27 Fēpueli

Ko e Hā ʻOku Mahuʻinga ai ʻa e Mali Taʻengatá?

Sēnesi 24–27

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi kaveinga kuo aleaʻi ʻe he kau pīsopelikí ʻi heʻetau fakataha alēlea fakauooti ʻa e toʻu tupú? Ko e hā ha meʻa ʻe lava ke tau fakahoko fakakalasi pe fakakōlomu ʻo makatuʻunga ʻi he ngaahi fealeaʻaki ko iá?

• Tokanga kiate kinautolu ʻoku faingataʻaʻiá. Te tau tokoniʻi fēfē nai ʻa e kakaí ʻi ha ngaahi founga faka-Kalaisi ʻi he taimi ʻoku tau vakai ai ki ha fiemaʻu ka ʻoku ʻikai ke tau ʻilo ʻa e meʻa ke lea ʻakí?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha meʻa kuo tau maʻu ʻi he ongoongolelei ʻo Sīsū Kalaisí ʻokú ne ʻomi ʻa e fiefiá? Te tau lava fēfē nai ke vahevahe ʻa e fiefia ko iá mo e niʻihi kehé?

• Fakatahaʻi ʻa e ngaahi fāmilí ke taʻengata. Ko e hā ha meʻa ʻoku tau fakahoko ke fekumi ai ki he ngaahi hingoa ʻo ʻetau ngaahi kui ʻoku nau fie maʻu ʻa e ngaahi ouau fakatemipalé? Ko e hā ha meʻa ʻe lava ke tau fakahoko ke tokoni ai ki he niʻihi kehé ke nau fekumi ki he ngaahi hingoa ʻo ʻenau ngaahi kuí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga ʻo e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻI he hokosia e taimi ke mali ai ʻa ʻAisaké, naʻe kole ʻe ʻĒpalahame ki heʻene tamaioʻeikí ke kumi mai ha uaifi moʻo ʻAisake. Naʻe loto ʻa ʻĒpalahame mo ʻAisake ke kumi ha uaifi moʻo ʻAisake ʻa ia ʻe lava ke ne fakahoko mo tauhi ʻa e ngaahi fuakava mo e ʻEikí pea akoʻi kinautolu ki heʻene fānaú. Ko Lepeka ʻa e fefine angatonu naʻe mali ʻi he fuakavá mo ʻAisaké. Neongo ʻoku fakamahinoʻi ʻi he folofolá ʻoku mahuʻinga fau ʻa e nofomalí ki he ʻOtuá, ka ʻoku poleʻi ʻa e ngaahi akonaki ʻa e ʻOtuá fekauʻaki mo e nofomalí ʻi hotau kuongá. Ka kuo talaki ʻe Heʻene kau palōfitá ko e nofomalí ʻoku “tuʻutuʻuni ia ʻe he ʻOtuá” (“Ko e Fāmilí: Ko ha Fanongonongo ki Māmani,” ChurchofJesusChrist.org). ʻOku mahuʻinga ke mahino kiate kinautolu ʻokú ke akoʻí ʻa e ngaahi moʻoni taʻengata fekauʻaki mo e nofomalí. ʻE tokoni ʻa hono fakahoko iá ke nau mateuteu ai ke fakamoʻoni ki he konga mahuʻinga ko ʻeni ʻo e palani ʻa ʻetau Tamai Hēvaní.

Ko e hā e ongo ʻoku maʻu ʻe he toʻu tupu ʻokú ke akoʻí fekauʻaki mo e mali taʻengatá? Te ke tokoniʻi fēfē nai kinautolu ke nau fakakaukau ki he ʻuhinga ʻoku mahuʻinga ai ʻa e mali taʻengatá ki he palani ʻa e Tamai Hēvaní? ʻI hoʻo teuteu ke faiakó, te ke lava ʻo toe lau ʻa e pōpoaki ʻa ʻEletā D. Todd Christofferson ko e “ʻUhinga ʻo e Malí, ʻUhinga ʻo e Fāmilí” (Liahona, Mē 2015, 50–53). Te ke lava foki ʻo toe lau ʻa e “Ko e Fāmilí: Ko ha Fanongonongo ki Māmani” (ChurchofJesusChrist.org).

Ko e mali taʻengatá mo e fāmilí ʻa e uho ʻo e palani ʻa e Tamai Hēvaní.

Ako Fakataha

Mahalo ne fakalaulauloto ʻa e toʻu tupu ʻokú ke akoʻí ki hono mahuʻinga ʻo e nofomalí ʻi heʻenau lau ʻa e Sēnesi 24–27 he uike ní. Fakaafeʻi ke nau toe lau ʻa e Sēnesi 24. Kole ange ke nau vahevahe ha ngaahi veesi ʻoku fakahaaʻi ai naʻe mahuʻinga ʻa e nofomalí ki he kakai ʻoku fakamatalaʻi ʻi he vahe ko ʻení. Fakaafeʻi ke nau fakakaukau ki he ʻuhinga ʻoku mahuʻinga ai ʻa e mali taʻengatá ki he palani ʻa e ʻOtuá. ʻE ala tokoni ʻa e ngaahi ʻekitivitī ko ʻení ke mahino lelei ange kiate kinautolu ʻa hono mahuʻinga ʻo e nofomalí.

