Jānwōde 23

Ewi Wāween an Irooj Jipan̄ Eō Bwe En Ļapļo̧k An Tiljekļo̧k Aō Jerbal?

Jenesis 5; Moses 6

Ko̧o̧njeļ Ippān Doon

Kar tōl jān juon uwaan būreejtōnji eo an doulul eo ak kūlaaj eo; 10–-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innām tōl juon iien ekōnono kōn jerbal in lo̧mo̧o̧r eo im mour ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta en̄jake ko rekāāl rekar kōkajoorļo̧k naan in kam̧ool ko ad?

• Kea kōn ro rej pād ilo aikuj. Wōn eo ej aikuji jipan̄ eo ad im jar ko ad? Ta eo jej im̧we n̄an kōm̧m̧ane n̄an jipan̄ er?

• Karuwaineneik aolep n̄an bōk gospel eo. Ewi wāwen jemaron̄ erom̧ juon meram n̄an ro uwaan baam̧le eo ak ro m̧ōttad ro rejjab tōmak tōmak ko ad?

• Kobaik baam̧le ko n̄an indeeo. Ewi wāween ad kwaļo̧k eļapļo̧k iakwe im rejtak n̄an baam̧le ko ad im kōm̧m̧ane juon oktak em̧m̧an ilo im̧ōko im̧ōd?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak jodikdik; 25–35 minit ko

Kōpooj Eok Make ilo Jetōb

Ke Inōk ekar bōk kūr eo an n̄an jerbal n̄an Irooj, ekar en̄jake an jab maron̄e (lale Moses 6:31). Ak Irooj ekar jab jilkinļo̧k wōt Inōk n̄an kōm̧m̧ane jerbal eo An; Ekar bar kallim̧uri Inōk bwe Enaaj kōjparok im jipan̄ e (lale Moses 6:32–34).

Bōlen kwomaron̄ iookļo̧k en̄jake eo an Inōk kōn an jab maron̄e ilo kijejeto ko an make n̄an jerbal n̄an Irooj. Jet iaan jerbal in jipan̄ ko kar itok āinwōt kūr ko ilo Kabun̄ in. Ilo jet iien, jej lo juon aikuj im en̄jake im̧we jān Jetōb n̄an kwaļo̧k ad iakwe im rie. Ijoke iien ko rem̧m̧an rej itok, jemaron̄ peran, āinwōt Inōk, jeļā bwe Irooj enaaj jipan̄ kōj ilo ad bōk kūr eo An n̄an “etetal ippa” (Moses 6:34).

Ilo am̧ kōppopo n̄an katakin kōn jipan̄ eo jemaron̄ bōke jān Irooj ilo ad jipan̄ ro jet, etale Moses 6 im ļōmņak kōn en̄jake ko kwar en̄jaki ilo am̧ jerbal n̄an ro jet. Ewi wāween an kar Irooj jipan̄ eok ilo kijejeto ko am̧? Ta eo kwoj kōjatdikdik ro uwaan kūlaaj ak doulul eo am̧ renaaj ekkatak jān waanjon̄ak ko an Inōk im ro jet? Kwomaron̄ riiti juon iaan ennaan kein jān Būreejtōn Henry B. Eyring: “Etetal Ippa” (Liaona, Māe 2017, 82–85) or “Kōrā in Bujen ro ilo Jemdoon eo ippān Anij” (Liaona, Nob. 2019, 70–73).

Jemaron̄ ļoor waanjon̄ak eo an Rilo̧mo̧o̧r eo ilo ad loļo̧k ro jet kōn tūriam̧o.

Ekkatak Ippān Doon

Jipan̄ ro jet ej letok juon iien em̧m̧an n̄an kōj n̄an “etetal ippān [Anij],” im jenaaj bōk jipan̄ eo An ilo ad jipan̄ (Moses 6:34). N̄an jipan̄ ro uwaan kūlaaj eo ak doulul eo jino ekōnono kōn menin, kwomaron̄ kajjitōk ippāer n̄an kappukot Moses 6:32–39 wāween ko Irooj ekar jipan̄ Inōk ilo iien jerbal ko an. Ewi wāween an Irooj jipan̄ kōj n̄e jej jerbal n̄a E? Ļōmņak kein rej elaajrak remaron̄ jipan̄ eok tōl juon ekōnono kōn jipan̄ ekwojarjar eo jemaron̄ bōke ilo ad jipan̄ ro jet.

