Jab Mijak n̄an Kōm̧m̧an Em̧m̧an
Irooj ej jiron̄ kōj bwe n̄e jej jutak kōn tōmak ioon An ejm̧aan, pere im mijak rej makunļo̧k; ikdeelel eo n̄an kōm̧m̧an em̧m̧an ej ļapļo̧k.
Ro jeiū im jatū, ij jar ilo ettā bwe Jetōb eo an Irooj enaaj pād ippād ilo aō kōnono rainin. Būruwō ej obrak kōn kam̧m̧oolol n̄an Irooj, eo Kabun̄ in ej An, kōn im̧we eo jaar en̄jake ilo jar ko rekije, kwaļo̧k ko raar im̧we, im al ko peļļo̧kier āinwōt an enjeļ ro al ilo kweilo̧k in.
Eprōļ eo ļo̧k, Būreejtōn Thomas S. Monson eaar letok juon ennaan me eaar kanooj jelet en̄jake ko an armej ro ilo aolepān laļ in, ekoba n̄a. Eaar kōnono kōn kajoor eo an Bok in Mormon. Eaar libjerjere kōj n̄an ekkatak, kōļmenļo̧kjeņ, im kōjerbal katak ko ie. Eaar kallim̧ur bwe eļan̄n̄e jej kōjeno̧lo̧k iien kajjojo raan n̄an ekkatak im kōļmenļo̧kjeņ im kōjparok kien ko rej pād ilo Bok in Mormon, enaaj wōr juon ad naan in kam̧ool kōn m̧ool eo an eaorōk, im naan in kam̧ool eo jej bōk kōn Kraist eo emour enaaj jipan̄ kōjparok kōj niknik ilo iien ko renana. (Lale “Kajoor eo an Bok in Mormon eo,” Kweilo̧k eo Eļap, Māe 2017, 86–87.)
Āinwōt elōn̄ iaami, iaar ron̄ naan ko an rikanaan eo āinwōt ainikien Irooj n̄an eō. Im, barāinwōt āinwōt elōn̄ iaami, iaar jokālet n̄an pokake naan ko. Kiiō, jān ke iaar juon ļaddik edik, iaar en̄jake kam̧ool eo me Bok in Mormon eo ej naan an Anij, bwe Jemān im Nejin raar waļo̧k im kōnono ippān Josep Smith, im bwe Rijilōk ro etto raar itok n̄an Rikanaan Josep n̄an kōjepļaaktok kii ko an priesthood eo n̄an Kabun̄ eo an Irooj.
Ippān naan in kam̧ool in, iaar riiti Bok in Mormon eo aolep raan elōn̄ļo̧k jān 50 iiō ko. Kōnke em̧ōj aō kōm̧m̧ane menin imaron̄ kar ļōmņak bwe naan ko an Būreejtōn Monson rej n̄an bar jet. Aaet, āinwōt elōn̄ iaami, iaar en̄jake naan in rōjan̄ eo an rikanaan eo im an kallim̧ur n̄an kūr eō n̄an kōm̧m̧ane juon kijejeto eļapļo̧k. Elōn̄ iaami em̧ōj ami kōm̧m̧ani ta iaar kōm̧m̧ane: jar kōn eļapļo̧k kōttōpar, kōļmenļo̧kjeņ eļapļo̧k kōn jeje ko rekwojarjar, im buuļ kajjieon̄ n̄an jerbal n̄an Irooj im ro jet n̄an E.
Tōprak ekam̧ōņōņō n̄an eō, im n̄an elōn̄ iaami, ekar ta eo rikanaan eo eaar kallim̧ur kake. Kōj ro me raar bōk kapilōk eo an eim̧we ilo tum̧ūlaļ in ealikkar ļo̧k aer ron̄ Jetōb eo. Jaar lo eļapļo̧k kajoor n̄an jum̧ae kapo im kar en̄jake eļapļo̧k tōmak ilo jerkakpeje Jisōs Kraist, ilo gospel eo An, im ilo Kabun̄ eo An emour.
