27 Māʻasi

Ko Hai Nai Au, pea Ko Hai ʻOku Finangalo ʻa e ʻOtuá Ke U Hoko ki Aí?

ʻEkesōtosi 1–6

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hākeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e founga ʻoku tau maʻu ai ʻa e fiefiá ʻi he muimui kia Sīsū Kalaisí?

• Tokanga kiate kinautolu ʻoku faingataʻaʻiá. Ko hai nai ʻi hotau uōtí pe tukui koló ʻokú ne fie maʻu ʻetau tokoní? Ko e hā ha founga te tau lava ai ʻo tokoni?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fetokoniʻaki fēfē ke mateuteu ki he ngāue fakafaifekaú?

• Fakatahaʻi ʻa e ngaahi fāmilí ke taʻengata. Te tau tokoni fēfē ki he ngaahi ngāue ʻa hotau uōtí ke fakahoko ʻa e hisitōlia fakafāmilí mo e ngāue fakatemipalé?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Naʻe fakaholomamata ʻa e vakai ki ha fuʻu ʻakau ʻoku vela ka ʻoku ʻikai keina ʻe he afí, pea naʻá ne toʻoa ʻa e tokanga ʻa Mōsesé. Ka ko e meʻa naʻe mālie angé ʻa e meʻa ne hoko atu aí. Naʻe folofola ʻa e ʻOtuá kia Mōsese, pea naʻe ako ʻa Mōsese ke ne sio kiate ia ʻi he founga ne ʻafio ai ʻa e ʻOtuá kiate iá. ʻI he fakakaukau ko iá, ne aʻusia ʻe Mōsese ha meʻa ʻi he tokoni ʻa e ʻEikí ʻa ia naʻá ne fakakaukau ʻe taʻemalava: naʻá ne talanoa hangatonu mo Felo pea fakahaofi e kakai ʻa e ʻOtuá.

ʻOku tau fie maʻu kotoa pē ha ngaahi aʻusia ʻoku nau tokoniʻi kitautolu ke tau fetongi ʻa e veiveiua ʻiate kitá ʻaki e mahino ʻa e ʻOtuá ki hotau tuʻungá mo e tokotaha te tau lava ʻo hoko ki aí. ʻOku tautautefito ki he kakai kei talavoú ʻa ʻenau fehangahangai mo e ngaahi pōpoaki hala fekauʻaki mo honau mahuʻinga fakatāutahá. Pea hangē ko Mōsesé, ʻoku maʻu ʻe he ʻOtuá “ha ngāue [maʻanautolu] ke fakahoko” (Kaveinga ʻo e Kōlomu ʻo e Lakanga Taulaʻeiki Faka-ʻĒloné). ʻOku ʻi ai haʻanau kau Felo ke fehangahangai mo kinautolu mo haʻanau kakai ke fakahaofi. Te ke tokoniʻi fēfē nai kinautolu ke nau manatuʻi ko e ngaahi ʻofefine mo e ngaahi foha ʻofeina kinautolu ʻo ha ongomātuʻa fakalangi “mo ha natula faka-ʻOtua mo e ikuʻanga taʻengata”? (Kaveinga ʻo e Kau Finemuí). Fakalaulauloto ki heni ʻi hoʻo lau ʻa e ʻEkesōtosi 1–6. Fakakaukau foki ke ako ʻa e Tokāteline mo e Ngaahi Fuakava 18:10–15 mo e pōpoaki ʻa Palesiteni Dieter F. Uchtdorf “ʻOkú ke Mahuʻinga Kiate Ia” (Liahona, Nōvema 2011, 19–22).

ʻE lava ke liliu ʻetau moʻuí ʻi he taimi ʻoku mahino ai kiate kitautolu hotau tuʻunga totonu ko e fānau ʻa e ʻOtuá.

Ako Fakataha

Mahalo naʻe lau ʻe he kau mēmipa ʻo hoʻo kalasí ʻa e ʻEkesōtosi 1–6 he uiké ni. Ke ueʻi kinautolu ke nau vahevahe ʻa e meʻa ne nau akó, te ke lava ʻo fehuʻi ange pe naʻe ongoʻi fēfē nai ʻe Mōsese hono uiuiʻi ia ke fakahaofi ʻa e fānau ʻIsilelí (vakai, ʻEkesōtosi 3:11). Ko e hā ha ngaahi moʻoni naʻe akoʻi ʻe he ʻEikí kia Mōsese ke tokoni ke liliu ʻene fakakaukaú? (vakai, ʻEkesōtosi 3:4–15; 4:10–17; vakai foki, Mōsese 1:3–11). Naʻe tokoniʻi fēfē nai ʻe he ngaahi moʻoni ko ʻení ʻa Mōsesé? Te nau tokoniʻi fēfē nai kitautolu? Fakaʻaongaʻi ha ʻekitivitī hangē ko ha taha ʻo e ngaahi ʻekitivitī ko ʻení ke tokoni ki he kau mēmipa ʻo e kōlomú pe kalasí ke nau ʻiloʻi ʻa e meʻa kuo fakahā ʻe he ʻOtuá fekauʻaki mo honau tuʻunga totonú, mahuʻingá mo e ivi malavá.

