Matabete kei na Masu Yadua
Mai vei Peresitedi Henry B. Eyring
Matai ni Daunivakasala ena Mataveiliutaki Taumada
Sa rawa kina ni solia vei keda na Kalou na mana ena matabete ena ituvaki cava ga eda tu kina. E gadrevi ga kina me da kerea ena yalomalumalumu.
Au vakavinavinakataka na veivakabauti meu vosa vei kemuni na matabete ni Kalou e vuravura raraba. Au vakila na tarabi ni madigi oya baleta niu kila e dua na ka me baleta na nona veivakabauti na Turaga vei kemuni. Ena nomuni sa ciqoma na matabete, o ni sa ciqoma kina na dodonu mo ni vosa ka cakacaka ena yaca ni Kalou.
Ena qai vakavotukana ga na dodonu oya ni o sa rawata na veivakauqeti mai vua na Kalou. Ena gauna duadua ga oya sa na qai rawa kina mo vosa ena Yacana. Ia ena gauna duadua ga oqori sa na qai rawa kina mo cakacaka ena Yacana. Sa vakacalai beka vakaoqo na nomu nanuma, “O, e sega soti ni dredre oya. E rawa niu vakauqeti kevaka au kerei meu vosa se kevaka e gadrevi meu solia e dua na veivakalougatataki ni matabete.” Se ena vakacegu beka na dikoni gonetagane se na ivakavuvuli ni vakasamataka, “Niu sa qase cake se niu sa kacivi meu daukaulotu, au na qai kila na veika ena tukuna na Kalou kei na veika ena cakava na Kalou.”
Ia vakasamataka mada na siga sa na dodonu kina mo kila na ka ena tukuna na Kalou kei na ka ena cakava. Sa yaco oti mai vei keda kece—se vanua cava ga o tu kina ena nomu ilesilesi ni matabete. Au a tubu cake ena buturara ni kaulotu ena tokalau kei Amerika ena iKarua ni iValu Levu. E veiyawaki sara na vanua era tu kina na lewe ni Lotu, ka lailai sara na benisini e vakatarai me da volia. O au duadua ga na dikoni ena tabana oya. Era dau solia na lewenilotu na nodra waqanivola ni isolisoli ni lolo vua na peresitedi ni tabana ni ra lako mai ki na soqoni ni lolo kei na ivakadinadina ena neitou vale.
Niu yabaki 13, keitou toki ki Utah me vakaitikotiko ena dua na tabanalevu vakaitamera. Au nanuma na imatai ni noqu ilesilesi meu lako yani ki na veivale ka kumuna na isolisoli ni lolo. Au raica na yaca ena dua na waqanivola a soli vei au ka raica ni tautauvata na iotioti ni yaca kei na dua vei iratou na Tolu na iVakadinadina ni iVola i Momani. Au mani tukituki e katuba ena yalodei. A dolava mai o tagane na katuba, raici au, ka kodrovaka meu lako tani. Au mani lako cuvacuva yani.
Oqo sa rauta ni 70 na yabaki sa oti, ia au se nanuma tikoga na veika au vakila ena siga ko ya e matanikatuba ni a dodonu meu a tukuna se cakava e dua na ka. Kevaka walega meu a masu ena vakabauta ena noqu lako yani ena siga ko ya, keu a vakauqeti beka meu tu tale mada vakalailai e matanikatuba, matadredredre, ka tukuna e dua na ka me vaka na: “E talei niu sotavi iko. Vinaka vakalevu na veika dou sa solia o iko kei na nomu matavuvale ena veigauna sa oti. Au sa nanamaki tiko meu na raici iko tale ena vula mai qo.”
Keu a tukuna ka cakava oya, ke a qai sosa—ka rarawa sara beka. Ia au kila ena gauna oqo se na vakacava na ivakarau ni yaloqu. Ke a sega na yalorarawa se na druka ena noqu gole yani, keu a vakila beka na veivakacaucautaki malumu ena noqu vakasama kei na yaloqu: “Daumaka.”
