Sīsū Kalaisi

10 ʻEpeleli

Te U Fakamālohia Fēfē Nai ʻEku Tui kia Sīsū Kalaisí ʻi he ʻAho Kotoa Pē?

ʻEkesōtosi 14–17

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, makehe mei he fealeaʻaki fakataha fekauʻaki mo e ngaahi fiemaʻu pau ʻa e kalasí pe kōlomú, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení.

• Ko e hā ha ngaahi kaveinga pe pōpoaki ne makehe kiate kitautolú? Ko e hā e meʻa naʻá ne fakamālohia ʻetau tui kia Sīsū Kalaisí?

• Ko e hā e meʻa naʻá ne fakamālohia ʻetau fakamoʻoni ki he kau palōfita moʻuí? Ko e hā ne tau ongoʻi ne ueʻi kitautolu ke tau fakahoko koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kalasi pe kōlomu ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe nae fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Ke moʻui ʻi he toafá, naʻe pau ke ako ʻe he fānau ʻIsilelí ʻa e founga ke fakafalala ai ki he ʻEikí. Naʻa nau fakafalala kiate Ia ki ha ngaahi mana fakahaofi moʻui, hangē ko hono fakamavaeua ʻo e Tahi Kulokulá, kae pehē foki ki ha ngaahi mana ke tauhi ʻaki ʻenau moʻuí, hangē ko e mana (manna) mei he langí. Ko e moʻoni tatau pē ʻoku hoko ki he niʻihi ʻokú ke akoʻí. Kapau ʻoku nau fakaʻamu ke moʻui ʻi heʻenau fononga fakalaumālie ʻi he ngaahi aʻusia ʻo e moʻui fakamatelié, kuo pau ke nau fakamālohia ʻa e tui kia Sīsū Kalaisí. Pea kuo pau ke nau fakamālohia ʻa e tui ko iá he ʻaho kotoa pē, kae ʻikai ko e taimi pē ʻe niʻihi. Mahalo ʻe ongoʻi ʻe he niʻihi ʻokú ke akoʻí ʻoku ʻikai ke loko mālohi ʻenau tuí. Te ke lava ʻo tokoniʻi kinautolu ke nau ʻiloʻi ko e tuí ʻoku tupulaki māmālie ia, ʻi he ʻaho ki he ʻaho. ʻOku fafanga ia ʻe he fanga kiʻi meʻa iiki mo faingofua ʻoku tau fakahoko maʻu peé. Fakalaulauloto ki he ngaahi meʻa ko ʻení ʻi hoʻo ako ʻa e ʻEkesōtosi 14–17 he uike ní. Te ke lava foki ʻo ako ʻa e pōpoaki ʻa Palesiteni Dallin H. Oaks ko e “Fanga Kiʻi Meʻa Iiki mo Faingofuá” (Liahona, Mē 2018, 89–92).

kalasi ʻa e kau finemuí

Te tau lava ʻo fakamālohia ʻetau tuí he ʻaho takitaha ʻi ha fanga kiʻi founga iiki mo faingofua.

Ako Fakataha

Ke kamataʻi ha fealeaʻaki, te ke lava ʻo kole ki he toʻu tupú ke nau vahevahe ha niʻihi ʻo ʻenau ngaahi tōʻonga fakaʻaho ʻoku tokoni kiate kinautolu ke nau fakahoko e ngaahi meʻa ʻoku leleí. ʻE lava ke kau ʻi he ngaahi meʻá ni ʻa hono tauhi e moʻui leleí pe ko hono fakamālohia ʻenau fakamoʻoní. Ko e hā nai ha meʻa ʻe hoko kapau naʻe ʻikai ke tau tauhi ʻa e ngaahi tōʻonga ko ʻení? ʻE fakafehoanaki fēfē nai ʻetau ngaahi ngāue fakaʻahó ke fakahoko e ngaahi meʻa leleí ki he fakahinohino naʻe fakahoko ʻe he ʻEikí ki he kakai ʻIsilelí ke nau tānaki e maná? (vakai, ʻEkesōtosi 16:16–21). Te ke lava ʻo tokoni ki he kalasí pe kōlomú ke fakafehoanaki e aʻusia ʻa e kakai ʻIsilelí ki heʻetau feinga ke fakamālohia ʻetau tui kia Sīsū Kalaisí he ʻaho kotoa peé. Hangē ko ʻení, ko e hā ʻa e meʻa ʻoku foaki mai ʻe he ʻEikí kiate kitautolu ʻoku hangē ko e mana fakaʻaho naʻá Ne foaki ki he kakai ʻIsilelí? Ko e hā e meʻa ʻe lava ke tau fakahoko ʻa ia ʻoku tatau mo hono tānaki ʻo e maná? Ke hoko atu hoʻomou fealeaʻakí, fakaʻaongaʻi ha foʻi ʻekitivitī ʻe taha pe lahi ange mei he ngaahi ʻekitivitī ʻi laló pe ko haʻo ʻekitivitī pē ʻaʻau.

