Kam̧ool eo Ekajoor an Anij: Bok in Mormon eo
Bok in Mormon eo ej kam̧ool eo an Anij ekajoor kōn kwojarjar eo an Jisōs Kraist, kūr in rikanaan eo an Josep Smith, im eļaptata m̧ool eo kōn Kabun̄ in.
Bok in Mormon eo ejjab wōt dōkā in jabōn em̧ eo an kabun̄ in ad, ak emaron̄ barāinwōt erom̧ dōkā in jabōn em̧ eo an naan in kam̧ool ko ad im n̄e kapo ko ak kajjitōk ko rejjan̄in uwaak rej jelm̧ae kōj, emaron̄ dāpij im kapen naan in kam̧ool ko ad. Bok in ej juon jon̄an eddo eo ej pād ioon kein baun ko an m̧ool me eddoļo̧k jān kobain aolep eddo ko an aolep kajjitōk ko an ro rejjab errā. Etke? Kōnke n̄e em̧ool, innām Josep Smith ekar juon rikanaan im en̄in ej jepļaaktok eo an Kabun̄ eo an Jisōs Kraist, mekarta jabdewōt bwebwenato ak kajjitōk ko n̄an jum̧ae in. Kōn un in, ro rej kōraat kōttōpar eo aer n̄an kariab Bok in Mormon, bōtaab kabbōjrak ko rej jelm̧ae rekanooj eļļap kōnke bok in ej m̧ool.
Kein kajuon, ro rej kōraat rej aikuj kōmeļeļeiki ekōjkan an Josep Smith, juon ļaddik eo 23 an iiō im ejabwe jeļāļo̧kjeņ ippān, kar kōm̧m̧ane juon bōk ewōr jibūki et im jikin ko rāinjuon, barāinwōt bwebwenato im m̧akūtkūt ko. Ilo wāween in, elōn̄ ro rej kōraat rej ļōm̧ake bwe ekar juon rimāletlet eo ejeļā jerbal eo ekar kōjerbal elōn̄ bok ko im kein jipan̄ ko jet n̄an an kōm̧m̧ane m̧ōttan ko an bwebwenato ko ilo Bok in Mormon eo. Ak oktak eo n̄an ļōmņak kein aer, ejjeļo̧k juon iaan kam̧ool kein rej ba ke rekar loe ippān Josep bok im kein jerbal kein m̧okta jān an ukook eo kar jjino.
Barāinwōt eļan̄n̄e naan in aer en kar m̧ool, en kar lukkuun nana im jabwe n̄an kōmeļeļeiki waļo̧k tok eo an Bok in Mormon eo. Juon ej aikuj barāinwōt uwaake kajjitōk in: ewi wāween an kar Josep riiti aolep bok kein rej eņoik kake, n̄an kadikļo̧k ļōmņak in, im dāpij m̧ōttan m̧ool ko āinwōt wōn eo ekar pād ilo jikin ta im n̄āāt, innām kwaļo̧k jān an maron̄ ememej? Bwe ke Josep Smith ekar ukōte, ekar ejjeļo̧k juon bok in jeje. Ilo m̧ool, kōrā eo pāleen Emma ekar kwaļo̧k: “Ejjeļo̧k juon peba barāinwōt bok n̄an riit jāne. … Eļan̄n̄e ekar lōn̄ jabdewōt men ippān en kar kwaļo̧ki im jab ņooji jān eō.”1
Kōn menin elmen an Josep kōm̧m̧ane juon jerbal eo ekabwilōn̄lōn̄ ilo an ellaajrak 500–im lōn̄ļo̧k peij ko an juon bok ilo an ejjeļo̧k note in jipan̄ ko? N̄an kōm̧m̧an āindein, emaron̄ kar aikuj jab āinwōt juon rimāletlet ejeļā jerbal ak barāinwōt em̧m̧an an maron̄ ememej pija ko. Ak n̄e menin em̧ool, etke ro rej jab errā rejjab kōnono kōn kabāāl in an ekabwilōn̄lōn̄?
