malimali ha kau talavou

13 Māʻasi

Te U Tali Fēfē Nai ʻa e Faingataʻá ʻi he Tuí?

Sēnesi 37–41

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Kuo tau mātā fēfē nai ʻa e toʻukupu ʻo e ʻEikí ʻi heʻetau moʻuí?

• Tokanga kiate kinautolu ʻoku faingataʻaʻiá. Te tau lava fēfē nai ʻo fetokoniʻaki ʻi he ngaahi meʻa ʻoku tau fouá?

• Fakaafeʻi ʻa e tokotaha kotoa pē ke nau maʻu ʻa e ongoongoleleí. Te tau fakaʻaongaʻi lelei ange fēfē nai ʻa e tekinolosiá ko ha meʻangāue ke vahevahe ai ʻa e ongoongoleleí?

• Fakatahaʻi ʻa e ngaahi fāmilí ke taʻengata. Ko e hā e meʻa ʻoku tau fakahoko ke tokoni ki hotau ngaahi fāmilí ke nau haʻu kia Kalaisí?

ʻI he fakaʻosinga ʻo e lēsoní, fakahoko ʻa e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palaní mo e fakaafe naʻe fakahoko ʻi he lolotonga ʻo e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻI he kei talavou ʻa Siosefa ʻo ʻIsipité, naʻá ne fekuki mo ha ngaahi faingataʻa kehekehe. Naʻá ne fehangahangai mo e fakafepaki mei hono fāmilí pea naʻe ngaohikovia ia ʻe hono ngaahi tokouá. Naʻe ʻahiʻahiʻi ia ke ne maumauʻi e fono ʻo e angamaʻá. Ka naʻe ʻikai ke fakaʻapaʻapaʻi ia ʻi heʻene faitotonú, he naʻe lī ia ki he fale fakapōpulá. Mahalo ʻoku fehangahangai e kau mēmipa ʻo hoʻo kalasí pe kōlomú mo ha faingataʻa tatau pea mo ha ngaahi faingataʻa kehe pē. ʻI hoʻo ako e ngaahi aʻusia ʻa Siosefa ʻi he Sēnesi 37–41, fakakaukau ki he niʻihi ʻokú ke akoʻí. Fakalaulauloto pe ko e hā e ngaahi lēsoni mahuʻinga maʻanautolu mei he moʻui ʻa Siosefá (vakai foki, ʻEta 12:27; Henry B. Eyring, “Feinga, Feinga, Feinga,” Liahona, Nōvema 2018, 90–93). ʻE ala fakalotoa ʻe he talanoa ʻo Siosefá ʻa e kau mēmipa ʻo e kalasí pe kōlomú ke nau fehuʻi, “Te u tali fēfē nai hoku ngaahi faingataʻá ʻaki ʻa e tuí, pea ʻe tokoniʻi fēfē nai au ʻe he ʻOtuá?”

kalasi ʻa e kau finemuí

ʻE lava ke tau maʻu ha mālohi ʻi hotau ngaahi faingataʻá ʻaki ʻetau tokanga taha ki heʻetau tui kia Sīsū Kalaisí,

Ako Fakataha

Fakakaukau ke kole ki he kau mēmipa ʻo e kalasí pe kōlomú ke nau hiki ʻi he palakipoé ha niʻihi ʻo e ngaahi meʻa ne hoko mei he moʻui ʻa Siosefa ʻo ʻIsipité, ʻo hangē ko ia ʻoku fakamatalaʻi ʻi he Sēnesí 37 mo e 39–41. ʻE ala tokoni ke fakaʻaliʻali ha niʻihi ʻo e ʻū fakatātā, hangē ko ia ʻoku hā ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, ke nau manatuʻi ʻa e ngaahi meʻa ko ʻeni ne hokó. ʻOku faitatau fēfē nai ʻa e ngaahi faingataʻa ʻo Siosefá mo e ngaahi pole ʻoku fehangahangai mo e toʻu tupú he ʻaho ní? Kapau naʻe moʻui ʻa Siosefa he taimí ni, ko e hā nai ha faleʻi te ne ʻomi kiate kitautolu fekauʻaki mo hono tali e faingataʻá? Ko e hā nai ha meʻa te ne talamai fekauʻaki mo e founga ne tokoniʻi ai ia ʻe hono vā fetuʻutaki mo e ʻEikí? Fakaʻaongaʻi ha ngaahi ʻekitivitī hangē ko ʻení ke tokoni ki he toʻu tupú ke nau fakakaukau ki he founga ʻe lava ke nau tali ʻaki ʻa honau ngaahi faingataʻá ʻa e tui kia Sīsū Kalaisí

• ʻE lava ke tokoni ʻa hono ako e founga ne tali ʻaki ʻe he Fakamoʻuí ʻa e faingataʻá, ke tau fehangahangai mo hotau ngaahi faingataʻá ʻi he tui. ʻE ala fokotuʻu atu ʻe he toʻu tupú ha ngaahi sīpinga ʻe niʻihi ʻo e faingataʻa ne fehangahangai mo e Fakamoʻuí pea mou toe vakaiʻi fakataha ia (vakai, “Ngaahi Maʻuʻanga Tokoni Poupoú” ki ha ngaahi fakakaukau). Ko e hā e meʻa ʻoku tau saiʻia ai fekauʻaki mo e founga ne tali ʻaki ʻe he Fakamoʻuí ʻa Hono ngaahi taimi faingataʻá? Te tau lava fēfē nai ke muimui ki Heʻene tā sīpingá ʻi heʻetau fehangahangai mo e faingataʻá?

