Bwe Am̧ Lan̄lōn En Maron̄ Obrak
Jisōs Kraist ej unin kōmour otemjej, aenōm̧m̧an, im wōnm̧aanļok eo ejjeļok jem̧ļokin.
Ro jeiū im jatū, ej aō lan̄lōn̄ bwe in pād ippemi. Im̧ men eo in ikōnan kōnnaan kake ippami jibon̄niin—obrak kōn lan̄lōn̄ eļap.
Juōn nuuj emootļok kar riiti einwōt in: “deka in kakkure ko an aelōn̄ in [im] laļ in.”1 Jān aire im ibwij leplep n̄an meņāān in mejatoto im an̄ōnean̄, jen kūjeek ko reļļap im makutkut an laļ n̄an tarinae ko im nan̄inmej ko rekauwōtata, einwōt “laļ [ej] limotak.”2
Millien armej em̧ōj bōk jikier, im elōn̄ an armej kar mour men kein rekar kakuri. Iakwelel ilo baam̧le im jukjuk in pād ko ippenļok ļōkapokpok ko tu lowa kōn mijak, pere, im bōklōkōt ko rejjōb kurm̧ool rej likūt kōj ilo pok. Emaron̄ pen n̄an en̄jake lan̄lōn̄ eo Leai ekar katakin im ej kōttōbar eo an mour in.3 Ilo jet iien em̧ōj an aolep kajjitōk: “Ia eo imaron̄ oktak ļo̧k n̄an aenōm̧m̧an?” Ia eo jikin aō kone … ?”4 Jej ļōmnak, ekōjkan aō lo lan̄lōn̄ jen poktak ko an mour in?
Emaron̄ pidodo am lo uwaak eo, ak em̧ōj an walok jen kar tōre ko an Adam. Lan̄lōn̄ eo ejej jem̧ļokin ej ilo ad kalimjōkļok Rilomoor, Jisōs Kraist, im mour kōn gospel eo āinwōt An kar katakin im kōmeļeļeiki. Ilo an ļapļo̧k ad ekkatak kōn, wōr ad tōmak kōn, im ļoore Jisōs Kraist, enaaj lapļok ad meļeļe ke E ej unjen kōmour otemjelok, aeņōm̧m̧an, im wōnm̧aanļok eo ejjeļok jem̧ļokin. Ej karuwaineneik kōj kajjojo n̄an itok n̄an E,5 kūr jān Būreejtōn Henry B. Eyring kwaļok kadkadin “kūr eo eļap an aorōk jabdewōt remaron̄ ero̧n̄.”6
Katak kōn Jisōs Kraist
Ewi wāween ad itok n̄an E? Eprōļ eo ļok, Būreejtōn Russell M. Nelson im Elder M. Russell Ballard rej kapilōk kōj bwe jen katak “Kraist Eo Emour”7 ilo m̧ōttan wōt katak kōn Rilo̧mo̧o̧r eo. Elōn̄ em̧ōj aer ron̄jake kūr in im jeraam̧m̧an jāne. Ejjab lukkun to Juōn m̧ōtta aorōk ekar leļo̧k n̄an ajri rutto ro nejin kape in jerbaļ eo ippenļok gospel pija ko n̄an kōmeļeļeik kajjojo naan. Ekar rōjan̄ ro nejin n̄an jipan̄ ro jibūn meļeļe im keememej men in. Jet iien tokālik lio m̧ōtta ekar kwaļok juōn pija in alooj kōn leddik eo jibūn jiljino an iiō, Laynei, ej kakkilōklōk e an kakeememej e jerbal eo an jibūn kon̄ ikdelel im wāween an ba. Ikar lo bwe n̄e jiljino iiō dettan emaron̄ kōm̧m̧ane, innam imaron̄!