Bōtaab ewōr juon men eļapļo̧k. Kajjitōk kein rej wōt n̄an m̧ōttan wōt bwebwenato in bok in. Lukkuun kajjitōk rej pād wōt: ewi wāween an kar Josep kōm̧m̧ane juon bok me ej kwaļo̧k kōn Jetōb eo, im ia eo ekar bōk kain katak kein reļļap, elōn̄ iaan men kein rej kalikkar ak roktak jān tōmak ko an Rikūrijin ro ilo tōre eo an?
N̄an waanjon̄ak, Bok in Mormon eo ej katakin, oktak n̄an enan̄in aolep tōmak an Rikūrijin, bwe Wōtlo̧k eo an Adam ekar juon bun̄tōn eo em̧m̧an. Ej kwaļo̧k bujen ko kar kōm̧m̧ani ilo peptaij, ko rej jab kwaļo̧k ilo Baibōļ eo.
Ilo kakkobaba, juon emaron̄ kajjitōk: ia eo Josep ekar bōk kajoor in ļōmņak in me bwe kōn Pinmuur eo an Kraist, E emaron̄ wōt karreoik kōj ak barāinwōt kōwāppen kōj? Ia eo ekar bōk kwaļo̧k in ekabwilōn̄lōn̄ kōn tōmak ilo Alma 32? Ak kwaļo̧k eo an Kiin̄ Benjamin kōn Pinmuur eo an Rilo̧mo̧o̧r eo, bōlen ej kwaļo̧k eo ekabwilōn̄lōn̄ tata kōn unin kōnono in ilo aolep jeje ko rekwojarjar. Ak bwebwenato eo kōn wōjke olive eo kōn an pen im kobwe katak ie? Ke iaar riiti bwebwenato in, ikar likūt ilo māp n̄an aō ļoor meļeļe ko ie. Kiiō jej ke ba jej tōmak bwe Josep Smith ekar baj kōllaajrak katakin jān kōļmenļo̧kjeņ eo an ilo an ejjeļo̧k note?
Oktak eo n̄an kain jem̧ļo̧k in, annan̄in pein Anij rej aolep pād ilo Bok in Mormon eo, āinwōt kar kam̧ool jān m̧ool in katak ko, eļaptata katak ko an juon armej emāletlet kōn Pinmuur eo an Jesus Christ.
N̄e Josep en kar jab juon rikanaan, innām bwe en maron̄ jeje men kein im elōn̄ katak ko rekabwilōn̄lōn̄, ro rej kōraat rej aikuj kōm̧m̧an kajjitōk ko me ekar barāinwōt juon rimāletlet katak im tōmak an kabun̄. Ak n̄e ekar jekjek eo in, juon ej aikuj kajjitōk: etke Josep ekar e wōt ilowaan 1,800 iiō ālkin ankwaļo̧k eo an Kraist n̄an kōm̧m̧an kain katak rot in rekaitoktok limo im ralikkar? Kōnke ekar juon revelesōn, jab māletlet, ekar jipan̄ eo an bok in.
Ak men̄e jej ba bwe Josep ekar juon rimāletlet eo ejeļā katak ko an kabun̄ kōn an maron̄ ememej pija—kapāāl kein make rejjab maron̄ kōm̧m̧an bwe juon rijeje eo en kapāāl. N̄an kōmeļeļein waļo̧ktok eo an Bok in Mormon eo, ro rejjab errā rej aikuj bar ba bwe Josep ekar juon eo ekar ļotak im jeļā āinwōt rijeje ke ej 23 an iiō. N̄e ejjab, ewi wāween an kar kobaiki jon̄an āt, jikin, im m̧akūtkūt ko n̄an aolepān ilo an ejjeļo̧k naan ko rebōd. Ewi wāween an kar kōmeļeļe ilo jeje tariņae ko, ejaaki katak ko rem̧ool, im loi naan kein rej aorōk, im aikuj kakilōklōki, kouti, im likūti ioon aijbook ko jān milien armej ro, naan ko āinwōt, “Bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.” (Mosaia 2:17ak “Armej ren kar āinwōt, bwe ren maron̄ m̧ōņōņō” (2 Nipaii 2:25 Ennaan kein ewōr kajoor ie—ennaan kein n̄an mour im menono im im̧we. N̄an ba bwe Josep Smith ilo 23 iiō dettan eaar bōk kapeel ko remenin aikuj n̄an je jerbal in juon alen je eļap ilo jon̄an in 65 raan ko ejum̧ae aolep m̧ool ko an mour in.