Ilo iien an ļapļo̧k tarpok ilo laļ in, ro rej ļapļo̧k ilo naan in kam̧ool kar ubakeļo̧k pere im mijak im kar bōktok n̄an kōj en̄jake ko an aenōm̧m̧an. Ron̄jake kapilōk an Būreejtōn Monson ebar wōr ruo kijejeto ko raiboojoj ilo eō: Juon, Jetōb eo eaar kallim̧ur kake eaar kwaļo̧k kōļmenļo̧kjeņ in kōjatdikdik kōn ta ko repād im̧aan, men̄e lōkapokpok eo ilo laļ in ej āinwōt eļapļo̧k. Im, ruo, Irooj eaar letok n̄an eō—im kwe—juon en̄jake eļapļo̧k kōn iawke eo An n̄an ro me rej pād ilo en̄taan. Jaar en̄jake juon ļapļo̧k ilo ikdeelel n̄an ilo̧k n̄an lo̧mo̧o̧ren ro jet. Ikdeelel jab in ekar pād ilo ioļapļap in pedped in iien eo Būreejtōn Monson ej juon ritōl im an katakin.
Irooj eaar kallim̧ur kōn iakwe n̄an ro jet im kōketak n̄an Rikanaan Josep Smith im Oliver Cowdery ke jerbal ko im̧aer raar āinwōt tōrjān jon̄aer. Irooj eaar ba bwe kōketak eo emenin aikuj enaaj kar itok jān tōmak eo aer ilo E āinwōt aer ejm̧aan:
“Jab mijak n̄an kōm̧m̧an em̧m̧an, m̧aan raņ nejū, bwe jabdewōt kom̧ naaj jeore, men in kom̧ naaj barāinwōt m̧adm̧ōd; kōn menin, eļan̄n̄e kom̧ naaj jeor em̧m̧an kom̧ naaj barāinwōt m̧adm̧ōd em̧m̧an n̄an woņeam̧i.
“Kōn menin, Jab mijak, bwij jidikdik in sip; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ij ekkal ioon Aō ejm̧aan, rej jamin anjo̧.
“Lo, Ij jab liaakeļo̧k kom̧; etal ilo iaļ ko amiro im jab bar jero̧wiwi; jerbal ilo alikkar in ļōmņak, jerbal eo Iaar jiron̄ kom̧iro.
“Reitok n̄an Eō ilo ļōmņak otemjeļo̧k; jab pere, jab mijak.
“Lali kinej kein rekar wākari ikatū, im barāinwōt jenkwan dila kā ilo Peiū im Neō; kom̧in tiljek, kōjparok kien ko Aō, im kom̧ naaj jolōte aelōn̄ in lan̄” (K&B ko 6:36–37).
Irooj eaar jiron̄ ritōl ro An kōn Jepļaaktok eo, im ej jiron̄ kōj, bwe n̄e jej jutak kōn tōmak ioon An ejm̧aan, pere im mijak rej makunļo̧k; ikdeelel eo n̄an kōm̧m̧an em̧m̧an ej ļapļo̧k. Ilo ad bōk kūr eo an Būreejtōn Monson n̄an katōk ilo būruwōd juon naan in kam̧ool kōn Jisōs Kraist, jej bōk kajoor, ikdeelel, im peran eo n̄an ilo̧k n̄an lo̧mo̧o̧ren ro jet kōn ejjeļok n̄ūrbōktak kōn aikuj ko ad make.
Em̧ōj aō lo bwe tōmak im peran elōn̄ kōttan n̄e Armej ro Rekwojarjar ilo Raan-ko Āliktata retōmak raar jeļm̧ae mālijjon̄ ko reppen. N̄an juon waanjon̄ak, iaar pād ilo Idaho ke Tenton Dam eo eaar rup ilo Juun 5, 1976 eo. Juon dān eļap eaar wanlaļtak. Taujin raar ko jān im̧ōko im̧weer. Taujin m̧ōko im im̧ōn wia ko raar jorrāān. Ilo kabwilōn̄lōn̄, eietļo̧k jān 15 armej ro raar mej.
Ta eo iaar lo ijōņ, iaar lo jabdewōt iien Armej ro Rekwojarjar ilo Raan-ko Āliktata rej jutak dim ioon ejm̧aan eo an naan in kam̧ool eo kōn Jisōs Kraist. Kōnke eaar ejjeļo̧k aer pere ilo An mije er, raar erom̧ jab mijak. Raar kowaan mālijjon̄ ko aer make n̄an ilo̧k n̄an jipan̄ an ro jet. Im raar kōm̧m̧an menin kōn iakwe n̄an Irooj, kajjitōk ejjeļo̧k kōļļā.
