Pilawā in Mour Eo Ekar Itok jān Lan̄
Eļan̄n̄e jej jan̄nuwaade ad pād ilo Kraist im An pād ilo kōj, innām kwojarjar ej ta eo jej pukote.
Raan eo ālkin an Jisōs kar naajdik 5,000 armej ilo Galele kōn wōt “ļalem pilawe barll, im ruo ek,” 1 Ekar bar kōnono n̄an armej ro ilo Capernaum. Rilo̧mo̧o̧r eo ekar ļōmņak bwe elōn̄ rekar jab lukkuun itok limo ilo katak ko an rekar n̄an m̧ōn̄ā im mat. 2 Jān wāween in, Ekar kajjieon̄ kareel er kōn aorōk eo eļapļo̧k an “m̧ōn̄ā e enaaj pād wōt n̄an indeeo, men eo Nejin armej enaaj lewōj n̄an kom̧.” 3 Jisōs ekar ba:
“N̄a pilawā in mour.
“Ro jemami raar m̧ōn̄ā manna ilo āne jem̧aden, im re mej.
“Pilawā in ej itok jān lan̄, bwe armej en m̧ōn̄ā jān e im jāmin mej.
“N̄a pilawā eo e mour ear wanlaļtak jān lan̄: eļan̄n̄e jabdewōt armej ej m̧ōn̄ā jān pilawā in, enaaj mour indeeo: im pilawā eo I naaj lewōj e kanniōkō, men eo Inaaj lewōj bwe en kemour laļ.” 4
Meļeļe in naan eo an Rilo̧mo̧o̧r eo ekar jab lukkuun meļeļe ippān riron̄jake ro rekar meļeļe jidik in wōt ennaan eo. Kōļmenļo̧kjeņ kōn naan eo, rekar ļōmņak, “Ekōjkan armej in E maron̄ letok n̄an kōj kanniōkin bwe jen m̧ōn̄a?” 5 Jisōs ekar wōnm̧aanļo̧k im kōmeļeļeļo̧k:
“E m̧ool, e m̧ool, Ij ba n̄an kom̧, Eļan̄n̄e kom̧ jab m̧ōn̄ā kanniōkin Nejin armej, im jab idaak bōtōktōkin, ejjeļo̧k mour ilo kom̧.
“Eo ej m̧ōn̄ā kanniōkiō, im idaak bōtōktōk, an mour indeeo; im I naaj kejerkak e ilo raan eo āliktata.
“Bwe kanniōkō men in m̧ōn̄ā em̧ool, im bōtōktōktōkō men in idaak em̧ool.” 6
Innām ekar kwaļo̧k meļeļe eo eļap an naan kein An:
“Eo ej m̧ōn̄ā kanniōkō, im idaak bōtōktōkō, ej pād ilo N̄a, im N̄a ilo e.
“Āinwōt Jema e mour Ear jilkintok Eō, im N̄a Ij mour kōn Jema; barāinwōt eo ej m̧ōn̄ā N̄a, e in enaaj mour kōn N̄a.” 7
Riron̄jake ro rekar m̧ōkaj aer bōk ta eo Jisōs ekar ba, im “elōn̄… , ke em̧ōj aer ron̄jake, re ba, Naan in naan e pen, wōn e maron̄ in ron̄jake? … [Im] jān iien eo elōn̄ iaan ro rūkaļoran rej jepļaak, im jab bar etetal Ippān.” 8
N̄an m̧ōn̄ā Kanniōkōn im idaak Bōtōktōkōn ej juon wāween ad aikuj bōktok Rilo̧mo̧o̧r eo n̄an mour eo ad—n̄an lukkuun kōj—bwe jen maron̄ juon wōt. Elmen an menin kar waļo̧k?
Juon, jej aikuj meļeļe bwe ilo katok kōn Ānbwinnin im Bōtōktōkin, Jisōs ekar pinmuur kōn jerawiw ko im anjo̧ jān mej, jim̧or ilo kanniōk im jetōb. 9 Alikkar, innām, jej bōk m̧ōttan Kanniokin im idaak Bōtōktōkōn n̄e jej bōk jān E kajoor im kōjeraam̧m̧an ko an Pinmuur eo.
