Ukweļo̧k Aolep Iien Em̧m̧an
Iien eo jej jutak ioon iaļ in ukweļo̧k in, jej karuwaineneiktok kajoor in pinmuur eo an Rilo̧mo̧o̧r eo n̄an mour ko ad.
Jejjo iiō remootļo̧k, Būreejtōn Gordon B. Hinckley ekar pād ilo juon iien ikkure football an kaļōj. Ekar itok bwen kōm̧m̧ane juon kōjjeļļā bwe im̧ōn ikkure eo naaj bōk etan kooj eo an tiim in ikkure eo, eo epaak an jem̧ļo̧k an jerbal. Tiim eo ekar lukkuun kōņaan in wiini game eo n̄an kautiej coach eo aer. Būreejtōn Hinckley kar karuwaineneikļo̧k n̄an ļakōr ruum̧ eo im n̄an kwaļo̧k jet naan in rōjan̄. Im̧we kōn naan ko an, tiim̧ eo ilo raan eo ekar eta; wōt im wiin i game eo im kōjem̧ļo̧k season eo kōn juon wining rekoot eo em̧m̧an.
Rainin, ikōņaan kōnono n̄an ro me rej inepatak bwe remaron̄ “jab wiin” ilo mour. M̧ool eo ej, aaet, bwe kōj “otemjej raar jero̧wiwi im rej likjab jān aiboojoj an Anij.”1 Men̄e emaron̄ wōr juon tiim ejjan̄in lōn̄ aer luuj ilo season in ikkure ko, ejjeļo̧k juon ilo mour. Ij kam̧ool bwe Rilo̧mo̧o̧r Jisōs Kraist ekar jerbale juon Pinmuur ewāppen im Ekar letok mennin letok an ukweļo̧k—iaļen jepļaak eo ad n̄an juon kōjatdikdik ewāppen im mour etōprak.
Ukweļo̧k ej Bōktok Lem̧ōņōņō
Emakijkij ad ļōmņak kōn ukweļo̧k āinwōt juon men eo ejjab kam̧ōņōņō im ekainepata. Ak karōk eo an Anij ej karōk in m̧ōņōņō, jab karōk in jab m̧ōņōņō! Ukweļo̧k ej ļōn̄aj im ukōt armej. Ej jerawiwi eo ej bōktok jab m̧ōņōņō.2 Ukweļo̧k ej iaļen diwōjļo̧k eo ad! Āinwōt an Elder D. Todd Christofferson kar kōmeļeļeiki: “N̄e ejjeļo̧k ukweļo̧k, ejjeļo̧k m̧ool in eddōkļo̧k ak em̧m̧anļo̧k ilo mour in. … Kōn ukweļo̧k wōt jej deļo̧n̄e pinmuur in tiriam̧o an Jisōs Kraist im karōk in lo̧mo̧o̧r eo. Ukweļo̧k … ej kalikkar n̄an kōj kōn anemkwoj, lōke, im aenōm̧m̧an.”3 Ennaan eo aō n̄an aolep—eļaptata kom̧ jodikdik raņ—ukweļo̧k aolep iien em̧m̧an.
N̄e jej kōnono kōn ukweļo̧k, jejjab kōnono wōt kōn wāween kōkōm̧anm̧anļo̧k kōj make. Ukweļo̧k eo em̧ool eļapļo̧k jān menin—ej im̧we kōj jān tōmak ilo Irooj Jisōs Kraist im kajoor eo An n̄an jeorļo̧k jerawiwi ko ad. Āinwōt an Elder Dale G. Renlund kar katakin kōj, “N̄e ejjeļo̧k Ripinmuur, … ukweļo̧k ejej tokjen.”4 Jemaron̄ kajjieon̄ ukōt m̧wil ko ad make, ak Rilo̧mo̧o̧r eo wōt emaron̄ joļo̧k māād ko ippād im ļōn̄aj eddodo ko ad, kōmaron̄ ad bōk iaļen pokake kōn lōke im kajoor. Lan̄lōn̄ eo jān ukweļo̧k eļapļo̧k jān lan̄lōn̄ eo jān mour juon mour em̧m̧an. Ej lan̄lōn̄ eo jān jeorļo̧k bōd, jān ad maron̄ bar erreo, im epaakeļo̧k Anij. N̄e em̧ōj am̧ en̄jake kain lan̄lōn̄ in, ejjeļo̧k bar en̄jake em̧m̧anļo̧k jān in.
Ukweļo̧k eo em̧ool ej im̧we kōj bwe jen pokake juon kallim̧ur—juon bujen, ej ijjino ilo peptaij im kāāl kajjojo wiik ilo kwojkwoj in kijone eo an Irooj, Kwojkwoj eo. Ijin jej bōk kallim̧ur eo bwe “Jetōb eo An en maron̄ pād [ippād] iien otemjej,”5 kōn aolep lan̄lōn̄ im aenōm̧m̧an eo ej itok jān ad ro Mōttan. En̄in ej leen ukweļo̧k, im en̄in ej ta eo ej kōm̧m̧an bwe ukweļo̧k en lan̄lōn̄!
