Aikuj ko Rej Pād Imaad
Jet iaan aikuj ko reaorōk jemaron̄ kakke rej pād ilowaan wōt baam̧le ko ad make, ilubwiljin ro m̧ōttad, ilo ward ko ad, im ilo jukjukin pād ko ad.
Ilo raan ko ļo̧k jekar kam̧ool kōn lan̄ ko reļļap raar jelete Mexico, Amedka kaņ, Asia, Carribean, im Africa. Eaar kakobaiktok em̧m̧an ko ilo armej āinwōt an taujin armej kar kōm̧m̧ane ijoko remaron̄e n̄an jipan̄ ro raar pād ilo kauwōtata ak pād ilo aikuj im mej. Eļap aō kar m̧ōņōņō in lo elōn̄ jiron̄ ro jān Texas im Florida ro, ippānļo̧k elōn̄ ro jet, raar kōnaki jiln̄ij ielllo ko elōn̄ naan in Helping Hand ak Pein Jipan̄ im rej jipan̄ karreo m̧ōko raar jorrāān jān lan̄ ko reļļap. Elōn̄ ļo̧k jān taujin armej ro raar bar kōņaan etal n̄an ijo eļap aikuj jipan̄ ie n̄e en kar jab ettoļo̧k. Ijjeļo̧kin, kom̧ kar leļo̧k menin tūriamo̧ ko n̄an kōmeraikļo̧k en̄taan ko. Jouj im tūriamo̧ ko ami rekōketak im rej āinwōt mour an Kraist.
Rainin ikōņaan kwaļo̧k juon m̧ōttan ļo̧k jipan̄ eo me Ij en̄jake bwe eaorōk n̄an aolep —jekdoon ijoko kwoj pād ie. N̄an kōj ro raar alooji nuuj in m̧akūtkūt ko kiiō im kar en̄jake n̄an jeļā ta eo n̄an kōm̧m̧ane, uwaak eo emaron̄ lukkuun pād im̧aad.
Rilo̧mo̧o̧r eaar katakin, “Bwe jabdewōt eo e kōņaan dāpij mour, enaaj jako: a jabdewōt eo mour eo an enaaj jako kōn N̄a, e in enaaj lo̧mo̧o̧ren.”1 Būreejtōn Thomas S. Monson eaar kōm̧eļeļeik eoon in: “Ij tōmak bwe Rilo̧mo̧o̧r ej ba n̄an kōj bwe n̄e jej jab luuji mour ko ad ilo jerbal n̄an ro jet, jidik wōt ad jeraam̧m̧an ilo mour ko ad. Ro rej ļōmņak kōn er make āliktata enaaj ejjeļo̧k tokjeer im naaj luuji mour ko aer, ak ro rej luuji mour ko aer ilo jerbal n̄an ro jet rej eddōkļo̧k im jebar—im ilo tōprakin renaaj lo̧mo̧o̧ren mour ko aer.”2
Jej mour ilo juon manit eo ijo me ej ļapļo̧k wōt ad kōjerbal kein kapeel ko an raan kein āinwōt taļboon ak tāāblet, jān ad lale armej ro ipeļaakid. Eļap ļo̧k kōm̧m̧ani men kein, jeje ilo taļboon im ijjilōkļo̧k enaan ko ilo kein iiaio imejatoto jān ad lukkun kalimjōk juon im ettōn̄ ak, barāinwōt jeja, ad jelm̧ae doon im bwebwenato. Eļapļo̧k ad ļōmņak kōn oraņ armej ro rej ļoor im kōņaan jej bōke ijelo̧kin likūt peiid aeraņ eo m̧ōttad im kwaļo̧k am̧ iakwe, am ļōmņak kake, im am itok limo. Men̄e kein jerbal ko raan kein remaron̄ kabwilōn̄lōn̄ ilo jet wāween n̄an kajedeed enaan eo an gospel eo an Jisōs Kraist im jipan̄ kōj dāpij wōt jem̧jerā in baam̧le im m̧ōttā ko ad, eļan̄n̄e jejjab lukkuun meletlet ilo wāween kōjerbal taļboon ak tablet ko ad make, jemaron̄ jino ad ļōmņak kōn kōj make im meļo̧kļo̧k bwe men eo eaorōk ilo gospel in ej jerbal in jipan̄.