• Naʻe pehē ʻe Palesiteni Dieter F. Uchtdorf, “ʻOku fakaʻaongaʻi ʻe he ʻEikí ha meʻafua ʻoku fuʻu kehekehe ʻaupito mei he meʻafua ʻoku fua ʻaki ʻe he māmaní ʻa e laumālié” (“ʻOkú ke Mahuʻinga Kiate Ia,” 22). Ke aleaʻi ʻa e fakakaukau ko ʻení, te ke lava ʻo hiki ʻi he palakipoé ʻOku fakahaaʻi fēfē nai ʻe he māmaní ki ha taha ʻokú ne mahuʻinga? Fakaafeʻi ʻa kinautolu ʻokú ke akoʻí ke nau fokotuʻu atu ha ngaahi tali. Kapau te tau fakamāuʻi hotau mahuʻingá ʻi he founga ko ʻení, ʻe liliu fēfē nai ʻe he ngaahi ongo ko ʻení ʻa ʻetau ngaahi filí? Te ke lava leva ʻo hiki ʻi he palakipoé ʻOku fakahaaʻi fēfē nai ʻe he ʻOtuá ki ha taha ʻokú ne mahuʻinga? ʻI he vahevahe ʻe he toʻu tupú ʻa e ngaahi talí, poupouʻi ke nau lau ʻa e Sione 3:16; Tokāteline mo e Ngaahi Fuakava 18:10–15; Luke 15:3–6, 11–32. ʻE lava foki ke nau lau ʻa e konga fakaʻosi ʻo e pōpoaki ʻa Palesiteni ʻUkitofá. Kapau te tau fakamāuʻi hotau mahuʻingá ʻi he founga ko ʻení, ʻe liliu fēfē nai ʻe he ngaahi ongo ko ʻení ʻa ʻetau ngaahi filí?

• ʻOku liliu ʻe he fakahingoá ʻa e anga ʻo ʻetau ongo mo e fakafōtunga kiate kitautolú pea mo e niʻihi kehé. Ke tokoni ki he kau mēmipa ʻo e kalasí pe kōlomú ke nau fakakaukau ki he founga ʻoku nau fakahingoa ai kinautolú, te ke lava ʻo ʻoange kiate kinautolu takitaha ha ʻū pine hingoa ʻoku ʻikai tohi ha meʻa ai. ʻE lava ke tohi ʻi he foʻi pine takitaha ʻa e “Mālō e lelei, ko au …”. Fakaafeʻi ke nau fakakaukau ki ha ngaahi foʻi lea pe ngaahi kupuʻi lea kehekehe ʻe lava ke nau tohi ʻi honau pine hingoá. Kapau naʻe fakafonu ʻe he Tamai Hēvaní ʻa e ʻū pine hingoá maʻatautolu, ko e hā nai ʻa e meʻa te Ne tohí? Ko e hā nai ha meʻa naʻá Ne mei tohí ʻo kapau naʻe pehē ʻe he piné “Mālō e lelei, te u lava ʻo hoko ko e …”? ʻE lava ʻe he kau mēmipa ʻo e kalasí pe kōlomú ʻo fakalaulauloto ki he ongo fehuʻi ko ʻení lolotonga haʻanau lau ha niʻihi ʻo e ngaahi potufolofola ko ʻení: 1 Sione 3:1–3; Molonai 10:32–33; Tokāteline mo e Ngaahi Fuakava 76:69–70; 84:37–38.

• ʻOku ʻi he ngaahi pōpoaki konifelenisi lahi ʻi he “Ngaahi Maʻuʻanga Tokoni Poupoú” ha ngaahi sīpinga ʻo ha kakai ne liliu ʻenau moʻuí koeʻuhí ne nau ako honau tuʻunga totonú ko e fānau ʻa e ʻOtuá. Fakakaukau ke ʻoange ki he mēmipa takitaha he kalasí pe kōlomú ha taha ʻo e ngaahi sīpinga ko ʻení ke nau fakalaulauloto ki ai pea vahevahe mo e kulupú. Te ke lava foki ʻo talanoa ki he founga kuo liliu ai hoʻo moʻuí ʻe hono ʻiloʻi ko e fānau kotoa kitautolu ʻa e ʻOtuá. Fakaafeʻi e kau mēmipa ʻo e kalasí pe kōlomú ke nau fakahoko ʻa e meʻa tatau.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Joy D. Jones, “Mahuʻinga Taʻe-Hano-Tatau,” Liahona, Nōvema 2017, 13–15

• Brian K. Taylor, “Ko e Fānau Koā Au ʻa e ʻOtuá?” Liahona, Mē 2018, 12–14

Ko e Faiako ʻi he Founga ʻa e Fakamoʻuí

“Kapau ʻe ongoʻi ʻe he toʻu tupú ʻokú ke falala ange kiate kinautolu, ʻe toe tupulaki ai ʻenau falala ki honau ivi fakalangí, pea te nau fakaʻohovaleʻi koe ʻi he meʻa te nau lavaʻí” (Ko e Faiako ʻi he Founga ʻa e Fakamoʻuí, 28).