Kijejeto Emenin Aikuj ilo Ukweļo̧k
Em̧m̧an ippa bwebwenato eo kōn nejin eo ejerwaan.6 Ewōr juon men eo me eaiboojoj kōn aorōk in kālet eo ekar kōm̧m̧an ke nejin eo ejerwaan ekar “ian̄aktok an.” Jijet ilowaan wōrwōr an biik, antoone an maron̄ “kōņaan kobrak lo̧jien kōn m̧ōttan kijen piik,” āliktata ekar kile bwe ekar kakkure jem̧ļo̧k ko an jān jemān ak barāinwōt mour eo an make. Kōn tōmak ekar ļōmņak jemān enej kōtļo̧k an ro̧o̧lļo̧k—eļan̄n̄e jaab āinwōt juon nejin m̧aan innām bōlen āinwōt juon an rijerbal—ekar kile bwe en joļo̧k aolep nana ko an im ro̧o̧l n̄an m̧weo im̧ōn.
Jet iien, ij ļōmņak kōn etetal aitok in an ļaddik in n̄an m̧weo im̧ōn. Ekar ke lōn̄ iien ekar āliklik im koļmenļo̧kjeņ, “Ewi wāween an Jema nej bōk eō?” Bōlen ekar jolikļo̧k neen jān piik ko. Ļōmņak mōk ewi wāween an naaj bwebwenato in oktak eļan̄n̄e en kar ebbweer. Tōmak ekar kōmakūt e, im tōmak ekar kōm̧m̧an bwe jemān en emej wōt im kōttar, m̧ae āliktata:
“A ke ej ettoļo̧k wōt, jemān ej kile e, im tūriam̧o̧kake, im ettōr, im bun̄ ioon kōnwaan, im mejānmaik e.
“Im nejin e ba n̄an e, “Jema, I ar kōm̧anm̧an nana ņae lan̄, im im̧aan mejam̧, ij patkake bwe ren likūt eta nejim̧.
“A jemān ej ba n̄an ro ri karejeran, Kom̧win jab rum̧wij im bōktok liboror eo em̧m̧antata, im kanuknuk e kake: im likūt luko ioon pein, im juuj i neen: …
“Bwe e in nejū e kar mej im ej bar mour; e kar jako, im ej waļo̧k.”
Ukweļo̧k Ej n̄an Aolep
Ro jeiū im jatū, kōj aolep rej nejin eo ejerwaan. Kōj aolep elōn̄ iien jej “ian̄aktok ad”—ekkā an lōn̄ļo̧k jān juon kōttan—im jej kālet iaļ eo ej kōro̧o̧lļo̧k kōj n̄an m̧weo im̧ōd. Ej juon kālet jej kōm̧m̧ane aolep raan, ilo aolepān mour ko ad.
Ekkā ad kobaik ukweļo̧k eo ad ippān jerawiwi ko rekōmettak me raikuj “oktak ekajoor.”7 Ak ukweļo̧k ej n̄an aolep—ro rej jōbwābwe ilo “iaļ ko remo̧ im [rej] jebwābwe”8 barāinwōt ro raar “pād ilo iaļ in erānin̄ im eaidik” im kiiō rej aikuj in “bun̄ m̧aanļo̧k.”9 Ukweļo̧k ej likūt kōj ioon iaļ eo ejim̧we im ej dāpij kōn ioon iaļ eo ejim̧we. Ej n̄an ro rej kab jino tōmak, ro rekar tōmak m̧aantak, im ro rekar aikuj in bar jino tōmak. Āinwōt an Elder David A. Bednar katakin: “Elōn̄ iaad ealikkar aer meļeļe bwe Pinmuur eo ej n̄an rijerawiwi ro. Ijjab kanooj jeļā, mekarta, bwe jejeļā im meļeļe bwe Pinmuur eo ej barāinwōt n̄an rikwojarjar ro—bwe m̧aan im kōrā ro rem̧m̧an me rej pokake, erreo, im … kajjieon̄ erom̧ em̧m̧anļo̧k.”10
Ikar loļo̧k juon mijenede training jentōr im ioon juon kurub in mijenede ro rekāāl rej deļo̧n̄tok. Ikar lukkuun em̧m̧akūt ke ij kalimjōke im loe meram eo iturin mejāer. Relukkuun meram im m̧ōņōņō im kalimomo. Innām juon ļōmņak ekar itok n̄an ļōmņak eo aō. “Em̧ōj aer ioon tōmak n̄an ukweļo̧k. En̄in ej etke rej obrak kōn lan̄lōn̄ im kōjatdikdik.”
Ijjab ļōmņak bwe er aolep rekar aolep wōr aer jerawiwi ko reļļap m̧okta ilo mour ko aer, ij ļōmņak bwe rejeļā wāween eo n̄an ukweļo̧k; rekar katak bwe ukweļo̧k ej em̧m̧an; im er rekar pojak im kijerjer n̄an jake to jake tak ennaan in em̧m̧an ilo laļ in.
