Jej Ke Lōke E? Men ko Reppen Rem̧m̧an
Jekdoon būrabōļōm, eppen emaron̄ em̧m̧an n̄an ro me renaaj wōnm̧aanļo̧k kōn tōmak im lōke Irooj im karōk eo An.
Mokta jān aō jinoe, āinwōt juon eo ej bōk jikid wōj aolep kar m̧weiūr kōn jorrāān ko rej kab waļo̧k jān ļan̄ ko im m̧akūtkūt in laļ ko, ij kwaļo̧k aō kam̧m̧oolol n̄an aolep Pein Jipan̄ ko im rikōjjekiik ro, ro rekar letok n̄an kōj jipan̄ im kōjatdikdik.
Ilo Oktoba 2006, jinoin aō kar kwaļo̧k ilo juon kweilo̧k eļap. Ikar en̄jake juon ennaan eaorōk kōn Kabun̄ in ipeļaakin laļ in ekoba pedped eo “Irooj ej lōke kōj!”
Ej lukkuun lōke kōj ilo elōn̄ wāween ko. Emōj an letok n̄an kōj gospel eo an Jisōs Kraist im, ilo epepen in, tarļep in gospel eo. Ej lōke kōj ilo an letok mālim in priesthood eo An, im kōn aolepen kii ko n̄an tōl ilo jejjetin. Kōn kajoor in jemaron̄ kōjeram̧m̧an, jipan̄, bōk kain̄i ko, im kōm̧m̧an bujen ko. Ej lōke kōj ilo an kōjepļaak tok Kabun̄ eo An, ekitbuuj tampōļ ko rekwojarjar. Ej lōke ro rikarejeran ilo an leļo̧k kajoor in liāp—n̄an liāp ioon laļ im naaj kōtļo̧k e i lan̄.Ej barāinwōt lōke kōj ilo ad erom mama im baba, rūkaki ro, im rikōjparok ajri ro Nejin.
Ālkin iiō in jerbal ko aō āinwōt juon Riutiej an Kabun̄ in ilo elōn̄ m̧ōttan ko ilo laļ in, Ij kwaļo̧k ilo ejjelo̧k pere:Ej lōke kōj.
Kiiō kajjitōk eo Ij kajjitōk ilo kweilo̧k in, “Jej ke lōke E?”
Jej Ke Lōke E?
Būreejtōn Thomas S. Monson ekkā an kakemeemej kōj n̄an “lōke Jeova kōn aolepen būruom̧, im kwōn jab atartar ioon jeļāļo̧kjeņ eo am̧.
“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.”
“Kwōn jab mālōtlōt wōt ilo mejam̧” (Jabōn Kōnnaan Ko 3:5–7).
Jej ke lōke bwe kien ko An rej n̄an em̧m̧anļo̧k eo ad?Jej ke lōke ke Ritōl ro An renaaj tōl kōj ilo jim̧we men̄e rejjab wānōk?Jej ke lōke ke kalim̧ur ko an rem̧ool?Jej ke lōke bwe Jemedwōj Ilan̄ im Jisōs Kraist rejeļā kajjier im kōņaan jipan̄ kōj?Jekdoon n̄e jej ioon melejon̄, apan̄, jej ke lōke E?
Ilo mour eo aō, Iaar ekkatak jet iaan katak ko rem̧m̧an ilo iien ko reppen—emaron̄ kar ke iaar jodikdik, ilo mijen eo, jino juon jerbal ekāāl, kajeon̄ kaļapļo̧k kūr ko aō, kōkajiriri juon baam̧ļe elōn̄ uwaan, ak apan̄ n̄an un̄arre peiū make.Ealikkar bwe men ko reppen rem̧m̧an!
Men ko Reppen Rem̧m̧an
Men ko reppen rej kōm̧m̧an bwe jen kajoor, ettā, im letok ad iien bwe jen idajon̄jon̄ kōj make. Paineer ro ad rejitōnbōro raar jeļā kajjien Anij ilo jekjek ko reppen raar iooni. Etke eaar bōk ruo jepta ko kōn Nipai im ļōm̧aro jein n̄an bōk pileej brass ko im jilu wōt eoon n̄an kipel baam̧le eo an Ishmael n̄an kobaļo̧k ippāier ilo āne jamaden?(lale 1 Nipai 3–4; 7:3–5). Ej kwaļo̧k bwe Irooj eaar kōņaan kōkajoor Nipai ilo iien ko reppen n̄an bōk pileej ko.