Būreejtōn Russell M. Nelson, juon eo eminene im ejeļā jeje, ekar kwaļo̧k bwe ekar bar je juon an kōnono n̄an kweilo̧k eo eļap 40 kōttōn. Kiiō jej ke tōmak bwe Josep Smith, kōn e make, ekar je aolepān Bok in Mormon eo juon wōt alen ilo an jejjo wōt bōd in kūram̧a ko rekar ukōti tokālik?
Kōrā eo pāleen Josep Emma ekar kapen wāween eo epen an kain kijejeto in: “Josep Smith [āinwōt juon likao) ekar jab maron̄ jeje barāinwōt kean̄ e juon leta eo em̧m̧an im em̧m̧an kar je; make iaan [kean̄] juon bwe en je juon bok āinwōt Bok in Mormon eo.”2
Im āliktata, men̄e juon enej errā kōn aolep kajjitōk ko ebōjrak kōnono kaki, ko rejjab m̧ool āinwōt aer jab, ro rejjab errā renej wōt jelm̧ae bar juon kapan̄pan̄ eo ej waļo̧k. Josep ekar ba bwe Bok in Mormon eo kar jeje ioon pileej kooļ ko. Jān wāween in ekar waļo̧k eļap kōnana ko ilo tōre eo an—n̄an “aolep” rekar jeļā bwe bwebwenato ko etto rekar jeje ioon papyrus juon wōjke ak peba, m̧ae iien iiō ko tokālik, ke pileej metal ko ewōr jeje ko etto ie kar loi. Ilo kakkobaba, ro rejjab errā rekar ba bwe kōjerbal jimāān, āinwōt an kōmeļeļe ilo Bok in Mormon eo, ekar jab juon kapāāl an ņakņōk rein etto ilo Amedka—m̧ae iien em̧ jimāān kein rekar loi etto ilo Amedka. Ewi wāween an rein rejjab errā kiiō kōmeļeļeiki men kein im ko jet em̧ōj loi rej āinwōt men kein? Josep, kwoj loe, aikuj kar juon eo elukkuun jejjet im jim̧we, an anto̧o̧n. Ilo juon wāween, mekarta aolep anto̧o̧n kein an rekar lukkuun jejjet, keidi n̄an aolep jeļāļo̧kjeņ an scientist im ko katak kaki, anto̧o̧n ko an rekar jim̧we im ko an ro jet rekar bōd.
Ālkin kōļmenļo̧kjeņ kōn men kein aolep, juon emaron̄ ba ewi wāween an juon armej maron̄ tōmak aolep men kein rem̧ool im kajoor kōnono kaki, āinwōt ļōm̧aki tok jān ro rejjab errā, ilo wāween jab in me ekamaron̄ n̄an an Josep je Bok in Mormon eo im ejaake juon jerbal in mo̧ņ. Ak ewi wāween an alikkar menin? Ilo juon oktak eo ekaju n̄an kain m̧ool rot in, bok in em̧ōj an im̧we milien armej ro rej dike Setan im kiiō rej mour āinwōt Kraist.