Sa dodonu vei keda kece me da vosa ka cakacaka ena yaca ni Kalou ena veigauna ena sega ni veiganiti kina na noda vakatulewa tawavukei ni sega na veivakauqeti. Na veigauna oqori e rawa ni yaco mai vei keda ni sega na gauna me ia na vakavakarau. Qori sa yaco oti vakavuqa vei au. A yaco ena vuqa na yabaki sa oti ena dua na valenibula ka tukuna kina vei au kei na noqu itokani e dua na tama ni ra sa tukuna vua na vuniwai ni sa na mate ena loma ga ni vica na miniti na luvena yalewa yabaki tolu ka sa mavoa sara tu vakaca. Niu vakotora na ligaqu ena tiki ni uluna duadua ga e sega ni vadreti tu, meu kila, me vaka niu italai ni Kalou, se na cava ena cakava ka tukuna o Koya.
E yaco mai ki na noqu vakasama kei na tebenigusuqu ni na bula o koya. E vosakudrukudru ena cudru na vuniwai a duri tu e yasaqu ka kerei au meu kua ni vakaosooso. Au curu mai na valenibula oya ena yalovakacegu kei na loloma. A bula na goneyalewa oya ka tayabe sobu mai na iyabeyabe ki na soqoni sakaramede ena noqu iotioti ni siga ena korolevu ko ya. Au se nanuma tiko na reki kei na lomavinaka au a vakila mai na veika au a tukuna ka cakava ena veiqaravi ni Turaga ena vukuna na goneyalewa lailai kei na nona matavuvale.
Na duidui ena veika au a vakila mai valenibula kei na yalorarawa au vakila ena noqu lako tani mai na katuba oya niu se dikoni e yaco mai ena veika au sa vulica me baleta na kedrau isema na masu kei na mana ni matabete. Niu se dikoni, au se bera kina ni vulica ni kaukauwa me da vosa ka cakacaka ena yaca ni Kalou ena gadrevi kina na ivakatakila ia me tu vei keda ena gauna eda gadreva kina e vinakati kina na masu kei na cakacaka ena vakabauta me baleta na veitokani ni Yalo Tabu.
Ena yakavi ni se bera niu lako ki na katuba oya me kumuna na isolisoli ni lolo, au a cavuta na noqu masu ena gauna ni moce. Ia ena veimacawa kei na vula ni se bera na talevoni mai valenibula, au a muria voli e dua na ivakarau ni masu ka cakava na sasaga a vakavuvulitaka o Peresitedi Joseph F. Smith ena rawa kina vua na Kalou me solia mai na veivakauqeti e ganita me tu kina vei keda na mana ni matabete. A rawarawa na nona tukuna:
“Me da kakua ni tagi vua ena vuqa na vosa. Me da kakua ni vakaocai koya ena masu babalavu. Ia na ka eda gadreva, kei na ka e dodonu me da vakayacora ni da Yalododonu Edaidai, me da vinaka kina, me da lako yani vakawasoma vua, me da vakadinadinataka vua ni da nanumi koya tiko ka da sa tuvakarau me da taura na yacana, muria na nona ivakaro, cakacaka ena buladodonu; ka ni da gadreva na Yalona me vukei keda.”
Ka qai tukuna vei keda o Peresitedi Simici na ka e dodonu me da masulaka, ni ra yalataka na nona italai me ra vosa ka cakacaka ena vukuna na Kalou. E kaya kina: “Na cava o dau masulaka? O masuta me kilai iko na Kalou, me rogoca na nomu masu, ka me vakalougatataki iko ena Yalona.”
