Iakwe Doon Āinwōt An kar Iakwe Kōj
Kōn jerbal in jipan̄ im jeo̧rļo̧k an ro jet bōd kōn iakwe em̧ool, jemaron̄ mour im bōk kajoor n̄an anjo̧ ioon apan̄ ko ad make.
Ilo iien Kejota eo Āliktata, Rilo̧mo̧o̧r eaar leļo̧k juon kien ekāāl n̄an rikaļoor ro An, im ba:
“Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧, kom̧win barāinwōt yokwe doon.
“Ilo men in armej otemjej renaaj jeļā bwe kom̧ij rikaļora, eļan̄n̄e kom̧ij yokwe doon.”1
Kar leļo̧k n̄an rikaļoor ro an Rilo̧mo̧o̧r juon kien ekāāl n̄an kōm̧m̧an eļapļo̧k, jet men reļļapļo̧k, im jet men rekwojarjarļo̧k. Kien in ekāāl im kūr in ej kwaļo̧k ilo naan in “āinwōt Iar yokwe kom̧.”
Iakwe Ej Waļo̧k ilo Kōm̧m̧an; Iakwe Ej Waļo̧k ilo Jerbal in Jipan̄
“Iakwe ej juon en̄jake in wūjlepļo̧k eo em̧wilaļ, kea, im nōbar. Waanjon̄ok eo em̧m̧antata kōn iakwe eo an Anij n̄an ro Nejin ej waļo̧k ilo Pinmuur eo an Jisōs Kraist.”2 “Bwe kōn an Anij yokwe laļ,” Jon eaar je, “Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”3 “Iakwe n̄an Anij im armej ej juon m̧wiļ an juon rikaļooraņ Jisōs Kraist.”4
Jet iiō remootļo̧k, ke ļaddik eo jibum̧ erūtto tata, Jose, ke ej emān an iiō, eaar ikkure ippān kōrā eo ippa. Ke rej ettōn̄ im m̧ōņōņō ippān doon, ļaddik eo jibum̧ eaar kajjitōk ippān jibun, “bubu, kwōj ke iakwe eō?”
Jibun eaar uwaak, “Aaet, Jose, Ij iakwe eok.”
Innām eaar bar kajjitōk juon kajjitōk: “Elmen am̧ jeļā ke kwōj iakwe eō.”
Jibun eaar kōmeļeļeik n̄an e en̄jake ko an im bar ba n̄an e aolep men eaar kōm̧m̧ane im naaj kōm̧m̧ane n̄an e.
Tokālik kōrā eo ippa eaar ba n̄an Jose ejja kajjitōk ko wōt, ekoba kain kajjitōk rot in em̧wilaļ: “Elmen am̧ jeļā ke kwōj iakwe eō.”
Kōn juon uwaak eo erreo im em̧ool, eaar ba, “Ij iakwe eok kōnke ij en̄jake ilo tum̧wilaļin būruwō.” Kain iakwe eo an Jose n̄an jibun raan eo im aolep iien ej kwaļo̧k juon iakwe eo ekitbuuj aolep kōm̧m̧ane barāinwōt en̄jake ko rem̧wilaļ.
Kiin̄ Benjamin eaar ba, “A lo, ij ba n̄an kom̧ men kein bwe kom̧in maron̄ ekkatak jeļāļo̧kjeņ; bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”5
Ilo laļ in rainin ekanooj lōn̄ en̄taan ko rej waļo̧k kōn jekjek ko reoktak, jilkinļo̧k juon ennaan kōn juon jekjek in turin māj ekōjak (sticker)ak juon pija em̧m̧an kōn naan ko “Ij iakwe eok” ej juon men em̧m̧an im eaorōk. Ak ta eo elōn̄ iaad eaikuj in kōm̧m̧ane ej likūt men ko m̧weid itulik im, kōn peid im need, jipan̄ ro jet ilo aikuj eļap. Iakwe ilo an jako jerbal in jipan̄ ej āinwōt tōmak n̄e ejako jerbal; em̧ool emej.
