Na Dauveivakacegui
Mai vei Peresitedi Henry B. Eyring
Matai ni Daunivakasala ena Mataveiliutaki Taumada
Au vakadinadinataka ni Karisito sa bula sa tala mai na Yalo Tabu, na Dauveivakacegui, vei ira eda sa yalataka meda vukei Koya me vakacegui ira.
Kemuni na ganequ, sa dua na ka rekitaki vei au meu mai soqoni vata kei kemuni. Au sa nanuma kina na tinaqu, watiqu, luvequ yalewa, vugoqu yalewa, kei na makubuqu yalewa—eso vei ira era tiko qo. Au sa mai vakamareqeti ira kina vakalevu ena vuku ni parokaramu totoka oqo. Au kila ni sa vakaoqo na noqu matavuvale ia ena yaco na bula vakamatavuvale me totoka ni ra cakava na iVakabula me iusutu ni nodra bula. Eda sa vakananumi Koya ena bogi nikua ena ivakatagi, masu kei na ivunau veivakauqeti. E dua na nona ivakarau na iVakabula ka da vakavinavinakataka sara vakalevu sa ikoya na Nona yalololoma tawayalani.
O sa mai vakila ena bogi nikua ni o Koya e kilai iko ka lomani iko. O sa vakila vakakina na Nona lomani ira era dabe voliti iko tiko. Era sa tacimu, luvena yalewa vakayalo na Tamada Vakalomalagi. E kauwaitaki ira me vaka Nona kauwaitaki iko. E kila na nodra veika rarawa taucoko. E gadreva me vukei ira.
Na noqu itukutuku vei kemuni ena bogi nikua ni sa rawa mo tiki bibi ni Nona veivakacegui vei ira era gadreva mera vakacegui. Ena totoka sara na nomu itavi ke o kila cake vakavinaka na sala sa dau sauma kina o Koya na masu ni kere veivuke.
E vuqa era masu tiko vua na Tamada Vakalomagi me ra vakacegui, ka vukei ena colati ni nodra icolacola ni mosi, galili, kei na rere. E rogoca na Tamada Vakalomalagi na masu oya ka kila na ka era gadreva. E rau sa yalataka vei ira na veivuke, O koya kei na Luvena Lomani, o Jisu Karisito o koya sa vakaturi cake.
A solia o Jisu Karisito na yalayala kamica oqo:
“Dou lako mai vei au, koi kemudou vakaaduaga sa oca ka colata nai colacola bibi, ia kau na vakacegui kemudou.
“Vakataqara vei kemudou na noqui vua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqui vua, ka mamada na noqui colacola.”
Na icolacola bibi ka dodonu mera cola ena bula oqo na Nona italai yalodina sa vakamamadataki ena Nona Veisorovaki. Sa rawa me kautani na icolacola ni valavala ca, ia na veivakatovolei ena bula oqo vei ira na tamata vinaka e rawa tikoga me icolacola bibi.
Ni sa raica na veivakatovolei oqori ena nodra bula na tamata vivinaka o lomani ira. Ni a vakila na nomu gadreva mo vukei ira. E tiko na inaki ni nomu a vakila na yalololoma me baleti ira.
O sa dua na lewe ni veiyalayalati ni Lotu i Jisu Karisito. A tekivu e vuniyalomu e dua na veisau levu ena nomu a lako mai ki na Lotu. Ni a veiyalayalati, ka ciqoma e dua na iyalayala ka sa tekivu me sa veisau sara tikoga na kemu ituvaki.
A vakamacalataka o Alama, ena nona vosa ga ena Wai o Momani, na nomu yalayala ena nomu papitaiso kei na kena ibalebale vei iko kei ira kece era tu wavolivoliti iko—vakabibi ena nomu matavuvale. E a vosa tiko vei ira era se qai vakarau vakayacora na yalayala o a sa vakayacora, ka ra sa ciqoma vakakina na yalayala vata ga ka solia vei iko na Turaga:
“Raica sa tu oqo na wai, (ia sa yaca tale ga ni wai) ko Momani; ia me vaka dou sa gadreva mo dou curu ki na loma ni bai ni Kalou, ka vakatokai me nona tamata, ka sa lomamudou mo dou veivuketaka na nomudou i colacola me mamada kina;
“Io ni sa lomamudou mo dou tagi vata kei ira sa tagi, ka vakacegui ira sa rarawa ka vakadinadinataka na Kalou e na veigauna kece ga, ena veika kece ga kei na veivanua kece ga dou sa tiko kina me yacova na mate, io me vakabulai kemudou na Kalou, ka okati kemudou vata kei ira ena i matai ni tucake tale mai na mate, me nomudou kina na bula tawamudu.”