E sega soti ni dua na ka na vosa me da vakayagataka, ena gadrevi me da na vosota vakadede. Sai koya na nomu toro yani vua na Tamamu Vakalomalagi ena inaki me kilai keda yadua o Koya. Sai koya na Kalou ni kalou kecega, na Tamada kecega, ia sa tuvakarau me rogoci keda vakatautauvata na Luvena. Oqori beka na vuna e vakayagataka kina na iVakabula na veivosa “Tamai keimami mai Lomalagi, me vakarokorokotaki na yacamuni.”
Ena rawarawa cake na yaco mai ni vakarokoroko ni da tekiduru tiko se vakacuva na uluda, ia e rawa ni da vakila ni da sa torova tiko na Tamada Vakalomalagi ena ivakarau vakatamata yadua kei na masu lo, me vaka ena dau gadrevi vakalevu vei keda ena noda veiqaravi ni matabete. Ena vakavolivoliti iko na rorogo kei na tamata ena vuqa na gauna ni o yadra tiko. Dau rogoca na Kalou na nomu masu vuni, ia ena gadrevi beka mo vulica mo dau tabonaka na veivagolei tani baleta na gauna o gadreva kina na sema vua na Kalou e rawa ni sega ni yaco mai ena gauna vakadigagalu.
E vakatura o Peresitedi Smith ni o na gadreva mo masuta me na raici iko na Kalou ena nomu ilesilesi ni veiqaravi Vua. Sa kila oti tu vakamatailalai o Koya na nomu veikacivi. A kacivi iko o koya, ia ena nomu masuti Koya me baleta na nomu ilesilesi, ena vakatakila mai o Koya e vuqa na ka mo kila.
Au na tukuna vei kemuni e dua na ivakaraitaki ni veika me cakava e dua na dauveituberi vakamatavuvale ni masu. O sa na kila oti tiko beka ni dodonu me:
“Io me dausikova na nodra vuvale na lewenilotu, ka vakaroti ira me ra vakayacora vakavinaka na nodra itavi, io me ra dau masu tikoga ena masu votu kei na masu vuni. …
“… Dau vakaraici ira na lewenilotu, dausikovi ira ka vakauqeti ira tikoga;
“Me ra kakua ni ivalavala ca, me ra kakua ni veicudruvi, me ra kakua ni lasu, veikaseti vuni se vosavakacacataki ira na tani;
“Me raica me ra dausoqoni wasoma na lewe ni lotu, ka raica talega me ra vakayacora vakavinaka na nodra itavi.”
Ia, vei koya mada ga na dauveituberi vakavuvale kilaka kei na nona itokani gone, e matata ni na sega ni rawa oqori kevaka e sega na veivuke ni Yalo Tabu. Vakasamataki ira na veimatavuvale se o ira sara mada ga na tamata yadua o sa kacivi mo qaravi ira. Na vakatulewa vakatamata kei na inaki vinaka ena sega ni rauta.
O koya mo na masuta kina na sala mo kila kina na yalodra, mo kila na veika e yali tiko ena nodra bula kei na yalodra na tamata o sega soti ni kila vinaka ka ra sega soti ni taleitaka sara mo kilai ira. O na gadreva mo kila na ka e vinakata na Kalou mo cakava mo vukei ira ka mo cakava kece ena kena vinaka duadua o rawata, ka vakila tiko na loloma ni Kalou ena vukudra.
Baleta ni tu vei iko na veikacivi ni matabete bibi ka dredre vakaoqo sa vakatura kina o Peresitedi Smith ni gauna o masu kina, mo dau vakatakekere vua na Kalou me na vakalougatataki iko ena Yalona. O na gadreva na Yalo Tabu sega ni vakadua walega ia ena kena levu ga ena vakatara vei iko na Kalou me nomu itokani tudei. Oqori na vuna e dodonu me da dau masulaka tikoga me na tuberi keda na Kalou ena noda veiqaravi vei ira na Luvena.