N̄an waanjon̄ak, ke Tenton Dame eo eaar rup, ruo ripālele in Armej ro Rekwojarjar ilo Raan-ko Āliktata raar ito–itak, m̧aiiļ ettoļo̧k jān m̧weo im̧weer. Ilo iien eo wōt raar ron̄ kōn ennaan eo ilo retio, raar ekairir in bar ro̧o̧l n̄an Rexburg. Ijello̧kin aer etal n̄an m̧weo im̧weer make n̄an lale eļan̄n̄e eaar rup, raar ilo̧k in kappukōt bisop aer. Eaar pād ilo juon em̧ me kar kōjerbale āinwōt jikin kōtōbalbal jerbal in jipan̄. Eaar jipan̄ kōtōbalbal taujin baļintiōr ro me raar jikrōkļo̧k ilo baj in jikuuļ iaļo ko.
Ripālele rein ruo raar jibadōkļo̧k bisop eo im ba, “Kōmij kab ro̧o̧ltok. Bisop, ia eo kōm maron̄ etal in jipan̄ ie?” Eaar leļo̧k n̄an er āt ko etan juon baam̧ļe. Ripālele rein raar kōm̧akūt pedkat im dān jān elōn̄ im̧ōko. Raar jerbal jān joraanļo̧k n̄an marok elōn̄ raan ko. Āliktata raar kakkije n̄an etal n̄an lale jekjek eo an m̧weo im̧weer make. Ekar rup jān an ibwijleplep, likūt ejjeļo̧k jabdewōt n̄an karreo. Kōn menin em̧ōkaj aer oktaklik n̄an ro̧o̧l n̄an ippān bisop eo aer. Raar kajjitōk, “Bisop, ewōr ke jet ro kōmin jipan̄ er?”
Kabwilōn̄lōn̄ jab in an aenōm̧m̧an im peran im iakwe em̧ool—iakwe eo erreo an Kraist—em̧ōj ālji im bar ālji ium̧win iiō ko im aolepān laļ in. Eaar waļo̧k ilo raan ko renana an kaen̄taanan ko im mālijjon̄ ko ilo tōre eo an Rikanaan Josep Smith ilo Missouri. Eaar waļo̧k ke Brigham Young eaar tōl riwōjļo̧k eo jān Nauvoo innām kūr eo n̄an ro Rekwojarjar n̄an ilo̧k n̄an jikin ko ejjan̄in wōr armej rekar pād ilo United States, n̄an jipan̄ doon ejaake Zaion n̄an Irooj.
Eļan̄n̄e kom̧ naaj riiti ļo̧o̧k ko an jōnōļ an bainier ro, kom̧ij lo an tōmak ilo kabwilōn̄lōn̄ kadiwōjļo̧k pere im mijak. Im kom̧ij riiti kōn Armej ro Rekwojarjar rekar likūt kōņaan ko aer make n̄an jipan̄ bar juon n̄an Irooj, m̧okta jān aer bar etal im lale jiip ko aer make ak n̄an meļaaj ko aer rejjan̄in totaki.
Iaar lo ejja kabwilōn̄lōn̄ in wōt jet raan rekkadu remootļo̧k ilo ālkin jem̧ļo̧k eo an Hurricane Irma ilo Puerto Rico, Saint Thomas, im Florida, ijo Armej ro Rekwojarjar ilo Raan-ko Āliktata raar koba ippān kabun̄ ko jet, kumi ko ilo jukjukin pād eo ijo jokwe ie, im national doulul ko n̄an jino jerbal in karreo ko.
Āinwōt ro m̧ōtta ilo Rexburg, juon ripālele eo ejjab membōr ilo Florida raar m̧ad ilo jipan̄ jukjukin pād eo ijello̧kin jerbal ilo men ko m̧wier make. Ke ro jet riturier Armej ro Rekwojajar ilo Raan-ko Āliktata raar leļo̧k jipan̄ kōn ruo wōjke eļļap raar pinej iaļ eo aer, ripālele in raar kōmeļeļeik bwe raar ļo̧kjeņ aer im lukkuun ilo̧k n̄an jipan̄ ro jet, wōr tōmak bwe Irooj enaaj kar leļo̧k jipan̄ eo raar aikuji ilo m̧weo im̧wer make. Innām ļeo pālele eaar kwaļo̧k bwe m̧okta jān an membōr ro ilo Kabun̄ eo am kar jikrōktok kōn leļo̧k jipan̄, ripālele eo eaar jar. Raar bōk juon uwaak bwe jipan̄ eo enaaj kar itok. Eaar itok ilowaan wōt awa ko ke jaar jar.