Ilo aō kar katak kōn mour im katak ko an Kraist kōn eļap jipadpad im m̧ool “Kraist Eo Emour” n̄an aō kein ememej, aō kauteej im iakwe n̄an aō Rilo̧mo̧o̧r ekar eddōkļok. Kajjojo jentōj ilo jerbal eo em̧m̧an ekar wōr juōn kweilo̧k im ekar kaitokļo̧k jeļā e aō kōn jon̄ak ko an Anij im mijen eo an ioon laļ in. Ta eo ikar katak im en̄jake ilo iien ekkatak in im kōļmenļokjen kake ekam̧ool ke Jisōs ej lukkuun “meram eo, mour eo, im ej kōjatdikdik eo an lal.”8 Jeje ko rekwojarjar jān etto im naan ko an rikanan ro raan kein rej nebar E kam̧ool in “Jinok eo jenkwan ej ial eo ej tel lok ñõn m̧õnõnõ ilo mour in im ilo mour ñõn indeo ilo lal eo ej itok.”9
En Wōr Tōmak ilo Jisōs Kraist
Ilo am̧ ekkatak kōn mour im katak ko an Kraist ilo elōn̄ wāween ko, tōmak eo am̧ ilo E enaaj eddōkļok. Kwonaaj itok n̄an am̧ jeļā E ej iakwe eok im eļap An meļeļe kōn kwe. Ilo 33 iiō eo An mour ilo mour in, Ekar en̄taan kōn kōjdat; en̄taan; kwole in ānbwin, maro, im m̧ōk;10 ajimakeke; metak ilo naan im ānbwin ilo ejjeļok unin; im āliktata, mej eo kōmetak jen pein rijerawiwi ro.11 Ilo jikin kallib Getsemane, im ioon dōbwāāl Calvary, Ekar en̄jake aolep ad metak, en̄taan, mālijjon̄ ko, nan̄inmej, im m̧ōjņo̧ ko ad, en̄taan, mālijjon̄ ko, nan̄inmej, im m̧ōjņo̧ ko.12
Jekdon ta ko em̧ōj ad en̄taan kaki, E ej rikōmour eo. Ro im em̧ōj aer ioon mour in kam̧koko, en̄jake jako eo epen, nan̄inmej eo eto kūtien ako en̄taan in nan̄inmej, ba ņae ko rejjab m̧ool, en̄taan ko reļļap, ako jorrāān in jetōb jān jerawiwi im pok ko remaron̄ bar kōm̧m̧an n̄an m̧okta jān Ripinmuur eo an laļ. Ijowōt ke, Eban deļo̧n̄ eļan̄n̄e ejjeļo̧k karuwainene. Jej aikuj itok n̄an E im kōtļok bwe En jerbale kabwilōn̄lōn̄ ko An.
Juōn jibriin̄ aeboojoj ikar kōpeļļok kōjem eo im bōk aō iien kattoto. Juōn bao jidikdik ekar ketok n̄an m̧aan kōjem eo im lo bwe ejjab ijo en ekar kōņaan pād ie. Ekar lukkuun ekkake ipeļaakin ruum̧ eo, bar kelo̧k n̄an kūlaaj eo bwe en kajjion̄ ko. Ikar kajjion̄ kōkōm̧anm̧an tōlļo̧k e n̄an kōjem eo, ak ekar mijak im lōkkar kōkairir. Innām ekar kaju jok ioon lōn̄in katiin̄ eo ilo an lukkuun m̧ōk im pok. Ikar bōk juōn buruum̧ im kadikdik kōttōbarļo̧k kabin buruum̧ eo im kajju ijo bao eo emijak ej pād ie. Ke ikar jibwe bōran buruum̧ eo tūrinlok neen, bao eo ekar etetal tok ioon kabin buruum̧ eo. Kadikdik, kadikdikļo̧k wōt, ikar etetaļo̧k im kōpeļļo̧k kōjem eo, dapij buruum̧ eo kōn jon̄an wōt aō maron̄. Ke ij jino tōparļok ikar kōpeļļok kōjem eo, bao eo ekajju kelo̧k ilo anemkwoj.
Āinwōt bao in, jet iien jej mijak in lōke kōnke jejjab meļeļe iakwe eo ewāppen an Anij im kōņaan n̄an jipan kōj. Ak n̄e jej ekkatak kōn karōk eo an Jemedwōj ilan̄ im mijen eo an Jisōs Kraist, jenaaj meļeļe bwe un eo de eo ej m̧ōņōņō im wōnm̧aanļok eo ejjeļok jem̧ļo̧kin.13 Rej m̧ōņōņō n̄an jipan̄ n̄e jej kajjitōk, kapukōt, im kōļaļļaļ.14 N̄e jej kōmālmel e tōmak im kōttaik kōj n̄an uwaak ko Aer, jenaaj rōļo̧k jān pok in meļeļe im kōtmāne ko, im emaron̄ waļo̧k ial eo ļo̧k n̄an kōj.