Sa ikoya oya na vuna o gadreva kina mo vukea e dua na tamata sa segata tiko me toso ki liu ena nona vakaogai tu ena ivua ni lolosi kei na dredre. O a yalataka ni o na vukea na Turaga me vakamamadataki na nodra ivua ka mera vakacegui. A soli vei iko na kaukauwa mo vukea na kena vakamamadataki na ivua oqori ena nomu a ciqoma na isolisoli ni Yalo Tabu.
Ni sa vakarau rube ena kauveilatai, a vakamacalataka na iVakabula na sala e dau vakamamadataka kina o Koya na icolacola, ka solia na kaukauwa mera colati kina. A kila o Koya ni ra na lolosi na Nona tisaipeli. A kila o Koya ni ra na leqataka na nodra veisiga ni mataka. A kila o Koya ni ra na vakatitiqataka na nodra rawa ni toso yani ki liu.
A solia kina o Koya vei ira na yalayala ka solia vei keda kei ira taucoko na Nona tisaipeli dina:
“Ia kau na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka sega ni mudu;
“A Yalo Tabu sa vu ni ka dina; ko koya era sa sega ni vakabauta rawa na kai vuravura, ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya ka na curumi kemudou.”
A qai yalataka o Koya:
“Ia na Dauveivakacegui, na Yalo Tabu, ko koya ena tala mai ko Tamaqu e na yacaqu ena vakavulici kemudou ena ka kecega kau a vosataka vei kemudou.
“Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia o vuravura. Me kakua ni rarawa na yalomudou se rere.”
Ena vica ga na macawa sa oti au raica na kena yaco na yalayala oqori ni kena talai mai na Yalo Tabu ki na nodra bula o ira na luve ni Kalou era vakatakekere tiko ena masu me vakamamadataki na nodra icolacola. Na caka mana ni kena vakamamadataki na icolacola a yaco mai ena dua na sala ka yalataka na Turaga. Rau a tala mai o Koya kei Tamada Vakalomalagi na Yalo Tabu me Dauveivakacegui kivei ira na Nona tisaipeli mera veivuke.
Ena dua na gauna sa oti e ratou a losivaka tiko e tolu na itabatamata ni dua na matavuvale na nona mate e dua na cauravou lailai yabaki lima. A mate ena dua na vakacala-ka ni ratou gade vata tiko kei na nona matavuvale. A noqu madigi oqo meu sarava tale mada na Nona dau vakalougatataki ira na yalodina na Turaga ena veivakacegui kei na kaukauwa mera vosota rawa.
Au a vakaraica toka na sala a vakamamadataka kina na Turaga na nodratou colacola bibi. Au a tiko vata kei iratou niu sa italai ni veiyalayalati ni Turaga—me vaka kina o iko ena vuqa na gauna ni nomu bula—“mo dou tagi vata kei ira sa tagi … ka vakacegui ira sa rarawa.”
Baleta ga niu kila ni dina oqo, au lomavinaka kina ka yalo vakacegu ni rau sa sureti au na tubuna me keitou sota kei rau na itubutubu nei cauravou lailai ni bera na veibulu.
Au a masulaka meu kila na sala au rawa ni vukea kina na Turaga me vakacegui iratou. Keitou a dabe vata toka ena neitou rumu ni gade. Au a raraga toka na rumu ena bogi batabata oya ena dua na buka lailai.
Au a vakila meu tukuna vei rau niu lomani rau. Au tukuna vei rau niu vakila ni lomani rau na Turaga. Ena vica ga na noqu vosa au a saga meu kaya niu losivaki iratou ia e kila ga qo na Turaga ka kila vinaka o Koya na nodratou mosi kei na rarawa.
Ni oti noqu mai cavuta e vica na vosa oqo, au a vakila ni sa dodonu meu rogoci rau ena yalololoma me rau tukuna mada na veika rau sa mai vakila.
