o se tamaitai talavou o loo ata

8 Me

E Mafai Faapefea Ona Ou Iloa Ua Faamagaloina A’u e le Atua?

Esoto 35–40; Levitiko 1; 16;19

aikona o le fefautuaai faatasi

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. E mafai faapefea ona fesoasoani le liliu atu i le Alii ia i tatou e taulima ai o tatou luitau ma tofotofoga?

• Tausia o i latou e lē tagolima. O ai tatou te iloa e moomia a tatou tatalo ma le faauooga?

• Valaaulia tagata uma ia talia le talalelei. O a fuafuaga e faasoa atu ai le talalelei na talanoaina i le fono a le aufono a le autalavou a le uarota? E faapefea ona faaaofia ai la tatou vasega po o le korama?

• Tuufaatasia o aiga mo le faavavau. E faapefea e le faia o galuega o talafaasolopito o aiga ona faamalosia a tatou sootaga ma le Tama Faalelagi ma Iesu Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

E manatunatu nisi tagata pe ua “lava a latou faatinoga” e magalo ai agasala. E ui e moomia ni taumafaiga e salamo ai, ae mulimuli ane e le faamagaloina i tatou ona ua uma se lisi o mea e tatau ona fai po o ni galuega patino. E faamagaloina i tatou pe a tatou talia le alofa tunoa na ofoina mai e Iesu Keriso. O le auala lea e mafai ona suia ai o tatou natura.

I taimi anamua, o sauniga ma taulaga o le tulafono a Mose na faasino atu ai Isaraelu i le Togiola a le Faaola. E pei ona faamalamalama mai e le Alii i le Levitiko 16:30, “O le aso lea e fai ai le togiola mo outou e faamamaina ai outou, ina ia mama outou i luma o Ieova i a outou agasala uma.” O le mea moni, o le sauniga lava ia e le mafai ona aumaia ai ia i tatou le faamagaloga o agasala. O le faamagaloga e mai ia Iesu Keriso. I o tatou aso, o sauniga e pei o papatisoga ma le faamanatuga e faasino atu ai o tatou mafaufau ma loto i le Faaola. Latou te fesoasoani ia tatou malamalama ai o le a Ia faamagalo i tatou i taimi uma pe a tatou salamo.

Na faapefea ona fesoasoani le Tama Faalelagi ia oe ia iloa ua faamagaloina oe? E mafai foi ona e suesue i le Mosaea 4: 1-3 ma le savali a Peresitene Tad R. Callister “O le Togiola a Iesu Keriso” (Liahona, Me 2019, 85–87). E mafai ona fesoasoani lenei savali ia i latou o loo e aoaoa ina ia malamalama e faamagalo i tatou e le Tama Faalelagi pe a tatou salamo.

tagata talavou o loo tatalo

E faamagalo i tatou pe a tatou talia le alofa tunoa na ofoina mai e Iesu Keriso.

Aoao Faatasi

E mafai ona e amata i le faaali atu o ata o le Faaola i Ketesemane ma luga o le satauro (tagai Tusi Ata o le Talalelei, nu. 56-57). Valaaulia le autalavou e suesue le Levitiko 1:1–9; 16:15–16, 30. Fai atu ia i latou e faasoa mai fuaitau o loo faamanatu ai ia i latou le Togiola a le Faaola. Na faapefea ona fesoasoani osigataulaga o loo faamatala mai i nei fuaiupu ia Isaraelu e tulimatai atu ai i le Togiola a le Faaola? O a ni mea e fesoasoani tatou te manatua ai le Togiola a le Faaola? O a ni mea e fesoasoani tatou te lagona ai le alofa ma le faamagaloga a le Faaola? O gaoioiga o loo i lalo e mafai ona fesoasoani i le autalavou ia malamalama atili ai o le a faamagalo i tatou e le Atua.

• E i ai ni nai tagata i tusitusiga paia o loo faamatalaina lagona na latou maua ina ua faamagaloina i latou e le Tama Faalelagi. E mafai e tagata o lau vasega po o le korama ona faitau ni faataitaiga (tagai “Punaoa Lagolago”). Valaaulia i latou e fai se lisi o fuaitau mai nei fuaiupu o loo faamatala ai pe faapeī lagona o le faamagaloina. E mafai ona e fai atu ia i latou e faamatala i a latou lava upu o latou lagona e uiga i le faamagaloga. O a ni mea e mafai ona tatou aoaoa e uiga i le Atua mai nei lagona? Atonu e mafai ona e faasoa atu ou oe lava lagona e uiga i le faamagaloga.

• O nisi taimi e le mautinoa e tagata ua faamagaloina i latou ona latou te le o mautinoa ua latou salamo faamaoni. O le savali a Elder Dale G. Renlund, “Salamo, O Se Filifiliga Fiafia” o loo faamatala ai le auala e salamo moni ai ma maua ai le faamagaloga a le Atua (Liahona, Nov. 2016, 121–24). E mafai ona e tusia i le laupapa ulutala Salamo Faamaoni ma Mea e Faalavelave i le Ala o le Salamo. Fai atu ia i latou o loo e aoaoina e saili aoaoga i le savali e patino i lalo o ulutala. O a mea ua tatou aoaoina e uiga i le Faaola ma Lana faamagaloga mai parakalafa e tolu mulimuli o lenei savali?

• O nisi tagata atonu ua salamo ae e le o lagonaina le faamagaloina. Atonu e tupu lenei mea ona e le o mafai ona latou faamagaloa i latou lava. O le fautuaga o loo i le savali a Peresitene Tad R. Callister “O le Togiola a Iesu Keriso” e mafai ona fesoasoani ia i latou. E mafai ona faitau e lau vasega po o le korama le vaega o loo amata i le “2. Agasala.” Fai atu ia i latou e saili fautuaga e mafai ona latou faasoa atu i se uo po o se tagata o le aiga o loo lagona pea le tausalaina e tusa pe ua salamo. Tuu atu se taimi i le autalavou e faasoa ai o latou lagona e uiga i le Faaola, o le e mafai ai ona tatou salamo ma faamagaloina.

Faatino i le Faatuatua

Ia uunaia tagata o le vasega po o le korama e manatunatu ma tusi le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Enosa 1:1-8; Mosaea 4:1-3; Alema 24:7-10; 36:17-21 (O lagona o tagata ina ua faamagaloina)

• Isaia 1:18; Mosaea 26:30; Moronae 6:8; Mataupu Faavae ma Feagaiga 58:42–43; 64:10 (Ua folafola mai le Alii e faamagalo i tatou)

• Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67-69

• Craig A. Cardon, “E Finagalo le Faaola e Faamagalo Atu,” Liahona, Me 2013, 15–18

Aoao Atu i le Ala a le Faaola

Ua aoaoina e le Faaola i tatou e faaaoga tusitusiga paia e saili ai tali i a tatou lava fesili. E mafai faapefea ona e fesoasoani ia i latou o loo e aoaoina ia liliu atu i tusitusiga paia ma upu a perofeta ao latou sailia tali?