Tu e Yasa ni Vunikau
Mai vei Elder Kevin W. Pearson
Ena Vitusagavulu
Na raivotu nei Liai me baleta na vunikau ni bula e dua na italanoa vakaibalebale mana ni vosota ki na ivakataotioti.
Ni voleka na gauna me takali yani kina o Peresitedi Heber J. Grant, a veisiko ki na nona vale e dua vei iratou na Veitacini iliuliu. Ni se bera ni biubiu, a masu vaqo o Peresitedi Grant, “Kemuni na Kalou, ni vakalougatataki au me kakua ni yali na noqu ivakadinadina ka meu yalodina tikoga ki na ivakataotioti!” Ni oti e voleka ni 27 na yabaki vaka-Peresitedi ni Lotu, oqo na nona masu ni vakatakekere. Na nona ivakaraitaki sa ivakananumi uasivi ni sega ni dua, se tabayabaki cava ga, ena vakuwai mai na veivakauqeti nei Setani. E rua na iyaragi kaukauwa duadua nei Setani na veivagolei tani kei na veicavilaki.
Na vosota ki na ivakataototi e ivakatakilakila tudei ni bula dina vakatisaipeli ka gadrevi ki na bula tawamudu. Ia ni yaco mai vei keda na veivakatovolei kei na dredre, sa dau tukuni wasoma vei keda me da “tautauri toka ga.” Meu vakamatatataka: me da “tautauri toka ga” e sega ni ivakavuvuli ni kosipeli. Na vosota ki na ivakataotioti e kena ibalebale me da dau lako vei Karisito e veigauna ka vakataucokotaki ki Vua.
Kevaka e gadrevi ena bula tawamudu na vosota ki na ivakataotioti, na cava e dau dredre kina na yalodina tiko? E dau dredre ni da tu ena maliwa ni veika me vakabibitaki. Na talairawarawa lomalomarua kei na yalodina veimama e dau vakamalumalutaka na vakabauta. Na vosota ki na ivakataotioti e gadrevi kina na yalodina taucoko vua na iVakabula kei na noda veiyalayalati.
Na raivotu nei Liai me baleta na vunikau ni bula e dua na italanoa vakaibalebale mana ni vosota ki na ivakataotioti. Yalovinaka ka vulica ena masumasu ka vakananuma vakatitobu na tadra nei Liai; qai vakatauvatana vei iko. Ni o kitaka vakakina, vakasamataka vakavinaka e ono na ivakavuvuli bibi ka na vukei keda me da vosota ki na ivakataotioti.
1. Mo Dau Masu Ga
Me da tekivu mada vei Liai duadua “ena dua na vanua liwalala ka butobuto.” O keda yadua eda dau sotava na veigauna butobuto ka galili. “Ni dau dredre tu na bula, mo dau masu ga.” Muria na ivakaraitaki nei Peresitedi Heber J. Grant. Masulaka na igu mo vosota ki na ivakataotioti. Taroga na Tamada Vakalomalagi, “Na cava tale o ni vinakata meu cakava?”
2. Lako mai vei Karisito ka Vakataucokotaki Vua
Na vunikau ni bula na itakele ni nona tadra o Liai. Na veika kece e dusia na vunikau ni bula. Na vunikau e matataki Jisu Karisito, o koya na ivakaraitaki matata sara ni loloma ni Kalou. Na vuana na Nona Veisorovaki tawavakaiyalayala ka ivakadinadina cecere ni loloma ni Kalou. Na bula tawamudu kei ira na noda daulomani e kamica ka gadrevi vakalevu cake mai na veika kecega. Me rawati na isolisoli oqo, sa dodonu me da “lako mai vei Karisito, me da vinaka kina.” Sai Koya na “sala, kei na vu ni dina, kei na vu ni bula.” E rawa ni da vakasinaita na noda bula ena rawaka kei na cakavinaka, ia ena ivakataotioti, kevaka eda sega ni cakava na veiyalayalati tabu me da muri Karisito ka rokova ena yalodina, eda sa maumau ka calata vakadua na maka.