Jisōs Kraist ej barāinwōt unjin aenōm̧m̧an in. Ej karuwaineneik kōj n̄an “atōrtōr ioon An kajoor”15 im kallim̧ur “aenōṃṃan … eo ej eḷḷā jān jeḷā otemjej,”16 juōn en̄jake eo ej itok n̄e Jetōb eo An “[Eaar kōnono] aenōm̧m̧an n̄an jetōb ko am”17 jekdoon ta menin māllijjon̄ ej kapooļ kōj. Men̄e rej apan̄ ko ad wōt, pok ko an baam̧le, ak jorrāān ko an jukjuk in pād, aenōm̧m̧an enaaj itok ilo ad tōmak ilo Nejin Anij emakewōt eo im ewōr an kajoor n̄an kaenōm̧m̧an ad.
Snjezana Podvinski, juon iaan Rikwojarjar ro an juon jar edik ilo Karlavac, Croatia, kar atartar ioon Rilo̧mo̧o̧r tōre eo ļeo pāleen im jinen im jemān rekar jako jiljino̧ allōn̄ remootļo̧k iiō eo ļo̧k. Burom̧ōj ekar ļap, ak kōn naan in kam̧ool eo ke baam̧le rej n̄an indeeo, ekar kōjerbal aolep an jāān n̄an etal n̄an tampeļ eo, ijo ekar liāp n̄an ļeo pāleen im jinen im jemān. Ekar kwaļo̧k bwe tōre kein rej jet iien ko rem̧m̧an tata ilo mour eo an. Kōn tōmak eo an edim ilo Jisōs Kraist im Pinmuur eo An, ekar en̄jake aenōm̧m̧āņ im en̄jake kōmour eo me ekar barāinwōt juon kajoor n̄an ro ipeļaakin.
Tōmak ilo Jisōs Kraist ej boktok eļapļo̧k menin letok ko jān kōmour im aenōm̧m̧an. Āinwōt an Būreejtōn Henry B. Eyring kar kwaļo̧k, “Ikar kam̧m̧oolol kōn elōn̄ wāween ko Irooj ekar lotok eō kōn Rikaenōm̧m̧an eo ke iaar aikuj aenōm̧m̧an. Aaet Jemed Ilan̄ ej inepata jab wōt kōn aenōm̧m̧an eo ad ak barāinwōt aaet eļapļo̧k kōn eddōkļo̧k eo ad m̧aanļo̧k.”18
Kōn Pinmuur eo an Jisōs Kraist, ekoba aolep menin letok ko an lo̧mo̧o̧r im jerkakpeje, jemaron̄ ukweļok, oktak, im wōnm̧aanļok ejjeļok jem̧ļokin eddōkļo̧k n̄an indeeo. Kōn kajoor eo Ej letok n̄an kōj ilo ad pokake, jemaron̄ erōm eļapļo̧k jān n̄e jān kar make ļo̧k iaad. Jemaron̄ jab meļeļe ekōjkan, ak kajjojo iaad em̧ōj ad en̄jake eddōkļok tōmak ilo Kraist em̧ōj an barāinwōt bōk eļapļok meļeļe kōn karōk im wōn lukkuun kōj, ej tōl ļo̧k kōj n̄an kōm̧m̧an kālet ko rejjejet n̄an jeļā in.
Ijjelokin ta eo laļ in ej kajjieon̄ no kōj laļ ļo̧k n̄an jon̄an “menin mour ko,”19 jeļā bwe Anij ej Jemed eo ej kōm̧m̧an bwe jen bōk aorōkid im kallim̧ur eo euteej. Ijjelokin ta eo laļ ej ba n̄an kōj ke mour in ewōr jem̧ļokin, jeļā bwe kōn Nejin Anij jitōn bōro Ekar kōm̧m̧an bwe ej pidodo n̄an kōj bwe jān pinmuur im jerkakpeje eo ej letok kōjatdikdik n̄an eddōkļo̧k eo ejjeļo̧k jem̧ļokin.