Ewōr aō iakwe eļap im tōmak kōn ro me rej pād ilo iiō in jodikdik im rūm̧m̧an ded ro. Iaar loe im en̄jake ikdelel ko ami n̄an jerbal im kōm̧m̧an oktak ilo juon laļ. Ij tōmak bwe elōn̄ membōr ro rej ļōmņak bwe jipan̄ ej m̧ōttan eo eaorōk kōn bujen ko aer im aer mour āinwōt rikaļoor. Ak iaar barāinwōt ļōmņāk bwe jet iien epidodo ad kajejtokjen iien ko reaorōk n̄an jipan̄ ro jet kōnke jej mad ak kōnke jej pukot wāween ko reļļap n̄an kōm̧m̧an oktak ilo laļ in im jejjab loe bwe jet iaan aikuj ko raorōk me jemaron̄ kōm̧m̧ani repād ilowaan wōt baam̧le ko ad, ilubwiljin ro m̧ōttad, ilo ward ko ad, im ilo jukjuk in pād ko ad. Jej buromōj n̄e jej lo an ro ipeļaakin laļ in rej en̄taan im aikuj eļap, ak jemaron̄ likjab n̄an lo bwe ewōr juon armej eo ej aikuj m̧ōttan eo ej jijjet iturir ilo kūlaaj ko ad.
Sister Linda K. Burton eaar kwaļo̧k juon bwebwenato in juon būreejtōn an Doulul eo an Kōrā ro eo, eaar aini ko̧o̧j ko n̄an armej ro rej aikuj ilo 1990 jima ko. “E im leddik eo nejin raar kattōr e juon wa killep im kōbrak e kōn ko̧o̧j ko jān London n̄an Kosovo. Ilo iaļ eo an n̄an m̧weo ekar bōke juon jejjet in jitbōn kabwilōn̄lōn̄ me ekar deļo̧n̄ ilo m̧wilaļ in buruōn. En̄in ej im̧we eo: ‘Ta eo kwar kōm̧m̧ane ej juon men elukkuun em̧m̧an. Kiiō rooļ n̄an m̧weo imōm, etetal ilo iaļ ko, im jipan̄ ro rūtūrum!’”3
Ta eo em̧m̧an n̄an lo̧mo̧o̧ren laļ in eļan̄n̄e jej kōjekdoon aikuj ko an ro jet me repaak e kōj im ro me jej iakwe er? Ewi jon̄an an aorōk ilo ad jipan̄ ijoko rettoļo̧k n̄e armej ro ipeļaakid rej jelm̧ae apan̄ im jej jab jeļā kake?Jemedwōj Ilan̄ emaron̄ kar likūt ro rej aikuj bwe ren epaake kōj, ilo an jeļā bwe jem̧m̧an im jemaron̄ kakke aikuj ko aer.
Aolep remaron̄ lo wāween ko n̄an kōm̧m̧ane jerbal in jipan̄ āinwōt Kraist. Rikakpilōklōk eo mōtta, Sister Carol F. McConkie ekar ba n̄an n̄a kōn leddik eo jibūn me 10 an iiō etan Sarah, eo me ke eaar jeļā ke jinen enan̄inmej, eaar kālet ippān make bwe en jipan̄. Ekar karūj leddik jidikdik eo jatin, jipan̄ kōm̧m̧an an nuknuk, būraje n̄iin, kōm̧m̧ane bōran, im m̧ōn̄a in jibbon̄ bwe jinen en kakkije. Eaar kōm̧m̧ane jerbal in jipan̄ ilo aer kar jab ba n̄an e ak kōnke eaar lo juon aikuj im eaar kōņaan jipan̄. Ejjab Sarah wōt eaar kōjeram̧m̧an jinen, ak ijeļā bwe eaar bar m̧ōņōņō ilo an jeļā bwe eaar kōmeraikļo̧k eddo an juon eo me ej iakwe im, ke ej kōm̧m̧ane menin, eaar kōkajoorļo̧k jem̧jerā eo an ippān leddik eo jatin. Būreejtōn James E. Faust eaar ba: “Jipan̄ ro jet emaron̄ ijjino ilo jabdewōt iiō. … Ejjab aikuj juon men eo ekabwilōn̄lōn̄, im eļap an aorōk ilowaan baam̧le eo.”4
Ajri ro nejimi rej ke kile jon̄an an ļap tokjen ippān ro jineer im jemāer im ro uwaan baam̧le eo n̄e kwoj pukot wāween ko n̄an jipan̄ ilo m̧ōko? N̄an jet ilo iiō in jodikdik ko ami, kōkajoor im jipan̄ ro uwaan baam̧le ko ami rej aikuj men ko imaantata ilo am pukot wāween ko n̄an kōm̧m̧an oktak ilo laļ in. Kwaļo̧k jouj im am ļōmņak n̄an ro jeim im jatim im ro jinemi im jemāmi ej jipan̄ ejaake juon mejatoto in ippān doon im karuwaineneik Jetōb n̄an lowaan mōko. Kōm̧m̧an oktak ilo laļ in ej ijjino kōn kōkajoorļo̧k baam̧le ko ad make.