Iaar ron̄ juon riboot bwe jet raar jino kūr Armej ro Rekwojarjar ilo Raan-ko Āliktata ro rej kōņak Jiln̄ij ko reiaļo Helping Hand, “Enjeļ ro Reiaļo.” Juon Armej ro Rekwojarjar ilo Raan-ko Āliktata eaar bōkļo̧k wa eo waan bwe ren kōm̧m̧ane, im em̧m̧aan eo eaar jipan̄ e eaar kōmeļeļeikjuon “en̄jake ilo jetōb” eaar ioone ke armej ro ilo jiln̄ij iaļo ko raar kōm̧akūt wōjke ko jān meļan eo an innām, eaar ba, raar “al jet al ko n̄an eō kōn āinwōt juon nejin Anij.”
Bar juon armej in Florida—barāinwōt jab jān kabun̄ in ad—eaar kwaļo̧k bwe Armej ro Rekwojarjar ilo Raan-ko Āliktata raar itok n̄an m̧weo im̧ōn ke eaar jerbal ilo meļan eo an ejorrāān im en̄jake ļo̧kjeņ an, laudin̄din̄, im baj jan̄ wōt. Baļintier ro raar ejaake, ilo naan ko an, “juon kabwilōn̄lōn̄ erreo.” Raar jerbal ejjab wōt kōn tiljek ak barāinwōt kōn ettōn̄ im medikdik, jab bōk jabdewōt jān jerbal eo aer.
Iaar lo tiljek jab in im ron̄ bwe ettōn̄ ke, joten ļo̧k juon Jādede, Iaar loļo̧k juon kumi in Armej ro Rekwojarjar ilo Raan-ko Āliktata ilo Florida. Baļintieer ro ebwe an aitok aer kar jerbal raar bōjrak jān aer karreo n̄an kōtļo̧k bwe in idik jān pā ko. Raar ba bwe 60 membōr ro an stake eo aer ilo Georgia raar ejake juon ļōmņak n̄an koba ilo jerbal in jipan̄ eo ilo Florida bon̄ōn eo m̧okta jān aer kar em̧m̧akūt.
Raar likūt m̧ōko m̧weer ilo 4:00 awa ilo jibbon̄, kattōr elōn̄ awa ko, jerbal n̄an n̄e ebon̄, im bar jerbal raan eo tok juon.
Raar kōmeļeļeik tok n̄an n̄a kōn medikdik im paotok em̧m̧an. Inepata eo wōt iaar arromeļo̧k eaar bwe raar kōņaan bwe ren jab kam̧m̧oolol bwe ren maron̄ ro̧o̧l in jerbal. Stake būreejtōn eo eaar bar kōjo̧ jidpen eo an im kar jerbale juon wōjke eaar okjak im bisop eo eaar kōm̧akūt raan wōjke ko ke kōm kar iuweļo̧k ilo wa ko waam n̄an etal ippān tiim in lo̧mo̧o̧r eo juon.
Jibbon̄ōn ļo̧k raan jab eo, ke kōm kar ilo̧k jān jikin jab eo, juon em̧m̧aan kar itok n̄an wa eo, utūk at eo an, im kam̧oolol kōm kōn baļintier eo. Eaar ba, “Ijjab juon membōr in m̧ōn jar eo ami. Ijjab tōmak ta eo kom̧ kar kōm̧m̧ane n̄an kōm. Anij en kōjeraam̧m̧an kom̧.” LDS baļintieer eo ej jutak iturin ilo jiln̄ūj iaļo eo an kar ettōn̄ im kōm̧akūtkūt aeran āinwōt eļan̄n̄e eaar kōņaan nōbar.
