Iesu Keriso

10 Aperila

E Mafai Faapefea Ona Ou Faamalosia Lo’u Faatuatua ia Iesu Keriso i Aso Taitasi?

Esoto 14–17

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona, e faaopoopo atu i le fefautuaai faatasi e uiga i pisinisi faapitoa a le vasega po o le korama, atonu e te manao e talatalanoa i uunaiga ma autu mai le konafesi aoao. Atonu o le a fesoasoani fesili nei.

• O a autu po o savali na tulagaese ia i tatou? O a mea na faamalosia ai lo tatou faatuatua ia Iesu Keriso?

• O a mea na faamalosia ai a tatou molimau e uiga i perofeta soifua? O le a le mea na tatou lagonaina le musuia e fai ona o mea na tatou aoaoina pe lagonaina?

• O a mea e tatau ona tatou faia o se vasega po o le korama e manatua ai ma galue ai i luga o fautuaga na tatou faalogo i ai i le konafesi aoao?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25-35 minute

Saunia Oe Lava Faaleagaga

Ina ia faasaoina mai le vao, na manaomia e le fanauga a Isaraelu ona aoao i auala e faalagolago ai i le Alii. Sa latou faalagolago ia te Ia mo ni vavega faaola, e pei o le vaeluaina o le Sami Ulaula, e faapea foi ma vavega e ola ai, e pei o le manai mai le lagi. E moni foi lena mea mo i latou o loo e aoaoina. Afai latou te sao mai la latou malaga faaleagaga i le vao o le olaga faaletino, e tatau ona latou faatuatua ia Iesu Keriso. Ma e tatau ona faatino lena faatuatua i aso taitasi, ae le nao sina taimi. Atonu o nisi o loo e aoaoina e lagona le le matua malosi tele o o latou faatuatua. E mafai ona e fesoasoani ia i latou ia iloa o le faatuatua e tuputupuae malie, i lea aso i lea aso. E faafaileleina e ala i mea laiti ma faatauvaa tatou te faia e le aunoa. Mafaufau loloto i nei mea a o e suesue i le Esoto 14–17 i lenei vaiaso. E mafai foi ona e suesue i le savali a Peresitene Dallin H. Oaks “O Mea Laiti ma Faatauvaa” (Liahona, Me 2018, 89–92).

vasega a tamaitai talavou

E mafai ona tatou faamalosia lo tatou faatuatua i aso taitasi i auala laiti ma faatauvaa.

Aoao Faatasi

Ina ia amata se talanoaga, e mafai ona e fai atu i le autalavou e faasoa mai nisi o a latou mausa o aso taitasi o fesoasoani ia i latou e faia mea lelei. O nei mea e mafai ona aofia ai le tausia lelei o le soifua maloloina po o le faamalosia o a latou molimau. O le a le mea e ono tupu pe ana tatou le faatumauina nei mausa? E faapefea e a tatou taumafaiga o aso taitasi e faia le lelei ona faatusatusa i faatonuga na tuuina atu e le Alii ia Isaraelu e ao le manai? (tagai Esoto 16:16-21). E mafai ona e fesoasoani i le vasega po o le korama e faatusatusa aafiaga o tagata Isaraelu i a tatou taumafaiga e faamalosia lo tatou faatuatua ia Iesu Keriso i aso uma. Mo se faataitaiga, o le a le mea o loo tuuina mai e le Alii ia i tatou i aso taitasi e pei o le manai na Ia tuuina atu ia Isaraelu? O le a se mea e mafai ona tatou faia e faapei o le aoina o le manai? Ina ia faaauau le talanoaga, faaaoga se tasi po o le sili atu o gaoioiga nei po o se tasi o a oe lava gaoioiga.