Ena dua na auwa ni neitou dabe vata toka, a levu cake tale na ka e ratou tukuna. Au vakila ena domodrau kei na matadrau ni sa tarai rau tiko na Yalo Tabu. Rau a vakaraitaka na ka sa mai yaco kei na ka rau vakila ena ivakadinadina rawarawa sara. Sa solia oti vei iratou na Yalo Tabu na vakacegu e sala vata mai kei na inuinui ni bula tawamudu, ni sa rawa vei nodrau cauravou, a mate ka sega vua na ivalavala ca, sa rawa me nodrau tawamudu.
Niu mai solia yani vei rau na veivakalougatataki vakamatabete, au a vakavinavinakataka na veivakayarayarataki ni Yalo Tabu ka tu e kea. A gole mai na Dauveivakacegui, ka kauta tiko mai na inuinui, yaloqaqa, kei na veivaqaqacotaki levu cake vei keda kece sara.
Ena bogi oya, au raica kina na ivakaraitaki ni nona cakacaka na Turaga me vakamamadataka na nodra icolacola na Nona tamata. Ni nanuma na iVola i Momani ena gauna era sa voleka kina ni vakaleqai na Nona tamata ena icolacola era vakacolati kina mai vei ira na dauveivakaocai vakaitamera.
Era a tagica na veivakacegui na tamata, me vaka na nodra dau vakayacora e vuqa eda lomana ka dau qarava. Sa ikoya oqo na itukutuku, kau kila ni dina:
“Ia au na vakamamadataka na icolacola dou sa vakacolati kina mo dou kakua ni vakila ni dou sa colata ena nomudou tiko vakabobula; ia au na kitaka oqo mo dou na kila vakaidina kina ni sa i au na Turaga na Kalou, kau sa dautalevi ira na noqu tamata era sa vakararawataki.
“A sa vakamamadataki na i colacola kece sa vakataqari vei Alama kei ira na wekana; a sa vakaukauwataki ira na Turaga mera colata rawa na nodra icolacola, ka ra soli ira ena yalomarau kei na yalo vosota ki na nona lewa na Turaga.”
Au sa raica ka se baci raica tale na cakamana oqo. Eda na vakamamadataka vakavinaka duadua na nodra ivua e so tale, ena noda vukea na Turaga me vakaukauwataki ira. Sa ikoya oya na vuna e okata kina na Turaga ena nona veivakaroti meda dau vakacegui ira tale e so na ivakaro meda Nona ivakadinadina ena veigauna kei na veivanua kece sara.
E rau a vakadinadinataka na iVakabula na tama kei na tina ni gonetagane lailai ena bogi oya ena rumunigade e vale. A lako mai na Yalo Tabu, ka keitou a vakacegui kece sara. E rau a vakaukauwataki na itubutubu. A sega ni yali yani na icolacola ni lolosi, ia erau a rawa ni sotava na rarawa. Sa tubu tikoga na nodra vakabauta. Ka tomani tiko na nodra qaqaco ena nodra kerea tikoga ka bulataka tiko.
Na ivakadinadina ni Yalotabu baleta na Veisorovaki ka yaco talega mai ena bogi o ya a vakaukauwataki Jope me colata na nona icolacola:
“Niu sa kila sa bula tiko na noqui Vakabula, ena tu talega e vuravura ena veisiga mai muri:
“Ia ni sa rusa sara na kuliqu oqo, kau na kunea ga na Kalou ena yagoqu.”
Na ivakadinadina mai vua na Yalotabu a soli kina vua na kaukauwa me vosota. Ena lako sivita na tagi kei na lailai ni veivakacegui mai vei ira na tu wavoliti koya me raica na reki ena yaco mai vei ira na yalodina ni oti nodra lako sivita yani ena yalodina na nodra veivakatovolei.
A yaco dina vei Jope. A yaco vua ena bula oqo na veivakalougatataki. A mai yala ena cakamana oqo na italanoa kei Jope:
“Sa vakalougatataka vakalevu ko Jiova na veiyabaki i Jope sa muri, ka vakalailai eliu. …
“Ka sa sega ni kune ena vanua taucoko ko ya na yalewa sa matavinaka me vaka na luve i Jope: a sa vota vei iratou ko tamadratou na ivotavota e na kedra maliwa na ganedratou.
“Sa oti oqo sa bula tiko ko Jope ka dua na drau ka vasagavulu na yabaki ka raici iratou na luvena kei na luvedratou na luvena, me va nai tabatamata.
“A sa mate ko Jope, ni sa qase mai ka vuqa na nona yabaki.”