Men ko reppen ilo mour ko ad rej itok ilo an jab kāāl n̄an kōj.Juon iaan kalim̧ur ko jinoin jaar kōm̧m̧ane ippān Irooj ej n̄an mour kōn kien wūjeļepļo̧k.Wūjeļepļo̧k, meļeļein ekitbuuj kōjekdoon kōņaan ko ad. Kōn en̄jake jej kile bwe jabdewōt kōņaan ko jej kōjekdooni ej wōņeen eo edik jej kōļļāik n̄e jej keidi n̄an kōjeram̧m̧an ko me rej tōparkin ad wūjeļepļo̧k.Ium̧win tōl eo an Josep Smith, ekar ba bwe “juon Kabun̄ eo me ejjab aikuj bwe en wōr wūjļepļo̧k kōn aolep men otemjej ejamin wōr an kajoor eo ebwe n̄an kwaļo̧k tōmak eo emenin aikuj n̄an mour im lo̧mo̧o̧r.”1
Membōr ro ium̧win taitōl in Anij rejjab ruwamājet n̄an kōm̧m̧ani men ko reppen. Anij Jemen eaar aje ļo̧k Eo Nejin Emake wōt n̄an en̄taan ekōmetak kōn Pinmuur eo, ekitbuuj mej ioon debwāāl.Jeje ko rekwojarjar rej ba Ekar katak “Ear katak im pokake kōn men ko ear en̄taan kaki”(Hibru 5:8). Ekar en̄taan im metak kōn Pinmuur eo. Jetōb Kwojarjar ej aikuj kijenmej n̄an im̧we, kakkōl, im tōl kōj, innem jet iien jej kajejtokjen, bōd ad kōjerbale, ak meļo̧kļo̧ke.
Mōttan ļo̧k Karōk eo
Iien ko reppen ej m̧ōttan ļo̧k karōk eo an gospel eo. Juon iaan unin mour in n̄an kōj ej n̄an idajon̄jon̄ (lale Ebream 3:25). Jejjo raar en̄taan eļapļo̧k jān armej ro an Alma. Raar ko jān Kiin̄ Noa eo enana innem raar erom rikamakoko n̄an Ri Leman ro!Ilo iien ko aer reppen Irooj eaar katakin er bwe Eaar melejon̄e armej ro An im “idajon̄jon̄ e aer kōmmaanwa im aer tōmak” lale (Mosaia 23:21).
Ilo raan ko renana ilo jikin kalbuuj Liberty, Irooj eaar katakin Josep Smith n̄an “kijejetoiki em̧m̧an” (K&B 121:8) im kar kalim̧ur bwe eļan̄n̄e ekar kōm̧m̧ani, “aolep men kein otemjeļo̧k renaaj lewōj imminene, im naaj n̄an em̧m̧anļo̧k eo am.” (K&B 122:7).
Būreejtōn Thomas S. Monson ekar akweļap, “Jen kālet kālet eo rejim̧we, ijjelo̧kin kālet eo ebōd.”2 Kōn tampeļ ko ad, ekar kwaļo̧k bwe “ejjeļo̧k kaarmejete elukkuun ļap, ejjeļo̧k wōņāān eo elukkuun eddo, ejjeļo̧k kakkōt ko reppen bwe jen aikuj bōk [kōjeraam̧m̧an ko] an tampeļ eo.”3
Ilo mour in, men ko reppen rejm̧ōttan ļo̧k mour in.Epen n̄an juon tokki bwe en riwōjtok jān nien in epen. Ak n̄e juon ej kajeon̄ kōm̧m̧an bwe en pidodo, tokki eo eban maron̄ ejaake kajoor eo an make me enaaj aikuji ilo an mour. Ilo bar juon wāween, apan̄ an juon babbub n̄an ko jān nien bwe ej bōk kajoor n̄an mour eo an.
Kōn waanjon̄ak kein, jej lo bwe aolep armej rej ioon men ko reppen ej emakijkij Ewōr ad aolep apan̄ ko. Ta eo eoktak ej men ko jej kōm̧m̧ani n̄an jelm̧ae men ko reppen.
Ilo juon iien, jet armej ilo Bok in Mormon raar “en̄taan eļap” im “eļap kaen̄tanaan.” (Hilamōn 3:24). Ta eo raar kōm̧m̧ane?“Raar jitlo̧k im jar emmakijkij, im eaar kanooj kajoorļo̧k im kajoorļo̧k ilo aer ettā, im penļo̧k im penļo̧k ilo lōke Kraist, n̄an obrak in burueer kōn m̧ōņōņō im ineem̧m̧an” (Hilamōn 3:35). Bar juon waanjon̄ak ekar waļo̧k ālkin iiō in pata ko: “Kōnke an kar aetok otem aetok tariņae eo ikōtaan riNipai ro im riLeman ro elōn̄ raar erom kijn̄en̄e, … ; im elōn̄ raar meoeo kōnke en̄taan ko aer, jon̄an raar kōttāik er make im̧aan Anijem̧ool ilo m̧wilaļ in ettā” (Alma 62:41).