3. Toso Tikoga ki Liu ena Vakabauta
E dua na sala e gole ki na vunikau ni bula, vei Karisito. E qiqo ka rabailailai, matailalai ka dodonu vinaka. Na ivakaro ni Kalou e matailalai ia e sega ni yalani. Era taqomaki keda mai na veika rerevaki vakayalo ka vakayago ka taqomaki keda mai na lakosese.
Na talairawarawa e tara cake na vakabauti Karisito. Na vakabauta e dua na ivakavuvuli ni cakacaka kei na mana. Ni muri tikoga na nona ivakaraitaki na iVakabula ena rawa kina na mana vakayalo kei na kaukauwa. Ni sega na mana veivaqaqacotaki ka veivakaukauwataki ni Veisorovaki, ena sega ni rawa ni da tiko ena sala ka vosota ki na ivakataotioti.
4. Na iVola i Momani na iDola ki na Rawabula Vakayalo
E veibolei na ilakolako ni bula. E rawarawa noda vagolei tani, butusevata noda sala, ka lakosese. Na dredre e tiki ni noda ilakolako tawamudu sega ni levei rawa ka yaga. Ni yaco na kalouca, kua ni laiva e dua na ka o sega ni kila vinaka me vakarusa na veika kece o kila. Vosota, kukuva toka na dina; ena yaco mai na kilaka. Na veivakatovolei e vaka na kabukabu lelevu ni butobuto ka rawa ni vakamatabokotaka na matada ka vakaukauwataka na yaloda. Vakavo sara kevaka “eda tautauri matua tikoga” ki na vosa ni Kalou ka bulataka, ena yaco me da mataboko vakayalo ka sega ni dau vakanananu vakayalo. Vakasaqaqara ena iVola i Momani kei na nodra vosa na parofita bula e veisiga, veisiga, veisiga! Oqori na idola ni rawabula vakayalo ka levea na veicavilaki. Kevaka e sega, eda sa lakosese vakayalo.
5. Kakua ni Vagolei Tani se Cavilaki
Me rogoci sai koya me vakasamataki vakamalua. Na vakarogoci ira era sega ni vakabauta na Karisito ena sega ni vukei iko mo kunei Koya. Nomu vaqaqara kilaka ena #spaciousbuilding (vale vakaitamera) ena sega ni kauti iko ki na dina. E sega ni kabi tu kina. Na iVakabula duadua ga e tu Vua na “vosa ni bula tawamudu.” Na veika kece tale e vosa walega. Na vale vakaitamera ka rabailevu e vakatakarakarataka na “nanuma sesewa kei na nodra viavialevu” na kai vuravura—ena dua tale na kena vosa, na veivagolei tani kei na veicavilaki. E sinai tu mai vei ira na tamata vakaisulu vinaka ka rairai vaka ni tu vei ira na veika kecega. Ia era sa vakalialia na iVakabula kei ira era muri Koya. Era sa “dau vakatavulici tiko ka sega ni rawata me ra kila na ka dina.” Era na dina beka vakapolitiki, ia era sa lakosese vakayalo.
6. Tu e Yasa ni Vunikau
Na itukutuku i Liai me da tu ena yasa ni vunikau. Eda tu baleta ni da sa saumaki vua na Turaga. E vakavuvulitaka o Alama, “Raica sa vakauqeta sara na yalodra; io, sa vakayadrati ira mai na nodra moce lutu, ka ra sa bula kina.” Ni da solia na yaloda vua na Kalou, ena veisautaka na Yalo Tabu na noda ivakarau ni bula, sa yaco me da saumaki vakatitobu vua na Turaga ka da sa sega tale ni vaqara na vale rabailevu. Kevaka eda muduka noda cakava tiko na veika ena kauta mai na saumaki vakatitobu, eda na lutu vakayalo. Na vukitani e veibasai ni saumaki.
Vei kemuni kece na daukaulotu ni veigauna sa oti kei na gauna oqo: Elder kei na sister, e sega ni rawa ni o lesu ga mai ena kaulotu ka dokoulu tale vaka na ga ki Papiloni, ka vakalusi gauna ena rawati ni poidi sega na betena ena qito ni vidio sega ni vakaibalebale ka qai sega ni mocelutu vakayalo. E sega talega ni rawa ni o vakaitovotaki iko ena iyaloyalo vakasisila ena initaneti ka sega ni via kila na ivalavala dodonu kei na bula savasava me sega na kena revurevu ca vakayalo. Ni sa yali vei iko na Yalo, o sa lakosese. Kakua ni vagolei tani ka cavilaki.