• Eoon ko robrak kōn katak ko kōn jerbal in jipan̄ (lale, n̄an waanjon̄ak, Matu 25:31–40; Luk 10:25–37; Mosaia 2:17). Ļōmņak in karuwaineneik ro jet kwoj katakin er n̄an kwaļo̧k eoon ko me rej im̧we er n̄an jipan̄ ro jet. Kwomaron̄ kajjitōk ippāer m̧okta kadede n̄an itok ilo aer pojak n̄an kwaļo̧k eoon ko kōn jerbal in jipan̄ in waanjon̄ak kōn jerbal in jipan̄. Eļan̄n̄e rej aikuj jipan̄, rōjan̄ er n̄an lale ium̧win “Service” ilo Unin Tōl eo n̄an Jeje ko Rekwojarjar (scriptures.ChurchofJesusChrist.org). Ta eo kwoj im̧we n̄an kōm̧m̧ane kōn ta eo kwaar riiti?

• Rilo̧mo̧o̧r eo ekar jipan̄ ro jet ilo iien kwaļo̧k naan eo An. Ta jemaron̄ ekkatak jān wanjo̧n̄o̧k eo An me emaron̄ jipan̄ kōj ilo ad jerbal? N̄an uwaake kajjitōk in, kajjojo ro uwaan kūlaaj ak doulul eo remaron̄ riiti juon iaan eoon ko rej elaajrak, kappukot juon men me ej katakin kōn waanjon̄ak eo an Rilo̧mo̧o̧r kōn jerbal in jipan̄: Matu 14:13–21; Jon 9:1–11, 35–38; 13:4–5, 12–17; 3 Nipai 17:5–9. Karuwaineneik aolep n̄an kwaļo̧k juon men rekar loe. Leļo̧k iien n̄an aolep n̄an ļōmņak kōn juon eo remaron jipan̄ e im wāween aer naaj ļoor waanjon̄ak eo an Rilo̧mo̧o̧r eo ilo jerbal in jipan̄ in.

• Jet iien jej ļōmņak jerbal in jipan̄ meļeļein ej kōm̧m̧an juon men ekilep im ilo iien eo em̧ōj karōke. Emaron̄ bar juon ne unin ad jab jipan̄ jon̄an eo jemaron̄ kar kōm̧m̧ane. Kwomaron̄ jitōn̄ im kwaļo̧k bwe Rilo̧mo̧o̧r eo ekkā an jipan̄ armej Ekar kile er ilo aolep iien jerbal ko An aolep raan (lale, n̄an waanjon̄ak, Matu 12:9–13; Mark 5:21–34; Luk 19:1–10; Jon 4:3–26). N̄an jipan̄ ro uwaan kūlaaj ak doulul eo ļōmņak kōn wāween ko remaron̄ jipan̄ ro jet ilo mour ko aer aolep raan, kwomaron̄ kwaļo̧k juon iaan pija in alooj kein rej elaajrak: “When Ye Are in the Service—YM” ak “When Ye Are in the Service—YW” (ChurchofJesusChrist.org). Kajjitōk ippān jodikdik ro n̄an kwaļo̧k ļōmņak ko aer. Ta jerbal in jipan̄ dikdik ko em̧ōj ad loe an ro jet kōm̧m̧ani? Ta eo kar im̧we kōj n̄an kōm̧m̧ane? Karuwaineneik kajjojo armej n̄an je wāween ko n̄an kadedeikļo̧k ennaan kein rej elaajrak: “Imaron̄ jipan̄ ro jet ilo aō …” im “Inaaj kappukot jipan̄ eo an Irooj ilo kijejeto ko aō ilo aō …” Innem kajjitōk ippān jejjo n̄an kwaļo̧k ta eo rekar je.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbalki im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• “Opportunities to Do Good,” “Teachings of Thomas S. Monson: Rescuing Those in Need” (videos), ChurchofJesusChrist.org

• Bonnie L. Oscarson, “Aikuj ko Rej Pād Im̧aad” (Liaona, Nov. 2017, 25–27)

Teaching in the Savior’s Way

“Ilo kakobaba n̄an jipan̄ rūkkatak ro en̄jake im kile Jetōb eo, jipan̄ er jerbalii im̧we ko rej būki” (Teaching in the Savior’s Way [2016], 10).