Kōj kajjojo jej kālet ta eo jej kōm̧m̧ani n̄an men ko reppen.
Mejmejkaruo kōn Men ko Epidodo kōm̧m̧ani
Mokta jen aō kar bōk kūr in iaar juon rikakpilōklōk ikkijen jeen ilo Huston, Texas.Eiten aolep aō jerbal ij jerbal ippān rim̧weie ro me ewōr aer make pejnej. Eiten aolepeer raar ejaak pejnej ko aer me remourur jān ejjeļo̧k kōn wōt jerbal ko reppen. Kaburomōjmōj eo n̄an n̄a n̄e ij ron̄ an jet iaaer ba bwe rekōņaan bwe en pidodo ļo̧k n̄an ro nejier.Raar jab kōņaan bwe ro nejier ren en̄taan āinwōt kar er. Ilo bar juon wāween ba, renaaj kattoļo̧k ajri ro nejier jān men ko reppen raar kōm̧m̧ani bwe ren maron̄ kar jeram̧m̧an.
N̄an keidi, kōm jeļā kōn juon baam̧le eo eaar pukot kilen.Pāreen rein bōk en̄jake in kōn wōt en̄jake eo an J. C. Penney eo jemān eaar ba n̄an e ke ej jejjet rualitōk an iiō bwe ej make eddoiki jeen ko an.Raar bōk lōn̄tak juon make aer ļōmņak: ilo an ajri ro nejier kadiwōjļo̧k jān high school, rej make eddoiki jeen ko aer—n̄an jikuul ļo̧k wōt (kaaļļōj, kaļļōj ko reutiejļo̧k, im ko jet) im n̄an aer jeļā kōjparok jeen (ilo m̧ool rej un̄n̄are peier make) (lale K&B 83:4). Men eo ekam̧ōņōņō, ajri ro raar kōm̧m̧ani ilo mālōtlōt.Aolepeer raar kadiwōjļo̧k jān kaaļļōj, im jet iaaer raar barāinwōt kadiwōjļo̧k jān kaaļļōj ko re utiejļo̧k—raar make eddoiki er.Ekar jab pidodo, ak raar kōm̧m̧ane.Rekar kōm̧m̧ane kōn eļap jerbal im tōmak.
Tōmak n̄an Lōke E
Kajjitōk eo “Jej ke lōke E?” emaron̄ em̧m̧an ļo̧k ba, “Ewōr ke ad tōmak n̄an lōke E?”
Ewōr ke ad tōmakn̄an lōke kallim̧ur ko An kōn juon m̧ōttan jon̄oul bwe kōn 90 bōjāān in jeraam̧m̧an ko ak ekoba jipan̄ an Iroojem̧m̧anļo̧k jān ad 100 bōjāān ko ad make?
Ewōr ke ad fōmak n̄an lōke bwe Enaaj lotok kōj ilo keen̄taanaan ko (lale Mosaia 24:14), bwe E enaaj akwāāle ro rej akwāāle kōj (lale Aiseia 49:25; 2 Nipai 6:17), im bwe Enaaj kokwojarjar ro rej en̄taan kōn ad bar bōk? (lale 2 Nipai 2:2).
Jenaaj ke kōmoururi tōmak ko ad me emenin aikuj n̄an kōjparok kien ko An bwe En maron̄ kōjeram̧m̧an kōj ilo mour in kanniōk im jetōb?Jenaaj ke kōmoururi tōmak ko ad me emenin aikuj n̄an kōjparok kien ko An bwe En maron̄ kōjeram̧m̧an kōj ilo mour in kanniōk im jetōb? Im jenaaj ke wōnm̧aanļo̧k ilo tiljek n̄an jem̧ļo̧kin bwe En maron̄ bōk kōj n̄an Imaan Mejān? (lale Mosiah 2:41).
Ro jeiū im jatū, emaron̄ wōr ad tōmak n̄an lōke E!Ekōņaan ta eo em̧m̧an n̄an kōj(lale Moses 1:39). Enaaj uwaak jar ko ad (lale K&B 112:10). Enaaj kōjparok kalim̧ur ko An (lale K&B 1:38). Ewōr an kajoor n̄an kōjparok kalim̧ur ko (lale Alma 37:16). Ejeļā men otemjeļo̧k! Im men eo eaorōk tata, Ejeļā ta eo em̧m̧an (lale Aisea 55:8–9).