Katak ko an Kraist rej kwaļo̧k ta ko jej aikuj kōm̧m̧ani n̄an bōk tūriam̧o̧ in pinmuur eo. Ej n̄an tōmak im wōr tōmak ilo Kraist, ukweļo̧k im peptaij, im n̄an bōk Jetōb kwojarjar eo, “innām ej itok jeorļo̧k in jero̧wiwi ko ami kōn kijeek im kōn Jetōb Kwōjarjar.” 10 En̄in ej iaļ eo, ad iaļen bōk tūriam̧o̧ in pinmuur eo an Rilo̧mo̧o̧r eo im n̄an iaļ eo eaidik im eradin̄ ej tōlļo̧k n̄an aelōn̄ in kiin̄ eo An.
“Kōn menin, n̄e kom̧ naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo.
“Lo, en̄in ej katak an Kraist, im katak an Jemān, im an Nejin, im an Jetōb Kwōjarjar, eo ej juon Anij, ejjeļo̧k jem̧ļo̧kin.” 11
Kōkkaļļein kwokwoj eo an m̧ōn̄ā in Kijoone eo an Irooj ej aiboojoj n̄an kōļmenļo̧kjeņ kake. Pilawā im dān rej bōk jikin Ānbwinnin im Bōtōktōkin eo ej Pilawā in Mour im Dān in Mour, 12 eo ej kakeememej kōj kōn wāņāān eo Ekar kōļļāik n̄an pinmuuri kōj. Ilo an pilawā eo ruje, jej keememej ānbwin eo erub an Rilo̧mo̧o̧r eo. Elder Dallin H. Oaks ekar ba bwe “kōnke ebwilo̧k im rub, kajjojo m̧ōttan pilawā eo eaorōk, āinwōt an kajjojo armej ro bōk m̧ōttan rej aorōk. Kōj aolep eoktak jerawiwi ko ad jān doon n̄an ukweļo̧k jāni. Kōj aolep eoktak aikuj ko ad n̄an aer maron̄ bōk kōkajoorļo̧k jān Pinmuur eo an Irooj Jisōs Kraist, eo jej keememej E ilo kain̄i in.” 13 Ilo ad idaak jān dān eo, jej ļōmņak kōn bōtōktōk eo Ekar kōto̧o̧rļo̧k ilo Gethsemane im ioon dōbwāāl eo im kajoor in ko̧kwojarjar eo an. 14 Jeļā bwe “ejjeļo̧k men ejjab erreo emaron̄ deļo̧n̄ ilo aelōn̄ eo An; kōn menin ejjeļo̧k ej deļo̧n̄ ilo An kakkije ijello̧kun wōt ro raar kwaļ ballier ilo bōtōktōkū, kōn tōmak eo aer, im ukeļo̧k jān aolep aer jero̧wiwi, im aer tiljek n̄an jem̧ļo̧kin 15
Ikar kōnono kōn bōk tūriam̧o̧ in pinmuur eo an Rilo̧mo̧o̧r eo n̄an bōkļo̧k jerawiwi ko ad im māār in jerawiwi ko ilo kōj. Bōk m̧ōttan Ānbwinnin im idaak jān Bōtōktōkin eļapļo̧k meļeļein, im bwe ej n̄an kadeļo̧n̄tok wāween mour ko rem̧m̧an im m̧wil ko an Kraist, likūtļo̧k piktokin armej im erom̧ Rikwojarjar ro “kōn pinmuur eo an Kraist Irooj.” 16 Ilo ad bōk m̧ōttan pilawā im dān kajjojo wiik, enaaj em̧m̧an ad mour n̄an ļōmņak kōn wāween ad aikuj in lukkuun kobaik kadkadin im jon̄ak ko an mour eo ejjeļo̧k an jerawiwi n̄an mour ko ad im kōj. Jisōs eban kar maron̄ pinmuur kōn jerawiwi ko an ro jet m̧ae iien E Make ejjab jerawiwi. Bwe ekajet ejjeļo̧k an kajoor Ioon, Emaron̄ leļo̧k E MAKE ilo jikin ko ad n̄an kaju būruwōn ekajet innām letok tūriam̧o̧. Ilo ad keememej im kautiej katok in pinmuur eo An, jej aikuj barāinwōt kōļmenļo̧kjeņ kōn mour eo an ewāppen.