• Ko e taimi ʻe niʻihi ʻoku faingofua ange ke tali ʻa e faingataʻá ʻi he taimi ʻoku tau feinga ai ke vakai ki ai mei he tafaʻaki ʻa e ʻEikí. Ke tokoni ke mahino ki he niʻihi ʻokú ke akoʻí ʻa e meʻá ni, kole ange ke nau kumi ha ngaahi sīpinga ʻe lava ke fakahoko ʻe he kehekehe ko iá ʻaki hono toe vakaiʻi ʻa e pōpoaki ʻa ʻEletā Rafael E. Pino “Ko e Tafaʻaki Taʻengata ʻo e Ongoongoleleí” (Liahona, Mē 2015, 117–19). Fakaafeʻi ke nau vahevahe ʻa e meʻa ne nau maʻú. Ko e hā e meʻa ʻoku fokotuʻu mai ʻe he ngaahi sīpinga ko ʻení fekauʻaki mo e founga ʻe lava ke tau fakakaukau mo tali ʻaki hotau ngaahi faingataʻá? Kapau ʻe lava ke tau fefolofolai mo e Fakamoʻuí fekauʻaki mo hotau ngaahi faingataʻá, ko e hā nai e meʻa ʻoku tau fakakaukau te Ne folofola mai ʻakí? Ke tokoni ke tali ʻa e fehuʻi ko ʻení, ʻe lava ke lau ʻe he toʻu tupú ʻa e ngaahi potufolofola ʻi he “Ngaahi Maʻuʻanga Tokoni Poupoú.”

• Fakakaukau ke kole ki he toʻu tupú ke nau vahevahe ha sīpinga ʻo ha taha (mahalo ko haʻanau kui) naʻa nau saiʻia ʻi he founga naʻá ne fehangahangai ai mo ha ʻahiʻahi faingataʻa. Pe te ke vahevahe ha ngaahi sīpinga fakalaumālie ʻo ha kakai ʻokú ke ʻiloʻi. ʻOku faʻa kau ʻi he ngaahi pōpoaki ʻo e konifelenisi lahí ha ngaahi talanoa ʻo ha kakai ʻoku nau tali e faingataʻá ʻaki ʻa e tuí (ki ha ngaahi sīpinga, vakai, “Ngaahi Maʻuʻanga Tokoni Poupoú”). Fakakaukau pe ko e hā ha meʻa ʻe lava ke ke vahevahe mei he ngaahi pōpoaki peheé ʻe ala ʻuhingamālie ki he niʻihi ʻokú ke akoʻí. ʻI hoʻomou aleaʻi fakataha e ngaahi sīpinga ko ʻení, fokotuʻu ange ke tukutaha e tokanga ʻa e kau mēmipa ʻo e kalasí pe kōlomú ʻi he founga naʻe tokoni ai ʻa e tui kia Sīsū Kalaisí ki he kakaí lolotonga honau ngaahi faingataʻá. Te ke lava foki ʻo vahevahe ʻa e lisi ʻa Pīsope W. Christopher Waddell ki he ngaahi maʻuʻanga tokoni kuo ʻomi ʻe he ʻEikí ke tokoniʻi kitautolu ʻi hotau ngaahi faingataʻá, ʻa ia ʻoku hā ʻi he fakaʻosinga ʻo ʻene pōpoakí “Tafoki ki he ʻEikí” (Liahona, Nōvema 2017, 94–96).

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 4:1–11 (Naʻe maʻu ʻe he Fakamoʻuí ʻa e tuí lolotonga e faingataʻá)

• Mātiu 14:10–21; Luke 23:33–34; Sione 19:25–27 (Naʻe tokoniʻi ʻe he Fakamoʻuí ʻa e niʻihi kehé lolotonga ʻEne faingataʻaʻiá)

• Mātiu 27:45–46; Luke 23:44–46 (Naʻe ongoʻi tuenoa ʻa e Fakamoʻuí ʻi he lolotonga e faingataʻá ka naʻá Ne falala ki he ʻOtuá)

• Mātiu 5:38–45; Mōsaia 24:8–15; Tokāteline mo e Ngaahi Fuakava 121:1–8; 122:5–9 (Ko e ngaahi akonaki ʻa e Fakamoʻuí fekauʻaki mo e fehangahangai mo e faingataʻá)

• Neil L. Andersen, “Kuo Kafo,” Liahona, Nōvema 2018, 83–86

• L. Todd Budge, “Falala Maʻu Pē mo Vilitaki,” Liahona, Nōvema 2019, 47–49

• Jean B. Bingham, “Ke Kakato Ai Hoʻomou Fiefiá,” Liahona, Nōvema 2017, 85–87

Ko e Faiako ʻi he Founga ʻa e Fakamoʻuí

“ʻI he lolotonga hoʻo teuteú, tuku ke tākiekina hoʻo palaní ʻe he mahino ʻokú ke maʻu ki he kakai ʻokú ke akoʻí” (Ko e Faiako ʻi he Founga ʻa e Fakamoʻuí, 7). Hangē ko ʻení, palani ʻi he faʻa lotu ʻa e ngaahi ʻekitivitií ʻo fakaʻaongaʻi ʻa e ngaahi folofolá mo e ngaahi maʻuʻanga tokoni kehe ʻe ala tokoni ki he ngaahi faingataʻa ʻoku fehangahangai mo e kau mēmipa ʻo e kalasí pe kōlomú.