Baleta ni o sega ni rawa ni yacova yani na kemu iyacoyaco ena matabete ke sega ni toso tiko vata kei iko na Yalotabu, o sa dua kina na nona takete na meca ni marau kecega. Kevaka e rawa ni temaki iko o koya mo ivalavala ca, sa rawa vua me vakalailaitaka na nomu kaukauwa mo liutaki tiko kina ena Yalotabu ka vakalailaitaka kina na mana ni nomu veiqaravi ena matabete. Oqori na vuna e kaya kina o Peresitedi Smith ni dodonu me da dau masulaka tikoga me na vakasalataki keda ka taqomaki keda mai na ca na Kalou.
Sa vakasalataki keda ena vuqa na sala. Na ivakasala ni qaqarauni era tiki ni ituvatuva ni veivakabulai. Era sa vakarogoya tiko na parofita, iapositolo, peresitedi ni iteki, bisopi, kei na daukaulotu na domo ivakasala ni qaqarauni me da dro tani mai na ca ena noda vakabauti Jisu Karisito, veivutuni, ka cakava ka maroroya na veiyalayalati tabu.
Ni o taura tu na matabete, sa dodonu mo dua na domo ni veivakasalataki ni Turaga. Ia sa dodonu mo rogoca mada o iko na ivakasala. O na sega ni rawabula vakayalo kevaka e sega na veitaqomaki ni veitokani ni Yalo Tabu ena nomu bula ni veisiga.
Sa dodonu mo masuta ka cakacaka mo rawata. Ena veituberi duadua ga qori ena rawa kina vei iko mo kunea na nomu sala ena gaunisala qiqo ka rabailailai ena loma ni kabukabu ni ca. Ena nomu idusidusi na Yalo Tabu ni vakatakila mai o Koya na dina ni o vulica na nodra vosa na parofita.
Me rawati na veituberi oqori e gadrevi me levu cake na ka e caka mai na vakarorogo tu ga kei na wiliwili. O na gadreva mo masu ka cakacaka ena vakabauta mo teivaka ki yalomu na vosa ni dina. Sa dodonu mo masuta me na vakalougatataki iko na Kalou ena Nona Yalotabu, ni na liutaki iko o Koya ki na dina kecega ka vakaraitaka vei iko na sala dodonu. Oqori na sala ena vunauci iko ka tuberi iko kina o Koya ki na sala dodonu ena nomu bula kei na nomu veiqaravi ni matabete.
E vakarautaki ena koniferedi raraba e dua na madigi levu me soli vua na Turaga me vaqaqacotaka na nomu kaukauwa mo veiqaravi ena matabete ni Kalou. E rawa ni o vakarautaki iko, au vakabauta deivaki ni ko ni a vakayacora vakakina me baleta na koniferedi oqo ena masu. E rawa ni o vakaduavatataka na nomu vakabauta kei ira era na masu. Era na masulaka ena koniferedi oqo e levu na veivakalougatataki ena vukudra e vuqa na tamata.
Era na masulaka me lako mai vua na parofita me vaka ni gusuna na Turaga na Yalotabu. Era na masulaki ira na iApositolo kei ira kece na italai e kacivi ira na Kalou. Oqori o okati kina o iko, mai vua na dikoni vou duadua ki vua na bete levu sa qaseta tu, kei ira eso, na qase kei na gone, ka sa voleka ni ra lako yani ki na vuravura ni yalo, na vanua era na rogoca kina, “E vinaka, a tamata vinaka ka dina.”
Na veivakacaucautaki oqori ena yaco vei ira eso era na kidacalataka. Era se bera ni taura eso na itutu cecere ena matanitu ni Kalou e vuravura. Eso beka era nanuma ni lailai na vua ni nodra cakacaka era raica se sega beka ni soli vei ira eso na madigi ni veiqaravi. Eso beka era nanuma ni a vakalekalekataki na nodra gauna ni veiqaravi ena bula oqo mai na veika era a namaka.
E sega soti ni bibi vua na Turaga na itutu o taura tu se na gauna ni nomu veiqaravi. Eda kila oqo mai na vosa vakaibalebale ni Turaga baleti ira na tamata cakacaka ena were ni vaini, ka a tautauvata ga na kedra isau se cava ga na balavu kei na vanua eda veiqaravi kina. Era na saumi ena ivakarau ni nodra veiqaravi.