Ilo an baļintieer ro jān Georgia kar itok n̄an jipan̄ em̧m̧aan in me ekar jab tōmak, buki Armej ro Rekwojarjar ilo Raan-ko Āliktata jān m̧ōttan jab in ekanooj jorrāān an Florida raar ilo̧k buki m̧aiļ ko iturōk n̄an bar juon jikin ilo Florida me raar ron̄ ke eļap kar aer ļanootot.
Raan eo iaar keememej im ļapļo̧k aō meļeļe naan in kanaan ko an Rikanaan Josep Smith: “Juon armej eobrak kōn iakwe eo an Anij, ejjab bun̄ būruwōn kōn kōjeram̧m̧an baam̧le eo wōt an, ak kappukōt ilo aolepān laļ in, laudin̄din̄ eo n̄an kōjeram̧m̧an aolep armej”” (Teachings of Presidents of the Church: Joseph Smith [2007], 426).
Jej lo kain iakwe in ilo mour ko an Armej ro Rekwojarjar ilo Raan-ko Āliktata aolep jikin. Kajjojo iien ewōr juon jorrāān eļap jabdewōt jikin ilo laļ in, Armej ro Rekwojarjar ilo Raan-ko Āliktata rej jipan̄ļo̧k baļintier n̄an jerbal ko an humanitarian eo an Kabun̄. Juon kajjitōk eļap n̄an baļintier ej menin aikuj ejeja. Ilo m̧ool, ilo jet iien ko, kōm kar aikuj in kajjitōk ippān ro rekōņaan baļintier n̄an kōttar n̄an ilo̧k n̄an jikin jipan̄ eo m̧ae iien ro rej bōk eddo in jerbal eo rej pojak n̄an bōk er.
Ikdeelel jab in n̄an kōjeraam̧m̧an ej tōprak in an armej bōk juon naan in kam̧ool kōn Jisōs Kraist, jepļaaktok in Kabun̄ eo An, im rikanaan eo An. En̄in ej etke armej ro doon Irooj rejjab pere im mijak. En̄in ej etke mijenede ro rej baļōntieer n̄an jerbal in jipan̄ ilo aolep m̧ōttan ko an laļ. En̄in ej etke ro jinen im jemān rej jar ippān ajri ro nejier kōn ro jet. En̄in ej etke ritōl ro rej kūr jodikdik ro aer n̄an m̧ool in bōk kajjitōk eo an Būreejtōn Monson n̄an ekkatak kōn Bok in Mormon ilo tum̧wilaļ. Tōprak eo ejjab itok wōt jān libjōrjōr jān ritōl ro ak jān an jodikdik ro im membōr ro em̧m̧akūt kōn tōmak. Tōmak jab in likūt ilo jerbal—, ej aikuji karmejete eo ejjab ļōmņak kōn e make—, ej bōktok oktak in bōro eo me ej kōtļo̧k bwe ren en̄jake iakwe an Anij.
Būruwōd, ijowōt ke, rej pād to̧o̧n wōt ilo an jab oktak ilo ad wōnm̧aanļo̧k wōt n̄an ļoor kapilōk eo an rikanaan eo. Eļan̄n̄e jej bōjrak jān kajjieon̄ ālkin juon wōt kijejeto eļap, oktak eo enaaj makunļo̧k.
Armej ro Rekwojarjar ilo Raan-ko Āliktata retiljek kar kōļapļo̧k aet tōmak ilo Irooj Jisōs Kraist, ilo Bok in Mormon āinwōt naan an Anij, im ilo jepļaaktok eo an kii ko an priesthood ilo Kabun̄ eo An em̧ool. Bwe ļapļo̧k in naan in kam̧ool eo eaar leļo̧k n̄an er eļapļo̧k peran im n̄ūrbōktak kōn ro jet nejin Anij. Bōtaab idajon̄jon̄ ko im iien ko rem̧m̧an im̧aan renaaj aikuji em̧ool eļapļo̧k.
Jejjab maron̄ kajidedeik tipdik in, ak jejeļā ta eo enaaj waļo̧k ilju jekļaj. Jejeļā bwe ilo raan ko āliktata, laļ in enaaj pād ilo tarpok. Jejeļā bwe ilo ibwilijin jekdo̧o̧n ta jorrāān ko rej itok, Irooj enaaj tōl Armej ro Rekwojarjar ilo Raan-ko Āliktata retiljek n̄an gospel eo an Jisōs Kraist n̄an aolep laļ ko, bwij ko, lo ko, im armej ro. Im jejeļā bwe rikaļoor ro rem̧ool an Irooj renaaj erreo im pojak n̄an bōk E n̄e E ej bar itok. Jej jab aikuj mijak.