Juon Laļ eo Ekauwōtata
Laļ in ad rainin epen. Elōn̄ ippād nana ko im kalikjōkļo̧k aolep jikin ilo aolep laļ, jerbal ko an rikakkure ro ilo jikin ko rettino, dikļo̧k in jeen, jabwe jerbal, nan̄inmej, jorrāān in mejatoto, tariņae ko, ritōl ro renana, im ko jet. Ta eo jej aikuj kōm̧m̧ane? Jej ko ke ak jum̧ae?Eo wōt in ejim̧we?Aolepen kālet kein rekauwōtata.Ekar kauwōtata n̄ān George Washington im ritariņae ro an n̄an tariņae ak ekar barāinwōt paineer ro jibūd jem̧āan bwe ren ko.Ekar kauwōtata n̄an Nelson Mandela bwe kar kate n̄an anem̧kwoj.Emōj kar ba menin bwe “Ta eo jenaaj kōm̧m̧ane?”Kar ba bwe nana en jako, ej bwe armej ro rem̧m̧an ren jab kōm̧m̧an jabdewōt.4
Jab Mijak
Ilo jabdewōt men jej kōm̧m̧ani jej aikuj jab kālet ak kōm̧mane kōn juon jetōb in mijak. Ilo m̧ool, “Anij eaar jab letok n̄an kōj jetōb in lōļn̄o̧n̄” (2 Timote 1:7). (Kwoj ke kile meļeļe eo an “jab mijak” ej kwaļo̧k ilo jeje ko rekwojarjar?) Irooj eaar katakin eō bwe ebwer im mijak rej kein jerbal ko an rinana eo. Uwaak eo an Irooj n̄an men ko reppen ej wōnm̧aanļo̧k wōt kōn tōmak .
Ta eo Epen?
Kajjojo iaad emaron̄ wōr ippāer ļōmņak ko reoktaktak kōn ta eo epen. Jet remaron̄ likūt epen n̄an kōļļā juon m̧ōttan jon̄oul n̄e ejabwe jeen. Ritōl ro jet iien rej lo epen n̄an kōjatdikdik bwe ro rijeramōl ren kōļļā juon m̧ōttan jon̄oul.Emaron̄ pen n̄an jet iaad n̄n wōnm̧aanļo̧k wōt kōn tōmak n̄an m̧are ak n̄n ejaake juon aer baam̧le.Elōn̄ ro rej watōke bwe epen “n̄an po buruō kōn men ko Irooj eaar jitōn̄ tōk n̄an [er]” (Alma 29:3). Emaron̄ pen an po buruōd kōn kūr ko ad. (lale Alma 29:6). Kaje ko an Kabun̄ in remaron̄ eppen ilo watōki, ak n̄an jet ej kōkalļen jinoinaer lukkun m̧ool in ukwelo̧k.
Jekdoon būrabōļōm, eppen emaron̄ em̧m̧an n̄an ro me renaaj wōnm̧aanļo̧k kōn tōmak im lōke Irooj im karōk eo An.
Aō Kam̧ool
Ro jeiū im jatū, Ij kam̧ool bwe ritōl rein rej jijet ijin im̧aan rej kūr jān Anij. Aer ikdelel ej n̄an jerbal n̄an Irooj im jipan̄ kalōk gospel eo ilo buruōd. e er im rejtak er. Ij iakwe er im rejtake er.
Ij iakwe Rilo̧mo̧o̧r, Jisōs Kraist. Ij bwilōn̄ bwe E eaar ļap an iakwe Jemen im kōj bwe en kar erom Rilo̧mo̧o̧r im Ripinmuur, bwe en kar kōm̧m̧ane Eaar aikuj en̄taan jon̄an Eaar “wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb” (K&B19:18). Aaet ekar jelm̧ae juon jekjek ekōmetak im ilo m̧ool emenin aikuj, Eaar ba n̄an Jemān, “A en jab ankil Aō a Am̧ wōt” (Luke 22:42). Ij lan̄lōn̄ kōn naan ko an enjeļ eo: “E jako ijin, bwe E ar jerkakpeje” (Matu 28:6).
Waanjon̄ak eo An ilo m̧ool ej “iaļ eo, im m̧ool eo, im mour eo” (Jon 14:6). Mour wōt kōn waanjon̄ak in emaron̄ kōm̧m̧an bwe jen lo “aenōm̧m̧an ilo laļ in, im mour indeeo ilo laļ eo ej itok”(K&B 59:23). Āinwōt aō kar ļoor waanjon̄ak eo An im mour kake katak ko An, ikar ekkatak jān n̄a make bwe kajjojo “kallim̧ur ko An reļaptata im aorōk” (2Piter 1:4) ej m̧ool.
Ikdelel ko reļļap rej n̄an jutak ippān Mormon āinwōt juon rikaļoor eo em̧ool an Jisōs Kraist , (lale 3 Nipai 5:13) im bwe juon raan jenaaj ron̄ An ba, “Em̧m̧an am̧ kōm̧m̧an kwō karijera em̧m̧an im tiljek.” (Matu 25:21). Ilo etan Jisōs Kraist, amen.