Menin ej ļōm̧ake tok juon aikuj eo n̄an juon kajieon̄ ekajoor ilo ijo koņaad. Jejjab maron̄ m̧ōņōņō im pād wōt ak jej aikuj in kepaakeļo̧k “jon̄an rūttoun an Kraist obrak.” 17 Āinwōt jemān Kiin̄ Lamoni ilo Bok in Mormon eo, jej aikuj m̧ōņōņō in leļo̧k aolep jerawiwi ko ad 18 im ļōmņak wōt kōn ta eo Irooj ej kōtmānik jān kōj, kajjojo im ippān doon.
Jet tōre em̧ootļo̧k, juon m̧ōtta ekar kōmeļeļeik n̄an eō juon an en̄jake ke ekar jerbal āinwōt juon mijen būreejtōn. Ekar ped ilo taktō im m̧wijm̧wij eo enej bōk jejjo wiik ko bwe en bar ājmour. Ilo iien in ej kōmomo wōt, ekar kōjerbal iien eo bwen etale jeje ko rekwojarjar. Juon joteen ke ej kejōkļo̧kjeņ kōn naan ko an Rilo̧mo̧o̧r eo 27 Jebta in 3 Nipai, ekar jino en̄jake an mejki. Innām E ekar kwaļo̧k:
“Ikar ettōņak juon tōņak eo me ikar bōk juon pija ej kakeememej, kōmeļeļeiki mour eo aō. Ikar loe jerawiwi ko aō, kālet ko aō rebōd, iien ko … ikar kōm̧anm̧an n̄an armej ilo ejjeļo̧k kijenmej, ekoba bōd dikdik ko kōn men ko In kar ba ak kōm̧m̧ani. … [Juon] kōmeļeļe … [in etal] mour eo aō kar kwaļo̧k n̄an eō ium̧win wōt jejjo minit ko, ak āinwōt ekar aitok. Ikar jerkak, bwilōn̄, im … jino būkwelōlō ioon bukweeō iturin peet eo im jino jar, akweļap kōn jeorļo̧k bōd, lutōkļo̧k en̄jake ko an būruwō āinwōt ijjan̄in kar kōm̧m̧ane m̧okta.
“Mokta jān ettōņak in, ikar jab jeļā bwe ikar [aikuj] eļap men ko n̄an ukweļo̧k jāni. Bōd im m̧ōjņo̧ ko aō rekar erom alikkar tok n̄an eō bwe kōtaa eo kōtaaō im armej eo im kwojarjar eo im em̧m̧an eo an Anij ekar [āinwōt] milien m̧aeļ ko. Ilo jar eo aō joteen eo, ikar kwaļo̧k aō kam̧oolol eļap n̄an Irooj im n̄an Rilo̧mo̧o̧r eo kōn aolepān būruwō kōn ta ko Rekar kōm̧m̧ane n̄an n̄a im kōn jem̧jerā eo ikar kaorōke ippān kōrā eo pāleeō im ajri ro nejū. Iien eo ikar bukwelōlō ikar barāinwōt en̄jake iakwe eo an Anij im tūriam̧o̧ eo ekar lukkuun ļap, mekarta en̄jake ko aō ippāt kake. …
“Ijjab maron̄ ba ke ikar jab oktak ālkin raan ņe. … Būruwō eaar oktak. … Ta eo ekar waļo̧k tokālik ej bwe ikar ejaake eļapļo̧k iakwe n̄an ro jet, kōn juon jon̄an eo eļapļo̧k n̄an iakwe, kobain juon en̄jake in kōņaan kwaļo̧k gospel eo. … Imaron̄ keidi n̄an ennaan ko kōn tōmak, kōjatdikdik, im mennin letok an ukweļo̧k loe ilo Bok in Mormon eo [āinwōt] ejjan̄in kar m̧okta.” 19