Sa ikoya na ivakadinadina mai vua na Yalotabu ni kena yaco mai na Veisorovaki a yaco vei Jope me vorata na veivakatovolei ka okati vata mai kei na bula oqo kivei keda taucoko. Oqori e tiki ni ituvatuva ni veivakabulai cecere ka solia vei keda na Tamada. A vakatara vei Luvena me vakarautaka, ena Nona solibula ni veisorovaki, na inuinui ka vakacegui keda se vakacava sara na dredre ni sala i vale ki Vua.
Erau a tala mai na Yalo Tabu na Tamana kei na Luvena me mai vakacegui ira ka vakaukauwataki ira nona tisaipeli na iVakavuvuli, ena nodra ilakolako oqo.
Au a raica na cakamana ni veivakacegui oqo niu yaco mai ena valenilotu, na vanua ka vakayacori kina na lotu ni veibulu ni gonetagane lailai. Au a sotava e dua na goneyalewa totoka au sega ni kila. E kaya ni gole tiko mai ki na veibulu me mai lolosi ka veivakacegui ke rawa.
E kaya ni nona gole mai ki na veibulu oqo mena vakacegui talega kina. A kaya ni se qai mate walega qo na nona ulumatua. A keveta tiko e dua na goneyalewa lailai totoka. Au kala yani e liu vua meu raica na matadredredre nei goneyalewa lailai. Au tarogi tinai gonelailai, “O cei na yacana?” E sauma mai vakatotolo ena marau “Na yacana o Reki. Na Reki e yaco ni oti na rarawa.”
A wasea tiko vei au na nona ivakadinadina. Au a raica ni vakacegu kei na sautu sa yaco mai vua mai na kena ivurevure dina duadua. Na Kalou duaduaga e kila na yalo, ka sa iKoya duadua talega e rawa me kaya vakaidina, “Au kila na ka o vakila.” Ia sa rawa meu raitayalotaka ruarua na nona reki kei na rarawa taumada, ia e kila ga ni Turaga e lomani koya.
Au sa kila ga vakatikina na levu ni gauna e marau kina o Koya, ni ra vukei Koya na Nona tisaipeli, me kauta yani na vakacegu kei na reki vua e dua na luvena na Tamada Vakalomalagi.
Au vakadinadinataka ni Turaga sa kerei keda yadua, na Nona tisaipeli, me veivukei ena noda vakamamadataka na noda icolacola vakai keda. Eda a sa yalataka meda na vakayacora. Au vakadinadinataka ni Turaga, ena Nona Veisorovaki kei na Tucake Tale, a sa voroka kina na kaukauwa kei mate. Au vakadinadinataka ni Karisito sa bula sa tala mai na Yalo Tabu, na Dauveivakacegui, vei ira eda sa yalataka meda vukei Koya me vakacegui ira.
Ko ni sa ivakadinadina taucoko, me vakataki au ga, me baleta na dina ni vosa e tiko ena pini e dara toka o tinaqu ena 20 na yabaki vakacaca ni lewena tiko na matabose raraba ni iSoqosoqo ni Veivukei. E volai toka kina, “Sa sega ni Mudu na Loloma.” Au se kila tikoga na ibalebale taucoko ni vosa oqori. Ia au a raica rawa na gauna e dau dodoliga yani me vukei ira na vakaleqai. Na ivolanikalou e tukuna vei keda na dina oqo: “Sa vu mai vei Karisito na loloma uasivi sara.”
Sa sega ni mudu na Nona loloma, ka sega ni oti rawa noda vakila na ue e lomada meda “tagi vata kei ira sa tagi … ka vakacegui ira sa rarawa.” Ka sega ni rawa me biuti keda na vakacegu sa yalataka tu o Koya ni da qaravi ira na tamata ena Vukuna.
Me vaka e dua na Nona ivakadinadina, au vakavinavinakataka na nomuni dau vakayacora sara tiko vakavinaka na nomuni itavi ni dau vukea na Turaga o Jisu Karisito sa bula tiko kei na Yalo Tabu, na Dauveivakacegui, mera vakaukauwataki na duru sa malumalumu ka laveta cake na liga sa wadamele. Au vakavinavinaka vakalevu, mai na vu ni yaloqu taucoko, me baleti ira na yalewa ena noqu bula era tisaipeli dina i Jisu Karisito era a vukei au ka vakalougatataki au. Ena yaca i Jisu Karisito, emeni.