Au kila e dua na tamata, e dua na itokani lomani sa mai cava ena 11:00 ena bogi na nona veiqaravi ni bula oqo ena were ni vaini. Sa qaravi tiko mai ena vicavata na yabaki ena mate ni kenisa. Ena veiyabaki oqori ni nona qaravi tiko kei na mosi levu kei na dredre, a ciqoma e dua na veikacivi me dau vakayaco bose ka liutaki ira na lewenilotu ena nona tabanalevu ka ra sa lako tani mai nodra veivale na luvedra; eso era yada. Na nona veikacivi me vukei ira me ra kune vakacegu ena bula veimaliwai kei na vuli kosipeli.
Ni yaco mai vua na iotioti ni itukutuku vakamosiyalo ni sa lekaleka na gauna ni nona bula sa vo, a lako tu vakacakacaka na nona bisopi. Ni oti e rua na siga, a vakauta e dua na itukutuku vei nona bisopi mai vua na nona iliuliu ni bete levu. E tukuna vaqo o koya me baleta na nona ilesilesi: “Au kila ni lako tu na bisopi, o koya au sa cakacaka tiko kina. Au vakasamataka tiko me dua na neitou bose vakailawalawa ena Moniti mai qo. E rawa ni rau vakasarasarataki keirau ena Vale ni Koniferedi e rua na lewenilotu. Ena totoka sara kevaka e rawa ni ra draivataki ira eso na lewenilotu kei na so na sikauti me ra biliga na idabedabe vakaqiqi. Ena vakatau o cei soti ena saini kina, ena rawa beka ni veirauti na itabaqase me da cakava ga, ia ena uasivi me da kila ni tiko na veitokoni kevaka e gadrevi. E rawa talega ni dua na bogi vinaka ni matavuvale vei ira na liganiveivuke. Ia qai tukuna rawa mai ni se bera niu biuta na ituvatuva. … Vinaka.”
Oti qai vakidacalataka na bisopi ena dua na qiri. Ni sega ni via tukuna na kena ituvaki se na nona sasaga gugumatua ena vuku ni nona ilesilesi, a taroga, “Bisopi, dua beka na ka au rawa ni cakava vei iko?” Na Yalo Tabu duadua ga e rawa ni vakatara vua me vakila na icolacola nei bisopi ena gauna vata e bikai tu kina ena nona icolacola. Kei na Yalotabu duadua ga e rawa kina vua me tauyavutaka e dua na ituvatuva me veiqaravi vei ira na tacina kei na ganena ena maqosa vata a vakayagataka ena nona a tuvalaka na veisoqo ni sikauti ni se gone.
Ena masu ni vakabauta, sa rawa kina ni solia vei keda na Kalou na mana ena matabete ena ituvaki cava ga eda tu kina. E gadrevi ga kina me da kerea ena yalomalumalumu me vakaraitaka vei keda na Yalotabu na veika e vinakata na Kalou me da tukuna ka cakava, cakava sara, ka qai bulakilikili kaya tiko.
Au vakadinadinataka vei kemuni ni bula tiko na Kalou na Tamada, e lomani keda, ka rogoca noda masu yadua. Au vakadinadinataka ni o Jisu na Karisito bula sa rawa ni da vakasavasavataki ena vuku ni nona Veisorovaki ka kilikili kina kei keda na veitokani ni Yalo Tabu. Au vakadinadinataka ena noda vakabauta kei na gugumatua, ena rawa kina me da rogoca ena dua na siga na malanivosa ena kauta mai na reki: “E vinaka, a tamata vinaka ka dina.” Sa noqu masu ni da na ciqoma na veivakalougatataki mai vua na iVakavuvuli eda qarava. Ena yaca i Jisu Karisito, emeni.