Eaorōk n̄an jeļā bwe en̄jake ko rekajoor in m̧adenļo̧k in jerawiwi ko an em̧m̧aan in em̧m̧an im likjab ko an rekar jab kabweer e ak tōlļo̧k e n̄an inepata. Aaet, ekar ilbōk im ajļo̧k. Ekar en̄jake an aikuj in ukweļo̧k. Ekar kōttāik būruwōn, im kar en̄jake kam̧oolol, aenōm̧m̧an, im kōjatdikdik—kōjatdikdik em̧ool—kōnke Jisōs Kraist, “pilawā e mour ear wanlaļtak jān lan̄.” 20
In m̧ōtta ekar kōnono kōn kōtaa eo ekar kile ilo ettōņak eo an ikōtaan mour eo an im kwojarjar eo an Anij. Kwojarjar ej naan eo ejim̧we. N̄an m̧ōn̄ā ānbwinnin im idaak jān bōtōktōkin Kraist meļeļein ej n̄an jibadōk kwojarjar. Anij ej kean̄, “Kom̧win kwōjarjar, bwe N̄a I kwōjarjar.” 21
Enōs ekar kapilōke kōj, “Katakin e n̄an ro nejim, bwe aolep armej raņ, ijoko jabdewōt, reaikuj ukeļo̧k, ak reban maron̄ ilo jabdewōt wāween jolōte aelōn̄ in Anij, bwe ejjeļo̧k men ettoon emaron̄ jokwe ijo, ak jokwe ilo im̧aan Mejān; bwe, ilo kajin eo an Adam, Armej in Kwōjarjar ej Etan, im etan eo Nejin Eaar Make Keotake ej eo Nejin Armej, em̧ool Jisōs Kraist, juon Riekajet ejim̧we, eo Enaaj itok ilo ioļapļap in iien.” 22 Āinwōt juon ļaddik, ikar ļōmņak etke ilo Kallim̧ur Mokta Jisōs ekkā an kōnono (im kōnono n̄an E Make) āinwōt Nejin Armej n̄e E ej lukkuun Nejin Anij, ak ennaan eo an Enōs ekalikkar bwe meļeļe kein rej lukkuun kwaļo̧k aorōk im kwojarjar eo An—Ej ej Nejin Armej Ekwojarjar, Anij Jemād.
Eļan̄n̄e jej jan̄nuwaade ad pād ilo Kraist im an pād ilo kōj, 23 innām kwojarjar ej ta eo jej pukote, jim̧or ilo ānbwin im jetōb. 24 N̄e jej pukot e ilo tampeļ eo, ijo ej kōmeļeļeiki “Kwojarjar n̄an Irooj.” Jej pukot e ilo m̧are ko ad, baam̧le ko, im kapijuknen ko. Jej pukot e kajjojo wiik ilo ad lan̄lōn̄ ilo raan eo ekwojarjar an Irooj. 25 Jej pukot e aaet ilo aolep m̧akūtkūt in aolep iien mour: ad kōnono, ad nuknuk, im ad ļōmņak. Āinwōt an Būreejtōn Thomas S. Monson kar kwaļo̧k, “Jej waļo̧k in men otemjej jej riiti, men otemjej jej alooji, men otemjej jej ron̄jaki im men otemjej jej ļōmņaki.” 26 Jej pukot kwojarjar ilo ad bōk dōbwāāl eo ad make. 27
Sister Carol F. McConkie ekar ba: “Jej kile aolep mālijjon̄ ko, kapo ko, im apan̄ ko me remaron̄ bōk kōj jān aolep men ko rerreeo im nōbar im̧aan Anij. Ak en̄jake ko ilo mour in ad eletok ad iien em̧m̧an n̄an kālet kwojarjar. Enan̄in aolep iien kaarmejete eo jej kōm̧m̧an e n̄an kōjparok bujen ko ad me ej kōkwojarjar kōj im kōm̧m̧an ad ekwojarjar.” 28 Im n̄an “kaarmejete ko jej kōm̧m̧ani” ikōņaan bar kobaiki jerbal in jipan̄ eo jej leļo̧k.