• Lau fakataha ʻa e ʻAlamā 37:6–7. Lisi ʻi he palakipoé fakataha mo e kalasí pe kōlomú ha niʻihi ʻo e “fanga kiʻi meʻa iiki mo faingofua” kuo fakaafe mai ʻa e ʻEikí ke tau fakahoko he ʻaho takitaha ke haʻu ai kiate Iá. ʻE lava leva ke toe vakaiʻi ʻe kinautolu ʻokú ke akoʻí ʻa e pōpoaki ʻa Palesiteni Dallin H. Oaks ko e “Fanga Kiʻi Meʻa Iiki mo Faingofuá” ke ʻilo ai mo ha toe fanga kiʻi meʻa iiki lahi ange ʻe lava ke hoko ko ha tākiekina lelei ʻi heʻetau moʻuí. Ko e hā ʻa e tākiekina ʻe lava ke fakahoko ʻe he ngaahi meʻa ko ʻení? Ko e hā ʻa e meʻa ʻokú ne fakalotoa kitautolu ke tau fakahoko e ngaahi meʻa ko ʻení ke hoko ko ha konga tukupau ʻo ʻetau moʻui fakaʻahó?

• Ko e hā e ʻuhinga ʻoku fie maʻu ai ke tanumaki fakaʻaho ʻa e tui kia Sīsū Kalaisí? Ke tokoni ke mahino lelei ange ki he kau mēmipá ʻa e meʻá ni, te ke lava ʻo fakaʻaliʻali ha foʻi vitiō ʻe taha pe lahi ange ʻo e ngaahi vitiō ʻoku lisi ʻi he “Ngaahi Maʻuʻanga Tokoni Poupoú.” ʻI he ngaahi vitiō ko ʻení, naʻe akoʻi ai ʻe ʻEletā D. Todd Christofferson fekauʻaki mo e fiemaʻu ke pouaki ʻetau tuí. Fakaafeʻi ʻa kinautolu ʻokú ke akoʻí ke nau vahevahe ha ngaahi meʻa ne nau ako ʻoku fakalotoa ai kinautolu ke nau fakatupulaki ʻenau tui kia Sīsū Kalaisí he ʻaho kotoa pē.

• Ko e ngaahi ngāue fakaʻaho ʻoku fakahoko maʻu peé, ko e founga lelei taha ia ke fakamālohia ai ʻetau tui kia Kalaisí. Ke aleaʻi ʻa e foʻi fakakaukau ko ʻení, mou lau fakataha ʻa e fokotuʻu hono tolu ʻa ʻEletā David A. Bednar ʻi heʻene pōpoaki “Faivelenga mo Tokanga ʻo Lahi Ange ʻi ʻApi” (Liahona, Nōvema 2009, 17–20). Ko e hā ha ngaahi lēsoni ʻe lava ke tau ako mei heʻene fakamatalaʻi ʻo ha fakatātā ʻi hono ʻōfisí? ʻE fakaʻaongaʻi fēfē nai ʻa e ngaahi lēsoni ko ʻení ʻi heʻetau feinga ke langaki ʻetau tui kia Sīsū Kalaisí? ʻE lava ke tānaki atu ʻa hono lau fakataha ʻa e ʻAlamā 32:21, 26–43 ki hoʻomou fealeaʻakí. Ko e hā e ngaahi ʻilo ʻoku tau maʻu fekauʻaki mo e founga ke fakamālohia ai ʻetau tui kia Sīsū Kalaisí?

• ʻE lava ke tau fakatupulaki ʻetau tuí ʻaki ʻetau fili ke ako mei he ngaahi aʻusia ʻoku nau siviʻi iá.   Aleaʻi fakataha pe ko e hā ha meʻa ʻe lava ke tau fakahoko ʻi he lolotonga ha ʻahiʻahi ke fakamālohia ʻetau tuí. (Vakai ki he Neil L. Andersen, “Ngaahi Faingataʻa Fakalaumālié,” Liahona, Mē 2014, 18–21.) Te ke lava ʻo kole ki he kau mēmipa ʻo e kalasí pe kōlomú ke nau vahevahe ha ngaahi taimi ne nau ongoʻi ai ne ʻahiʻahiʻi ʻenau tui kia Kalaisí pea ko e hā e meʻa ne nau fakahoko ke fakamālohia ai ʻenau tuí he taimi ko iá. Fakamahinoʻi ange ʻoku fakamatalaʻi ʻi he ʻEkesōtosi 14–17 ʻa e hanu pe lāunga maʻu pē ʻa e kakai ʻIsilelí ʻi he taimi ne nau foua ai e faingataʻá. ʻE hoko fēfē ʻa e lāunga ʻi he lolotonga e ngaahi faingataʻá ke vaivai ai ʻetau tuí? Ko e hā e faikehekehe ʻo e lāungá mo hono fakahaaʻi ki heʻetau Tamai Hēvaní ʻetau loto-hohaʻa lolotonga e ngaahi taimi faingataʻá?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• “Meʻakai Fakaʻahó: Sīpingá,” “Meʻakai Fakaʻahó: Liliu,” “Meʻakai Fakaʻahó: Aʻusiá” (ngaahi vitiō), ChurchofJesusChrist.org

Ko e Faiako ʻi he Founga ʻa e Fakamoʻuí

Tokoni ke mahino ki he kau mēmipa ʻo e kalasí pe kōlomú ʻa e founga ʻe lava ke nau fakaafeʻi ai ʻa e Laumālié ke kau ʻi heʻenau fealeaʻakí. ʻE lava ke nau fakahoko ʻeni ʻi heʻenau “tōʻonga moʻuí … , ʻulungaanga ki he niʻihi kehé pea mo e ongo ʻoku nau maʻu ki he ongoongoleleí” (Ko e Faiako ʻi he Founga ʻa e Fakamoʻuí, 15).