Men̄e juon armej emaron̄ kālet n̄an tōmak kōmeļeļe ko an ro rejjab errā, ej, n̄an n̄a, tōmak armej rein eban letok jeļāļo̧kjeņ im eddōkļo̧k ilo jetōb. N̄an kōmeļeļe kein an rein rejjab errā, inaaj kar aikuj bōk kōmālim eo enej kar itok ālkin bar juon. Ilo kakkobaba, inaaj kar aikuj jab kautiej naan in kam̧ool eo an aolep Rikam̧ool ro 11 ,3 men̄e kajjojo iaer rekar m̧ool wōt n̄an naan in kam̧ool eo an n̄an jem̧ļo̧kin; inaaj kar aikuj in jab kautieje katak ko rekwojarjar me rej kobrak peij im bar peij in bok ko rekwojarjar kōn m̧ool ko aer rekajoor; inaaj kar iakuj in kōjekdo̧o̧n m̧ool bwe jarlepju ro, ekoba n̄a, ro rekar epaaketok Anij jān aer riiti bok in jān jabdewōt bok ko jet, im ilōn̄ in men otemjej, inaaj kar aikuj kariab unoojdikdik eo an Jetōb Kwojarjar. Menin enaaj kar jum̧ae men otemjej ko ijeļā ke rem̧ool.
Juon iaan ro m̧ōtta em̧m̧an im māletlet ekar etal jān Kabun̄ ilo juon iien. Ekar jejetok n̄an n̄a kōn ro̧o̧ltok eo an: “Moktata, ikōņaan bwe Bok in Mormon eo en kwaļo̧k n̄an n̄a bwebwenatoon, ijo jikin, kajin eo, im m̧anit eo ie. Ak ke ikar ukōt aō kalimjōke n̄an ta eo ej katakin kōn gospel eo an Jisōs Kraist im jerbal in lo̧mo̧o̧r eo An, ikar jino bōk juon naan in kam̧ool kōn m̧ool ko an. Juon raan ke ikar riiti Bok in Mormon eo ilo ruum̧ eo aō, ikar bōjrak jidik im bukwelōlō im kar jar kōn juon bōro em̧ool im en̄jake ealikkar bwe Jemedwōj Ilan̄ ekar unoojdikdik n̄an jetōb eo aō bwe Kabun̄ in im Bok in Mormon eo eļap aer m̧ool. Iiō ko jilu im jimettan in aō ekkatak kōn Kabun̄ in rekar lukkuun karreļo̧k eō im kareel eō n̄an m̧ool ko an.”
N̄e juon enaaj bōk juon iien n̄an ettā riiti im kejōkļo̧kjeņ kōn Bok in Mormon eo, āinwōt in m̧ōtta, im leļo̧k lo̧jiln̄in n̄an leen ko rem̧m̧an an Jetōb eo, innām enaaj bōk kam̧ool eo ej aikuji.
Bok in Mormon eo ej juon iaan mennin letok ko an Anij n̄an kōj ejjeļo̧k wōņāān. Ej jim̧or juon jāje im juon pālpel—ej jilkinļo̧k naan ko an Anij n̄an tariņae n̄an ire n̄an bōro ko juon im ej jerbal āinwōt juon kein jojom̧ar an m̧ool eo. Āinwōt Armej ro Rekwojarjar, ejjab wōt wōr ad jeraam̧m̧an n̄an jojom̧are Bok in Mormon eo barāinwōt ewōr ad iien n̄an kōjerbale—n̄an kwaļo̧k kōn kajoor in katak ko an rekwojarjar im kwaļo̧k naan in kam̧ool ko kam̧ool in nōbar eo an Jisōs Kraist.
Ij kwaļo̧k aō naan in kam̧ool bwe Bok in Mormon eo ekar ukook jān mennin letok eo im kajoor an Anij. Ej kam̧ool eo an Anij ekajoor kōn kwojarjar eo an Jisōs Kraist, kūr in rikanaan eo an Josep Smith, im eļaptata m̧ool eo kōn Kabun̄ in. Kōm̧m̧an bwe en erom̧ dōkā in jabōn em̧ an naan in kam̧ool ko ad, bwe emaron̄ bar n̄an kōj, āinwōt an Rilemen ro kar oktak, rekar “jāmin raar bun.”(Alma 23:6 Ilo etan Jisōs Kraist, amen.