N̄e jej jeļā bwe “bwe eļan̄n̄e [jej] jerbal n̄an armej ro [ad] [jej] jerbal wōt n̄an [ad] Anij.” 29 Im Irooj ej kakeememej kōj bwe kain jerbal in jipan̄ in ej io̧ļapļap in mour eo An im kadkadin:“Bwe barāinwōt Nejin armej ear jab itok bwe ren karijer n̄an E, a bwe En ri karijer, im bwe En leļo̧k An mour kōn oņān elōn̄ armej.” 30 Būreejtōn Marion G. Romney kar kōmeļeļeiki: “Jerbal ejjab juon men eo jej kōttōpare ilo laļ in bwe jen bōk jim̧we eo n̄an mour ilo aeboojoj eo an al. Jerbal in jipan̄ ej lukkuun in ōn eo me ej āje juon mour eo eutiejtata ilo aiboojoj eo an aļ.” 31
Zekaraia ekar kanaan bwe ilo raan eo Irooj enaaj irooj, aaet ainikien kōjan̄jan̄ jān ooj ko renaaj kwaļo̧k naan kein, “Kwojarjar n̄an Irooj.” 32 Ilo ejja kain jetōb in, paineer Rikwojarjar ro ilo bukwōn kein rekar kobaik naan in kakeememej in, “Kwojarjar n̄an Irooj,” ioon men ko rāinjuon barāinwōt ko rej ekkelļo̧k ippān kabun̄ im kamminene. Ekar jeje ioon kab in kwojkwoj ko im pileej ko im kar jeje ioon peba in kam̧ool ekkapit ko an Jiljilimjuonn̄oul ro im ioon būļāāk eo an Doulul eo an Kōrā ro. “Kwojarjar n̄an Irooj” ekar bar jeje ioon wintō ko an Zion’s Cooperative Mercantile Institution, ZCMI department store eo. Kar loe ioon dōm̧an juon am̧a ioon juon tūram̧. “Kwojarjar n̄an Irooj” ekar pād ioon ejjor in kōjem̧ ko an m̧weo im̧ōn Būreejtōn Brigham Young. Meļeļe naan kein n̄an kwojarjar āinwōt ekar jeja ak jab kōtmāne ilo jikin ko me āinwōt rejjekkar, ak rekar kwaļo̧k ewi jon̄an im emakijkij in ad kalimjek wōt kwojarjar eo emennin aikuj n̄an erom̧.
Bōk m̧ōttan kanniōk in Rilo̧mo̧o̧r eo im idaak jān Bōtōktōkin meļeļein n̄an joļo̧k jān mour ko ad jabdewōt men ko rejjab jokin wōt juon ippān m̧wil ko an Kraist im kōm̧m̧ane bwe Mwilin ej m̧wilid. En̄in ej juon meļeļe eļapļo̧k kōn ukweļo̧k: jab wōt juon oktakļo̧k jān jerawiwi ko m̧okta ak barāinwōt “juon oktak in bōro im m̧ōņōņō n̄an Anij” 33 im wōnm̧aanļo̧k. Āinwōt an kar waļo̧k n̄an eo m̧ōtta ilo ettōņak eo an, Anij ekar kwaļo̧k n̄an kōj ad m̧ōjņo̧ im wōtlo̧k, ak Enaaj barāinwōt jipan̄ kōj ukōt m̧ōjņo̧ ko n̄an kajoor. 34 Eļan̄n̄e jej m̧ool ilo ad kajjitōk, “Ewi men eo ijjan̄in tōpar e?” 35 E ejāmin likūt kōj n̄an anto̧o̧n, ak ilo iakwe Enaaj uwaak n̄an em̧m̧an eo ad im ad m̧ōņōņō. Im E enaaj letok n̄an kōj kōjatdikdik.
Ej juon kijejeto eļap, im enaaj lukkuun kaam̧jak n̄e ilo ad kajjieon̄ pukot kwojarjar ippād make. Mool eo eaiboojoj ej jejjab make iaad. Ewōr ippād iakwe eo an Anij, tūriam̧o̧ eo an Kraist, kaenōm̧m̧an im tōl eo an Jetōb Kwojarjar, im jem̧jerā eo im rōjan̄ ko an Rikwojarjar ro ilo ānbwinnin Kraist. Jen jab jum̧ae ijo jej pād ie, ak barāinwōt jen jab ebbeer. Āinwōt al in eļam̧ waan ak meļeļe ko an al in ej rōjan̄ kōj:
Bōk iien n̄an am̧ kwojarjar, laļ em̧ōkaj an em̧m̧akūtkūt;
joļo̧k eļap iien ilo kwojarjar ippān Jisōs make.
Jān reilo̧k n̄an Jisōs, āinwōt E kwonaaj;
ro m̧ōttam̧ ilo tōl eo am̧ an nememein renaaj loe. 36
Ij kwaļo̧k aō naan in kam̧ool kōn Jisōs Kraist, “Pilawā in mour eo Ekar Itok jān Lan̄,” 37 im bwe “Eo ej m̧ōn̄ā kanniōk [Eō], im idāāk bōtōktōk [Eō], an mour indeeo,” 38 ilo etan Jisōs Kraist, amen.