tulafono e sefulu

24 Aperila

Aisea e Tuuina mai ai e le Atua ia i Tatou Poloaiga?

Esoto 18–20

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai nei ua faalatalata atili atu ai i tatou i le Tama Faalelagi ma Iesu Keriso?

• Tausia o i latou e lē tagolima. Pe na i ai se tasi na siitia mai talu ai nei i le tatou uarota pe faatoa auai i le Ekalesia? E faapefea ona tatou fesoasoani ia i latou ia lagona le taliaina?

• Valaaulia tagata uma ia talia le talalelei. O i ai ni gaoioiga o loma e mafai ona tatou valaaulia ai a tatou uo e auai mai ai?

• Tuufaatasia o aiga mo le faavavau. O a ni taumafaiga e mafai ona tatou faia e faamaumau ai a tatou talafaasolopito patino?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O le faitauina o le Esoto 20 e ono uunaia ai oe e mafaufau i le pogai ua i ai ia i tatou poloaiga. O nisi tagata e vaai i poloaiga o ni tapulaa po o se taumafaiga e faatonutonu ai tatou. Ae ona ua tatou iloa o le Atua o se Tama alofa, e mafai ona tatou faatuatuaina Ana tulafono e mo lo tatou lelei, e tusa lava pe tatou te le iloa i taimi uma le mafuaaga. Na Ia folafola mai ia i tatou e mafai ona tatou iloa o Ana poloaiga e moni pe a tatou ola ai (tagai Ioane 7:17).

Na aoao mai Peresitene Russell M. Neson: “Ona e alolofa le Tama ma le Alo ia i tatou i se alofa le faatuaoia, atoatoa, ma ona ua La’ua silafia e le mafai ona tatou vaai i mea uma La te silasila i ai, ua La tuuina mai ai tulafono o le a taitaiina ma puipuia ai i tatou. O loo i ai se sootaga malosi i le va o le alofa o le Atua ma Ana tulafono” (“The Love and Laws of God” [Brigham Young University devotional, Sept. 17, 2019], speeches.byu.edu).

Aisea e te faafetai ai mo poloaiga? O le a se mea e te faamoemoe ia malamalama i ai tagata o le vasega po o le korama e uiga i le pogai ua tuuina mai ai e le Atua ia i tatou poloaiga? E mafai ona e saunia e aoao atu e ala i le iloiloina o le Esoto 20 ma le savali a Peresitene Dallin H. Oaks “Ola Faatasi ma Alolofa atu i Isi e Eseese o Tatou Talitonuga” (Liahona, Nov. 2014, 25-28).

alii talavou o loo suesue i tusitusiga paia

E mafai ona tatou iloa e moni poloaiga a le Atua pe a tatou ola ai.

Aoao Faatasi

Ina ia fesoasoani i tagata o le vasega po o le korama e iloilo Tulafono e Sefulu, e mafai ona e fai atu ia i latou e lisi mai le tele o tulafono o mafai ona latou manatua. Afai latou te manaomia le fesoasoani, e mafai ona latou vaavaai i le Esoto 20:3–17. Aisea e tuuina mai ai e le Atua ia i tatou poloaiga? Ina ia fesoasoani e tali lenei fesili, atonu latou te talanoaina nisi o Tulafono e Sefulu i ni vaega laiti. E mafai faapefea e le ola ai i nei poloaiga ona fesoasoani ia i tatou ia maua le fiafia ma latalata atili atu ai i le Atua? O manatu nei e mafai ona fesoasoani ia i latou o loo e aoaoina e aoao atili e uiga i le pogai ua tuuina mai ai e le Atua ia i tatou poloaiga.

• Ua i ai i tusitusiga paia tali i le fesili “Aisea e tuuina mai ai e le Atua ia i tatou poloaiga?” E mafai ona e valaaulia tagata o le vasega po o le korama e vaavaai mo tali i se tasi po o le sili atu o mau o loo maua i “Punaoa Faaopoopo.” Ona fai atu lea ia i latou e faasoa mai se mea na latou mauaina. E mafai foi ona latou matamata i vitio nei e vaavaai ai mo ni malamalamaaga: “Instructions Included,” “Why Does God Give Us Commandments?” (ChurchofJesusChrist.org).

• Ina ia fesoasoani i tagata o le vasega po o le korama ia malamalama i le pogai ua tuuina mai ai e le Atua ia i tatou poloaiga, atonu e te faatusatusa le i ai o poloaiga mai le Atua i aafiaga e mafai ona latou fesootai ai. Mo se faataitaiga, e mafai ona e fai atu ia i latou e vaai faalemafaufau o loo latou malaga atu i se auala i tafatafa o se mauga, e latalata i se tofē maualalō ma o loo i ai se pa i le tafatafa o le auala. Fai atu ia i latou e talanoaina ma se isi tagata o le vasega i fesili nei: E faapefea ona pei poloaiga a le Atua o se pa? Ua faapefea ona faamanuiaina i tatou ona o le usiusitai i poloaiga? O a isi faatusatusaga e mafai ona fesoasoani ia tatou malamalama ai i le pogai e tuuina mai ai e le Atua ia i tatou poloaiga ma le pogai e tatau ai ona tatou usiusitai i ai? Mo se faataitaiga, e mafai ona e valaaulia i latou e iloilo se tasi o savali po o vitio o loo maua i “Punanoa Faaopoopo.” Fai atu ia i latou e faasoa mai ni faatusatusaga latou te maua ma talanoa imea ua latou aoaoina.

• O la outou talanoaga e ono taitai atu ai tagata o le vasega po o le korama e talanoa i auala e tatau ona tatou taulima ai i latou e le talitonu pe tausia nisi poloaiga. E mafai ona e valaaulia i latou e vaavaai mo fautuaga i le savali a Peresitene Dallin H. Oaks “Ola Faatasi ma Alolofa atu i Isi e Eseese o Tatou Talitonuga.” Atonu e te fesili atu i fesili e pei o nei: E faapefea ona tatou faia i latou o e filifili e ola i se olaga e ese mai nai lo tatou? E mafai faapefea ona tatou vaai i le lelei i isi pe a latou faia ni filifiliga e ese mai nai lo tatou?

Faatino i le Faatuatua

Ia uunaia tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Teuteronome 10:12–13; Alema 36:30; Mataupu Faavae ma Feagaiga 1:24–28; 82:8–10; 93:20, 28; 130:18–21 (O le pogai e tuuina mai ai e le Atua poloaiga ia i tatou)

• Jeffrey R. Holland, “Ua Tauto i Tatou Uma” (Liahona, Nov. 2011, 44-47; tagai foi i vitio “Stay within the Lines”); Richard G. Scott, “E Mafai e le Togiola Ona Faamama, Toe Maua Mai ma Faapaia o Tatou Olaga” (Liahona, Nov. 2006, 40-42; tagai foi i le vitio “A Secure Anchor”); Von G. Keetch, “E Manuia ma Fiafia i Latou o E Tausi i Poloaiga a le Atua” (Liahona, Nov. 2015, 115-117; tagai foi i vitio e tutusa autu)

Aoao Atu i le Ala a le Faaola

“I au taumafaiga e ola ma aoao atili e pei o le Faaola, o le a i ai lava le taimi e te toilalo ai. Aua e te faavaivai, ae, avea au mea sese ma vaivaiga e te liliu atu ai i lou Tama Faalelagi ma le Faaola” (Aoao Atu i le Ala a le Faaola,14).