Bar juon iaan men ko jej mije ilo ad jipan̄ emaron̄ pād ilo ward ko ad make. Jet iien ajri ro nejid remaron̄ kajjitōk, Etke ij aikuj etal n̄an makūtkūt ko an Jodikdik? Ejjab lukkuun ļap men ij ekkatak jen e.”
N̄e en kar iien aō katakin nejū, inkar uwaak, “Ta eo ekōm̧m̧an bwe kwon ļōmņak ke kwoj etal n̄an Mutual eo kōnke elōn̄ men kwe kwoj ekkatak jene?”
Ran m̧ōtta reddik, imaron̄ kwaļo̧k ilo m̧ool bwe enaaj wōr juon eo ilo aolep iien jar ko an Kabun̄ in me ej ajjimakeke, eo ej ioon apan̄ im ej aikuj m̧ōttan, ak ej en̄jake bwe ejjab aorōk. Ewōr ippam juon men eaorōk n̄an leļo̧k ilo aolep kweilo̧k ak makūtkūt, im Irooj ej ikdelel bwe kwon reito reitak n̄an ro m̧ōttam innem kwaļo̧k naan āinwōt E.
Elder D. Todd Christofferson eaar katakin, “Juon un eļap unin an wōr m̧ōn jar an Irooj ej n̄an ejaake juon jukjuk in pād eo an ro Rekwojarjar ro me renaaj rejtake doon ilo iaļ eo ‘erānin̄ im eaidik eo ej tōlļo̧k n̄an mour indeeo.’” E eaar barāinwōt ba, Kabun̄ in ejjab ļōmņak kōn e make, ijjeļo̧kin, kar kūr kōj aolep n̄an jerbal im jipan̄. Jej mej, pā, bar, im ne ko im membōr ro jet ilo ānbwinnen Kraist.”5
Em̧ool bwe jej pād ilo iien jar ko an Kabun̄ in kajjojo wiik n̄an bōk koņaad ilo kain̄i ko ekkatak katak ko rem̧m̧an, im bōk im̧we, ak bar juon un eo eaorōk ilo ad pād ilo iien jar ej bwe, āinwōt juon baam̧le ilo ward eo kōn eddo ko ad āinwōt rikaļooran Rilo̧mo̧o̧r Jisōs Kraist, jej lale doon, kōkajoor doon, im pukot wāween n̄an jipan̄ im kōkajoor jem̧jerā eo aer n̄an doon. Jejjab ribbōk wōt jeram̧m̧an ilo Kabun̄ in; jej aikuj bar erom ro rileļo̧k. Jiron̄ im Likao raņ, n̄e kom̧ bar etal im Mutual, ijjeļo̧k am lale taļboon eo am n̄an lale ejet an ro m̧ōttam mour, bōjrak, reito reitak, im kajjitōkin eok make, “Wōn eo ej aikuj eō rainin?” Kwomaron̄ erom juon kii n̄an jipan̄ im un̄ūr mour an juon m̧ōttam ak kōkajoor juon m̧ōttam eo ej ioon apan̄.
Kajjitōk ippān Jemedwōj Ilan̄ bwe en kwaļo̧k waj ro ipeļaakim ro rej aikuj am jipan̄ im im̧we eok kōn wāween eo em̧m̧an tata n̄an jipan̄ er. Keememej bwe ekkā an Rilo̧mo̧o̧r eo kwaļo̧k naan n̄an armej ro juon ļo̧k juon ilo juon iien.
Ļaddik eo jibūm̧ etan Ethan eo 17 an iiō. Ekar un̄ūr būruō jōm̧ar eo kiiō ke ej ba n̄an n̄a ke, emōj kōketak e kōn waanjon̄ak eo an jinen, ej jar aolep raan bwe en wōr an iien n̄an jipan̄ juon. Ke kōm ar ippān doon ippān baam̧le eo an, iaar lo wāween an Ethan ej kōm̧m̧an n̄an ļaddik im leddik ro jatin ilo an kijenmej, iakwe, im jouj im ejipan̄ jinen; im kappukot wāween ko n̄an jipan̄ ro jet. Iaar bwilōn̄ kōn jon̄an an ļōmņak kōn armej ro ipeļaakin im kōn an ikdelel n̄an jipan̄ er. E ej juon waanjon̄ak n̄an eō. Kōm̧m̧an āinwōt an Ethan kōm̧m̧an—kajjitōk bwe Irooj en jipan̄ kōj kappukot wāween ko n̄an jipan̄—enaaj kōtļo̧k bwe Jetōb en kōpeļļo̧k mejād n̄an lo aikuj ko ipeļaakid, n̄an lo aikuj ko an “juon” ilo raan en, im n̄an jeļā wāween n̄an kwaļo̧k naan n̄an e.