Na tisaipeli dina ena dau yadra tikoga vua na Kalou e veisiga yadua ena masu yadua vakaibalebale, vuli ivolanikalou vagumatua, talairawarawa, kei na veiqaravi sega ni nanumi koya ga. Tu e yasa ni vunikau ka yadra tiko.
Ena vicavata na yabaki sa oti, keirau a kacivi kei Sister Pearson me keirau laki vakatulewa ena Tabana ni Kaulotu na Washington Tacoma. E vakidacala dina na veikacivi. Ena loma taqaya au sota vata kei koya na jeameni kei na Vakailesilesi Liu ni kabani au a cakacaka tiko kina ka tukuna vei rau na noqu ilesilesi vakadaukaulotu. E laurai votu ni rau sega ni taleitaka noqu vakatulewa meu sa biuta na kabani. “Na gauna cava o sa vakatauca kina na lewa oqo, a cava o sega ni bau mai veitalanoa mada kina kei keirau?” erau via kila.
Ena dua na gauna lekaleka ni vakasama matata, e yaco mai noqu vakasama e dua na isaunitaro bibi. Au kaya, “Au a vakatauca na lewa oqo niu se gonetagane yabaki 19, ena noqu veiyalayalati kei na Kalou ena valetabu meu muria na iVakabula. Au sa tara cake na noqu bula ena veiyalayalati oqori, ka sa noqu inaki meu rokova tiko ena gauna oqo.”
Ni da sa veiyalayalati kei na Kalou, sa sega na lesu tale. Sa sega ni rawa na suka imuri, soro, kei na cegu mada. Ena matanitu ni Kalou, e tiko e dua na ivakatagedegede ni vakacerecerei. E gadrevi na bula vakatisaipeli gugumatua! E sega na tikina ni tisaipeli vakarauta se vakadonui koya. Na vakarauta e meca ni uasivi sara, na yalodina vakarauta ena tarovi iko mai na vosota ki na ivakataotioti.
Kevaka o sotava tiko na dredre, veilecayaki, se lakosese vakayalo, au vakauqeti iko mo cakava na ka duadua ga au kila ni na vakalesui iko tale. Tekivu tale mo vulica ena yalomasumasu na iVola i Momani ka bulataka na kena ivakavuvuli e veisiga, veisiga, veisiga! Au vakadinadinataka na mana tudei ni iVola i Momani ka na veisautaka na nomu bula ka vaqaqacotaka nomu yalayala mo muri Karisito. Na Yalo Tabu ena veisautaka na yalomu ka vukei iko mo raica na “veika sa yaco dina tiko.” Ena vakaraitaka vei iko o koya na ka mo cakava tarava. Oqo na yalayala nei Nifai vei iko:
“Au sa kaya vei iratou … ia ko koya yadua sa vakabauta ka muria sara na vosa ni Kalou, ena sega ni rusa; ena sega talega ni rawai koya na vere kei na gasau vidi ni ca me vakamatabokotaki koya ka kauti koya yani ki na veivakarusai.
“Ia, koi au … au sa vakaroti iratou … me ratou muria na vosa ni Turaga … me ratou vakabauta na vosa ni Kalou ka muria na nona ivakaro ena veika kecega.”
Kemuni na taciqu kei na ganequ, na vosota ki na ivakataotioti sai koya na vakatovolei cecere ni bula vakatisaipeli. Na noda bula vakatisaipeli e veisiga yadua ena vakatau kina na noda icavacava tawamudu. Yadra vua na Kalou, kubeta na dina, rokova na nomu veiyalayalati tabu ni valetabu, ka tu e yasa ni vunikau!
Au vakadinadinataka na Karisito sa vakaturi cake, ka bula tiko. Au kila ni bula tiko. Na noqu gagadre cecere duadua sai koya meu na dina ka yalodina ki na ivakataotioti ena noqu muria na Nona ivakaraitaki vakasakiti. Ena yaca tabu ni Turaga ko Jisu Karisito, emeni.