alii talavou o loo taina le kitara

27 Mati

O Ai A’u, ma O Ai e Finagalo le Atua ia ou Avea Ai?

Esoto 1–6

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O faapefea ona tatou maua le olioli i le mulimuli ai ia Iesu Keriso?

• Tausia o i latou e lē tagolima. O ai i la tatou uarota po o le nuu o manaomia la tatou fesoasoani? E mafai faapefea ona tatou fesoasoani atu?

• Valaaulia tagata uma ia talia le talalelei. E mafai faapefea ona tatou fesoasoani i le tasi ma le isi ia sauniuni mo le galuega faafaifeautalai?

• Tuufaatasia o aiga mo le faavavau. E mafai faapefea ona tatou fesoasoani i taumafaiga a le tatou uarota e faia talafaasolopito o aiga ma galuega o le malumalu?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25-35 minute

Saunia Oe Lava Faaleagaga

O se togavao mumū e lei faaumatiaina sa mafai ona avea ma se vaaiga mataina, ma na tosina atu i ai le mafaufau o Mose. Ae sa sili atu ona mataina le mea sa tupu mulimuli ane ai. Na fetalai le Atua ia Mose, ma sa iloa ai e Mose ona vaai ia te ia lava e pei ona sa silasila le Atua ia te ia. Faatasi ma lena vaaiga, na i ai se mea na ausia e Mose i le fesoasoani mai o le Alii lea na ia manatu e le mafai: na ia faafesagai ma Farao ma laveai i tagata o le Atua.

Tatou te manaomia uma ni poto masani e fesoasoani ia suia o tatou lemautonu ia i tatou lava i se malamalamaaga o le Atua pe o ai i tatou ma o ai e mafai ona tatou avea ai. O tagata talavou, e tele lava, ina fetaiai ma savali taufaasese e uiga i lo latou lava taua. Ma e pei o Mose, “ua i ai se galuega [a le Atua latou] te faia” (Autu o Korama a le Perisitua Arona). Ua i ai a latou lava Farao o latou fetaiai ma a latou lava tagata e laveai. O le a faapefea ona e fesoasoani ia i latou ia manatua o i latou o ni afafine ma atalii faapelepele o matua faalelagi “ma se natura paia ma se taunuuga e faavavau”? (Autu a Tamaitai Talavou). Mafaufau i lenei mea a o e faitau i le Esoto 1-6. Mafaufau foi e iloilo le Mataupu Faavae ma Feagaiga 18:10–15 ma le savali a Peresitene Dieter F. Uchtdorf “E Taua Oe ia Te Ia” (Liahona, Nov. 2011, 19-22).

vaega o tamaitai talavou i fafo

E mafai ona suia o tatou olaga pe a tatou malamalama i lo tatou faasinomaga moni o ni fanau a le Atua.

Aoao Faatasi

Atonu na faitauina e tagata o lau vasega po o le korama le Esoto 1-6 i lenei vaiaso. Ina ia uunaia i latou e faasoa mea na latou aoaoina, e mafai ona e fesili atu pe o a ni lagona o Mose e uiga i lona valaauga e laveaiina le fanauga a Isaraelu (tagai Esoto 3:11). O a upumoni na aoao atu e le Alii ia Mose e fesoasoani e sui ai lana vaaiga? (tagai Esoto 3:4-15; 4:10-17; tagai foi Mose 1:3-11). Na faapefea ona fesoasoani nei upumoni ia Mose? E mafai faapefea ona latou fesoasoani ia i tatou? Faaaoga se gaoioiga faapei o gaoioiga nei e fesoasoani i tagata o le vasega po o le korama ia iloa mea na faailoa mai e le Atua e uiga i o latou faasinomaga moni, taua, ma gafatia.

• Na saunoa Peresitene Dieter F. Uchtdorf “E faaaoga e le Alii se fuafaatatau e matuai ese lava mai le fua a le lalolagi e fuatia ai le taua o se tagata” (“E Taua Oe ia te Ia,” 22). Ina ia talanoaina lenei manatu, e mafai ona e tusia i le laupapa E faapefea ona faaali atu e le lalolagi i se tagata e taua o ia? Valaaulia i latou o loo e aoaoina e fautua atu ni tali. Afai tatou te faamasinoina lo tatou taua i lenei auala, e faapefea e nei lagona ona aafia ai a tatou filifiliga? Ona mafai lea ona e tusia i le laupapa E faapefea ona faaali atu e le Atua i se tagata e taua o ia? Ao faasoa mai e le autalavou tali, uunaia i latou e faitau le Ioane 3:16; Mataupu Faavae ma Feagaiga 18:10-15; Luka 15:3-6, 11-32. E mafai foi ona latou faitauina le vaega mulimuli o le savali a Peresitene Uchtdorf. Afai na tatou faamasinoina lo tatou taua i lenei auala, e faapefea e nei lagona ona aafia ai a tatou filifiliga?

• O faaituaiga e aafia ai o tatou lagona e uiga i le taulimaina o i tatou lava ma isi. Ina ia fesoasoani i tagata o le vasega po o le korama e mafaufau i auala latou te faatusa i ai i latou lava, atonu e te tuu atu ia i latou taitoatasi ni pine igoa o avanoa. O pine taitasi e mafai ona tusia ai i luga le “Talofa, O a’u o …”. Valaaulia i latou e mafaufau i ni nai upu eseese po o fuaitau e mafai ona latou tusi i luga o a latou pine igoa. Pe ana faapea e faatumu e le Tama Faalelagi pine igoa mo tatou, o le a se mea atonu Na te tusia? O le a se mea atonu Na te tusia pe afai o loo i ai i le pine le “Talofa, e mafai ona avea a’u …”? E mafai e tagata o le vasega po o le korama ona manatunatu i nei fesili ao faitauina nisi o mau nei: 1 Ioane 3:1-3; Moronae 10:32-33; Mataupu Faavae ma Feagaiga 76:69-70; 84:37-38.

• O savali o konafesi aoao i le “Punaoa Lagolago” o loo aofia ai faataitaiga o tagata na suia olaga ona sa latou aoaoina o latou faasinomaga moni o ni fanau a le Atua. Mafaufau e tuu atu i tagata taitasi o le vasega po o le korama se tasi o faataitaiga nei e manatunatu ai ma faasoa atu i le vaega. Atonu e te talanoa foi pe na faapefea ona aafia lou olaga i le iloa ai o i tatou uma o fanau a le Atua. Valaaulia tagata o le vasega po o le korama e faia le mea lava lena e tasi.

Faatino i le Faatuatua

Ia uunaia tagata o le vasega po o le korama e manatunatu ma tusia le mea o le a latou fai e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Joy D. Jones, “O Le Taua lē Mafuatiaina,” Liahona, Nov. 2017, 13–15

• Brian K. Taylor “O A’u ea o se Atalii o le Atua?” Liahona, Me 2018, 12–14

• “Our True Identity,” “How Can I See Myself as God Does?” mai le “Face to Face with Elder Rasband, Sister Oscarson, and Brother Owen” (vitio), ChurchofJesusChrist.org

• “All About Me” aafiaga i le FamilySearch.org/discovery

Aoao Atu i le Ala a le Faaola

“Afai e lagona e le autalavou e te faatuatuaina i latou, o le latou talitonuga i lo latou gafatia paia o le a tuputupu ae, ma o le a latou faateia oe i mea e mafai ona latou faataunuuina” (Aoao Atu i le Ala a le Faaola, 28).