Iakwe Ej Jeo̧rļo̧k Bōd.
Iakwe eo em̧ool an Kraist, eo ej iakwe em̧ool,6 ej im̧we kōj n̄an jerbal im leļo̧k jipan̄ ak ej barāinwōt wōr ippān kajoor n̄an jeo̧rļo̧k bōd, jekdo̧o̧ņ ta jekjek eo. In kwaļo̧k juon en̄jake ippāmi me eaar jelet im kar ukōt mour eo aō. Ted im Sharon, ro jinen im jemān Cooper, ro rej pād ippād ilo kweilo̧k in, kar letok n̄an eō mālim bwe in kwaļo̧k ta eo eaar waļo̧k n̄an baam̧le eo aer elōn̄ļo̧k jān ratimjuon iiō ko rem̧ootļo̧k. Inaaj kwaļo̧k en̄jake eo jān jekjek eo an Ted, jemān Cooper:
Okwōj 21, 2008, ekar raan in jikuuļ eo im̧aan tata, im ļaddik ro jilu jein im jatin Cooper, Ivan, Garret, im Logan, raar aolep pād ilo jikin kōtttar baaj eo n̄an iuwe ilo baaj ko. Cooper, eo eaar emān iiō rūttoon, eo eaar ioon baajikōļ eo waan; kōrā eo ippa, Sharon, eaar etetal laļ.
Kōrā eo ippān eaar kijoon iaļ eo im kar jōknōļļo̧k n̄an Cooper bwe en kijoone. Ilo ejja iien eo wōt, juon wa eo eaar kanooj raļo̧k eaar jeer ituanmiin̄ im kar ettōr ioon Cooper.
Iaar bōk juon kooļ jān juon eoituru jiron̄ eō ke em̧ōj an juon wa dibwōj Cooper. Iaar m̧ōkaj in ettōrļo̧k n̄an jikin kōttar baaj eo n̄an lale e. Cooper eaar babu ioon ujooj ko, kakkōt ilo an emenono, ak eaar jab alikar jorrāān ko.
Iaar jijet iturin Cooper im kōperan e ilo naan kein “Enaaj Em̧m̧an. Pād wōt.” Ilo iien eo high prist group leader eo aō, Nathan, erro kōrā eo ippān raar jedetok. Liin eaar ba bwe kōmin leļo̧k n̄an Cooper juon kōjeram̧m̧an in priesthood. Kōm eaar likūt peim̧ ioon bōraņ Cooper. Iaar jab keememej ta eo iaar ba ilo kōjeram̧m̧an eo, ak eaar alikar aō keememej an ro jet pād ipeļakum̧, im ilo kar iien eo iaar jeļā Cooper enej mej.
Cooper eaar uwe ilo ālikaptōr eo ļo̧k n̄an aujpitōl ak eear, ilo m̧ool, emej. Iaar en̄jake an Jema Ilan̄ jiron̄ eō bwe jerbal eo aō ededeļo̧k im bwe Cooper epād ilo kōjparok eo An.
Kōm kar maron̄ joļo̧k jidik iien ippān Cooper ilo aujpitōl. Rijerbal ro ijo raar kepooj e bwe kōmin maron̄ jepak e im iak-iakweik im ekar kōm̧m̧an bwe kōmin joļo̧k eļap iien ippān, jibwe, jon̄an wōt am kōņaan.
Ke kōmij ro̧o̧l, būrom̧ōj eo ilo kōm eaar ļap im kar kalimjōk doon im jino kennaan kake ļaddik eo eaar ettōr kōn wa eo. Kōmij jab jeļā kajjien, ak kar jeļā bwe ej jokwe ebaak im epād ilo bauntōri ko in ward eo am̧.
