alii talavou o loo ataata

13 Mati

E Mafai Faapefea Ona Ou Tali Atu i Faigata ma le Faatuatua?

Kenese 37–41

aikona o le fefautuaai faatasi

Fefautuaai Faatasi

E taitaia e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O faapefea ona tatou vaaia le aao o le Alii i o tatou olaga?

• Tausia o i latou e lē tagolima. E mafai faapefea ona tatou lagolagoina le tasi ma le isi i mea o loo tatou feagai?

• Valaaulia tagata uma ia talia le talalelei. E mafai faapefea ona sili atu lo tatou faaaogaina o tekinolosi o se meafaigaluega e faasoa atu ai le talalelei?

• Tuufaatasia o aiga mo le faavavau. O a a tatou mea o loo fai e fesoasoani ai i o tatou aiga ia o mai ia Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po se talavou; 25-35 minute

Saunia Oe Lava Faaleagaga

A o talavou o ia, sa feagai Iosefa o Aikupito ma le tele o ituaiga o faigata. Sa feagai o ia ma finauga i lona aiga ma na agaleagaina e ona uso. Na ia feagai ma faaosoosoga e solia le tulafono o le legavia. Ae nai lo le faaaloalogia o ia mo lona faamaoni, sa lafoina o ia i le falepuipui. Atonu e feagai tagata o lau vasega po o le korama ma ni tofotofoga talitutusa ma isi mea e tele. Ao e suesue i aafiaga a Iosefa i le Kenese 37–41, mafaufau ia i latou o loo e aoaoina. Mafaufau pe o a lesona taua na maua i le olaga o Iosefa mo i latou (tagai foi i le Eteru 12:27; Henry B. Eyring, “Taumafai,” Liahona, Nov. 2018, 90-93). O le tala ia Iosefa e mafai ona musuia ai tagata o le vasega po o le korama e fesili, “E mafai faapefea ona ou tali atu ma le faatuatua i o’u faigata, ma o le a faapefea ona fesoasoani mai le Atua ia te au?”

vasega a tamaitai talavou

O le taulai atu i lo tatou faatuatua ia Iesu Keriso, e mafai ona tatou maua ai le malosi i o tatou faigata.

Aoao Faatasi

Mafaufau e fesili atu i tagata o le vasega po o le korama e lisi i le laupapa ni mea na tutupu i le olaga o Iosefa o Aikupito, e pei ona faamatalaina i le Kenese 37 ma le 39-41. O le faaalia o ata, e pei o ata o loo i le Sau, Mulimuli Mai ia te A’u—Mo Tagata Taitoatasi ma Aiga, e mafai ona fesoasoani ia i latou e manatua ai nei mea na tutupu. E faapefea ona talitutusa luitau o Iosefa i luitau o loo feagai ma le autalavou i aso nei? Pe ana soifua Iosefa i le taimi nei, o le a se fautuaga atonu na te tuuina mai ia i tatou e uiga i le tali atu i faigata? Pe o le a sana tala e uiga i le ala na fesoasoani ai ia te ia la laʻua sootaga ma le Alii? Faaaoga gaoioiga e pei o nei e fesoasoani ai i le autalavou e mafaufau ai i le ala latou te tali atu ai i luitau ma le faatuatua ia Iesu Keriso.

• O le suesueina o le ala na tali atu ai le Faaola i faigata e mafai ona fesoasoani ia i tatou e fetaiai ai ma o tatou faigata i le faatuatua. Atonu e fautua mai e le autalavou nisi faataitaiga o faigata na feagai ma le Faaola ma iloilo faatasi i latou (tagai i le “Punaoa Lagolago” mo nisi manatu). O le a le mea ua faagaeetia ai i tatou i le ala na tali atu ai le Faaola i Ona taimi o faigata? E mafai faapefea ona tatou mulimuli i Lana faataitaiga a o tatou feagai ma o tatou lava faigata?

• O nisi taimi e faigofie atu ona tali i faigata pe a tatou taumafai e vaai i ai mai le vaaiga a le Alii. Ina ia fesoasoani ia i latou e te aoaoina ia malamalama i nei mea, fai atu ia i latou e saili faataitaiga o le eseesega e mafai ona faia e le vaaiga e ala i le iloiloina o le savali a Elder Rafael E. Pino “O le Vaaiga e Faavavau i le Talalelei” (Liahona, Me 2015, 117-19). Valaaulia i latou e faasoa mai mea na latou mauaina. O a mea o fautuaina mai e nei faataitaiga e uiga i auala atonu tatou te vaai ai ma tali atu i o tatou puapuaga? Pe afai e talanoa mai le Faaola ia i tatou e uiga i o tatou luitau, o le a so tatou manatu i le mea o le a fetalai mai ai o Ia? Ina ia fesoasoani e tali lenei fesili, e mafai ona iloilo e le autalavou mau i le “Punaoa Lagolago.”

• Mafaufau e fesili i le autalavou e faasoa mai se faataitaiga a se tasi (po o se tua’ā) sa musuia i latou i le auala sa ia feagai ai ma se tofotofoga faigata. Pe atonu e te faasoa mai foi ni faataitaiga musuia o tagata e te iloa. E masani lava ona aofia i savali o konafesi aoao ni tala o tagata na tali atu i faigata ma le faatuatua (tagai i ni faataitaiga i le “Punaoa Lagolago”). Mafaufau i le mea e te mafai ona faasoa atu mai nei savali e ono aoga ia i latou o loo e aoaoina. Ao outou talanoaina faatasi nei faataitaiga, fautua atu i tagata o le vasega po o le korama e taulai atu i le ala na fesoasoani ai le faatuatua ia Iesu Keriso i tagata i taimi o o latou faigata. E mafai foi ona e faasoa atu le lisi a Epikopo Christopher Waddell o punaoa ua saunia e le Alii e fesoasoani ia i tatou i o tatou luitau, o loo maua i le faaiuga o lana savali “Liliu Atu i le Alii” (Liahona Nov. 2017, 94–96).

Faatino i le Faatuatua

Ia uunaia tagata o le vasega po o le korama e manatunatu ma tusi le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoga o lagona na latou mauaina.

Punaoa Lagolago

• Mataio 4:1–11 (Sa i ai le faatuatua i le Faaola i taimi o faigata)

• Mataio 14:10-21; Luka 23:33–34; Ioane 19:25–27 (Na auauna atu le Faaola i isi i taimi o Ona puapuaga)

• Mataio 27:45-46; Luka 23:44–46 (Sa lagona e le Faaola le tuua na o ia i taimi o faigata ae sa faalagolago i le Atua)

• Mataio 5:38–45; Mosaea 24:8–15; Mataupu Faavae ma Feagaiga 121:1–8; 122:5–9 (O aoaoga a le Faaola e uiga i le feagai ai ma faigata)

• Neil L. Andersen, “Manu’a,” Liahona, Nov. 2018, 83-86.

• L. Todd Budge, “Faalagolago Tumau ma Malosi,” Liahona, Nov. 2019, 47–49

• Jean B. Bingham, “Ina Ia Atoa Lo Outou Olioli,” Liahona, Nov. 2017, 85-87

Aoao Atu i le Ala a le Faaola

“A o e sauni, tuu atu i lou malamalamaaga o tagata e te aoaoina e taiala au fuafuaga” (Aoao Atu i le Ala a le Faaola, 7). Mo se faataitaiga, fuafua ma le agaga tatalo gaoioiga e faaaoga ai tusitusiga paia ma isi punaoa e mafai ona fesoasoani i luitau o feagai ma tagata o le vasega po o le korama.