22 Me

E Mafai Faapefea ona Faaali Atu Lo’u Lotofaafetai i le Atua?

Teuteronome 6–8; 15; 18; 29–30; 34

Fefautuaai Faatasi

E taitaiina e se uso o le korama po o le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o fesili a oe lava ia (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Tuufaatasia o aiga mo le faavavau. O a manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O loo leoleo ma faamanuia i tatou e le aunoa e le Atua. Ae faatasi ai ma mea faalavefau ma tofotofoga o loo tatou feagai, e faigofie ai lava ona galo o Ia. Na tupu lenei mea i le fanauga a Isaraelu i le tele o taimi, e aofia ai taimi faigata na latou feoai ai i le vao. Ae na taitaiina ma le alofa e le Atua i latou i le nuu folafolaina—o se nofoaga e sili atu ona mafanafana ma le tele o tofotofoga, lea atonu e faaosoosoina ai i latou e toe faagalo foi ia te Ia. O faatonuga a le Alii i le Teuteronome 6 sa faia e fesoasoani ai i tagata Isaraelu ina ia manatua pea o Ia ma Ana upu (tagai fuaiupu 6–9).

E mafai faapefea ona e tuu le Alii ma Ana upu i lou loto—“nei galo ia te oe o Ieova? (Teuteronome 6:12). E faapefea e le manatuaina o le Alii ona fesoasoani ia i tatou ia lagona le faafetai i tulaga uma i o tatou olaga? A o e sauni e aoao atu, mafaufau e iloilo le Teuteronome 12:6-9, 12 ma le Luka 17:11-19. E mafai foi ona e suesue i le savali a Peresitene Dieter F. Uchtdorf “Ia Lotofaafetai i Soo Se Tulaga” (Liahona, Me 2014, 70-77).

O le manatuaina o le Alii e mafai ona fesoasoani ia tatou lagona ai le lotofaafetai i tulaga uma o le olaga.

Aoao Faatasi

Ina ia amata se talanoaga e uiga i le manatuaina o le Alii, e mafai ona e valaaulia le autalavou e faasoa mai ni aafiaga i se taimi na galo ai ia i latou se mea taua. O a ni taunuuga na i ai? O le a le mea e tupu pe a galo ia i tatou mea silisili na faia e le Alii mo i tatou? Valaaulia lau vasega po o le korama e iloilo le Teuteronome 6:4–9, 20–25. O a mea o aoao mai e nei fuaiupu e uiga i le manatua o le agalelei o le Atua i o tatou olaga? Filifili se tasi po o le sili atu o gaoioiga nei e fesoasoani ai ia i latou o loo e aoaoina ia iloa auala e lagona atili ai le lotofaafetai mo le agalelei o le Atua ma faaali atu ai lo latou agaga faafetai ia te Ia.

• O le faitauina faatasi o le Luka 17:11-19 e mafai ona fesoasoani ai i le autalavou ia mafaufau e uiga i le pogai e taua ai mo i tatou ona faaali atu le agaga faafetai i le Atua. Mafaufau e fesili atu i fesili e fesoasoani ia i latou e faatatau ai lenei tala i o latou olaga. Mo se faataitaiga, o a nisi o mafuaaga talafeagai na afua ai ona le faafetai atu lepela e toaiva o le toasefulu i le Faaola? Aisea tatou te le faafetai ai i le Atua i nisi taimi? Fai atu ia i latou o loo e aoaoina e mafaufau e uiga i taimi na latou lotofaafetai ai, e tusa lava pe na faigata. O a ni aafiaga ua tatou maua ona o le faaali atu o le lotofaafetai? Aisea e taua ai le faailoa atu o le lotofaafetai i le Atua? (Tagai i mau faasino i “Punaoa Lagolago” mo ni tali.) O le a se mea e mafai ona tatou faia e faaali atu ai lo tatou lotofaafetai i le Atua?

• E tele pese o viiga ma le faafetai, e pei o “Ua Sili Oe” ma le “Faitau Ou Manuia” (Viiga, nu. 46, 151). E mafai ona e fai atu i le autalavou e saili upu o viiga nei mo ni mea latou te lagona ai le lotofaafetai. Valaaulia i latou e faasoa mai mea na latou maua ma faamatala le pogai latou te lotofaafetai ai mo nei mea. E mafai ona outou usua faatasi nisi o nei viiga.

• E fesoasoani le savali a Peresitene Dieter F. Uchtdorf, “Ia Lotofaafetai i Soo Se Tulaga,” tatou te malamalama ai i auala e faateleina ai lo tatou lotofaafetai. O se tasi auala e fesoasoani ai i le autalavou e aoao mai lenei savali o le vaevae lea o i latou i ni vaega laiti ma tuu atu i vaega taitasi se tasi o vaega o le savali. Fai atu ia i latou e faasoa mai ni fasifuaitau po o fuaiupu ua latou lagona e aotele ai mea na aoao mai e Peresitene Uchtdorf. Valaaulia i latou e faasoa mai se mea na latou aoaoina e uiga i le lotofaafetai. E mafai foi ona latou matamata i le vitio “President Russell M. Nelson on the Healing Power of Gratitude” (ChurchofJesusChrist.org). O le a se mea e mafai ona tatou faia e mafai ai ona tatou “lotofaafetai i soo se tulaga,” e tusa lava po o a na tulaga? O a ni faataitaiga ua tatou vaaia o ni tagata lotofaafetai e ui i o latou tulaga faigata?

Faatino i le Faatuatua

Ia uunaia tagata o le vasega po o le korama e manatunatu ma tusi le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou maua.

Punaoa Lagolago

• Mosaea 2:19–24 (E tatau ona tatou vivii ma faafetai atu i le Atua)

• Alema 34:38; 37:37; Mataupu Faavae ma Feagaiga 46:32; 59:7, 15–21 (E ao ona tatou avatu le faafetai i mea uma)

• Salamo 107:8-9; Filipi 4:6-7; Mataupu Faavae ma Feagaiga 78:19 (O faamanuiaga o le lotofaafetai)

• Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41–44

• Lotofaafetai,” i le Mo le Malosi o le Autalavou (tamaitusi, 2011), 18

Aoao Atu i le Ala a le Faaola

Na silafia e le Faaola Ona soo ma tagata e mafai ona avea ai i latou. O lenei malamalama sa aafia ai le auala na Ia aoao ai i latou. E mafai faapefea ona e aoao e uiga i mea e fiafia ai, manaoga, ma luitau o i latou o loo e aoaoina ina ia mafai ona e aoaoina lelei i latou?