En̄in ej ta eo ej waļo̧k n̄e jej en̄jake lan̄lōn̄ jān ad ukweļo̧k. Ļōmņak kōn waanjon̄ak eo an Enōs. Ekar wōr juon iien ekar “ian̄aktok an make”, kōn menin an “bōd eo kar bōkļo̧k,” būruwōn ekar mōkaj im oktakļo̧k n̄an jeraam̧m̧an eo an ro jet. Inōs ekar joļo̧k mour eo an im karuwaineneik aolep armej n̄an ukweļo̧k im “m̧ōņōņō ilo e ilōn̄in men otemjej an laļ.”11 Ukweļo̧k ej kōm̧m̧ane menin; ej ukōt būruwōd n̄an ro m̧ōttad kōnke jej jeļā bwe lan̄lōn̄ eo jej en̄jake ej n̄an aolep armej.
Ukweļo̧k Ej juon Iaļ Jej Etal ie ļo̧k To̧o̧n Wōt Ad Mour
Ewōr juon m̧ōtta eo ekar rūttoļo̧k ilo juon baam̧le in Kabun̄ in me rejjab niknik. Ke ekar juon rūm̧m̧an ded, e barāinwōt ekar “ian̄aktok an make” im pepe ippān bwe en m̧aanjabpopo n̄an juon mijen.
Ekar erom̧ juon mijenede ewejabdik. Ilo raan eo an āliktata m̧okta jān an ro̧o̧l, mijen būreejtōn eo ekar intōrpiu e im kajjitōk bwen kwaļo̧k naan in kam̧ool eo an. Ekar kwaļo̧k, im an jan̄ im bakwij mijen būreejtōn eo an, būreejtōn eo ekar ba, “Elder, komaron̄ meļo̧kļo̧k ak kaarmejete men otemjej ej kab m̧ōj am̧ kam̧ool kaki ilowaan wōt juon allōn̄ eļan̄n̄e kwoban wōnm̧aanļo̧k wōt im kōm̧m̧ani men kein rej kālōk naan in kam̧ool eo am̧.”
Likao in m̧ōtta ekar ba n̄an eō bwe ekar jar im riiti jeje ko rekwojarjar aolep raan jān tōre eo ekar ro̧o̧l jān mijen eo an. Emakijkij “naajdik er jān em̧m̧an eo an naan in Anij” ekar dāpij e “ilo wāween ejim̧we.”12
Kom̧ ro rej m̧aanjabpopo n̄an mijen ko relikio im kom̧ ro rej ro̧o̧l, kom̧in jeje ami noot! Ejjab bwe n̄an baj bōk juon naan in kam̧ool; kwōj aikuj in kōm̧anm̧anļo̧k im kōkajoorļo̧k. Āinwōt an aolep mijenede jeļā, n̄e enej bōjrak am̧ patōļe juon baajkōļ, enaaj okjak, im n̄e enej bōjrak am̧ naajdik naan in kam̧ool eo am̧, enaaj m̧ōjņo̧. Ejja katak in wōt ej jerbal n̄an ukweļo̧k—ej juon iaļ jej bōk to̧o̧n wōt ad mour, jab juon wōt kōttan en̄jake in ilo mour eo ad.
N̄an aolep ro rej kappukōt jeorļo̧k bōd—jodikdik ro, rūm̧m̧an ded ro, m̧am̧a im baba ro, bubu im jim̧m̧a ro, im aaet, ro jibūd im jibūd im jim̧aad im jim̧aad—Ij kajjitōk bwe kom̧win ro̧o̧ltok. Kiiō ej iien eo in n̄an jinoe. Jab aibadbad kōn raan in ukweļo̧k eo ami.13
Innām, n̄e enej m̧ōj am̧ kōm̧m̧ane kālet in, ļoor wōt iaļ in. Jemād ej kōttar wōt, kijenmej in bōk eok. Pein rej eļļo̧k leplep waj “aolepān raan eo” n̄an eok.14 Nōbar eo ej aorōk in kijejeto.
Keememej naan kein jān Nipai: “Kom̧ aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo.”15
Jet iien iaļ in ad emaron̄ aitok—ijoke, ej juon iaļ ej jibadōk mour indeeo. Ak emaron̄ erom juon iaļ eo ekam̧ōņōņō eļan̄n̄e jej ito itak ie kōn tōmak ilo Jisōs Kraist im kōjatdikdik ilo Pinmuur eo An. Ij kam̧ool bwe iien eo jej jutak ioon iaļ in ukweļo̧k in, jej karuwaineneiktok kajoor in pinmuur eo an Rilo̧mo̧o̧r eo n̄an mour ko ad. Kajoor in enaaj katōt ne ko need, kakilepļo̧k ettōņak ko ad, im kam̧wilaļļo̧k kōņaan eo ad n̄an wōnm̧aanļo̧k wōt, bun̄tōn ņan bun̄tōn, m̧ae iien raan eo eaiboojoj n̄e āliktata jej tōparļo̧k m̧weo im̧ōd ilan̄ im ron̄ an Jemād ilo Lan̄ ba n̄an kōj, “Em̧m̧an am̧ kōm̧m̧an.”16 Ilo etan Jisōs Kraist, amen.