Raan eo juon eaar lukkuun in pen ilo am kar lukkuun obrak kōn būrom̧ōj . Iaar jubukwe ilo bukiiō im kōm̧m̧ane juon jar eknooj elap ijjan̄in kar kōm̧m̧ane m̧okta. Iaar kajjitōk ippān Jemed Ilan̄ ilo etan aō Rilo̧mo̧o̧r n̄an bōkļo̧k būrom̧ōj eo aō eļap jen jon̄an. Eaar kōm̧m̧ane āindein.
Ilo ejja raan eo wōt juon iaan rikakpilōklōk ro ilo stake būreejtōnji eo kar karōk bwe kōmin iioon likao eo—rikattōr eo an wa eo—im jinen im jemen ilo m̧weeo im̧ōņ rikakpilōklōk eo. Sharon im n̄a kom̧ro kar kōttar an ļaddik eo im ro jinen im jemen itaaktok. Ke kōjem eo eaar peļļo̧k, eaar kein kajuon am kar iioon er. Bisop eo aō eaar unoojdikdik tok n̄an lojiln̄ū, “Etal n̄an ippān.” Sharon im n̄a kom̧ro kar lukkkuun atbokwoj e. Kōm kar jan̄ ippān doon āinwōt juon iien eaitok. Kōm kar ba n̄an e kōm jeļā ta eo eaar waļo̧k bwe eaar jidiļo̧k.
Eaar menin kabwilōn̄lōn̄ n̄an Sharon im n̄a, bwe kōm kar jim̧or en̄jake wāween eo kōm kar en̄jake im bwe kōmij en̄jake wōt. Kōn tiram̧o kake an Anij, kōm kar maron̄ bōk iaļ eo, em̧ool iaļ eo, iaļ eo ej make wōt, iakwe ļaddik in.
Kōm kar lukkuun epaake e im baam̧le eo ium̧win elōn̄ iiō ko. Eaar kwaļo̧k iien ememļo̧kjeņ ko an rem̧m̧an tata ippām. Kōm kar etal n̄an tampeļ ippān ke eaar kōppopo n̄an mijen eo an.7
Ro jeiū im jatū, Ted ejeļā ilo ejjeļo̧k pere bwe Jemedwōj Ilan̄ ej iakwe kōj. Ejeļā bwe maron̄ jeo̧rļo̧k bōd, im n̄an joļo̧k an make eddodo ilo wāween in, ej āinwōt juon men em̧m̧an n̄an jeo̧rļo̧k bōd. Em̧m̧an in ej itok ilo ļoor waanjon̄ok eo an ad Riwaanjon̄ok eļap. Ilo Bok in Mormon, Alma eaar kwaļo̧k kōn Rilo̧mo̧o̧r, ‟Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k, im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmej ko an armej ro An.”8
Ro jeiū im jatū, ej juon bwebwenato eo em̧ool kōn iakwe im jeo̧rļo̧k bōd. Kōj, barāinwōt, maron̄ bōk lan̄lōn̄ im m̧ōņōņō ilo ad jerbal im jeo̧rļo̧k an ro jet bōd. Georgy, bar juon jibum̧ ļaddik, ekkā an ba, “Kain rot baam̧le kōj?” Im ej uwaak, “Jej juon baam̧le elem̧ōņōņō!”
Būreejtōn Thomas S. Monson ekar kapilōk kōj, im ba: “Jen etale mour ko ad im ļōmņake wāween ad ļoor waanjon̄ak ko an Rilo̧mo̧o̧r eo ilo ad jouj, iakwe, im ļap tūriam̧o.”9
Ij jeļā bwe Jemedwōj Ilan̄ im Nejin, Jisōs Kraist, rej iakwe kōj im rej kōņaan jipan̄ kōj n̄an jerbal ilo ad iakwe doon āinwōt Raar iakwe kōj. Im ij jeļā bwe kōn jerbal in jipan̄ im jeo̧rļo̧k an ro jet bōd kōn iakwe em̧ool, jemaron̄ mour im bōk kajoor n̄an anjo̧ ioon apan̄ ko ad make. Im ij kam̧ool ilo etan Jisōs Kraist, amen.