• Faitau faatasi le Alema 37:6-7. I le avea ai o se vasega po o le korama, lisi i le laupapa nisi o “mea laiti ma faatauvaa” ua valaaulia i tatou e le Alii e faia i aso taitasi e o mai ai ia te Ia. E mafai e i latou o e aoaoina ona iloilo le savali a Peresitene Dallin H Oaks “O Mea Laiti ma Faatauvaa” e saili ai mea laiti ma faatauvaa faaopoopo e mafai ona avea ma aafiaga sili i o tatou olaga. O le a se aafiaga e mafai ona i ai i nei mea? O a mea ua musuia i tatou e fai ia avea ai nei mea ma vaega e sili atu ona tumau o o tatou olaga i aso taitasi?

• Aisea e manaomia ai ona fafagaina i aso taitasi lo tatou faatuatua ia Iesu Keriso? Ina ia fesoasoani i tagata ia malamalama atili i lenei mea, e mafai ona e faaali atu se tasi pe sili atu o vitio o loo lisiina i lalo o “Punaoa Faaopoopo.” I nei vitio, na aoao mai ai Elder D. Todd Christofferson e uiga i le moomia o taumafaiga i aso taitasi e faatumau lo tatou faatuatua. Valaaulia i latou o loo e aoaoina e faasoa mai ni mea na latou aoaoina ua faaosofia ai i latou e faateleina lo latou faatuatua ia Iesu Keriso i aso taitasi.

• O taumafaiga faifai pea o aso taitasi o ni auala sili atu e faamalosia ai lo tatou faatuatua ia Keriso. Ina ia talanoaina lenei manatu, faitau faatasi le fautuaga lona tolu a Elder David A. Bednar i lana savali “Ia Matua Maelega ma Mafaufau i le Aiga” (Liahona, Nov. 2009, 17-20). O a ni lesona e mafai ona tatou aoao mai i lona faamatalaina o se atavali i lona ofisa? E faapefea ona aoga nei lesona i a tatou taumafaiga e fausia lo tatou faatuatua ia Iesu Keriso? O le faitauina faatasi o le Alema 32:21, 26-43 e mafai ona faaopoopo i la outou talanoaga. O a ni malamalamaaga ua tatou maua e uiga i le ala e faamalosia ai lo tatou faatuatua ia Iesu Keriso?

• E mafai ona tatou faateleina lo tatou faatuatua e ala i le filifili e aoao mai aafiaga e tofotofo ai. Atonu e te faaali atu le vitio “Asiosio Faaleagaga” (ChurchofJesusChrist.org). Talanoaina faatasi mea e mafai ona tatou faia i taimi o se tofotofoga e faamalosia ai lo tatou faatuatua. (Tagai foi Neil L. Andersen, “Asiosio Faaleagaga,” Liahona, Me 2014, 18–21.) Atonu e te fai atu i tagata o le vasega po o le korama e faasoa mai ni taimi na latou lagonaina ai ua tofotofoina o latou faatuatua ia Iesu Keriso ma mea na latou faia e faamalosia ai o latou faatuatua i lena taimi. Ta’u atu i ai o le Esoto 14-17 o loo faamatala ai le muimui soo, po o le faitio, o Isaraelu ao feagai ai ma tofotofoga. E mafai faapefea e le taumuimui ona faavaivaia lo latou faatuatua i taimi o tofotofoga? O le a le eseesega i le va o le muimui ma le faailoa atu o o tatou atugaluga i le Tama Faalelagi i taimi faigata?

Faatino i le Faatuatua

Ia uunaia tagata o le vasega po o le korama e manatunatu ma tusi le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• “Daily Bread: Pattern,” “Daily Bread: Change,” “Daily Bread: Experience” (vitio), ChurchofJesusChrist.org

Aoao Atu i le Ala a le Faaola

Fesoasoani i tagata o le vasega po o le korama ia malamalama i auala latou te valaaulia ai le Agaga e faatasi i le taimi o a latou talanoaga. E mafai foi ona latou faia lenei mea e ala ia latou “amio … , le ala latou te taulimaina ai le tasi ma le isi, ma le ala o loo latou lagonaina e uiga i le talalelei” (Aoao Atu i le Ala a le Faaola,15).