Kōn menin, men̄e emōj ad de kar kalōk tōmak im peran ilo būruwōd, Irooj ej kōtmene eļapļo̧k jān kōj—im jān epepen ko ālkiid. Renaaj aikuj in kajoorļo̧k im peranļo̧k kōnke renaaj kōm̧m̧ani men ko reļļapļo̧k im eppenļo̧k jān ko jaar kōm̧m̧ani. Im renaaj jelm̧ae eļapļo̧k jum̧ae jān rikōjerat eo an jetōb ko ad.
Wāween eo n̄an laudin̄din̄ ilo ad bun̄ m̧aanļo̧k kar letok jān Irooj: “Reitok n̄an Eō ilo ļōmņak otemjeļo̧k; jab pere, jab mijak” (K&B ko 6:36). Būreejtōn Monson eaar jiron̄ kōj ekōjkan kōm̧m̧ane menin. Jej aikuj in kōļmenļo̧kjeņ im kōjerbal Bok in Mormon im naan ko an rikanaan ro. Jar iien otemjej. Tōmak wōt. Jerbal n̄an Irooj kōn aolepān būruwōd, maron̄, ļōmņak, im kajoor. Jej aikuj jar kōn aolepān ad kajoor an būruwōd kōn menin letok eo an iakwe em̧ool, iakwe eo erreo an Kraist (lale Moronai 7:47–48). Im ilōn̄ aolep men, jej aikuj jokkun wōt juon im kijin̄en̄e ilo ļoor kapilōk in kanaan eo.
N̄e iaļ eo ej pen, jemaron̄ pedped ioon kallim̧ur eo an Irooj—kallim̧ur eo Būreejtōn Monson eaar kakememej kōj kake ilo an kar emakijkij an kōnono jān naan kein an Rilo̧mo̧o̧r eo: “Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧” (K&B ko 84:88).
Ij kam̧ool bwe Irooj ej etal im̧aan mejami ļo̧k jabdewōt iien kom̧ij pād ilo jerbal eo An. Jet iien kom̧ naaj enjeļ eo Irooj ej jilkinļo̧k n̄an kotak ro jet. Jet iien kom̧ naaj juon eo me ej jepooļ jān enjeļ ro me rej kotak kom̧. Bōtaab iien otemjej kom̧ naaj bōk Jetōbeo An ilo būruwōd, āinwōt kar kallim̧uri kom̧ ilo aolep kweilo̧k in kwojkwoj. Men eo de eo kom̧ij aikuj kōm̧m̧an kōjpark kien ko An.
Raan ko rem̧m̧an tata rej pād im̧aan n̄an aelōn̄ in kiin̄ eo an Anij ioon laļ in. Jum̧ae enaaj kōkkajoorļo̧k ad tōmak ilo Jisōs Kraist, āinwōt ekar jān raan ko an Rikanaan Josep Smith. Tōmak iien otemjej ej anjo̧ ioon mijak. Jutak ippān doon ej kwaļo̧k ippān doon. Im jar ko ami n̄an ro rej pād ilo aikuj rej ron̄jaki im uwaaki jān juon Anij in iakwe. E jāmin mejki ak E jāmin kiki.
Ij kwaļo̧k aō kam̧ool bwe Anij Jemān emour im ekōņaan bwe kom̧in ro̧o̧l n̄an kapijukene n̄an E. En̄in ej Kabun̄ eo em̧ool an Irooj Jisōs Kraist. Ejeļā kajiemi; Ej iakwe kom̧; Ej mije kom̧. Eaar en̄taan kōn jerawiwi ko ami im aō im jerawiwi ko an aolep ajri ro nejin Jemedwōj Ilan̄. Ļoor E ilo mour eo ami im ilo jerbal in jipan̄ eo ami n̄an ro jet ej iaļ eo de in n̄an mour indeeo.
Āindein ij kam̧ool im likūt ippāmi aō kōjeraam̧m̧an im aō iakwe. Ilo etan ekwojarjar Jisōs Kraist, amen.