagadre savasava se digidigi.

Au qoroya ka doka na vakasama nei koya na tamata vukavuka me lako vua na Turaga ka, “vakamasuta, ka tekiduru vua, ka kaya vua, Kevaka ko ni sa vinakata, ko ni sa vakasavasavataki au rawa.” A sega ni lewa me caka vua e dua na ka, e dina ga ni rairai savasava na nona gagadre; sa lomana ga me ciqoma na lewa ni Turaga.

Ena vica na yabaki sa oti, rau a vakalougatataki e dua na veiwatini yalodina noqu itokani ni mai sucu e dua na luvedrau tagane rau a masulaka tu mai vakabalavu. E vakasinaiti na itikotiko mera reki vata kei rau na itokani oqo kei na luvedrau yalewa, na luvedrau duabau ga taumada, ni sa tadu vou mai o koya na cauravou lailai. Dua na siga, a yaco e dua na ka sega ni namaki: a ciba vakasauri ka sega tu vakadua ni vakilai koya na cauravou lailai yabaki tolu oqo. Niu sa rogoca na ka oqo, au a qiriti noqu itokani oqo meu vakaraitaka na neitou veitokoni ena gauna rarawa o ya. Ia na ka e kaya mai au vuli sara ga kina. A kaya, “Kevaka sa lewa nei Tamada me kauti koya Vua, sa dodonu vinaka vei keirau o ya.” A sega ni tiko ena vosa nei noqu itokani e dua mada ga na tiki lailai ni kudru, veisaqasaqa, se yalovakatani. Sega sara ga, na ka ga au vakila ena nona vosa o ya ni vakavinavinaka vua na Kalou ni bau soli na madigi me rau marautaki luvedrau tagane ena gauna lekaleka o ya, ka sa yalona taucoko me ciqoma na lewa nei Tamada baleti iratou. Ni oti e vica na siga, sa mai vakalesui tale na cauravou lailai o ya ki na nona itikotiko vakatui e silesitieli.

Meda sa qai gu ga ki liu ena noda vulica na noda itavi, vakatulewa vakadodonu, cakava vakakina na lewa oqori, ka ciqoma na lewa nei Tamada.

Au vakavinavinaka ka marautaka vakalevu nona vakadonuya o tamaqu na vakatulewa meu cakava ena 47 na yabaki sa oti. Toso na gauna, au sa mai kila vinaka ni lewa a solia vei au—me sa noqu ilesilesi na vakatulewa o ya—sa kena ibalebale ni sa noqu ilesilesi vua na Tamaqu Vakalomalagi ka vakasaqara meu vakabulai vakakina vei ira na wekaqu, ka rawa sara meu vakataka cake na ka sa namaka ka vinakata tiko vei au o Tamaqu. Ena siga digitaki cecere oqo, au sa mai vakadinadinataka ni sa bula tiko na Kalou na Tamada kei na Luvena Lomani. Ena yaca i Jisu Karisito, emeni.