Ļoore Jisōs Kraist
Ilo ad katak eļapļok kōn Jisōs Kraist, jej kōļapļo̧k tōmak ilo E im jej kajju kōņaan ļoor e waanjon̄ak eo An. Kōjparok kien ko An ej jino eo an ikdeleel eo ad eļap. Būruōd ej kōņaan jipan̄ ro jet kōn en̄taan ko aer āinwōt An kar kōm̧m̧an, im jekōņaan bwe ren ioon aenōm̧m̧an im m̧ōņōņō eo epād ippād.
Etke kajjieon̄ kōm̧m̧ane āinwōt An kar kōm̧m̧an ellukkuun kajoor? Kōnke jej likūt ad tōmak n̄an kōm̧m̧an, Jetōb kwojarjar ej kam̧ool kōn m̧ool eo ejjeļok jem̧ļokin.20 Jisōs ekar ba n̄an rikaļoor ro an bwe ren kōjparok kien ko an kōnke Ejeļā bwe ilo ad ļoore jon̄ak eo An, jenaaj jino ad ioon lan̄lōn̄, im ilo ad wōnm̧aanļok ilo ial in An, jenaaj itok n̄an juōn lan̄lōn̄ eo eobrak. Ekar kōmeļeļe,“men kein ij ba n̄an kom̧, bwe aō lan̄lōn̄ en ped wōt ippami, im bwe am̧ lan̄lōn̄ en obrak.”21
Naan in kam̧ool ko ami rej ke ekkal ioon ejm̧aan eo an Jisōs Kraist im gospel eo An? N̄e lan̄ ko an mour in rej itok n̄an kōj, jej ke kōkairir im lale ekōjkan booke ak kajādede emejatoto n̄an jipan̄? Ilo ad kōm̧m̧an iien n̄an kalōke im kōkajoorļok jeļā ko ad im naan in kam̧ool eo kōn Jisōs Kraist enaaj ļap an ilo iien mālijjon̄ im apan̄ ko. Riiti jeje ko rekwojarjar aolep raan im kōļmenļo̧kjeņ kōn naan ko an rikanan ro; pād wōt am̧ jar ko eļap tojeer n̄an eok; kōļmenļo̧kjeņ kōn kwōjkwōj eo kajojo wiik; leļok jipan̄ āinwōt Rilo̧mo̧o̧r eo en kar—kajjojo iaan m̧akūtkūt kein rej ekkal dekā n̄an mour eo elem̧ōņōņō.
Ta ej boktok n̄an eok lan̄lōn̄? Paaktok in ro kwōj iakwe er ilo jem̧ļok juōn raan aetok? Anōm̧m̧an eo n̄e ej dedeļo̧k juōn jerbal em̧m̧an? Meram eo iloan mejān juon armej n̄e rej kwaļok edodo ko aer? Naan kein ilo juōn al ej un̄ur m̧ūlaļ in buruōm̧? Pein den̄den̄ eo an juōn m̧ōttam̧ epaake eok? Bōk juōn am̧ iien makeļok iaam̧ n̄an kōļmenļokjen kake kōjeram̧m̧an ko am̧, innām pukōt wāween ko n̄an kwaļoki. Ilo am̧ jipan̄ im kōkajoor ro jeiūm̧ im jatūm̧ itūrūm̧ ak ipeļaakin laļ in im eobrak kōn limo̧, kwonej en̄jake eļapļok aenōm̧m̧an im kōmour im barāinwōt eddōkļo̧k.
Itok n̄an Ippān. Ij kam̧ool bwe ilo am̧ likūt Jisōs Kraist n̄an io̧ļapļap in mour eo am̧, kwonaaj lo mōņōņō ilo iien ko reppen, jekdoon ta. Em̧ool, “E, wōt juōn,”22 ej uwaak eo. Kōm̧m̧an iien im bōk iien n̄an itok n̄an jeļā Jisōs Kraist jen ekkatak ko retiljek, eddōkļo̧k tōmak eļap ilo E, im wōnm̧aanļok n̄an erom̧ eļapļo̧k āinwōt E. Ilo ad kōm̧m̧ane men in, jenaaj barāinwōt em̧m̧akūt im ba, “Kōmij kam̧olol Anij kōn menin letok eo euteej Nejin Maan.”23 Ilo kōjeraam̧m̧an im āt eo ekwojarjar etan Jisōs Kraist, amen.