• Mahalo kuo maʻu ʻe he kau mēmipa ʻo hoʻo kalasí pe kōlomú ha ngaahi faingamālie ke fakamatalaʻi ʻa e ʻuhinga ʻoku mahuʻinga ai ʻa e nofomalí kiate kinautolú. Fakaafeʻi ke nau fakakaukauloto ʻoku ʻi ai honau kaungāmeʻa ʻoku tui kuo ʻosi e kuonga ʻo e malí pea ʻoku ʻikai hano ʻaonga. ʻE lava ke nau fakahoko ha kiʻi tohi ki he kaungāmeʻa ko ʻení ʻo fakamatalaʻi ʻa hono mahuʻinga ʻo e malí ki he palani ʻa e Tamai Hēvaní. Poupouʻi ke nau fakakau ʻa e ngaahi moʻoni ʻoku nau maʻu ʻi he “Ko e Fāmilí: Ko ha Fanongonongo ki Māmani.” Te nau lava foki ʻo fakaʻaongaʻi ʻa e ngaahi potufolofola ʻoku hā ʻi he “Ngaahi Maʻuʻanga Tokoni Poupoú” pe ʻi he “Malí” ʻi he Fakahinohino ki he Ngaahi Folofolá (scriptures.ChurchofJesusChrist.org). Fakaafeʻi ke nau vahevahe mo e kalasí ʻa e meʻa ne nau tohí.

• Ke kamata ha fealeaʻaki fekauʻaki mo hono mahuʻinga ʻo e nofomalí, hiki ʻi he palakipoé Ko e hā ʻoku mahuʻinga ai ʻa e mali taʻengatá? Tuku ha kiʻi taimi maʻá e toʻu tupú ke nau hiki ha ngaahi tali ki he fehuʻí. Hili iá pea fakaafeʻi leva ke nau vahevahe ʻenau ngaahi talí. ʻE lava ke nau fekumi ki ha ngaahi tali lahi ange ʻi he lea ʻa ʻEletā D. Todd Christofferson ko e “ʻUhinga ʻo e Malí, ʻUhinga ʻo e Fāmilí” (Liahona, Mē 2015, 50–53).   Fakaafeʻi ke nau vahevahe ʻenau fakamoʻoni ki he ʻuhinga ʻoku mahuʻinga ai ʻa e nofomalí.

• ʻI heʻetau tali ʻa e ngaahi akonaki ʻa e ʻOtuá fekauʻaki mo e nofomalí pea faifeinga ke moʻui ʻaki iá, ʻoku tau maʻu ai ha ngaahi tāpuaki lahi. Ka ʻoku fehangahangai ha kakai ʻe niʻihi—ʻo kau ai ʻa kinautolu ʻoku nau fakahoko honau lelei tahá ke moʻui ʻaki e ongoongoleleí—mo ha ngaahi faingataʻa ʻi heʻenau fakahoko ha nofomali ʻoku fiefia mo taʻengatá. Te ke lava ʻo kole ki he toʻu tupú ke talanoa fekauʻaki mo e ngaahi faingataʻa ko iá. Ko e hā te tau lava ʻo fakahoko he taimí ni ke teuteu ai ki he ngaahi faingataʻa peheé? Te ke lava foki ʻo fakaafeʻi ke nau lau ʻa e konga fakaʻosi ʻe ua ʻo e lea ʻa ʻEletā Neil L. Andersen “Ko e Vakai Atu ʻi he Tuí” (Liahona, Mē 2019, 34–38). ʻE lava ke aleaʻi ʻe he kau mēmipa ʻo hoʻo kalasí pe kōlomú ʻa e ngaahi sīpinga kuo nau mātā ʻi heʻenau moʻuí pe ko ʻenau hisitōlia fakafāmilí ʻo ha kakai ne nau fefaʻuhi faivelenga mo e ngaahi faingataʻá hangē ko ia ne fakamatalaʻi ʻe ʻEletā ʻEnitasoní. ʻE tokoniʻi fēfē nai ʻe he Fakamoʻuí ʻa kinautolu kotoa pē ʻoku fehangahangai mo e ngaahi faingataʻá ʻi heʻenau fekumi ki he ngaahi tāpuaki ʻo e mali taʻengatá?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Tokāteline mo e Ngaahi Fuakava 49:16–17 (ʻOku tokoni ʻa e nofomalí ke fakahoko ʻa e taumuʻa ʻo e Fakatupú)

• Tokāteline mo e Ngaahi Fuakava 131:1–4; 132:15–21 (ʻOku fie maʻu ʻa e mali taʻengatá ki he hakeakiʻí)

Ko e Faiako ʻi he Founga ʻa e Fakamoʻuí

Naʻe fakaafeʻi ʻe he Fakamoʻuí ʻEne kau ākongá ke nau ngāue ʻi he tui mo moʻui ʻaki ʻa e ngaahi moʻoni naʻá Ne akoʻí. Te ke fakaafeʻi fēfē nai ʻa e niʻihi ʻokú ke akoʻí ke nau moʻui ʻaki e ngaahi moʻoni ʻoku nau akó?