N̄an kakobabaikļo̧k kōn jipan̄ baam̧le eo am im membōr ro ilo baam̧le eo am, lale iien ko n̄an jipan̄ ro ritūrūm im jukjuk in pād eo am. Ilo jet iien ko jekkein kajjitōk jipan̄ ālkin jorrāān ko rej waļo̧k jān lan̄ ko reļļap, ilo kajjojo raan jej rojan̄ kom n̄an kappukot iien ko ilo bukwon ko ami make n̄an kōketak im jipan̄ ro jet me rej aikuj. Iaar bōk katak jān Eria Būreejtōn eo, eo ekar jerbal ilo juon laļ eo me elōn̄ apan̄ ko ilo mour in kanniōk, bwe wāween eo em̧m̧an tata ej n̄an jipan̄ ro jet rej aikuj ilo m̧ōttan ko jet ipeļaakin laļ in ej n̄an kōļļā menin joortak, leļo̧k n̄an jikin jipan̄ ko an Kabun̄ in, Jeen in jipan̄, im kappukot wāween n̄an jipan̄ ro jet ilo jukjukin pād ko ami make ijo kom̧ ej jokwe ie. Pijaikļo̧k mok n̄e laļ in enaaj jeraam̧m̧an eļan̄n̄e aolep raar ron̄jake naan in katak in!
Ro jeiū im jatū, im eļaptata jodikdik ro, ilo ami kajjieon̄ erom āinwōt Rilo̧mo̧o̧r Jisōs Kraist im mour kōn bujen ko ami, kom̧ naaj wōnm̧aanļo̧k wōt im jeraam̧m̧an kōn ikdelel n̄an kōmeraik en̄taan im n̄an jipan̄ ro jet me edik aer jeraam̧m̧an. Keememej bwe jet iaan aikuj ko reļļap remaron̄ pād im̧aan mejāmi. Ej ijjino kōn jerbal in jipan̄ ko ami ilo m̧ōko mōmmi im ilowaan wōt baam̧le ko ami. Erkein rej jemjerā ko me rej n̄an indeeo. Men̄e—im eļaptata—jekjek ko baam̧le ko ami repād ie ejjab lukkun em̧m̧an, kwomaron̄ kappukot wāween ko n̄an jipan̄, kōketak, im kōkajoor. Jino ijo kwoj pād ie, iakwe er kōn wōn er, im kōpopo n̄an baam̧le eo am me kwo kōņaan ilju im jekļaj.
Jar kōn jipan̄ n̄an kile baam̧le ko ilo ward eo me rej aikuj iakwe im naan in kōkajoor. Ijelo̧kin pād ilo iien jar ko kōn kajjitōk in “Ta eo inaaj ekkatak jān iien jar in?” kajjitōk, “Wōn eo ej aikuj eō rainin? Ta eo ewōr ippa bwe in leļo̧k?”
Ilo am kōjeraam̧m̧an baam̧le eo am im membōr in ward eo am, kappukot wāween ko n̄an kōjeraam̧m̧an ro ilo ijoko kwoj jokwe ie. Emaron̄ wōr am iien n̄an jerbal in jipan̄ ko reļļapļo̧k ak kwomaron̄ leļo̧k jejjo wōt awa ilo juon allōn̄, kijejeto ko am renaaj kōjeraam̧m̧an mour eo am im naaj barāinwōt enaaj kōjeraam̧m̧an eok ilo wāween ko kwojjab maron̄ kōtmāni.
Būreejtōn Spencer W. Kimball eaar katakin: “Anij ej karon̄ kōj, im ej lale kōj. Ak ekkā an waļo̧k jān bar juon armej eo me ej kakke aikuj ko ad.”6 Kōj kajjojo jej aikuj kile eddo im kōjeraam̧m̧an eo ilo ad bōk koņaad n̄an kadedeikļo̧k jerbal eo an ilo ad kakke aikuj ko an ajri ro Nejin ej jar eo aō in ilo etan Jisōs Kraist, amen.